(vovworld)-ມີຫລາຍມາດຕະການກ່ຽວກັບການປະຕິບັດກົນໄກລາຄາໃນທ້ອງຕະຫລາດ, ແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບກໍຄືຮັບປະກັນການດຸນດຽງລະຫວ່າງລາຍຮັບ ລາຍຈ່າຍງົບປະມານ ໂດຍແມ່ນບັນດາສະມາຊິກຄະນະລັດຖະບານສະເຫນີໃນກອງປະຊຸມປະຈຳເດືອນ 9 ຂອງລັດຖະບານໃນວັນທີ 29/9. ບັນດາຂໍ້ສະເຫນີດັ່ງກ່າວແມ່ນມຸ່ງໄປເຖິງຈຸດໝາຍຊ່ວຍພື້ນຖານເສດຖະກິດຫວຽດນາມ ຟື້ນຟູຢ່າງວ່ອງໄວ ແລະ ໝັ້ນຄົງກວ່າ ໃນສະພາບຍັງມີເວລາພຽງ 3 ເດືອນ ອີກກໍຈະໝົດປີ 2013.
ກອງປະຊຸມປະຈຳເດືອນ 9 ຂອງລັດຖະບານຫວຽດນາມ
ພາບ:chinhphu.vn
|
ກ່ອນອື່ນໝົດຕ້ອງຢັ້ງຢືນວ່າ: ເສດຖະກິດ ສັງຄົມ ສືບຕໍ່ພັດທະນາຕາມທ່ວງທ່າທີ່ດີໃນທຸກດ້ານ. ເຖິງຢ່າງໃດກໍຕາມ, ລະດັບການເຕີບໂຕບໍ່ທັນບັນລຸລະດັບເທົ່າທີ່ຄວນ . ການຟື້ນຕົວຂອງພື້ນຖານເສດຖະກິດຍັງຊັກຊ້າຢູ່ ບໍ່ທັນໝັ້ນແກ່ນປານໃດ. ລາຍຮັບງົບປະມານບັນລຸລະດັບຕ່ຳກວ່າເມື່ອທຽບໃສ່ແຜນການ. ຕະຫລາດ ແລະ ກຳລັງຊື້ມີການຫັນປ່ຽນແຕ່ຍັງຊັກຊ້າ ແລະ ຕ່ຳກວ່າເມື່ອທຽບໃສ່ໄລຍະດຽວກັນຂອງປີກາຍ, ໃນຂະນະນັ້ນ ການເຄື່ອນໄຫວຜະລິດດຳເນີນທຸລະກິດຍັງປະສົບກັບຄວາມຫຍຸ້ງຍາກຫລາຍຢ່າງ. ຈຳນວນວິສາຫະກິດຢຸດຕິການເຄື່ອນໄຫວຊົ່ວຄາວຍັງຫລາຍຢູ່.
ໃນສະພາບດັ່ງກ່າວ, ລັດຖະບານ ຄວນບໍລິຫານການປະຕິບັດການປະຢັດ, ຕ້ານການຟຸມເຟືອຍຢ່າງຂ້ຽວຂາດກວ່າ. ພ້ອມກັບການປະກາດໃຊ້ນະໂຍບາຍຫລຸດຜ່ອນ, ຕໍ່ກຳນົດເວລາ ເກັບອາກອນ, ໂຈະການເກັບອາກອນເພື່ອກະຕຸກຊຸກຍູ້ການລົງທຶນ, ພັດທະນາການຜະລິດດຳເນີນທຸລະກິດ ຕ້ອງປັບໄຫມລົງໂທດຢ່າງເຂັ້ມງວດບັນດາກໍລະນີ ຫນີ, ສໍ້ໂກງພາສີອາກອນ. ພິເສດ ຕ້ອງສືບຕໍ່ປະຕິບັດກົນໄກລາຄາໃນທ້ອງຕະຫລາດສຳລັບບັນດາປະເພດສິນຄ້າສົ້ນເຂົ້າທີ່ຈຳເປັນຄື: ນ້ຳມັນ, ໄຟຟ້າ. ທ່ານ ດີງລາທັງ, ລັດຖະມົນຕີກະຊວງຄົມມະນາຄົມຂົນສົ່ງ ຫວຽດນາມ ສະເຫນີວ່າ:
“ຂ້າພະເຈົ້າສະເຫນີ ຕ້ອງເດັດດ່ຽວປະຕິບັດຕາມລາຄາໃນທ້ອງຕະຫລາດຄື: ລາຄາອາຍແກສ, ກຸ່ມບໍລິສັດນ້ຳມັນອາຍແກສ. ຖ້າພວກເຮົາປະຕິບັດຢ່າງເຂັ້ມງວດ ແຕ່ລະປີ ພວກເຮົາສາມາດສ້າງລາຍຮັບງົບປະມານຕື່ມອີກ ນັບໝື່ນຕື້ດົ່ງຈາກຂົງເຂດອາຍແກສ.”
ກ່ຽວກັບບັນດາມາດຕະການແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ, ທ່ານ ຈີ້ງດີງຢູງ, ລັດຖະມົນຕີກະຊວງກໍ່ສ້າງຫວຽດນາມ ເນັ້ນຫນັກວ່າ: ບັນດາທ້ອງຖິ່ນຄວນປະຕິບັດການຫັນບັນດາໂຄງການເຮືອນຢູ່ການຄ້າເປັນເຮືອນຢູ່ສັງຄົມຢ່າງຂ້ຽວຂາດກວ່າ, ແກ້ໄຂຫນີ້ຄ້າງໃນການກໍ່ສ້າງພື້ນຖານຢ່າງມີປະສິດທິຜົນ, ຍູ້ແຮງການປ່ອຍບ້ວງເງິນຫນູນຊ່ວຍ 30.000 ຕື້ດົ່ງ ໃຫ້ຖືກກັບເປົ້າໝາຍ, ຜ່ານນັ້ນປະກອບສ່ວນກະຕຸກຊຸກຍູ້ການເຕີບໂຕ, ພັດທະນາເສດຖະກິດ. ທ່ານລັດຖະມົນຕີ ຈີ້ງດີງຢູງ ກໍຖືວ່າ: ຄວນກວດກາຄືນຂອບຂະຫນາດເງິນລົງທຶນເຂົ້າບັນດາໂຄງການເພື່ອຄວບຄຸມເງິນລົງທຶນຂອງລັດໃນການກໍ່ສ້າງໃຫ້ດີກວ່າ, ຫລີກລ້ຽງການລົງທຶນກະແຈກກະຈາຍ, ນີ້ກໍແມ່ນພື້ນຖານເພື່ອແກ້ໄຂສະພາບຫນີ້ຄ້າງໃນການກໍ່ສ້າງພື້ນຖານຢ່າງມີປະສິດທິຜົນ.
“ຂ້າພະເຈົ້າສະເຫນີ ສືບຕໍ່ກວດກາຄືນບັນດາໂຄງການລົງທຶນຢູ່ສູນກາງ ແລະ ທ້ອງຖິ່ນ. ວຽກງານນີ້ຕ້ອງມີການສົມທົບລະຫວ່າງບັນດາກະຊວງສະເພາະຂະແຫນງກ່ຽວກັບການກໍ່ສ້າງ ເພື່ອສຳຫລວດກວດຄືນ. ບັນດາໂຄງການໃດບໍ່ທັນຈຳເປັນ ເຖິງວ່າໄດ້ລົງທຶນແລ້ວ ກໍສາມາດຢຸດຕິໄວ້ຊົ່ວຄາວໄດ້ ແລະ ກວດກາຄືນບັນດາໂຄງການ ຄວນສືບຕໍ່ປະຕິບັດ, ຊ້ຳບໍ່ຫນຳ ບັນດາໂຄງການ ພວມກໍ່ສ້າງກໍສາມາດປັບປຸງຍົກເລີກໄດ້.”
ກ່ຽວກັບຂົງເຂດເງິນຕາ ທະນາຄານ ທ່ານ ດີງຕຽນຢູງ ລັດຖະມົນຕີກະຊວງການເງິນ ກໍໄດ້ສະເຫນີໃຫ້ທະນາຄານແຫ່ງລັດ ພ້ອມກັບບັນດາກະຊວງ, ຂະແຫນງການກ່ຽວຂ້ອງສົມທົບກັນຢ່າງແຫນ້ນແຟ້ນກັບກະຊວງການເງິນເພື່ອປະຕິບັດຫນ້າທີ່ການເງິນ ງົບປະມານຢ່າງມີປະສິດທິຜົນ, ຮັບປະກັນຄວາມດຸນດຽງລະຫວ່າງລາຍຮັບລາຍຈ່າຍງົບປະມານຕາມແຜນການທີ່ວາງອອກ, ຮັກສາລະດັບລາຍຈ່າຍເກີນດຸນຂອງທັງປີຄືໄດ້ຮັບການຮັບຮອງເອົາ ເພື່ອຫລີກລ້ຽງສະພາບລົງທຶນກະແຈກກະຈາຍ, ກໍ່ສະພາບຫນີ້ຄ້າງ, ຮົ່ວໄຫລ, ຟຸມເຟືອຍ.
ກ່ຽວຂ້ອງເຖິງວິວັດການຍູ້ໄວການສ້າງໂຄງປະກອບລັດວິສາຫະກິດຄືນໃຫມ່, ທ່ານ ຫວູດືກດາມ ລັດຖະມົນຕີ, ຫົວຫນ້າຫ້ອງວ່າການລັດຖະບານ ໃຫ້ຮູ້ວ່າ: ປະຈຸບັນ ລັດຖະບານ ພວມປະຕິບັດບາດກ້າວຕ່າງໆຢ່າງຂ້ຽວຂາດເພື່ອຍູ້ແຮງການຫັນບັນດາລັດວິສາຫະກິດເປັນຫຸ້ນສ່ວນ ຕາມທິດໂປ່ງໃສ ເປີດເຜີຍ ແລະ ປະຕິບັດຕາມມາດຖານລວມຂອງສາກົນ.
“ມີຫລາຍຮູບການວິສາຫະກິດ ລັດບໍ່ຈຳເປັນຖືຫຸ້ນເປັນສ່ວນຫລາຍ ແຕ່ໃນບັນດາຂໍ້ຕົກລົງສຳຄັນສຳລັບວິສາຫະກິດນັ້ນ ເຂົາເຈົ້າຍັງລະບຸໄວ້ໃນຂໍ້ກຳນົດ, ຊ້ຳບໍ່ຫນຳແມ່ນໃນກົດໝາຍທີ່ວ່າ ເຖິງວ່າລັດຖືຫຸ້ນພຽງ 1% ເທົ່ານັ້ນ, ລັດຍັງຄົງມີສິດຕັດສິນຊີ້ຂາດ. ພວກເຮົາປະຕິບັດການຫັນລັດວິສາຫະກິດເປັນຫຸ້ນສ່ວນ ບໍ່ແມ່ນໄປຝືນກັບການກຳນົດທິດ, ບໍ່ໄປຝືນກັບໂຄງການການເມືອງ ແລະ ຮ່າງລັດຖະທຳມະນູນປີ 1992 ສະບັບປັບປຸງ ຫາກພຽງເຮັດໃຫ້ລັດວິສາຫະກິດເຄື່ອນໄຫວຢ່າງມີປະສິດທິຜົນກວ່າ, ຮັບປະກັນພາລະບົດບາດສຳຄັນແມ່ນນຳພາພື້ນຖານເສດຖະກິດ”
ການຜັນຂະຫຍາຍບັນດາມາດຕະການຢ່າງຄົບຊຸດ ໂດຍບັນດາສະມາຊິກລັດຖະບານສະເຫນີ ຈະປະກອບສ່ວນຕັ້ງຫນ້າໃຫ້ແກ່ການປະຕິບັດສຳເລັດບັນດາຈຸດໝາຍຊື່ງສະພາແຫ່ງຊາດໄດ້ວາງອອກໃຫ້ປີ 2013 ເວົ້າລວມ ແລະ ຍູ້ແຮງຄວາມຄືບຫນ້າການຟື້ນຕົວພື້ນຖານເສດຖະກິດຫວຽດນາມເວົ້າສະເພາະ.