ທີ່ກອງປະຊຸມສະໄໝສາມັນປະຈຳເດືອນ 6 ຂອງລັດຖະບານຫວຽດນາມຊຶ່ງຫາກໍອັດລົງເມື່ອຕອນບ່າຍວັນທີ 1/7, ທ່ານນາຍົກລັດຖະມົນຕີຫວຽດນາມຫງວຽນເຕີ້ນຢຸງໄດ້ຢືນຢັນຄືນຄວາມຕັດສິນໃຈຂອງລັດຖະບານຫວຽດນາມໃນການປະຕິບັດບັນດາຕົວເລກຄາດໝາຍກ່ຽວກັບເສດຖະກິດປີ 2014. ຕາມນັ້ນແລ້ວ, ລັດຖະບານຫວຽດນາມມານະພະຍາຍາມ, ສຸມກຳລັງຢ່າງສູງເພື່ອແກ້ໄຂຄວາມຫຍຸ້ງຍາກໃນຂົງເຂດຕ່າງໆ, ສູ້ຊົນບັນລຸຄາດໝາຍການເຕີບໂຕ GDP ໃນທ້າຍປີແມ່ນປະມານ 5,8%.
(ພາບປະກອບ)
|
6 ເດື່ອນຕົ້ນປີ, ຫວຽດນາມປະເຊີນໜ້າກັບບັນດາຄວາມຫຍຸ້ງຍາກລວມຂອງສະຖານະການໂລກ, ແລະ ພາຍໃນປະເທດ, ພິເສດແມ່ນເລື່ອງຈີນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍເຂົ້າເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ດັ່ງນັ້ນ, ຫວຽດນາມທັງຕ້ອງຮັບມືກັບບັນດາຄວາມຫຍຸ້ງຍາກ, ສິ່ງທ້າທາຍທີ່ມີຢູ່ແລ້ວຂອງພື້ນຖານເສດຖະກິດພາຍໃນປະເທດ, ທັງຕ້ອງປະເຊີນໜ້າກັບບັນດາຜົນກະທົບຈາກ ສະຖານະການໂລກ.
6 ເດືອນຕົ້ນປີ, ເສດຖະກິດພວມຄ່ອຍຟື້ນຟູທ່າເຕີບໂຕ.
ຕາມທ່ານລັດຖະມົນຕີກະຊວງແຜນການ ແລະ ລົງທຶນຫວຽດນາມ ບຸຍກວາງວິງແລ້ວ, GDP ໄລຍະ 6 ເດືອນຕົ້ນປີຂອງຫວຽດນາມ ຄາດວ່າເພີ່ມຂຶ້ນ 5,18%, ສູງກວ່າຫຼາຍເມື່ອທຽບໃສ່ໄລຍະດຽວກັນຂອງປີກາຍ (4,9%), ດ້ວຍລະດັບການເຕີບໂຕສູງຂອງທັງ 3 ຂົງເຂດ: ກະສີກຳ-ປ່າໄມ້ ແລະ ສິນໃນນ້ຳ.
ສັນຍານຕັ້ງໜ້າຂອງພື້ນຖານເສດຖະກິດຍັງໄດ້ຮັບການສັງເກດດ້ວຍເລື່ອງໄພເງິນເຟີ້ພາຍຫຼັງ 6 ເດື່ອນຕົ້ນປີແມ່ນບັນລຸລະດັບພຽງ 1,38%, ຊຶ່ງແມ່ນລະດັບຕ່ຳສຸດໃນຮອບ 13 ປີທີ່ຜ່ານມາ. ການສົ່ງອອກຮັກສາທ່າເຕີບໂຕສູງ, ສືບຕໍ່ບັນລຸມູນຄ່າການສົ່ງອອກເກີນດູນ (1,32 ຕື້ USD ). ການຜະລິດອຸດສາຫະກຳ, ເປັນຕົ້ນແມ່ນອຸດສາຫະກຳປຸງແຕ່ງ-ການຜະລິດ, ສືບຕໍ່ຟື້ນຕົວ. ດັດຊະນີການຜະລິດອຸດສາຫະກຳ(IIP) ໄລຍະ6 ເດື່ອນຕົ້ນປີໄດ້ຢັ້ງຢືນການເຕີບໂຕຢ່າງແຂງແຮງຂອງ ອຸດສາຫະກຳປຸງແຕ່ງ-ການຜະລິດ. ທີ່ການປະຊຸມຂ່າວພາຍຫຼັງອັດກອງປະຊຸມສະໄໝສາມັນປະຈຳເດືອນ 6 ຂອງລັດຖະບານເມື່ອຕອນບ່າຍວັນທີ 1/7, ທ່່ານລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ຫງວຽນວັນເນັນ ໃຫ້ຮູ້ວ່າ :
“ ໝາກຜົນນີ້ສະແດງໃຫ້ເຫັນວ່າ ໃນເງື່ອນໄຂທີ່ຫຍຸ້ງຍາກ, ພວກເຮົາໄດ້ໃຊ້ຫຼາຍມາດຕະການຄົບຊຸດ, ຊີ້ນຳການຈັດຕັ້ງປະຕິບັດພ້ອມກັບປະຊາຊົນ, ພ້ອມກັບວິສາຫະກິດ, ອົນໄດ້ນຳມາເຊິ່ງໝາກຜົນທີ່ໜ້າຊື່ນຊົມ. ບັນດາດັດຊະນີມະຫາພາກຂອງພວກເຮົາສືບຕໍ່ເປັນປົກກະຕິ, ນັບທັງເງີນຕາ ແລະ ດູນຊຳລະອ່ືນໆ. ມາຮອດຈຸດເວລານີ້, ສັງເກດລວມແລ້ວ, ເສດຖະກິດມະຫາພາກເປັນປົກກະຕິ, ດູນຊຳລະ, ຂາອອກຂາເຂົ້າ, ລາຍຮັບ-ລາຍຈາຍງົບປະມານ... ລື່ນກາຍຫຼາຍເມື່ອທຽບຈຸດໝາຍວາງອອກ. ຂົງເຂດກະສີກຳກໍເຕີບໂຕ, ມີດ້ານຕ່າງໆບັນລຸການເຕີບໂຕຢ່າງເຫັນໄດ້ຊັດ. ການບໍລິການກໍເຊັ່ນດຽວກັນ. ”
ປະຕິບັດພ້ອມກັນສຳລັບບັນດາມາດຕະການແກ້ໄຂເສດຖະກິດໄລຍະ 6 ເດືອນ ທ້າຍປີ
ທີ່ກອງປະຊຸມສະໄໝສາມັນປະຈຳເດືອນ 6 ຂອງລັດຖະບານ, ທ່ານນາຍົກ ລັດຖະມົນຕີຫວຽດນາມຫງວຽນເຕີ້ນຢຸງໃຫ້ຮູ້ວ່າ ໃນວິວັດການສ້າງໂຄງປະກອບພື້ນຖານເສດຖະກິດຄືນໃໝ່ນັ້ນ, ລັດຖະບານຫວຽດນາມພວມປະຕິບັດຫຼາຍມາດຕະການເປີດກ້ວາງຕະຫຼາດສົ່ງອອກ, ເປັນຕົ້ນແມ່ນຍູ້ໄວວິວັດທະນາການເຈລະຈາບັນດາສັນຍາການຄ້າເສລີ 2 ຝ່າຍ ແລະ ລະຫວ່າງຊາດ, ພ້ອມທັງຕັ້ງໜ້າສ້າງບັນດາກົນໄກນະໂຍບາຍທີ່ກ່ຽວຂ້ອງເຖິງການປະມູນ, ນຳເຂົ້າວັດຖຸດິບສົ້ນເຂົ້າໃຫ້ສົມບູນແບບເພື່ອບໍ່ຕ້ອງເພິ່ງພາອາໄສຕະຫຼາດໃດໆ. ເມື່ອເຕື້ອງເຖິງເນື້ອໃນນີ້ທີ່ກການປະຊຸມພາຍຫຼັງກອງປະຊຸມສະໄໝສາມັນປະຈຳເດືອນ 6 ຂອງລັດຖະບານ, ທ່ານຮອງລັດຖະມົນຕີກະຊວງອຸດສາຫະກຳ-ການຄ້າຫວຽດນາມ ໂດ້ທັ້ງຫາຍ ຢືນຢັນວ່າ :
“ລັດຖະບານ, ບັນດາກະຊວງ, ຂະແໜງການຕ່າງໆ, ໃນນັ້ນມີກະຊວງອຸດສາຫະກຳ-ການຄ້າ ໄດ້ຄ່ອຍຫັນບັນດາຕະຫຼາດເປັນຫຼາຍຮູບຫຼາຍແບບ ນັບທັງການສົ່ງອອກ ແລະ ນຳເຂົ້າ. ກະຊວງອຸດສາຫະກຳ-ການຄ້າຕ້ອງເປີດກ້ວາງຕະຫຼາດຜ່ານການເຈລະຈາ. ປະຈຸບັນ, ພວກເຮົາ ເຊັນສັນຍາ FTA ໄດ້ 8 ສະບັບກັບບັນດາປະເທດ ແລະ ພວມຕັ້ງໜ້າໃຫ້ສຳເລັດສັນຍາຂ້າມປາຊີຟິກ (TTP) ແລະ ສັນຍາກັບພັນທະພາບພາສີອາກອນ ລັດເຊຍ-ກາຊັກສະຖານ-ເບລາຣຸດ. ໃນມໍ່ມານີ້ຄືໃນອາທິດແລ້ວນີ້, ທ່ານລັດຖະມົນຕີກະຊວງອຸດສາຫະກຳ-ການຄ້າຫວຽດນາມ ວູ້ຮຸຍຮ່ວາງ ກໍໄດ້ນຳພາຄະນະນັກເຈລະຈາຫວຽດນາມໄປຍັງສະຫະພາບເອີລົບເພື່ອປະຕິບັດບັນດາຂອດສຸດທ້າຍເພື່ອແນໃສ່ສຳເລັດສັນຍາລະຫວ່າງຫວຽດນາມ ແລະ ສະຫະພາບເອີລົບ. ພວກເຮົາຫວັງຢ່າງຍິ່ງວ່າ ສັນຍາລະຫວ່າງຫວຽດນາມ ແລະ ສະຫະພາບເອີລົບ ກໍຄື ສັນຍາກັບພັນທະພາບພາສີອາກອນ ລັດເຊຍ-ກາຊັກສະຖານ-ເບລາຣຸດ ອາດຈະສຳເລັດໃນປີ 2014. ນັ້ນແມ່ນບັນດາວຽກງານທີ່ຮີບຮ້ອນປະຕິບັດໃນ 2 ເດືອນທີ່ຜ່ານມາ”
ນອກຈາກເລື່ອງສືບຕໍ່ຍູ້ແຮງບັນດາການເຄື່ອນໄຫວສົ່ງເສີມການຄ້ານັ້ນ, ວຽກງານອີກອັນໜຶ່ງທີ່ສຳຄັນທີ່ສຸດຊຶ່ງບັນດາກະຊວງ, ຂະແໜງການຕ່່າງໆທີ່ກ່ຽວຂ້ອງປະຕິບັດ ນັ້ນແມ່ນຍູ້ແຮງການປະຕິບັດແຜນນະໂຍບາຍຊາວຫວຽດນາມໃຫ້ບຸລິມະສິດຊົມໃຊ້ສິນຄ້າຫວຽດນາມ.
ໃນຂົງເຂດການເງິນ, ທະນາຄານ, ທ່ານຮອງລັດຖະມົນຕີກະຊວງການເງິນ ຫວຽດນາມ ເຈີນວັນຮ້ຽວ ໃຫ້ຮູ້ວ່າ ຫວຽດນາມພວມປະຕິບັດແຜນຮ່າງສ້າງໂຄງປະກອບການລົງທຶນສ່ວນລວມຄືນໃໝ່ ແລະ ໄດ້ບັນລຸໝາກຜົນເບື້ອງຕົ້ນທີ່ສຳຄັນທີ່ສຸດ. ລາຍຈາຍແກ່ການລົງທຶນພັດທະນາ ແລະ ງົບປະມານ ໄລຍະ 6 ເດື່ອນຕົ້ນປີ ໄດ້ບັນລຸ 48% ແຜນການ, ເມື່ອທຽບໃສ່ໄລຍະດຽວກັນຂອງປີກາຍ ນີ້ແມ່ນລະດັບການປ່ອຍເງິນທີ່ຕັ້ງໜ້າພໍສົມຄວນ, ໂດຍສະເພາະແມ່ນໃນເງື່ອນໄຂທີ່ແຫຼ່ງທຶນຖືກຈຳກັດ. ທ່ານຮອງລັດຖະມົນຕີກະຊວງການເງິນ ຫວຽດນາມ ເຈີນວັນຮ້ຽວ ໃຫ້ຮູ້ວ່າ :
“ໄລຍະ 6 ເດື່ອນທ້າຍປີ, ສືບຕໍ່ຍູ້ແຮງການສ້າງເງື່ອນໄຂສະດວກ, ບັນດາລະບຽບການເພື່ອປ່ອຍເງິນແກ່ໂຄງການ, ສຳເລັດທຶນງົບປະມານ, ນັບທັງທຶນພັດທະບັດລັດຖະບານ ແມ່ນໜ້າທີ່ສຳຄັນ. ແຕ່ສຳຄັນກ່ວາຫມູ່ ແມ່ນການດຶງດູດແຫຼ່ງກຳລັງເຂົ້າຮ່ວມການລົງທຶນພັດທະນາເພື່ອສ້າງເງື່ອນໄຂໃຫ້ແກ່ບັນດາຂະແໜງການເສດຖະກິດ, ພິເສດແມ່ນບັນດາກິດຈະກຳພື້ນຖານໂຄງລ່າງພັດທະນາ. ບັນດາມາດຕະການແກ້ໄຂກ່ຽວກັບການລົງທຶນສ່ວນລວມ ປະກອບດ້ວຍບັນດາບັນດາມາດຕະການແກ້ໄຂກ່ຽວກັບເລື່ອງຕັ້ງໜ້າຍູ້ແຮງການປ່ອຍເງິນງົບປະມານ, ແຕ່ສຳຄັນກ່ວາໝູ່ແມ່ນກົນໄກນະໂຍບາຍດຶງດູດແຫຼ່ງກຳລັງສັງຄົມທີ່ເຂົ້າຮ່ວມການລົງທຶນພັດທະນາ”
ເພື່ອສາມາດນຳທຶນສິນເຊື່ອອອກສູ່ຕະຫຼາດຢ່າງມີປະສິດທິຜົນ, ທ່ານຮອງຜູ້ວ່າການທະນາຄານແຫ່ງລັດຫວຽດນາມ ຫງວຽດົງຕ້ຽນ ຖືວ່າ ຈະຄວນມີການສົມທົບນະໂຍບາຍທີ່ກ່ຽວຂ້ອງເຖິງກົນໄກຮັບປະກັນເງິນກູ້, ແກ້ໄຂຊັບສິນ...ພ້ອມກັນນັ້ນ, ກໍເລັ່ງໃສ່ແກ້ໄຂໜີ້ເສຍຊຶ່ງພວມແມ່ນໜຶ່ງໃນບັນດາສິ່ງກີດຂວາງໃນປະຈຸບັນ.
ດ້ວຍບັນດາມາດຕະການແກ້ໄຂຂອງລັດຖະບານ ແລະ ການສົມທົບຫຼາຍນະໂຍບາຍມະຫາພາກນັ້ນ, ຫວຽດນາມຈະຮັບປະກັນຈຸດໝາຍການເຕີບໂຕທີ່ເໝາະສົມ, ປະກອບສ່ວນປະຕິບັດບັນດາຈຸດໝາຍເສດຖະກິດ-ສັງຄົມອື່ນໆ.