(vovworld)-ມະຫາສາມັກຄີແມ່ນມູນເຊື້ອອັນລ້ຳຄ່າຂອງຊາດຫວຽດນາມຜ່ານຫລາຍລຸ້ນຄົນ. ນ້ຳໃຈຮັກຊາດ, ຮັກແພງມະນຸດ, ອະນຸໂລມໄດ້ຮັບການເສີມຂະຫຍາຍໃນທຸກໄລຍະປະຫວັດສາດ, ປະກອບສ່ວນສ້າງເປັນຄວາມສາມັກຄີ, ສະຫນິດຕິດພັນລະຫວ່າງບັນດາສະມາຊິກໃນວົງຄະນາຍາດບັນດາເຜົ່າຫວຽດນາມ. ກ່ອນທີ່ບຸນປີໃຫມ່ປະຈຳຊາດປີມະແມ, ມີການເຄື່ອນໄຫວຫລາຍຢ່າງຖືກຈັດຂຶ້ນເພື່ອປະກອບສ່ວນເພີ່ມທະວີວັດທະນະທຳວົງຄະນາຍາດ ແລະ ມູນເຊື້ອສາມັກຄີ.
ທ່ານປະທານປະເທດເຈືອງເຕີນຊາງ ຖ່າຍຮູບກັບຜູ້ຕາງຫນ້າ
ບັນດາເຜົ່າຢູ່ຫວຽດນາມ
ພາບ:vov
|
ຍັງພຽງອີກສອງມື້, ທຸກໆຄອບຄົວ, ຊາວຫວຽດນາມ ທຸກຄົນ ຈະເຕົ້າໂຮມກັນເພື່ອຕ້ອນຮັບບຸນປີໃຫມ່ປະຈຳຊາດ(ຫລືບຸນເຕັດ). ວັດທະນະທຳຂອງອາຊີຕາເວັນອອກແມ່ນເຄົາລົບຄວາມສາມັກຄີ, ປອງດອງກັນ. ຢູ່ໃນຄອບຄົວ, ວົງຕະກຸນ, ຄວາມສາມັກຄີສ້າງເປັນຮີດຄອງປະເພນີ. ຕາມຄວາມໝາຍກວ້າງ ມະຫາສາມັກຄີໄດ້ນຳມາເຊິ່ງຄວາມວັດທະນາຖາວອນໃຫ້ແກ່ທັງຊາດ. ສະນັ້ນ ຕາມທຳນຽມແລ້ວ, ບຸນເຕັດແມ່ນໂອກາດເພື່ອໃຫ້ຊາວຫວຽດນາມ ເພີ່ມທະວີຄວາມສາມັກຄີ.
ເພີ່ມທະວີມູນເຊື້ອມະຫາສາມັກຄີ
ໂອກາດລະດູບານໃຫມ່ ແລະບຸນເຕັດວຽນມາ, ການນຳພັກ, ລັດ, ແນວໂຮມປະເທດຊາດ ແລະ ອຳນາດການປົກຄອງທຸກຂັ້ນ ໄດ້ໄປຢື້ຢາມຖາມຂ່າວ, ອວຍພອນບຸນເຕັດປະຊາຊົນທຸກຊັ້ນວັນນະໃນທົ່ວປະເທດ. ຂອງຂວັນບຸນເຕັດຂອງທ່ານປະທານປະເທດ, ຂອງອຳນາດການປົກຄອງທຸກຂັ້ນ ແລະ ອົງການຈັດຕັ້ງມະຫາຊົນ ລ້ວນແຕ່ໄດ້ມອບໃຫ້ບັນດາຄອບຄົວໃນເປົ້າໝາຍນະໂຍບາຍ, ຜູ້ມີຄຸນງາມຄວາມດີ, ຜູ້ທຸກຍາກ, ຊາວຊົນເຜົ່າສ່ວນຫນ້ອຍໃນທົ່ວປະເທດ. ກ່ອນທີ່ບຸນເຕັດວຽນມາ, ນາຍົກລັດຖະມົນຕີ ໄດ້ຕົກລົງສະຫນອງເຂົ້າສານໃຫ້ປະຊາຊົນທີ່ທຸກຍາກເພື່ອໃຫ້ເຂົາເຈົ້າໄດ້ຕ້ອນຮັບບຸນເຕັດຢ່າງອົບອຸ່ນ.
ບໍ່ພຽງແຕ່ເບີ່ງແຍງດູແລທາງດ້ານວັດຖຸໃຫ້ປະຊາຊົນໃນໂອກາດບຸນເຕັດເທົ່ານັ້ນ ຫາກຍັງເອົາໃຈໃສ່ເຖິງດ້ານຈິດໃຈອີກດ້ວຍ. ຕາມນັ້ນແລ້ວ, ຢູ່ ຮ່າໂນ້ຍ ໄດ້ດຳເນີນວັນບຸນ “ສີສັນລະດູບານໃຫມ່ຢູ່ທຸກແຖບຖິ່ນຂອງປະເທດຊາດ” ໂດຍມີການເຂົ້າຮ່ວມຂອງເຈົ້າກົກເຈົ້າເຫລົ່າ, ປັນຍາຊົນ, ນັກຮຽນຮູ້, ນັກສິລະປະການຂອງບັນດາວົງຄະນາຍາດຊົນເຜົ່າສ່ວນຫນ້ອຍ, ຊາວຫວຽດນາມ ອາໄສຢູ່ຕ່າງປະເທດ. ວັນບຸນໄດ້ປະກອບສ່ວນຮັກສາ, ເສີມຂະຫຍາຍຮີດຄອງປະເພນີອັນດີງາມຂອງບັນດາເຜົ່າຫວຽດນາມ ໃນໂອກາດບຸນປີໃຫມ່ປະຈຳຊາດ ທັງແມ່ນໂອກາດພົບປະສັງສັນ, ພົວພັນແລກປ່ຽນ, ສາມັກຄີກັນ ແລະ ເຊີດຊູວັດທະນະທຳທີ່ເປັນມູນເຊື້ອ, ຜ່ານນັ້ນ ປະກອບສ່ວນສ້າງສາ ແລະ ປັບປຸງກຸ່ມກ້ອນມະຫາສາມັກຄີທົ່ວປວງຊົນທັງຊາດ.
ນັ້ນແມ່ນສຳລັບຊາວຫວຽດນາມຢູ່ພາຍໃນປະເທດ, ສຳລັບຊາວຫວຽດນາມ ອາໄສຢູ່ຕ່າງປະເທດກັບຄືນເມືອປະເທດເພື່ອຕ້ອນຮັບບຸນເຕັດໃນໂອກາດນີ້, ກະຊວງການຕ່າງປະເທດ ແລະ ຄະນະກຳມະການປະຊາຊົນນະຄອນ ໂຮ່ຈິມີນ ໄດ້ຈັດຕັ້ງລາຍການ “ລະດູບານໃຫມ່ບ້ານເກີດເມືອງນອນ” ຢູ່ ນະຄອນ ໂຮ່ຈິມີນ ໂດຍມີການເຂົ້າຮ່ວມຂອງຊາວຫວຽດນາມອາໄສຢູ່ຕ່າງປະເທດ ປະມານ 1.500 ຄົນ. ຕໍ່ຈາກນັ້ນ ຊາວຫວຽດນາມ ອາໄສຢູ່ຕ່າງປະເທດ ຈະໄປຢ້ຽມຢາມທັດສະນີຍະພາບ, ພົບປະກັບການນຳພັກ, ລັດ, ການນຳສູນກາງແນວໂຮມປະເທດຊາດຫວຽດນາມ ຢູ່ ຮ່າໂນ້ຍ. ສິ່ງທີ່ເປັນຫນ້າສົນໃຈ ນັ້ນແມ່ນໃນໂອກາດບຸນເຕັດ, ຄະນະກຳມະການກ່ຽວກັບຊາວຫວຽດນາມ ອາໄສຢູ່ຕ່າງປະເທດ ແລະບັນດາທ້ອງຖິ່ນ ມີຊາວຫວຽດນາມອາໄສຢູ່ຕ່າງປະເທດກັບຄືນເມືອຕ້ອນຮັບບຸນເຕັດເປັນຈຳນວນຫລາຍ ກໍໄດ້ຈັດຕັ້ງພິທີຕ້ອນຮັບ, ພົບປະສັງສັນ ເພື່ອປັບປຸງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເສີມຂະຫຍາຍແຫລ່ງກຳລັງຊາວຫວຽດນາມ ອາໄສຢູ່ຕ່າງປະເທດ ເຂົ້າຮ່ວມການສ້າງສາ ແລະ ປົກປັກຮັກສາປະເທດຊາດ.
ເສີມຂະຫຍາຍບົດບາດຂອງແນວໂຮມປະເທດຊາດ
ການເຄື່ອນໄຫວຫລາຍຢ່າງ ເພື່ອແນໃສ່ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດກ່ອນທີ່ລະດູບານໃຫມ່ວຽນມາ ແມ່ນການສືບທອດບັນດາຂະບວນການແຂ່ງຂັນຮັກຊາດ, ປັບປຸງກຸ່ມກ້ອນມະຫາສາມັກຄີທົ່ວປວງຊົນທັງຊາດ ຊື່ງລະບົບແນວໂຮມປະເທດຊາດທຸກຂັ້ນ ແລະ ບັນດາອົງການສະມາຊິກໄດ້ຜັນຂະຫຍາຍໃນປີ 2014 ແລະ ໃນຫລາຍປີຜ່ານມາ. ປະຊາຊົນທຸກຊັ້ນວັນນະໄດ້ເຂົ້າຮ່ວມບັນດາການເຄື່ອນໄຫວນີ້ ດ້ວຍຈິດໃຈທີ່ມີຫົວຄິດປະດິດສ້າງ, ປະກອບສ່ວນຢ່າງມີປະສິດທິຜົນເຂົ້າໃນກິດຈະການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ກໍ່ສ້າງຊົນນະບົດໃຫມ່, ຮັບປະກັນຊີວິດສັງຄົມ. ເຖິງຢ່າງໃດກໍຕາມ, ໃນສະພາບການຫວຽດນາມ ເພີ່ມທະວີການເຊື່ອມໂຍງເຂົ້າກັບສາກົນປະຈຸບັນ, ການເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີ ເພື່ອປະຕິບັດຫນ້າທີ່ວາງອອກສຳລັບແນວໂຮມປະເທດຊາດຫວຽດນາມ ນັ້ນແມ່ນສ້າງສາ ແລະ ພັດທະນາປະເທດຊາດ. ທ່ານ ເຈີນເຫົ້າ, ອະດີດບັນນາທິການໃຫຍ່ ວາລະສານ ແນວໂຮມປະເທດຊາດ ຖືວ່າ:
“ພວກຂ້າພະເຈົ້າຄິດວ່າ ບັນດາຫນ້າວຽກຕ້ອງເຮັດນັ້ນແມ່ນແນວໂຮມປະເທດຊາດ ເພີ່ມທະວີການເຕົ້າໂຮມ, ສ້າງຄວາມສາມັກຄີໃນທົ່ວປວງຊົນທັງຊາດໃນທຸກຂົງເຂດ. ຄວນປ່ຽນໃຫ່ມຄວາມຮັບຮູ້ກ່ຽວກັບທີ່ຕັ້ງ,ບົດບາດ, ຄຸນລັກສະນະຂອງແນວໂຮມປະເທດຊາດຫວຽດນາມ ບໍ່ພຽງແຕ່ແມ່ນອົງການໂຄສະນາ, ຮຽກຮ້ອງ, ປຸກລະດົມຂະບວນການເທົ່ານັ້ນ ຫາກແນວໂຮມປະເທດຊາດ ຍັງມີບົດບາດເຂົ້າຮ່ວມການເຄື່ອນໄຫວຕິດຕາມກວດກາສັງຄົມ ເພື່ອຈຸດໝາຍລວມຂອງຊາດ.”
ທີ່ກອງປະຊຸມສະໄຫມສາມັນຂອງສະພາແຫ່ງຊາດຫວຽດນາມ ຊຸດທີ 13 ດຳເນີນໄປໃນທ້າຍປີ 2014 ໄດ້ກຳນົດຈຸດໝາຍສັງລວມຂອງປີ 2015 ແມ່ນ: ເພີ່ມທະວີການຮັກສາເສດຖະກິດມະຫາພາກເປັນປົກກະຕິ, ສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ການເຄື່ອນໄຫວຜະລິດ, ດຳເນີນທຸລະກິດ. ປະຕິບັດບັນດາບຸກທະລຸຍຸດທະສາດ, ສ້າງໂຄງປະກອບພື້ນຖານເສດຖະກິດຄືນໃຫມ່ຕິດພັນກັບການຫັນປ່ຽນຮູບແບບການເຕີບໂຕ, ຍົກສູງປະສິດທິຜົນ ແລະ ກຳລັງຄວາມສາມາດແກ້ງແຍ້ງ, ສູ້ຊົນບັນລຸລະດັບເຕີບໂຕສູງກວ່າປີ 2014. ນອກນັ້ນ ພັດທະນາບັນດາຂົງເຂດສັງຄົມ, ວັດທະນະທຳ, ການສຶກສາ, ວິທະຍາສາດ, ເຕັກໂນໂລຊີ, ຮັກສາສິ່ງແວດລ້ອມ, ປັບປຸງຊີວິດການເປັນຢູ່ຂອງປະຊາຊົນ,ຍູ້ແຮງການປະຕິຮູບດ້ານບໍລິຫານ, ປະຕິຮູບຕຸລາການ, ປ້ອງກັນ, ຕ້ານການສໍ້ລາດບັງຫລວງ, ປະຕິບັດການປະຢັດ, ຕ້ານການຟຸມເຟືອຍ, ເພີ່ມທະວີການປ້ອງກັນຊາດປ້ອງກັນຄວາມສະຫງົບ, ປົກປັກຮັກສາອະທິປະໄຕແຫ່ງຊາດຢ່າງໝັ້ນຄົງ, ຮັບປະກັນສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍຄວາມປອດໄພທາງສັງຄົມ. ເປັນອັນວ່າ ເນື້ອໃນເຕົ້າໂຮມຄວາມສາມັກຄີທົ່ວປວງຊົນທັງຊາດໃນສະພາບການໃຫມ່ຈຶ່ງເປັນຫລາຍຮູບຫລາຍແບບ, ອຸດົມສົມບູນ, ນັ້ນແມ່ນຄວາມຮຽກຮ້ອງຕ້ອງການບໍ່ພຽງແຕ່ສຳລັບແນວໂຮມປະເທດຊາດຫວຽດນາມ ເທົ່ານັ້ນ ຫາກນັບທັງລະບົບການເມືອງທຸກຂັ້ນອີກດ້ວຍ. ທ່ານ ຟ້າມເທຢວຽດ, ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ:
“ຍິ່ງກວ່າເວລາໃດໝົດ, ປະຈຸບັນ ຢາກເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດໄດ້ ຮຽກຮ້ອງໃຫ້ພັກຕ້ອງປະຕິບັດບັນດາແນວທາງ, ມະຕິທີ່ວາງອອກໃຫ້ໄດ້. ຖ້າປະຕິບັດສິ່ງນີ້ໄດ້ດີ ພວກເຮົາສືບຕໍ່ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີເພື່ອປະຕິບັດພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ ແລະ ຍາດແຍ່ງອາລົມຈິດຂອງປະຊາຄົມໂລກໃນການພັດທະນາເສດຖະກິດກັບຫວຽດນາມ.”
ລະດູບານໃຫມ່ແມ່ນລະດູແຕກດອກອອກຫນໍ່ ຄືດັ່ງເພີ່ມພະລັງຊີວິດຈາກນ້ຳໃຈມະຫາສາມັກຄີທົ່ວປວງຊົນທັງຊາດ ແລະ ກໍແມ່ນໂອກາດເພື່ອປັບປຸງ, ເພີ່ມທະວີກຳລັງແຮງຂອງມະຫາສາມັກຄີເພື່ອໃຫ້ທົ່ວປະເທດຕ້ອນຮັບບຸນປີໃຫມ່ປີມະແມຢ່າງເບີກບານມ່ວນຊື່ນ ແລະ ອົບອຸ່ນ.