(vovworld)- ຕອນເຊົ້າວັນທີ15/11, ບັນດາສະມາຊິກສະພາແຫ່ງຊາດ(ສສຊ) ເຂົ້າຮ່ວມກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ຈະດຳເນີນການລົງຄະແນນສຽງໄວ້ວາງໃຈສຳລັບບັນດາຕຳແຫນ່ງການນຳຫລັກແຫລ່ງ ໂດຍສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນ. ນີ້ແມ່ນຄັ້ງທີ 2 ສະພາແຫ່ງຊາດຫວຽດນາມ ຕາງຫນ້າໃຫ້ບັນດາຜູ້ມີສິດເລືອກຕັ້ງໃນທົ່ວປະເທດ ປະຕິບັດຫນ້າທີ່ນີ້. ການລົງຄະແນນສຽງໄວ້ວາງໃຈ ແມ່ນການດຳເນີນຊີວິດການເມືອງສຳຄັນ, ສະແດງສິດຕິດຕາມກວດກາສູງສຸດຂອງສະພາແຫ່ງຊາດໃນວຽກງານບຸກຄະລາກອນ ພ້ອມທັງຊ່ວຍໃຫ້ຜູ້ໄດ້ຮັບການລົງຄະແນນສຽງໄວ້ວາງໃຈສູ້ຊົນ, ຍົກສູງຄວາມຮັບຜິດຊອບໃນຂົງເຂດທີ່ຕົນເອງຄຸ້ມຄອງ.
ບັນດາສະມາຊິກສະພາແຫ່ງຊາດປ່ອນບັດໄວ້ວາງໃຈ
ພາບປະກອບ:tuoitre.com
|
ການລົງຄະແນນສຽງໄວ້ວາງໃຈຄັ້ງນີ້, ສະພາແຫ່ງຊາດລົງຄະແນນສຽງໄວ້ວາງໃຈສຳລັບ 50 ຕຳແຫນ່ງໂດຍສະພາແຫ່ງຊາດເລືອກຕັ້ງ ຫລືໃຫ້ສັດຕະຍາບັນ, ເພີ່ມຂຶ້ນ 3 ຄົນເມື່ອທຽບໃສ່ການລົງຄະແນນສຽງໄວ້ວາງໃຈຄັ້ງກ່ອນນີ້, ນັ້ນແມ່ນທ່ານລັດຖະມົນຕີກະຊວງການເງິນ, ຫົວຫນ້າອົງການກວດສອບແຫ່ງລັດ ແລະ ຫົວຫນ້າຄະນະຄົ້ນຄ້ວາຄຳຮ້ອງຂໍຄວາມເປັນທຳຂອງສະພາແຫ່ງຊາດ.
ກະກຽມບັນດາຂັ້ນຕອນໃຫ້ແກ່ການລົງຄະແນນສຽງໄວ້ວາງໃຈຢ່າງລະອຽດ
ເພື່ອຖອດຖອນບົດຮຽນຈາການລົງຄະແນນສຽງຄັ້ງກ່ອນນີ້, ຄະນະປະຕິບັດງານ ສສຊ ໄດ້ສ້າງຕັ້ງຫນ່ວຍຊ່ວຍວຽກງານກະກຽມເອກະສານກ່ຽວຂ້ອງ ເພື່ອຮັບໃຊ້ໃຫ້ແກ່ ສສຊ, ໃຫ້ແກ່ຄະນະນັບບັດ ເພື່ອຮັບປະກັນວິທະຍາສາດ, ລັດສະນະຊັດເຈນ.
ເພື່ອແນໃສ່ສ້າງຄວາມເປັນເອກະພາບໃນການກະກຽມເອກະສານ, ຄະນະປະຕິບັດງານສສຊ ໄດ້ແນະນຳໂຄງຮ່າງຂອງບົດລາຍງານຢ່າງຈະແຈ້ງ, ໃນນັ້ນ ເຕື້ອງເຖິງການປະຕິບັດ ຫນ້າທີ່ຮັບຜິດຊອບທີ່ໄດ້ຮັບມອບໝາຍ, ຝືກຝົນຫລໍ່ຫລອມ, ສຳຫລວດກວດຄືນຜູ້ຖືກລົງຄະແນນສຽງ. ທີສອງ ແມ່ນການແຈ້ງຊັບສິນ. ພ້ອມກັບການກະກຽມຂອງບັນດາອົງການກ່ຽວຂ້ອງ, ສສຊ ແຕ່ລະທ່ານກໍເປັນເຈົ້າການໃນການຄົ້ນຄ້ວາ ເພື່ອປະຕິບັດຄວາມຮັບຜິດຊອບຂອງຜູ້ຕາງຫນ້າໃຫ້ແກ່ຜູ້ມີສິດເລືອກຕັ້ງໃນທົ່ວປະເທດ. ທ່ານນາງ ຫວໍທິຢູງ, ຮອງຫົວຫນ້າຄະນະ ສສຊ ນະຄອນ ໂຮ່ຈິມີນ ໃຫ້ຮູ້ວ່າ:
“ຄະນະປະຈຳສະພາແຫ່ງຊາດ ໄດ້ສົ່ງເອກະສານເຖິງບັນດາ ສສຊ ກ່ອນທີ່ດຳເນີນກອງປະຊຸມສະໄຫມສາມັນເທື່ອທີ 8. ເນື້ອໃນບົດລາຍງານຂອງບັນດາທ່ານຖືກລົງຄະແນນສຽງໄວ້ວາງໃຈກໍໄດ້ຮັບການກະກຽມລະອຽດ. ນອກນັ້ນ, ບັນດາ ສສຊ ກໍໄດ້ສຳພັດກັບບັນດາແຫລ່ງຂໍ້ມູນຕ່າງໆເພື່ອເກັບກຳຂໍ້ມູນຂ່າວຕື່ມອີກກ່ຽວກັບບັນດາຕຳແຫນ່ງຖືກລົງຄະແນນສຽງໄວ້ວາງໃຈ.”
ຄິດໄລ່ຊັ່ງຊາຮອບດ້ານເມື່ອຢັ້ງຢືນລະດັບໄວ້ວາງໃຈ
ຈຸດປະສົງຂອງການລົງຄະແນນສຽງໄວ້ວາງໃຈ ແມ່ນເພື່ອຍົກສູງປະສິດທິຜົນການຕິດຕາມກວດກາຂອງສະພາແຫ່ງຊາດສຳລັບຜູ້ດຳລົງຕຳແຫນ່ງ ໂດຍສະພາແຫ່ງຊາດ ເລືອກຕັ້ງ ຫລືໃຫ້ສັດຕະຍາບັນ, ຊ່ວຍເຂົາເຈົ້າເຫັນໄດ້ລະດັບໄວ້ວາງໃຈເພື່ອສູ້ຊົນ, ຝືກຝົນຫລໍ່ຫລອມ, ຍົກສູງຄວາມຮັບຜິດຊອບ ແລະ ປະສິດທິຜົນການເຄື່ອນໄຫວຂອງຕົນ. ຄວາມຈິງໃຫ້ເຫັນວ່າ ການລົງຄະແນນສຽງໄວ້ວາງໃຈຄັ້ງທຳອິດທີ່ກອງປະຊຸມສະໄຫມສາມັນເທື່ອທີ 5 ຂອງສະພາແຫ່ງຊາດຊຸດທີ 13 ໄດ້ສ້າງການຫັນປ່ຽນແນ່ນອນ. ຕາມທ່ານ ເຈືອງມີງຮວ່າງ, ສສຊ ແຂວງ ກາເມົາ, ການລົງຄະແນນສຽງໄວ້ວາງໃຈຄັ້ງກ່ອນນີ້, ລັດຖະມົນຕີ, ຫົວຫນ້າຂະແຫນງໄດ້ຮັບບັດໄວ້ວາງໃຈດ້ວຍຈຳນວນຫນ້ອຍ ແຕ່ໄລຍະຜ່ານມາ, ໂດຍມີການຊີ້ນຳ, ບໍລິຫານຢ່າງຂ້ຽວຂາດ, ຄວາມພະຍາຍາມຂອງບັນດາທ່ານລັດຖະມົນຕີ, ຫົວຫນ້າຂະແຫນງໄດ້ຮັບການຕີລາຄາສູງຈາກ ສສຊ ແລະ ຜູ້ມີສິດເລືອກຕັ້ງໃນທົ່ວປະເທດ. ທ່ານນາງ ບຸ່ຍທິອານ, ສສຊ ນະຄອນ ຮ່າໂນ້ຍ ຕີລາຄາວ່າ:
“ການລົງຄະແນນສຽງໄວ້ວາງໃຈແມ່ນຫນຶ່ງໃນບັນດາເນື້ອໃນຕິດຕາມກວດກາຢ່າງມີປະສິດທິຜົນສຳລັບບັນດາພະນັກງານການນຳທຸກຂັ້ນ. ນີ້ແມ່ນຮູບການຕິດຕາມກວດກາທີ່ມີຄຸນປະໂຫຍດທີ່ສຸດ. ຂ້າພະເຈົ້າເຫັນວ່າ ຈາກການລົງຄະແນນສຽງໄວ້ວາງໃຈຄັ້ງກ່ອນ ເຖິງວ່າລະດັບແຕກຕ່າງກັນ ແຕ່ບັນດາຜູ້ຖືກລົງຄະແນນສຽງໄວ້ວາງໃຈລ້ວນແຕ່ມີການປ່ຽນແປງ. ສິ່ງດັ່ງກ່າວແມ່ນດີທີ່ສຸດ, ຜູ້ມີສິດເລືອກຕັ້ງລ້ວນແຕ່ປາດຖະຫນາຢາກບັນດາຜູ້ຖືກລົງຄະແນນສຽງແກ້ໄຂຄວາມຂາດຕົກບົກຜ່ອງເພື່ອໃຫ້ຂະແຫນງຕົນພັດທະນາ.”
ຕາມທ່ານ ຫງວຽນງອກເຟືອງ, ສສຊ ແຂວງ ກວາງບີງ ແລ້ວ, ສິ່ງສະດວກໃນການລົງຄະແນນສຽງໄວ້ວາງໃຈຄັ້ງນີ້ ແມ່ນໄລຍະຜ່ານມາ, ບັນດາຕຳແຫນ່ງຫລັກແຫລ່ງ ໄດ້ມີປະສົບການຜ່ານພຶດຕິກຳຕົວຈິງ, ສະແດງໃຫ້ເຫັນຜ່ານວຽກງານຂອງຕົນເພື່ອໃຫ້ບັນດາ ສສຊ ຕີລາຄາ. ຄວາມຈິງໃຫ້ເຫັນວ່າ ວຽກງານນິຕິບັນຍັດ, ບໍລິຫານ, ຕຸລາການລ້ວນແຕ່ມີການຫັນປ່ຽນຢ່າງຕັ້ງຫນ້າ. ສະນັ້ນ ຫນ້າທີ່ວາງອອກໃຫ້ແກ່ ສສຊ ແຕ່ລະທ່ານ ຕ້ອງຄິດໄລ່ຊັ່ງຊາຢ່າງຮອບດ້ານເມື່ອຢັ້ງຢືນລະດັບຄວາມໄວ້ວາງໃຈ. ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ເນັ້ນຫນັກວ່າ:
“ການລົງຄະແນນສຽງໄວ້ວາງໃຈຄັ້ງນີ້ ບໍ່ພຽງແຕ່ປະຕິບັດຢູ່ ສະພາແຫ່ງຊາດເທົ່ານັ້ນ ຫາກຕາມແຜນນະໂຍບາຍຂອງພັກ ຈະດຳເນີນຢູ່ທຸກຂັ້ນ, ຂະແຫນງການ. ເຖິງຢ່າງໃດກໍຕາມ ການລົງຄະແນນສຽງທີ່ສະພາແຫ່ງຊາດ ແມ່ນການລົງຄະແນນສຽງຄັ້ງທຳອິດໃນປີນີ້ ສະນັ້ນຈຶ່ງມີຄວາມສຳຄັນທີ່ສຸດ. ນອກນັ້ນ, ບັນດາຕຳແຫນ່ງໂດຍສະພາແຫ່ງຊາດເລືອກຕັ້ງ ແລະ ໃຫ້ສັດຕະຍາບັນ ແມ່ນບັນດາຕຳແຫນ່ງໂດຍສະພາແຫ່ງຊາດມີຄວາມເຊື່ອໝັ້ນ. ສະນັ້ນ ຮຽກຮ້ອງຕ້ອງປະຕິບັດຢ່າງລອບຄອບຖີ່ຖ້ວນ, ພາວະວິໄສ, ຊັດເຈນ.”
ທີ່ກອງປະຊຸມສະໄຫມສາມັນເທື່ອທີ 5 ສະພາແຫ່ງຊາດຫວຽດນາມ ຊຸດທີ 13 ເມື່ອເດືອນ 6/2013 ເປັນຄັ້ງທຳອິດໃນປະຫວັດສາດແຫ່ງນິຕິບັດຍັດ, ສະພາແຫ່ງຊາດໄດ້ດຳເນີນການລົງຄະແນນສຽງໄວ້ວາງໃຈຕໍ່ 47 ຕຳແຫນ່ງການນຳໃນກົງຈັກລັດ ໂດຍສະພາແຫ່ງຊາດເລືອກຕັ້ງ ຫລືໃຫ້ສັດຕະຍາບັນ. ຕໍ່ຫນ້າ ສສຊ ເກືອບ 500 ທ່ານ, ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ເວົ້າວ່າ ການປ່ອນບັດໄວ້ວາງໃຈໃສ່ຫີບແມ່ນເລື່ອງງ່າຍ ແຕ່ວຽກງານນີ້ພັດມີຄວາມໝາຍອັນໃຫຍ່ຫລວງ. ໃນການລົງຄະແນນສຽງໄວ້ວາງໃຈຄັ້ງນີ້ ຜູ້ມີສິດເລືອກຕັ້ງປາດຖະຫນາວ່າ ດ້ວຍສະຕິຄວາມຮັບຜິດຊອບ ແລະ ການກະກຽມຢ່າງລອບຄອບຖີ່ຖ້ວນ, ສະພາແຫ່ງຊາດ ຈະສຳເລັດຄວາມຮັບຜິດຊອບຕໍ່ປະຊາຊົນ, ພັກ ແລະ ລັດ ດ້ວຍບັນດາບັດລົງຄະແນນສຽງໄວ້ວາງໃຈທີ່ພາວະວິໄສ, ຊັດເຈນ.