ຢືນຢັນຄວາມສາມັກຄີ ລະຫວ່າງ ຫວຽດນາມ ແລະ ກຳປູເຈຍ

ວັນຈັນ ທີ 24 ກັນຍາ ຄ.ສ. 2012 | 15:32:22

(vovworld) - ວັນທີ 24/9, ພະບາດສົມເດັດ ພະບໍລົມມະນຽດ ໂນໂຣດົມ ສີຫາໂມນີ ແຫ່ງລາຊະອານາຈັກກຳປູເຈຍ ໄດ້ເລີ່ມຕົ້ນການຢ້ຽມຢາມທາງລັດຖະກິດ ເຖິງຫວຽດນາມ ຕາມຄຳເຊື້ອເຊີນຂອງທ່ານປະທານປະເທດ ຫວຽດນາມ Truong Tan Sang. ການຢ້ຽມຢາມແກ່ຍາວໃນເວລາ 3 ວັນ, ເຊິ່ງນອນໃນຂອບເຂດບັນດາການເຄື່ອນໄຫວສະເຫລີມສະຫລອງ ປີມິດຕະພາບ ຫວຽດນາມ - ກຳປູເຈຍ 2012 ແລະ ສະເຫລີມສະຫລອງ 45 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງ ຫວຽດນາມ ແລະ ກຳປູເຈຍ ຄືວັນທີ 24/6/1967 - 24/6/2012, ການຢ້ຽມຢາມຄັ້ງນີ້ອີກຄັ້ງຫນຶ່ງໄດ້ຢືນຢັນຄວາມຕັດສິນໃຈຂອງການນຳສອງປະເທດແມ່ນເພີ່ມທະວີ ແລະ ເປີດກວ້າງການພົວພັນບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດ.

ຢືນຢັນຄວາມສາມັກຄີ ລະຫວ່າງ ຫວຽດນາມ ແລະ ກຳປູເຈຍ - ảnh 1

ກະສັດ ກຳປູເຈຍ ໂນໂຣດົມ ສີຫາໂມນີ
ພາບ: internet

ການພົວພັນລະຫວ່າງ ຫວຽດນາມ - ກຳປູເຈຍ ມີມາແຕ່ດົນນານແລ້ວ, ຄວາມໃກ້ຊິດຕິດພັນດ້ານພູມີປະເທດພ້ອມກັບຈຸດຄ້າຍຄືກັນຫລາຍຢ່າງຂອງພື້ນຖານວັດທະນະທຳ ແລະ ຜົນປະໂຫຍດລວມແມ່ນຄວາມສະຫນິດຕິດພັນຢ່າງແຫນ້ນແຟ້ນລະຫວ່າງສອງປະເທດ. ໃນໄລຍະປະຈຸບັນ, ຫວຽດນາມ - ກຳປູເຈຍ ລ້ວນແຕ່ປະຕິບັດນະໂຍບາຍການຕ່າງປະເທດເປີດກວ້າງ, ຫລາຍຮູບຫລາຍແບບ ຫລາຍຝ່າຍ ແລະ ສອງປະເທດລ້ວນແຕ່ຖືການປັບປຸງ, ເພີ່ມທະວີການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງສອງປະເທດເປັນສຳຄັນ. ດ້ວຍຄວາມຕັດສິນໃຈ ແລະ ຄວາມານະພະຍາຍາມລວມຂອງສອງປະເທດ, ໃນຊຸມປີຜ່ານມາ, ການພົວພັນສາມັກຄີມິດຕະພາບ, ການຮ່ວມມືຮອບດ້ານ ລະຫວ່າງ ຫວຽດນາມ - ກຳປູເຈຍ ໄດ້ມີບາດກ້າວພັດທະນາຢ່າງຈົບງາມທັງລວງກວ້າງ ແລະ ລວງເລິກ, ກາຍເປັນປະຖົມປັດໄຈສຳຄັນ, ປະກອບສ່ວນສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບ ໝັ້ນຄົງຍາວນານເພື່ອຍູ້ແຮງການພັດທະນາເສດຖະກິດ ສັງຄົມ, ຮັບປະກັນເອກະລາດ, ອະທິປະໄຕແຫ່ງຊາດຂອງແຕ່ລະປະເທດ. ມາຮອດປະຈຸບັນ, ສອງປະເທດໄດ້ກຳນົດຂອບເຂດການພົວພັນຮ່ວມມື “ບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ຮ່ວມມືຮອບດ້ານ, ໝັ້ນຄົງຍາວນານ” ແລະໄດ້ລົງນາມໃນເອກະສານດ້ານກົດໝາຍ 80 ກວ່າສະບັບ ກ່ຽວກັບການຮ່ວມມືສອງຝ່າຍໃນທຸກຂົງເຂດ ພ້ອມກັນນັ້ນ ໄດ້ສ້າງບັນດາກົນໄກສົມທົບກັນທີ່ຈຳເປັນ, ສອດຄ່ອງກັບຄວາມຮຽກຮ້ອງຕ້ອງການຂອງການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງສອງປະເທດ. ທ່ານ Pham Binh Minh ລັດຖະມົນຕີການຕ່າງປະເທດ ຫວຽດນາມ ຢືນຢັນວ່າ:

“45 ປີຜ່ານມາ ນັບແຕ່ເມື່ອສອງປະເທດສ້າງຕັ້ງສາຍພົວພັນມິດຕະພາບຖານບ້ານໃກ້ເຮືອນຄຽງ, ເຖິງວ່າໄດ້ຜ່ານຜ່າຄວາມຫຍຸ້ງຍາກການທົດສອບຫລາຍຢ່າງໃນປະຫວັດສາດກໍຕາມ ແຕ່ຍາມໃດກໍພັດທະນາຢ່າງແຂງແຮງ. ສາຍພົວພັນສະຫນິດຕິດພັນຢ່າງແຫນ້ນແຟ້ນລະຫວ່າງສອງປະເທດໄດ້ສະແດງໃຫ້ເຫັນຜ່ານການແລກປ່ຽນການນຳຂັ້ນສູງຂອງເປັນປະຈຳ, ສ້າງປະຖົມປັດໃຈໃຫ້ແກ່ການພັດທະນາລະຫວ່າງບັນດາທ້ອງຖິ່ນ, ກະຊວງຂະແຫນງການຕ່າງໆ. ພິເສດແມ່ນການພົວພັນແລກປ່ຽນປະຊາຊົນ, ເປັນຕົ້ນແມ່ນການຊ່ວຍເຫລືອເຊິ່ງກັນ ແລະ ກັນ ລະຫວ່າງປະຊາຊົນຢູ່ລຽບຕາມຊາຍແດນແມ່ນສະຫນິດຕິດພັນຍິ່ງກວ່າເວລາໃດໝົດ.”

ຢືນຢັນຄວາມສາມັກຄີ ລະຫວ່າງ ຫວຽດນາມ ແລະ ກຳປູເຈຍ - ảnh 2

ຫໍພິພິດທະພັນແຫ່ງຊາດ ກຳປູເຈຍ
ພາບ:dulich.com

ກ່ຽວກັບດ້ານເສດຖະກິດ, ການຮ່ວມມືກໍໄດ້ຮັບການເປີດກວ້າງເທື່ອລະກ້າວ, ວົງເງິນຂາເຂົ້າຂາອອກສອງສົ້ນແມ່ນເພີ່ມຂຶ້ນຢ່າງລ່ຽນຕິດ, ບັນລຸເກືອບ 2,8 ຕື້ USD ໃນປີ 2011. ປະຈຸບັນ, ມີເກືອບ 100 ໂຄງການຂອງວິສາຫະກິດ ຫວຽດນາມ ລົງທຶນຢູ່ ກຳປູເຈຍ ດ້ວຍຍອດຈຳນວນທຶນກວ່າ 2,2 ຕື້ USD, ຢືນອັນດັບ 2 ກ່ຽວກັບການລົງທຶນຂອງ ຫວຽດນາມ ອອກສູ່ຕ່າງປະເທດ ແລະ ສຸມໃສ່ໃນບັນດາຂົງເຂດຄື: ໂທລະຄົມມະນາຄົມ, ທະນາຄານ, ພະລັງງານ, ປູກຢາງພາລາ, ປຸງແຕ່ງຜະລິດຕະພັນກະເສດ…ຫວຽດນາມ ສືບຕໍ່ຊ່ວຍເຫລືອ ກຳປູເຈຍ ໃນການບຳລຸງສ້າງ ແຫລ່ງຊັບພະຍາກອນມະນຸດ, ສາທາລະນະສຸກ, ກວດ ປິນປົວພະຍາດໃຫ້ແກ່ປະຊາຊົນ ກຳປູເຈຍ. ວຽກງານຂີດຂັ້ນປັກຫລັກໝາຍຊາຍແດນສືບຕໍ່ໄດ້ຮັບການຜັນຂະຫຍາຍຈາກການປະສານສົມທົບລະຫວ່າງສອງຝ່າຍ. ສອງຝ່າຍຢືນຢັນວ່າ ຈະ ສືບຕໍ່ຮ່ວມມືເພື່ອສຳເລັດວຽກງານນີ້ໂດຍໄວ, ປະກອບສ່ວນສ້າງເສັ້ນຊາຍແດນສັນຕິພາບ, ມິດຕະພາບ, ການຮ່ວມມື ແລະ ພັດທະນາ. ການພົວພັນລະຫວ່າງບັນດາອົງການການເມືອງ, ສັງຄົມລະຫວ່າງ ຫວຽດນາມ - ກຳປູເຈຍ ນັບມື້ນັບໄດ້ຮັບການເພີ່ມທະວີ, ປະກອບສ່ວນຢ່າງແທດຈິງເຂົ້າໃນການຍົກສູງຄວາມຮັບຮູ້ໃຫ້ແກ່ປະຊາຊົນທຸກຊັ້ນວັນນະ, ພິເສດແມ່ນລຸ້ນຫນຸ່ມກ່ຽວກັບຄວາມສາມັກຄີທີ່ເປັນມູນເຊື້ອ, ການຊ່ວຍ ເຫລືອເຊິ່ງກັນ ແລະກັນ, ຜ່ານນັ້ນ ປະກອບກຳລັງເຫື່ອແຮງເຂົ້າໃນການຮັກສາ, ເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດ. ສິ່ງດັ່ງກ່າວຍິ່ງມີຄວາມໝາຍ ແລະ ໄດ້ຮັບຄວາມເອົາໃຈໃສ່ຊຸກຍູ້ໃນປີນີ້ ເມື່ອການນຳສອງປະເທດໄດ້ເຫັນດີເລືອກເຟັ້ນປີມິດຕະພາບ ຫວຽດນາມ - ກຳປູເຈຍ 2012” ແລະ ຈັດຕັ້ງການເຄື່ອນໄຫວລະດັບຊາດເພື່ອສະເຫລີມສະຫລອງ 45 ປີ ແຫ່ງວັນສ້າງຕັ້ງສາຍພົວພັນລະຫວ່າງ ຫວຽດນາມ - ກຳປູເຈຍ. ທ່ານ Vu Mao ປະທານສະມາຄົມມິດຕະພາບ ຫວຽດນາມ - ກຳປູເຈຍ ຖືວ່າ:

“ພວກເຮົາຕ້ອງເພີ່ມພູນຄູນສ້າງ ນ້ຳໃຈມິດຕະພາບຈາກລຸ້ນຫນຸ່ມສອງປະເທດ. ນີ້ແມ່ນສິ່ງທີ່ສຳຄັນທີ່ສຸດ. ພວກຂ້າພະເຈົ້າ ໄດ້ມີການປະສານສົມທົບກັນຢ່າງແຫນ້ນແຟ້ນກັບສະມາຄົມມິດຕະພາບ ກຳປູເຈຍ - ຫວຽດນາມ ດ້ວຍຄວາມສຸດຈິດສຸດໃຈ, ອິດທິພົນຊື່ສຽງຂອງຕົນ ເພື່ອຂົນຂວາຍທົ່ວສັງຄົມເຂົ້າຮ່ວມການປະກອບສ່ວນນີ້. ໃນປີ 2012, ມີການເຄື່ອນໄຫວຫລາຍຢ່າງ, ການພົບປະແລກປ່ຽນຕ່າງໆ ພິເສດ ພວກຂ້າພະເຈົ້າຈະພິມຈຳຫນ່າຍວາລະສານຂອງສະມາຄົມມິດຕະພາບ ຫວຽດນາມ - ກຳປູເຈຍ ເພື່ອໃຫ້ປະຊາຊົນສອງປະເທດສາມາດຊອກຮູ້ວິວັດທະນາການ, ການພັດທະນາລະຫວ່າງສອງປະເທດ.”

ບໍ່ພຽງແຕ່ໃນຂອບເຂດສອງຝ່າຍເທ່ົານັ້ນ, ຫາກສອງປະເທດກໍນັບມື້ນັບມີການຮ່ວມມື, ສະຫນິດຕິດພັນ, ສະຫນັບສະຫນູນເຊິ່ງກັນ ແລະ ກັນໃນບັນດາເວທີປາໄສສາກົນ ແລະ ພາກພື້ນອີກດ້ວຍຄື: ການຮ່ວມມືລະຫວ່າງສາມປະເທດ ກຳປູເຈຍ, ລາວ ແລະ ຫວຽດນາມ, ການຮ່ວມມື 4 ປະເທດ ກຳປູເຈຍ, ລາວ, ມ້ຽນມາ ແລະ ຫວຽດນາມ, ການຮ່ວມມືອະນຸພາກພື້ນແມ່ນ້ຳຂອງເປີດກວ້າງ, ອາຊີ, ASEM, ສປຊ …

ບົນພື້ນຖານຂອງສາຍພົວພັນອັນດີງາມນັ້ນ, ການຢ້ຽມຢາມຫວຽດນາມຄັ້ງນີ້ ຂອງ ພະບາດສົມເດັດ ພະບໍລົມມະນຽດ ໂນໂຣດົມ ສີຫາໂມນີ ພະມະຫາກະສັດ ກຳປູເຈຍ ເພື່ອເພີ່ມທະວີ ແລະ ພັດທະນາການພົວພັນບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດ. ນີ້ກໍແມ່ນໂອກາດເພື່ອໃຫ້ການນຳ ຫວຽດນາມ ແລະ ກຳປູເຈຍ ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະປະເທດ, ແລກປ່ຽນບາງບັນຫາໃນການພົວພັນສອງຝ່າຍ. ການຢ້ຽມຢາມຈະນຳການພົວພັນລະຫວ່າງສອງປະເທດນັບມື້ນັບແຕກດອກອອກຜົນ, ຕອບສະຫນອງຄວາມມຸ່ງມາດປາດຖະຫນາ ແລະ ຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ ອາຊີຕາເວັນອອກສຽງໃຕ້ ແລະ ໃນໂລກ.

ແອງຮ່ວຽນ