ປີ 2011 ຖືກຖືວ່າ ແມ່ນປີທີ່ບັນດາກຸ່ມເສດຖະກິດ, ວິສາຫະກິດຫວຽດນາມປະສົບກັບຄວາມຫຍຸ້ງຍາກຫຼາຍຢ່າງ. ຫຼາຍວິສາຫະກິດໄດ້ມີຄວາມມານະພະຍາຍາມ ເພື່ອສາມາດຄົງຕົວໄດ້ໃນໄລຍະເວລາອັນທຸກຍາກນີ້. ປີ 2012, ພື້ນຖານເສດຖະກິດໂລກເວົ້າລວມ ແລະຫວຽດນາມເວົ້າສະເພາະ ຍັງຄົງຢືນຢູ່ຕໍ່ໜ້າການທ້າທາຍຫຼາຍຢ່າງ. ບັນດາວິສາຫະກິດຫວຽດນາມໄດ້ກຳນົດວ່າ ຕ້ອງມີຄວາມພະຍາຍາມຫຼາຍກ່ວາອີກ ແລະປາດຖະໜາ ຈະໄດ້ຮັບຄວາມສະດວກຫຼາຍຢ່າງ ຈາກນະໂຍບາຍບໍລິຫານຂອງລັດຖະບານໃນປີໃໝ່ ຊື່ງຄາດຄະເນວ່າ ຍັງຄົງຈະປະສົບກັບຄວາມຫຍຸ້ງຍາກຢ່າງຫຼວງຫຼາຍ.
ການໂອ້ລົມສົນທະນາກ່ຽວກັບການປະຕິບັດມະຕິເລກທີ 11 ຂອງລັດຖະບານຫວຽດນາມຢູ່ນະຄອນໂຮ່ຈິມິນ
ພາບ: Http//:mpi.gov.vn
ໃນທ້າຍປີ 2011, ຄະນະເລຂາເວທີປາໄສວິສາຫະກິດຫວຽດນາມ (VBF) ໄດ້ດຳເນີນການສຳຫຼວດ ເອົາຄຳເຫັນຈາກວິສາຫະກິດກ່ຽວກັບເລື່ອງ “ລັດຖະບານຄວນຍຶດໝັ້ນການປະຕິບັດບັນດາມາດຕະການຮັດກຸ່ມເງິນຕາ ຕາມເໜືອໃນຈິດໃຈມະຕິເລກທີ 11 ຂອງລັດຖະບານ ຈົນເຖິງເວລາເສດຖະກິດມະຫາພາກເປັນປົກກະຕິໄດ້ຫຼືບໍ່”. ເບີ່ງລວມແລ້ວ, ວິສາຫະກິດສ່ວນຫຼາຍ ຊື່ງແມ່ນເປົ້າໝາຍຖືກຜົນສະທ້ອນໂດຍກົງຈາກມະຕິເລກທີ 11 ລ້ວນແຕ່ເຫັນດີເຫັນພ້ອມ ກັບທັດສະນະຂອງລັດຖະບານ ກ່ຽວກັບການໃຫ້ບຸລິມະສິດອັນດັບ 1, ຈຸດໝາຍຈຳຄັນທີ່ສຸດໃນປະຈຸບັນຂອງຫວຽດນາມ ແມ່ນຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ ແລະກ້າວໄປເຖິງການສ້າງໂຄງປະກອບເສດຖະກິດຄືນໃໝ່, ປ່ຽນໃໝ່ຮູບແບບການຈະເລີນເຕີບໂຕ. ວິສາຫະກິດສ່ວນຫຼາຍໄດ້ມີຄວາມປະເອີບໃຈກ່ຽວກັບແງ່ຫວັງຂອງພື້ນຖານເສດຖະກິດຫວຽດນາມໃນໄລຍະຍາວ. ທ່ານຟ້າມຮົ່ງຫວຽດ, ຜູ້ອຳນວຍການບໍລິສັດສົ່ງອອກແຫ່ງ 1 ໃນຂະແໜງເກີບໜັງຫວຽດນາມຖືວ່າ, ໃນປີ 2012, ວິສາຫະກິດປາດຖະໜາວ່າ ຈະມີການດັດປັບນະໂຍບາຍເງິນຕາຢ່າງມີໄຫວພິບຕໍ່ກັບບັນດາວິສາຫະກິດ:
“ປະຈຸບັນ, ວິສາຫະກິດຂາເຂົ້າຂາອອກຕ້ອງກູ້ຢືມທຶນດ້ວຍອັດຕາດອກເບັ້ຍແຕ່ 7-7,5%, ທີ່ຈິງແລ້ວ, ຄວນນຳໃຊ້ອັດຕາດອກເບັ້ຍກູ້ຢືມເງິນຕ່າງປະເທດໃນລະດັບຕ່ຳກ່ວາ 6%. ບັນດາໃບສັ່ງຊື້ສິນຄ້າໃນຕົ້ນປີ 2012 ຍັງປະສົບກັບຄວາມຫຍຸ້ງຍາກຫຼາຍຢ່າງ. ພິເສດ ໃນຕົ້ນປີ 2012 ບັນດາວິສາຫິກິດອີຢູ ຍັງບໍ່ທັນກຳນົດບັນດາໃບສັ່ງຊື້ສິນຄ້າໄດ້. ປະຈຸບັນ, ພວກຂ້າພະເຈົ້າໄດ້ສົ່ງອອກໄປຕະຫຼາດອາຟຼິກກາ, ອາຣັບເປັນຕົ້ນ. ຕໍ່ໜ້າບັນດາຄວາມຫຍຸ້ງຍາກເຊັ່ນນັ້ນ, ພວກຂ້າພະເຈົ້າມີແຜນການ ແລະ ຄິດໄລ່ເຖິງການເປີດກ້ວາງຕະຫຼາດ”
ບັນດາວິສາຫະກິດຜະລິດວັດສະດຸກໍ່ສ້າງໃນບໍລິເວນແຂວງກວາງນິງ
ພວມມານະພະຍາຍາມຜ່ານຜ່າຄວາມຫຍຸ້ງຍາກ
ພາບ: Http//:quangninh.gov.vn ປີ 2012, ໃນສະພາບການທີ່ລັດຖະບານຕ້ອງສືບຕໍ່ຈຸດໝາຍ ຄວບ ຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຍັງຕ້ອງຮັດກຸ່ມນະໂຍບາຍເງິນຕາ, ບໍ່ສາມາດຫລຸດອັດຕາດອກເບັ້ຍກູ້ຢືມໄດ້ໃນທັນທີ. ບັນດາວິສາຫະກິດຂະໜາດກາງ ແລະນ້ອຍ ຍັງມີຄວາມວິຕົກກັງວົນຫຼາຍ, ບັນດາວິສາຫະກິດຂະໜາດນ້ອຍ ແລະນ້ອຍທີ່ສຸດ ສືບຕໍ່ປະສົບກັບຄວາມຫຍຸ້ງຍາກໃນດ້ານທຶນຮອນ. ຕາມທ່ານໂຕຮ່ວາຍນາມ, ຮອງປະທານ ທັງເປັນເລຂາທິການສະຫະສະມາຄົມວິສາຫະກິດຂະໜາດກາງ ແລະນ້ອຍຫວຽດນາມແລ້ວ, ປີ 2011, ອີງໃສ່ມະຕິເລກທີ 11 ຂອງລັດຖະບານ, ສະຫະສະມາຄົມໄດ້ສ້າງຕັ້ງກອງທຶນສິນເຊື່ອໜູນຊ່ວຍວິສາຫະກິດຂະໜາດນ້ອຍ ເພື່ອແນໃສ່ໜູນຊ່ວຍສິ່ງທີ່ວິສາຫະກິດຕ້ອງການຄື: ສະຖານທີ່ທຳການຜະລິດ, ບຳລຸງສ້າງແຫຼ່ງຊັບພະຍາກອຍມະນຸດ, ທຶນສິນເຊື່ອ, ປ່ຽນໃໝ່ເຕັກໂນໂລຊີ, ທ່ານກ່າວວ່າ:
“ທັດສະນະຂອງສະຫະສະມາຄົມແມ່ນສຳລັບວິສາຫະກິດຂະໜາດກາງ ແລະນ້ອຍ ຕ້ອງມີການກຳນົດໃໝ່ ເພື່ອເຮັດແນວໃດຫລຸດຜ່ອນລະບຽບການຕ່າງໆ ຊື່ງແມ່ນຮົ້ວກີດຂວາງສຳລັບວິສາຫະກິດ. ຄຽງຂ້າງນັ້ນ ຈະເອົາໃຈໃສ່ເຖິງວິທີການລະອຽດຂອງວິສາຫະກິດ, ເວລານັ້ນ ນະໂຍບາຍໜູນຊ່ວຍດ້ານການເງິນຈະມີປະໂຫຍດຕໍ່ວິສາຫະກິດ. ປະຈຸບັນ, ກະຊວງແຜນການ ແລະການລົງທຶນຫວຽດນາມ, ທະນາຄານແຫ່ງລັດພວມຄົ້ນຄ້ວານະໂຍບາຍນີ້. ກະຊວງແຜນການ ແລະການລົງທຶນ ໄດ້ຍື່ນສະເໜີຕໍ່ລັດຖະບານ ແລະຂໍຄຳເຫັນຈາກບັນດາກະຊວງ ຂະແໜງການ, ສູ້ຊົນເຮດແນວໃດ ຈະປະຕິບັດນະໂຍບາຍໜູນຊ່ວຍວິສາຫະກິດໄດ້ໃນໄຕມາດທີ 1 ປີ 2012”
ການເຄື່ອນໄຫວຕົວຈິງຂອງບັນດາວິສາຫະກິດໃຫ້ເຫັນວ່າ ນະໂຍບາຍພາສີອາກອນ ແລະສິນເຊື່ອແມ່ນ 2 ນະໂຍບາຍກໍ່ຜົນສະທ້ອນຫຼາຍຕໍ່ວິສາຫະກິດ. ສາດສະດາຈານຫງວຽນມ້າຍ, ອະດີດຮອງປະທານຄະນະກຳມະການແຫ່ງລັດ ກ່ຽວກັບການຮ່ວມມືລົງທຶນຖືວ່າ: ນະໂຍບາຍສິນເຊື່ອຄວນມີໄຫວພິບ ແລະເໝາະສົມກັບສະພາບການຫຼາຍກ່ວາອີກ ເພື່ອໃຫ້ວິສາຫະກິດສາມາດສຳພັດກັບແຫຼ່ງທຶນກູ້ຢືມໄດ້. ກ່ຽວກັບນະໂຍບາຍພາສີອາກອນ, ຫວ່າງແລ້ວນີ້, ຫ້ອງການອຸດສາຫະກຳ ແລະການຄ້າຫວຽດນາມ (VCCI) ໄດ້ສະເໜີປັບປຸງກົດໝາຍ 16 ສະບັບ ນັບແຕ່ອາກອນມູນຄ່າເພີ່ມ ຕະຫຼອດຮອດອາກອນລາຍຮັບວິສາຫະກິດ, ອາກອນຈຳໜ່າຍພິເສດ ຕາມທິດຊ່ວຍວິສາຫະກິດບັນເທົາຄວາມຫຍຸ້ງຍາກ ແລະມີການພັດທະນາໄດ້:
“ຂໍ້ສະເໜີອັນຈະແຈ້ງຂອງ VCCI ແມ່ນສະເໜີປັບປຸງກົດໝາຍວ່າດ້ວຍການລົງທຶນ, ກົດໝາຍວ່າດ້ວຍວິສາຫະກິດ, ກົດໝາຍພາສີອາກອນ, ກົດໝາຍການປະມູນ, ທີ່ດິນ. ບັນດາການປັບປຸງນີ້ ຖືກປະຕິບັດໂດຍຜ່ານບັນດາຄຳເຫັນ ແລະຄວາມວິຕົກກັງວົນຂອງວິສາຫະກິດ. ຈາກນັ້ນ ມີບັນດານະໂຍບາຍເໝາະສົມກັບບັນດາວິສາຫະກິດ ເພື່ອສາມາດຮັບມືກັບສະພາບເສດຖະກິດຂອງປີ 2012”
ໃນປີ 2012, ຍັງມີກາລະໂອກາດຫຼາຍຢ່າງໃຫ້ແກ່ບັນດາວິສາຫະກິດ, ຂະນະທີ່ລັດຖະບານໄດ້ວາງອອກຫຼາຍມາດຕະການ ເພື່ອແນໃສ່ສະກັດກັ້ນ ແລະຫລຸດຜ່ອນໄພເງິນເຟີ້. ສິ່ງດັ່ງກ່າວແມ່ນເງື່ອນໄຂເພື່ອຫລຸດ ອັດຕາດອກເບັ້ຍກູ້ຢືມລົງ. ຄຽງຂ້າງນັ້ນ, ລັດຖະບານກໍມີແຜນນະໂຍບາຍຫລຸດຜ່ອນ, ຕໍ່ກຳນົດເວລາເສຍອາກອນລາຍຮັບໃຫ້ແກ່ວິສາຫະກິດ, ປະຕິຮູບລະບຽບການດ້ານບໍລິຫານ….ໜູນຊ່ວຍວິສາຫະກິດຫລຸດພົ້ນອອກຈາກຄວາມຫຍຸ້ງຍາກໃນປະຈຸບັນ, ຟື້ນຟູການຜະລິດ, ດຳເນີນທຸລະກິດ. ບັນດາຜູ້ຊ່ຽວຊານດ້ານເສດຖະກິດຖືວ່າ: ເພື່ອໜູນຊ່ວຍບັນດາກຸ່ມເສດ ຖະກິດ, ວິສາຫະກິດ ມີຄວາມສາມາດພັດທະນາໃນການເຄື່ອນໄຫວຜະລິດ ດຳເນີນທຸລະກິດຂອງຕົນນັ້ນ, ລັດຖະບານຄວນມີບັນດາບາດກ້າວບຸກທະລຸ ແລະແຂງແຮງກ່ວາອີກ, ຍ້ອນວ່າ ຖ້າຫາກ ແຫຼ່ງກຳລັງນີ້ເຂັ້ມແຂງ, ເສດຖະກິດຂອງປະເທດຊາດຈຶ່ງຈະມີການພັດທະນາ ແບບຍື່ນຍົງໄດ້.
ທູຮັ່ງ