(vovworld) - ປີ 2012 ລັດຖະບານຫວຽດນາມ ຢືນຢັນຈະ ຕັດສິນໃຈດັດປັບດັດຊະນີໄພເງິນເຟີ້ລົງລະດັບຫນຶ່ງຕົວເລກ, ຮັກສາເສດຖະກິດມະຫາພາກເປັນປົກກະຕິ, ຫລຸດຜ່ອນອັດຕາດອກເບ້ຍກູ້ຢືມລົງເທື່ອລະກ້າວ ພ້ອມທັງມີບັນດານະໂຍບາຍພາສີອາກອນ, ຄ່າທຳນຽມຢ່າງເໝາະສົມ ເພື່ອຊຸກຍູ້ການຜະລິດດຳເນີນທຸລະກິດ. ບັນດາມາດຕະການລະອຽດເພື່ອປະຕິບັດບັນດາຈຸດໝາຍນີ້ ຖືກຍົກອອກມາທີ່ການປະຊຸມຂ່າວພາຍຫລັງກອງປະຊຸມປະຈຳເດືອນ 1/2012 ຊຶ່ງດຳເນີນໄປໃນທ້າຍອາທິດຜ່ານມາ.
ຕາມທ່ານ ຫວູດຶກດາມ, ລັດຖະມົນຕີ ຫົວຫນ້າຫ້ອງວ່າການລັດຖະບານຫວຽດນາມແລ້ວ, ຄາດໝາຍຂອງລັດຖະບານຖືກວາງອອກໃນສະພາບການເສດຖະກິດປີ 2012 ຍັງສືບຕໍ່ປະສົບກັບຄວາມຫຍຸ້ງຍາກ, ຊ້ຳບໍ່ໜຳອາດຈະຫຍຸ້ງຍາກກວ່າປີ 2011. ສິ່ງດັ່ງກ່າວໝາຍຄວາມວ່າ ບັນດາສິ່ງທ້າທາຍທີ່ວາງອອກໃຫ້ຫວຽດນາມແມ່ນໃຫຍ່ຫລວງກວ່າ, ເປັນຕົ້ນແມ່ນບັນດາຂົງເຂດດຶງດູດເງິນລົງທຶນ ໂດຍກົງຈາກຕ່າງປະເທດ (FDI), ການສົ່ງອອກ, ການທ່ອງທ່ຽວ. ເຖິງຢ່າງໃດກໍຕາມ, ຕາມທ່ານລັດຖະມົນຕີ ຫວູດຶກດາມແລ້ວ, ນີ້ບໍ່ແມ່ນສິ່ງບັງເອີນ. ເພາະສະນັ້ນ ທີ່ກອງປະຊຸມຄັ້ງນີ້ ລັດຖະບານກໍຮັບຮູ້ວ່າໃນໄລຍະຕົ້ນປີ ຈະຕັດສິນໃຈຕິດຕາມບັນດາມາດຕະການ ແລະ ຄາດໝາຍທີ່ໄດ້ວາງອອກຢ່າງໃກ້ຊິດ.
“ຫວຽດນາມ ຈະຢືດໝັ້ນຈຸດໝາຍຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້ ແລະ ຢືນຢັນຄວາມຕັດສິນໃຈເຮັດໃຫ້ໄພເງິນເຟີ້ຫລຸດລົງລະດັບ 1 ຕົວເລກ. ພ້ອມກັນນັ້ນ ການຜະລິດເສດຖະກິດຕ້ອງມີການເຕີບໂຕຢູ່ລະດັບເໝາະສົມ, ຢ່າງຫນ້ອຍສຸດໃຫ້ເເທົ່າທຽມກັບປີ 2011 ຫລືຫລາຍກວ່າ. ນັ້ນກໍແມ່ນສ່ວນຫນຶ່ງເພື່ອຮັກສາເສດຖະກິດມະຫາພາກເປັນປົກກະຕິ. ໄປຄຽງຄູ່ກັນນັ້ນ ແມ່ນຄວາມສາມາດການຊຳລະ, ອັດຕາດອກເບ້ຍ, ບັນດານະໂຍບາຍເພື່ອຊ່ວຍບັນດາກຸ່ມວິສາຫະກິດ.”
ຫນຶ່ງໃນບັນດາມາດຕະການສຳຄັນ ເພື່ອຮັກສາເສດຖະກິດມະຫາພາກເປັນປົກກະຕິ ຊຶ່ງຖືກຍົກອອກທີ່ການປະຊຸມຂ່າວ ນັ້ນແມ່ນ ເລື່ອງຮັບປະກັນຄວາມສາມາດການຊຳລະຂອງລະບົບທະນາຄານ ແລະ ແກ້ໄຂບັນຫານີ້ໃນຂັ້ນພື້ນຖານນັບແຕ່ຕົ້ນເດືອນມີນາປີ 2012. ໄປຄຽງຄູ່ກັນນັ້ນ ແມ່ນຜັນຂະຫຍາຍການປະຕິບັດມາດຕະການຕ່າງໆຢ່າງມີປະສິດທິຜົນ ເພື່ອຫລຸດຜ່ອນອັດຕາດອກເບ້ຍທະນາຄານ, ຮັກສາອັດຕາແລກປ່ຽນເງິນຕາໃຫ້ເປັນປົກກະຕິ. ຕາມທ່ານນາງ ຫງວຽນທິຮົ່ງ, ຫົວຫນ້າກົມນະໂຍບາຍເງິນຕາ ສັງກັດທະນາຄານແຫ່ງລັດຫວຽດນາມແລ້ວ, ພາຍຫລັງບຸນປີໃຫມ່ປະຈຳຊາດ, ແຫລ່ງເງິນໄດ້ກັບຕ່າວຄືນສູ່ລະບົບທະນາຄານ ແລະ ປະຈຸບັນ ບັນດາອົງການສິນເຊື່ອເງິນຫລາຍພໍສົມຄວນສາມາດຮັບປະກັນໃຫ້ແກ່ການຊຳລະ. ທ່ານນາງ ຫງວຽນທິຮົ່ງກໍໃຫ້ຮູ້ບາງມາດຕະການຢ່າງລະອຽດ ຊຶ່ງທະນາຄານຈະປະຕິບັດໃນໄລຍະຈະມາເຖິງ.
“ໃນວິວັດການຊຳລະໃນໄຕມາດ 1, ປະຈຸບັນ ທະນາຄານແຫ່ງລັດ ໄດ້ສຸມໃສ່ປະຕິບັດຫລາຍມາດຕະການ. ແລະໃນເດືອນ 2 ຈະມີຄຳສັ່ງຊີ້ນຳບັນດາອົງການສິນເຊື່ອປະຕິບັດບັນດາມາດຕະການ ຊຶ່ງລັດຖະບານໄດ້ວາງອອກ ແລະ ອົງການສິນເຊື່ອເອງກໍຈະສ້າງໂຄງປະກອບບັນຊີລາຍຊື່ຊັບສິນຂອງຕົນຄືນໃຫມ່. ກ່ຽວກັບວິວັດການຫລຸດຜ່ອນອັດຕາດອກເບ້ຍ, ແຜນນະໂຍບາຍນັ້ນແມ່ນ ພວກເຮົາອາດຈະຫລຸດຜ່ອນອັດຕາດອກເບ້ຍລົງ ເພາະວ່າ ໃນຊຸມເດືອນທ້າຍປີ 2011 ໄພເງິນເຟີ້ໄດ້ຫລຸດລົງ, ພິເສດ ໃນເດືອນ 1/2012 ໄພເງິນເຟີ້ພຽງເພີ່ມຂຶ້ນ 1%. ເຖິງຢ່າງໃດກໍຕາມ, ການກຳນົດເວລາ ແລະ ລະດັບຫລຸດອັດຕາດອກເບ້ຍ ຕ້ອງສືບຕໍ່ຕິດຕາມກວດກາ ແລະ ຕາມວິວັດການຊຳລະຂອງອົງການສິນເຊື່ອ.”
ຊຸກຍູ້ການສົ່ງອອກຜະລິດຕະພັນກະເສດ
(ພາບ:kinhtenongthon.com.vn)
ແລະກໍໃນປີ 2012, ລັດຖະບານຈະສືບຕໍ່ຍູ້ແຮງເລື່ອງສ້າງໂຄງປະກອບເສດຖະກິດຄືນໃຫມ່. ຕາມທ່ານ ລັດຖະມົນຕີ ຫວູດຶກດາມ ແລ້ວ, ໃນການສ້າງພື້ນຖານເສດຖະກິດຄືນໃຫມ່, ຄຽງຂ້າງການສຸມໃສ່ສ້າງໂຄງປະກອບການລົງທຶນຂອງລັດ, ໂຄງປະກອບທະນາຄານຄືນໃຫມ່ແລ້ວ, ລັດຖະບານຈະເອົາໃຈໃສ່ເຖິງການສ້າງໂຄງປະກອບລັດວິສາຫະກິດຄືນໃຫມ່. ນີ້ແມ່ນວຽກງານທີ່ລັດຖະບານຫວຽດນາມ ໄດ້ປະຕິບັດໃນຫລາຍປີ ແລະ ໄລຍະຈະມາເຖິງ ຈະສືບຕໍ່ປະຕິບັດຕາມວິວັດການດ້ວຍມາດຕະການລະອຽດພໍສົມຄວນ.
“ທີຫນຶ່ງ, ລັດວິສາຫະກິດ ຄວນສຸມໃສ່ເຂົ້າໃນບັນດາຂະແຫນງອາຊີບ ເຮັດແນວໃດໃຫ້ເປັນເຄື່ອງມືເພື່ອຊ່ວຍກຳນົດທິດພັດທະນາເສດຖະກິດ. ທີສອງ ແມ່ນຍົກສູງກຳລັງຄວາມສາມາດບໍລິຫານຂອງວິສາຫະກິດ. ທີສາມ ແມ່ນບັນຫາບໍລິຫານຂອງລັດ ຕໍ່ກັບ ວິສາຫະກິດ. ລັດຖະບານ ຈະຊີ້ນຳຕາມທິດ ລັດວິສາຫະກິດບໍ່ຈຳຕ້ອງດຳເນີນທຸລະກິດໃນຫລາຍຂົງເຂດ ຫາກພຽງແຕ່ສຸມໃສ່ບັນດາຂົງເຂດທີ່ມີປະສິດທິຜົນເທົ່ານັ້ນ. ເລື່ອງສ້າງໂຄງປະກອບລັດວິສາຫະກິດຄືນໃຫມ່ຈະສືບຕໍ່ໄດ້ຮັບການປະຕິບັດ.”
ອາດເວົ້າໄດ້ວ່າ ບັນດາສິ່ງທ້າທາຍດ້ານເສດຖະກິດທີ່ວາງອອກໃຫ້ລັດຖະບານຫວຽດນາມ ໃນປີ 2012 ນັ້ນບໍ່ແມ່ນຫນ້ອຍ. ເລື່ອງສຳເລັດຈຸດໝາຍຮັກສາໄພເງິນເຟີ້ໃຫ້ຢູ່ໃນລະດັບ 1 ຕົວເລກ ກໍຄືການຮັກສາເສດຖະກິດມະຫາພາກໃຫ້ ເປັນປົກກະຕິ ແມ່ນບັນດາຫນ້າທີ່ບໍ່ງ່າຍດາຍ, ແຕ່ເຖິງຢ່າງໃດກໍຕາມ ດ້ວຍຄວາມຕັດສິນໃຈ ແລະ ການເປັນເຈົ້າການໃນບັນດາການເຄື່ອນໄຫວຂອງບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆ, ນັບແຕ່ຕົ້ນປີ, ບັນດາຈຸດໝາຍນີ້ ສາມາດຈະເປັນໄປໄດ້./.
ເວີນ