(vovworld) - ມຽນມາຫາກໍ່ດຳເນີນການເລືອກຕັ້ງທົ່ວປະເທດທີ່ໄດ້ຮັບຖືວ່າມີລັກສະນະເສລີ ແລະ ປະຊາທິປະໄຕທີ່ສຸດໃນຮອບເວລາ 25 ປີຜ່ານມາ. ເຖິງວ່າຜົນແຫ່ງການເລືອກຕັ້ງຢ່າງເປັນທາງການໃນທົ່ວປະເທດບໍ່ທັນໄດ້ຮັບການປະກາດກໍ່ຕາມ, ແຕ່ຄວາມຈິງສະແດງໃຫ້ເຫັນວ່າ, ເຖິງວ່າພັກໃດໄດ້ຮັບໄຊຊະນະໃນການເລືອກຕັ້ງ, ມຽນມາກໍ່ຈະສືບຕໍ່ດຳເນີນການເປີດປະຕູ, ປະຕິຮູບປະຊາທິປະໄຕຄືໃນປະຈຸບັນ. ນີ້ແມ່ນປະຖົມປັດໃຈເພື່ອໃຫ້ປະເທດນີ້ສືບຕໍ່ເຕີບໂຕດ້ານເສດຖະກິດ, ນຳມາເຊິ່ງຊີວິດນັບມື້ນັບດີກວ່າໃຫ້ແກ່ປະຊາຊົນ ກໍ່ຄືຍົກສູງທີ່ຕັ້ງບົດບາດຂອງປະເທດນີ້ໃນເວທີສາກົນ.
ການເລືອກຕັ້ງຢູ່ມຽນມາປີ2015:
ຂີດໝາຍປະຫວັດສາດໃນວິວັດແຫ່ງການປະຕິຮູບ
(ພາບ: CNN)
ຕາມຕົວເລກສະຖິຕິແລ້ວ, ໃນການເລືອກຕັ້ງຄັ້ງປະຫວັດສາດ ວັນທີ 8/11 ໄດ້ມີ 80% ຈຳນວນຜູ້ມີສິດເລືອກຕັ້ງ 32 ລ້ານຄົນໄປປ່ອນບັດ. ສິ່ງດັ່ງກ່າວສະແດງໃຫ້ເຫັນວ່າ ຜູ້ມີສິດເລືອກຕັ້ງມີຄວາມເອົາໃຈໃສ່ເຖິງການເລືອກຕັ້ງ ກໍ່ຄືອະນາຄົດຂອງປະເທດ. ຜູ້ມີສິດເລືອກຕັ້ງປາຖະໜາວ່າ ມຽນມາຈະມີລັດຖະບານໃໝ່ເພື່ອສືບຕໍ່ການປະຕິຮູບ, ແລະ ນັບມື້ນັບເອົາໃຈໃສ່ເຖິງປະຊາຊົນກວ່າ, ສືບຕໍ່ນຳພາປະເທດຊາດບົນເສັ້ນທາງປ່ຽນໃໝ່. ນີ້ກໍ່ແມ່ນທິດທາງທີ່ເໝາະສົມ ເພື່ອໃຫ້ມຽນມາຍົກສູງທີ່ຕັ້ງໃນພາກພື້ນ ແລະ ສາກົນ.
ປະຖົມປັດໃຈທີ່ສະດວກ
ບໍ່ສາມາດປະຕິເສດໄດ້ບັນດາຜົນງານສຳຄັນເຊິ່ງມຽນມາ ບັນລຸໄດ້ກ່ອນການເລືອກຕັ້ງ. ນັບແຕ່ອຳນາດການປົກຄອງພົນທະຫານ ປະກາດ
ເລີ່ມຕົ້ນໄລຍະຫັນໄປສູ່ພົນລະເຮືອນ ແລະ ປະຊາທິປະໄຕກ່ອນນີ້ສອງ, ສາມປີ, ເຂົາເຈົ້າກໍ່ເຫັນໄດ້ບັນດາການປ່ຽນແປງຢ່າງວ່ອງໄວຢູ່ປະເທດເປີດປະຕູ. ກ່ຽວກັບທາງດ້ານການເມືອງ, ຫາງສຽງສາມາດເຫັນໄດ້ການພັດທະນາຂອງພັກຝ່າຍການເມືອງຕ່າງໆຢູ່ປະເທດນີ້. 90 ກວ່າພັກຝ່າຍໄດ້ຈັດສົ່ງຜູ້ອອກສະໝັກເລືອກຕັ້ງ 6.000 ຄົນເຂົ້າຮ່ວມການເລືອກຕັ້ງທົ່ວປະເທດຜ່ານມາ. ເລື່ອງບັນລຸໄດ້ຂໍ້ຕົກລົງຢຸດຍິງທົ່ວປະເທດ (NCA) ລະຫວ່າງພັກສາມັກຄີ ແລະ ພັດທະນາສະຫະພັນມຽນມາ (USDP) ກຳອຳນາດ ກັບບັນດາກຸ່ມປະກອບອາວຸດເຊື້ອຊາດຜີວພັນຫວ່າງແລ້ວນີ້ ແມ່ນບາດກ້າວສຳຄັນທີ່ສຸດ ພາກ້າວໄປເຖິງພື້ນຖານສັນຕິພາບຢ່າງໝັ້ນຄົງ.
ກ່ຽວກັບທາງດ້ານເສດຖະກິດ, ຈາກປະເທດໜຶ່ງໃນຈຳນວນປະເທດທຸກຍາກກວ່າໝູ່ຂອງໂລກ, ພາຍຫຼັງ 2 ກວ່າທົດສະວັດທີ່ຖືກປິດລ້ອມ, ຂວ້ຳບາດ, ໃນ 3 ປີມໍ່ໆມານີ້, ເສດຖະກິດຂອງມຽນມາໄດ້ເຕີບໂຕໃນລະດັບ 7,6%/ປີ ແລະ ກາຍເປັນຕະຫຼາດລົງທຶນດຳເນີນທຸລະກິດທີ່ດູດດຶ່ມຢູ່ອາຊີຕາເວັນອອກສ່ຽງໃຕ້. ທະນາຄານພັດທະນາອາຊີ (ADB), ຄາດຄະເນວ່າ, ເສດຖະກິດມຽນມາ ຈະບັນລຸລະດັບເຕີບໂຕສະເລ່ຍປະມານ 9,5%/ປີ ໃນປີ 2030 ແລະ ລາຍຮັບສະເລ່ຍຕໍ່ຫົວຄົນເກືອບ 5.000 USD ໃນປີ 2030. ກອງທຶນເງິນຕາສາກົນ (IMF) ຕີລາຄາວ່າ, ຍ້ອນມີຊັບພະຍາກອນທຳມະຊາດອຸດົມສົມບູນ, ມີກຳລັງແຮງງານໜຸ່ມ ແລະ ມີທີ່ຕັ້ງເສດຖະກິດຍຸດທະສາດ, ມຽນມາ ມີຄວາມສະດວກເພື່ອສາມາດພັດທະນາກາຍເປັນໃຈກາງພະລັງງານ ແລະ ຊັບພະຍາກອນ, ເຊື່ອມຕໍ່ກັບອິນເດຍ, ຈີນ ແລະ ອາຊີຕາເວັນອອກສ່ຽງໃຕ້.
ນອກຈາກບັນດາຜົນງານໃນການພັດທະນາເສດຖະກິດ - ສັງຄົມ, ຄວາມເຊື່ອໝັ້ນຂອງຜູ້ມີສິດເລືອກຕັ້ງມຽນມາ ຕໍ່ປະເທດສັນຕິພາບ, ສະຖຽນລະພາບ ນັບມື້ນັບມີພື້ນຖານກວ່າ, ເມື່ອບັນດາພັກຝ່າຍການເມືອງລ້ວນແຕ່ຢືນຢັນ ຈະສືບຕໍ່ມຸ່ງໄປເຖິງປະຊາທິປະໄຕ. ຊາວມຽນມາ ພວມຊົມໃຊ້ບັນດາຜົນງານ ໂດຍວິວັດທະນາການປ່ຽນໃໝ່ ແລະ ປະຕິຮູບນຳມາໃຫ້, ພາຍໃຕ້ການຊີ້ນຳ ນຳພາຂອງພັກສາມັກຄີ ແລະ ພັດທະນາ USDP ກຳອຳນາດ. ບົນພື້ນຖານນັ້ນ, ພັກສະຫະພັນແຫ່ງຊາດເພື່ອປະຊາທິປະໄຕ (NLD) ເອກະລາດ, ໂດຍທ່ານນາງ Aung San Suu Kyi ນຳພາ ໄດ້ຍົກອອກຄຳຂວັນທີ່ວ່າ “ປ່ຽນແປງ“ ຕາມທິດລັດຖະບານພົນລະເຮືອນ, ຮັບປະກັນບັນດາສິດຂອງມະນຸດ.
ການທ້າທາຍບໍ່ແມ່ນໜ້ອຍ
ຕາມຂໍ້ສັງເກດຂອງວົງການນັກໄຈ້ແຍກແລ້ວ, ພາຍຫຼັງການເລືອກຕັ້ງປີ 2015, ອຳນາດການປົກຄອງມຽນມາ ຕ້ອງປະເຊີນໜ້າກັບບັນດາການທ້າທາຍຢ່າງໃຫຍ່ຫຼວງ. ເຖິງວ່າພັກໃດຍາດໄດ້ໄຊຊະນະກໍ່ຕາມ, ສາຍພົວພັນລະຫວ່າງພັກການເມືອງ ແລະ ກຳລັງປະກອບອາວຸດຢູ່ປະເທດນີ້ ກໍ່ແມ່ນບັນຫາທີ່ຫາງສຽງມີຄວາມສົນໃຈ. ນີ້ແມ່ນປັດໃຈສຳຄັນ ຕັດສິນອະນາຄົດຂອງມຽນມາ. ນອກນັ້ນ. ຄວາມຂັດແຍ່ງກັນກ່ຽວກັບດ້ານສາສະໜາ ກໍ່ແມ່ນບັນຫາທີ່ໜ້າສົນໃຈ, ເມື່ອວົງການນັກສັງເກດການຖືວ່າ, ລັດທິສາສະໜາຫົວຈັດ ພວມກາຍເປັນປັດໃຈກະທົບເຖິງຊີວິດທາງດ້ານການເມືອງຢູ່ມຽນມາ.
ຄຽງຂ້າງນັ້ນ, ມຽນມາຕ້ອງສ້າງຕັ້ງລັດຖະບານໜຶ່ງທີ່ ຮັບໃຊ້ຜົນປະໂຫຍດຂອງປະຊາຊົນໃຫ້ໄດ້. ນີ້ກໍ່ແມ່ນຄວາມປາຖະໜາຂອງຊາວມຽນມາ, ເພາະວ່າ, ເຖິງວ່າບັນລຸໄດ້ຄວາມກ້າວໜ້າທາງດ້ານເສດຖະກິດ - ສັງຄົມ ຢ່າງແນ່ນອນແລ້ວກໍ່ຕາມ, ແຕ່ລະດັບຄອງຊີບຂອງຊາວມຽນມາ ສ່ວນຫຼາຍຍັງບໍ່ທັນໄດ້ຮັບການປັບປຸງໄດ້ຫຼາຍເທື່ອ. ມຽນມາ ຍັງຄົງແມ່ນໜຶ່ງໃນບັນດາປະເທດທຸກຍາກຢູ່ອາຊີ, ດ້ວຍເກືອບ 1/3 ຈຳນວນພົນລະເມືອງ 60 ລ້ານຄົນຍັງທຸກຍາກຢູ່.
ອຳນາດການປົກຄອງໃໝ່ຢູ່ມຽນມາ ຈະຕ້ອງປະເຊີນໜ້າກັບຄວາມຫຍຸ້ງຍາກ, ການທ້າທາຍຫຼາຍຢ່າງ, ແຕ່ຜົນສຳເລັດຂອງການເລືອກຕັ້ງເມື່ອວັນທີ 8/11 ຜ່ານມາ, ຈະຊ່ວຍໃຫ້ມຽນມາມີສະຖຽນລະພາບດ້ານການເມືອງ, ຈາກນັ້ນສຸມໃສ່ພັດທະນາເສດຖະກິດ. ນີ້ແມ່ນບັນຫາກຸນແຈ ເພື່ອໃຫ້ປະເທດນີ້ ພັດທະນາຢ່າງແຮງກວ່າໃນທຸກດ້ານ ໃນໄລຍະຈະມາເຖິງ.