(vovworld)- ວັນທີ 10/6, ເປັນຄັ້ງທຳອິດໃນປະຫວັດສາດ, ສະພາແຫ່ງຊາດຫວຽດນາມດຳເນີນການລົງຄະແນນສຽງໄວ້ວາງໃຈສຳລັບ 47 ຕຳແຫນ່ງໂດຍສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນ, ໃນນັ້ນ ມີປະທານປະເທດ, ຮອງປະທານປະເທດ, ປະທານສະພາແຫ່ງຊາດ, ບັນດາຮອງປະທານສະພາແຫ່ງຊາດ, ນາຍົກລັດຖະມົນຕີ, ບັນດາຮອງນາຍົກລັດຖະມົນຕີ. ນີ້ແມ່ນການດຳເນີນຊີວິດດ້ານການເມືອງທີ່ສຳຄັນ, ແມ່ນບາດກ້າວໃຫມ່ໃນການເຄື່ອນໄຫວຕິດຕາມກວດກາຂອງສະພາແຫ່ງຊາດ ພ້ອມທັງຍົກສູງສະຕິຄວາມຮັບຜິດຊອບຂອງສະມາຊິກສະພາແຫ່ງຊາດ (ສສຊ) ແຕ່ລະທ່ານໃນການເລືອກເຟັ້ນຜູ້ມີຄວາມເກັ່ງກ້າສາມາດ, ມີຄຸນສົມບັດໃຫ້ແກ່ປະເທດຊາດ.
ຈຸດປະສົງຂອງການລົງຄະແນນສຽງໄວ້ວາງໃຈແມ່ນເພື່ອຍົກສູງປະສິດທິຜົນການຕິດຕາມກວດກາຂອງສະພາແຫ່ງຊາດສຳລັບຜູ້ດຳລົງຕຳແຫນ່ງໂດຍສະພາແຫ່ງຊາດເລືອກເຟັ້ນ ຫລືໃຫ້ສັດຕະຍາບັນ, ຊ່ວຍໃຫ້ເຂົາເຈົ້າເຫັນໄດ້ລະດັບຄວາມໄວ້ວາງໃຈເພື່ອສູ້ຊົນ, ຝືກຝົນຫລໍ່ຫລອມ, ຍົກສູງຄວາມຮັບຜິດຊອບ ແລະ ປະສິດທິຜົນການເຄື່ອນໄຫວວຽກງານຂອງຕົນ. ຕາມທ່ານ ດີງຊວນຖາວ, ສສຊ ນະຄອນຮ່າໂນ້ຍແລ້ວ,ວຽກງານນີ້ແມ່ນສຳຄັນທີ່ສຸດໃນຊີວິດດ້ານການເມືອງຂອງປະເທດຊາດ.
“ໃນລັດຖະທຳມະນູນ 1992 ແລະ ໃນກົດໝາຍວ່າດ້ວຍການຕິດຕາມກວດກາປີ 2003 ໄດ້ກຳນົດວ່າ: ສະພາແຫ່ງຊາດມີສິດປ່ອນບັດໄວ້ວາງໃຈສຳລັບບັນດາຕຳແຫນ່ງໂດຍສະພາແຫ່ງຊາດເລືອກຕັ້ງ, ໃຫ້ສັດຕະຍາບັນ ແຕ່ຄວາມຈິງບໍ່ທັນປະຕິບັດໄດ້. ຄັ້ງນີ້ ບົນພື້ນຖານມະຕິສູນກາງພັກຄັ້ງທີ 4 ກ່ຽວກັບການກໍ່ສ້າງ ປັບປຸງພັກ ມີຮູບການລົງຄະແນນສຽງໄວ້ວາງໃຈ. ບົນພື້ນຖານມະຕິເລກທີ 35 ຂອງສະພາແຫ່ງຊາດທີ່ກອງປະຊຸມສະໄຫມສາມັນເທີ່ອທີ 4 ສະພາແຫ່ງຊາດຫວຽດນາມຊຸດທີ 13, ຂ້າພະເຈົ້າເຫັນວ່າ ການເຄື່ອນໄຫວນີ້ແມ່ນມີຄວາມໝາຍທີ່ສຸດ. ນີ້ແມ່ນການເຄື່ອນໄຫວຕິດຕາມກວດກາຂອງສະພາແຫ່ງຊາດ, ຮຽກຮ້ອງ ສສຊ ແຕ່ລະທ່ານຕ້ອງສະແດງບົດບາດຄວາມຮັບຜິດຊອບຂອງຕົນຢ່າງສູງສຸດຕໍ່ຜູ້ມີສິດເລືອກຕັ້ງໃນທົ່ວປະເທດ ເພື່ອພີຈາລະນາຢ່າງພາວະວິໄສ ແນໃສ່ຕີລາຄາພະນັກງານ, ເພື່ອໃຫ້ເຂົາເຈົ້າເສີມຂະຫຍາຍດ້ານດີ, ແລະ ແກ້ໄຂດ້ານອ່ອນ”.
ການລົງຄະແນນສຽງໄວ້ວາງໃຈແມ່ນວຽກງານທີ່ສະພາແຫ່ງຊາດປະຕິບັດເປັນຄັ້ງທຳອິດ ສະນັ້ນໄດ້ຮັບການກະກຽມຢ່າງເຂັ້ມງວດ, ລອບຄອບຖິ່ຖ້ວນ, ປະຕິບັດຕາມຂັ້ນຕອນ, ລະບຽບການຢ່າງແຫນ້ນແຟ້ນ. ທ່ານ ຫງວຽນແຫ້ງຟຸກ, ຫົວຫນ້າຫ້ອງວ່າການສະພາແຫ່ງຊາດໃຫ້ຮູ້ວ່າ:
“ນີ້ເປັນຄັ້ງທຳອິດທີ່ພວກເຮົາປະຕິບັດຂັ້ນຕອນນີ້. ການລົງຄະແນນສຽງໄວ້ວາງໃຈຢ່າງພາວະວິໄສ ແລະ ເພື່ອຜົນປະໂຫຍດສ່ວນລວມແມ່ນບັນຫາທີ່ພວກຂ້າພະເຈົ້າເອົາໃຈໃສ່. ສະພາແຫ່ງຊາດໄດ້ຮຽກຮ້ອງຜູ້ຖືກລົງຄະແນນສຽງໄວ້ວາງໃຈຕ້ອງມີບົດລາຍງານອະພິປາຍກ່ຽວກັບໝາກຜົນແຫ່ງການປະຕິບັດງານ, ກ່ຽວກັບຄຸນສົມບັດ, ກິລິຍາທ່າທາງຂອງຕົນ. ແລະ ບົດລາຍງານດັ່ງກ່າວກໍໄດ້ສົ່ງເຖິງ ສສຊ ກ່ອນ 20 ມື້ ຕາມຂັ້ນຕອນຂອງມະຕິເລກທີ 35 ຂອງສະພາແຫ່ງຊາດ ກ່ຽວກັບການລົງຄະແນນສຽງໄວ້ວາງໃຈສຳລັບຜູ້ດຳລົງຕຳແຫນ່ງໂດຍສະພາແຫ່ງຊາດ,ສະພາປະຊາຊົນເລືອກຕັ້ງຫລືໃຫ້ສັດຕະຍາບັນ. ນອກຈາກບົດລາຍງານແລ້ວ, ບັນດາ ສສຊ ກໍອີງໃສ່ໝາກຜົນແຫ່ງການຕິດຕາມກວດກາຂອງສະພາຊົນເຜົ່າ, ບັນດາກຳມາທິການຂອງສະພາແຫ່ງຊາດກ່ຽວກັບຂົງເຂດຕ່າງໆຊື່ງບັນດາທ່ານທີ່ໄດ້ຮັບການລົງຄະແນນສຽງໄວ້ວາງໃຈຄັ້ງນີ້ຮັບຜິດຊອບ. ນອກນັ້ນ ສສຊ ຍັງອີງໃສ່ໝາກຜົນຕົວຈິງຂອງການປະຕິບັດງານ ແລະ ຄຳເຫັນຈາກປະຊາຊົນ.”
ການນຳພັກ, ແນວໂຮມປະເທດຊາດ, ກອງທັບປ່ອນບັດໄວ້ວາງໃຈ
ພາບປະກອບ:internet
|
ຄຽງຄູ່ກັບການກະກຽມຂອງບັນດາອົງການກ່ຽວຂ້ອງ, ສສຊ ແຕ່ລະທ່ານກໍເປັນເຈົ້າການໃນການຄົ້ນຄ້ວາເພື່ອປະຕິບັດຫນ້າທີ່ຄວາມຮັບຜິດຊອບຂອງຜູ້ຕາງຫນ້າໃຫ້ແກ່ຜູ້ມີສິດເລືອກຕັ້ງໃນທົ່ວປະເທດ. ທ່ານ ເຢືອງຮ່ວາງເຮືອງ, ສສຊ ແຂວງ ຟູທໍ້ ໃຫ້ຮູ້ວ່າ:
“ສສຊ ໄດ້ຮັບຂໍ້ມູນຂ່າວສານຫລາຍຢ່າງ, ມີບາງຂໍ້ມູນຂ່າວສານໂດຍບັນດາອົງການກ່ຽວຂ້ອງສະຫນອງຄື: ຄະນະປະຈຳສະພາແຫ່ງຊາດ, ບັນດາອົງການຂອງສະພາແຫ່ງຊາດ, ບັນດາອົງການຂອງລັດຖະບານ, ບັນດາຜູ້ຈະໄດ້ຮັບການລົງຄະແນນສຽງໄວ້ວາງໃຈ ແລະ ບັນດາ ສສຊ. ຂ້າພະເຈົ້າເອງກໍຮັບເອົາຂໍ້ມູນຈາກບັນດາແຫລ່ງຂໍ້ມູນຂ່າວສານທີ່ແຕກຕ່າງກັນ. ຂ້າພະເຈົ້າຈະພະຍາຍາມສະແດງຄວາມຮັບຜິດຊອບຂອງຕົນເພື່ອໄຈ້ແຍກ, ຄັດເລືອກຂໍ້ມູນຂ່າວສານເພ່ືອຕີລາຄາຢ່າງພາວະວິໄສທີ່ສຸດ, ຊື່ຕົງທີ່ສຸດສຳລັບ ສສຊ ແຕ່ລະທ່ານ.”
ການລົງຄະແນນສຽງໄວ້ວາງໃຈບໍ່ພຽງແຕ່ຍົກສູງປະສິດທິຜົນການຕິດຕາມກວດກາຂອງສະພາແຫ່ງຊາດສຳລັບບັນດາຕຳແຫນ່ງໂດຍສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນເທົ່ານັ້ນ ຫາກຍັງຕອບສະຫນອງຄວາມຸ້ງມາດປາດຖະຫນາຂອງຜູ້ມີສິດເລືອກຕັ້ງອີກດ້ວຍ. ທ່ານນາງ ເຈີນຮົ່ງທຳ, ສສຊ ນະຄອນ ເກີນເທີ ແບ່ງປັນວ່າ:
“ບັ້ນລົງຄະແນນສຽງໄວ້ວາງໃຈເປັນຄັ້ງທຳອິດຊື່ງສະພາແຫ່ງຊາດປະຕິບັດ ສະນັ້ນ ຄວາມສົນໃຈ ແລະ ມຸ້ງຫວັງ ຂອງຜູ້ມີສິດເລືອກຕັ້ງແມ່ນໃຫຍ່ຫລວງ. ຂ້າພະເຈົ້າຄິດວ່າ ຄວາມມຸ້ງຫວັງນັ້ນບໍ່ແມ່ນຄວາມກົດດັນສຳລັບການລົງຄະແນນສຽງໄວ້ວາງໃຈກໍຄືສຳລັບຕຳແຫນ່ງຖືກລົງຄະແນນສຽງໄວ້ວາງໃຈ ຫາກແມ່ນກາລະໂອກາດເພື່ອໃຫ້ບັນດາທ່ານຖືກລົງຄະແນນສຽງໄວ້ວາງໃຈທົບທວນຄືນໝາກຜົນທີ່ີຕົນເອງບັນລຸໄດ້ໃນໄລຍະຜ່ານມາ ເພື່ອມີການປັບປຸງໃນໄລຍະຈະມາເຖິງ.”
ເປັນຄັ້ງທຳອິດພາຍຫລັງ 60 ປີແຫ່ງການສ້າງຕັ້ງ, ສະພາແຫ່ງຊາດຫວຽດນາມ ດຳເນີນການລົງຄະແນນສຽງໄວ້ວາງໃນສຳລັບ 47 ຕຳແຫນ່ງຊື່ງສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນ, ອັນໄດ້ເປີດຫນ້າໃຫມ່ໃນການເຄື່ອນໄຫວຂອງກອງປະຊຸມຂອງສະພາແຫ່ງຊາດ ພ້ອມທັງສະແດງໃຫ້ເຫັນຄວາມຕັດສິນໃຈຂອງລັດໃນການສ້າງຖັນແຖວພະນັກງານການນຳທີ່ມີກຳລັງຄວາມສາມາດ ແລະ ມີອິດທິພົນຊື່ສຽງ.