(vovworld) - ບົດລາຍງານຂອງລັດຖະບານກ່ຽວກັບສະພາບການເສດຖະກິດ - ສັງຄົມປີ 2016 ແລະ ແຜນການປີ 2017 ໂດຍທ່ານນາຍົກລັດຖະມົນຕີ ຫງວຽນຊວນຟຸກ ລາຍງານທີ່ວາລະໄຂກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຫວຽດນາມ ຊຸດທີ 14 ໃນຕອນເຊົ້າວັນທີ 20/10, ໄດ້ເນັ້ນໜັກວ່າ, ເຖິງວ່າໄດ້ປະສົບກັບຄວາມຫຍຸ້ງຍາກຫຼາຍຢ່າງໃນໄລຍະຜ່ານມາກໍ່ຕາມ, ແຕ່ ຫວຽດນາມ ຍັງຄົງບັນລຸໄດ້ຜົນງານທີ່ສຳຄັນໃນທຸກຂົງເຂດ. ສິ່ງດັ່ງກ່າວສະແດງໃຫ້ເຫັນຄວາມມານະພະຍາຍາມຢ່າງໃຫຍ່ຫຼວງຂອງທົ່ວພັກ, ທົ່ວປວງຊົນ ແລະ ທົ່ວກອງທັບ. ດ້ວຍບັນດາຜົນງານທີ່ບັນລຸໄດ້ໃນປີ 2016, 2017, ຫວຽດນາມຈະມານະພະຍາຍາມຈົນສຸດຄວາມສາມາດຂອງຕົນ ເພື່ອບັນລຸຜົນງານປະທັບໃຈກວ່າໃນການພັດທະນາເສດຖະກິດ.
ປີ 2016, ຄຽງຂ້າງບັນດາຄວາມສະດວກ, ຫວຽດນາມຕ້ອງປະເຊີນໜ້າກັບຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ. ສະພາບການຢູ່ທະເລຕາເວັນອອກສັບສົນ. ການປ່ຽນແປງຂອງດິນຟ້າອາກາດໄດ້ປະກົດອອກໄວກວ່າການຄາດຄະເນ. ໄພທຳມະຊາດເກີດຂຶ້ນຢູ່ພາກເໜືອ, ທິດໃຕ້ພາກກາງ, ເຂດ ໄຕງວຽນ, ເຂດທົ່ງພຽງແມ່ນ້ຳຂອງ ແລະ ສະພາບມົນລະພິດສິ່ງແວດລ້ອມຢູ່ທະເລທີ່ຂຶ້ນກັບ 4 ແຂວງທາງພາກກາງ, ສິ່ງດັ່ງກ່າວໄດ້ສົ່ງຜົນສະທ້ອນເຖິງເສດຖະກິດ - ສັງຄົມຂອງປະເທດຊາດ. ເຖິງຢ່າງໃດກໍ່ຕາມ, ດ້ວຍຄວາມມານະພະຍາຍາມຂອງທັງລະບົບການການເມືອງ, ສະພາບເສດຖະກິດ - ສັງຄົມຂອງ ຫວຽດນາມ ຍັງຄົງບັນລຸຜົນງານທີ່ສຳຄັນໃນເກືອບທຸກຂົງເຂດ.
ປີ 2016: ເສດຖະກິດມະຫາພາກມີຄຄວາມສະຫງົບ, ຄວາມສົມດຸນພື້ນຖານໄດ້ຮັບປະກັນ
ເພື່ອບັນລຸໄດ້ຜົນງານດັ່ງກ່າວ, ລັດຖະບານ ໄດ້ສຸມໃສ່ຊີ້ນຳ, ບໍລິຫານຢ່າງມີໄຫວພິກ, ມີການສົມທົບກັນຢ່າງແໜ້ນແຟ້ນລະຫວ່າງນະໂຍບາຍປີການເງິນ ແລະ ນະໂຍບາຍເງິນຕາ ກໍ່ຄືນະໂຍບາຍອື່ນໆ ເພື່ອຄວບຄຸມໄພເງິນເຟີ້, ຮັບປະກັນເສດຖະກິດມະຫາພາກມີສະຖຽນລະພາບ ແລະ ຊຸກຍູ້ການເຕີບໂຕ. ດັດຊະນີລາຄາໃຊ້ສອຍ (CPI) ທັງປີຄາດວ່າບັນລຸປະມານ 4%. ໜີ້ເສຍສືບຕໍ່ໄດ້ຮັບການແກ້ໄຂ ຕິດພັນກັບການຍົກສູງຄຸນນະພາບສິນເຊື່ອ, ຮັບປະກັນການຊຳລະ ແລະ ຄວາມປອດໄພໃນທົ່ວລະບົບ. ມາຮອດປະຈຸບັນ, ສິນເຊື່ອສຳລັບພື້ນຖານເສດຖະກິດເພີ່ມຂຶ້ນ 11,24%. ອັດຕາແລກປ່ຽນ ແລະ ຕະຫຼາດເງິນຕາຕ່າງປະເທດ, ຕະຫຼາດຄຳມີສະຖຽນລະພາບ; ການສະສົມເງິນຕາຕ່າງປະເທດຝາກມາບັນລຸກວ່າ 40 ຕື້ USD, ເຊິ່ງແມ່ນລະດັບສູງສຸດນັບແຕ່ກ່ອນມາຮອດປະຈຸບັນ. ລາຍຮັບງົບປະມານແຫ່ງລັດທັງປີຄາດວ່າເພີ່ມຂຶ້ນ 2,4%.
ປີ 2016, ລັດຖະບານໄດ້ສຸມໃສ່ແກ້ໄຂຄວາມຫຍຸ້ງຍາກໃຫ້ການຜະລິດດຳເນີນທຸລະກິດ, ຊຸກຍູ້ການເຕີບໂຕເສດຖະກິດ. ໃນ 9 ເດືອນ, ມີວິສາຫະກິດ 81.000 ແຫ່ງໄດ້ຮັບການສ້າງຕັ້ງໃໝ່ ແລະ ມີວິສາຫະກິດ 20.000 ກວ່າແຫ່ງສືບຕໍ່ເຄື່ອນໄຫວຄືນໃໝ່, ອັນໄດ້ສ້າງຄວາມໄວ້ເນື້ອເຊື່ອໃຈ ແລະ ບັນຍາກາດຟົດຟື້ນໃຫ້ແກ່ປະຊາຊົນ, ນັກລົງທຶນ ແລະ ວິສາຫະກິດ.
ການສ້າງໂຄງປະກອບເສດຖະກິດຄືນໃໝ່, ບັນລຸໄດ້ຜົນງານໃນເບື້ອງຕົ້ນຈຳນວນໜຶ່ງ. ເຖິງຢ່າງໃດກໍ່ຕາມ, ທ່ານນາຍົກລັດຖະມົນຕີ ຫງວຽນຊວນຟຸກ ກໍ່ໃຫ້ຮູ້ວ່າ, ການເຕີບໂຕ GDP ທັງປີ ຄາດຄະເນວ່າຈະບັນລຸລະດັບຕຳ່ກວ່າແຜນການທີ່ໄດ້ວາງອອກ (6,7%). ການສົ່ງອອກທັງປີບັນລຸລະດັບເທົ່າກັບແຜນການທີ່ໄດ້ວາງອອກ. ຕີລາຄາລວມກ່ຽວກັບສະພາບເສດຖະກິດໃນປີ 2016, ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ:
“ເຖິງວ່າຍັງປະສົບກັບຄວາມຫຍຸ້ງຍາກ, ສິ່ງຈຳກັດຫຼາຍຢ່າງ, ແຕ່ສະພາບເສດຖະກິດ - ສັງຄົມ ຫວຽດນາມສືບຕໍ່ໄດ້ຮັບການຫັນປ່ຽນຢ່າງຕັ້ງໜ້າ, ບັນລຸໄດ້ຜົນງານຮອບດ້ານພໍສົມຄວນໃນເກືອບທຸກຂົງເຂດ. ເສດຖະກິດມະຫາພາກມີສະຖຽນລະພາບ. ໄພເງິນເຟີ້ໄດ້ຮັບການຄວບຄຸມ; ການຜະລິດດຳເນີນທຸລະກິດສືບຕໍ່ໄດ້ຮັບການພັດທະນາ; ການສ້າງໂຄງປະກອບພື້ນຖານເສດຖະກິດບັນລຸໄດ້ຜົນງານຈຳນວນໜຶ່ງ; ການລົງທຶນພາກເອກະຊົນຫັນປ່ຽນຢ່າງແຮງ; ຄວາມໄວ້ເນື້ອເຊື່ອໃຈຂອງສັງຄົມ ແລະ ຕະຫຼາດເພີ່ມຂຶ້ນ. ບັນດາໃຈກາງເສດຖະກິດໃຫຍ່ສືບຕໍ່ເສີມຂະຫຍາຍບົດບາດນຳໜ້າໃນການເຕີບໂຕ, ເປັນກຳລັງໜູນພັດທະນາຂອງບັນດາເຂດໃນທົ່ວປະເທດ; ມີຫຼາຍທ້ອງຖີ່ນປະສົບກັບຄວາມຫຍຸ້ງຍາກໄດ້ມານະພະຍາຍາມບືນຕົວຂຶ້ນ“
ປີ 2017: ຮັບປະກັນເສດຖະກິດມະຫາພາກມີສະຖຽນລະພາບ, ສູ້ຊົນເພື່ອໃຫ້ GDP ເພີ່ມຂຶ້ນປະມານ 6,7%
ໂດຍປະຕິບັດຄາດໝາຍດັ່ງກ່າວ, ໜ້າທີ່ທຳອິດເຊິ່ງລັດຖະບານມີຄວາມເອົາໃຈໃສ່ເປັນພິເສດ ນັ້ນແມ່ນ ຮັບປະກັນເສດຖະກິດມະຫາພາກມີສະຖຽນລະພາບ, ຮັບປະກັນບັນດາຄວາມສົມດຸນໃຫຍ່ຂອງພື້ນຖານເສດຖະກິດ. ຕາມນັ້ນແລ້ວ, ລັດຖະບານຈະບໍລິຫານຢ່າງມີປະສິດທິຜົນ, ສົມທົບກັນຢ່າງແໜ້ນແຟ້ນລະຫວ່າງນະໂຍບາຍປີການເງິນ ແລະ ນະໂຍບາຍເງິນຕາ, ຄວບຄຸມໄພເງິນເຟີ້ຕາມຄາດໝາຍທີ່ໄດ້ວາງອອກ.
“ເປັນເຈົ້າການປະຕິບັດນະໂຍບາຍເງິນຕາ, ຢ່າງມີໄຫວພິກ, ມີປະສິດທິຜົນ; ບໍລິຫານອັດຕາດອກເບ້ຍໃຫ້ເໝາະສົມກັບການຜັນແປຂອງເສດຖະກິດມະຫາພາກ, ໄພເງິນເຟີ້ ແລະ ຕະຫຼາດເງິນຕາ; ຍົກສູງຄຸນນະພາບ ແລະ ຮັບປະກັນທຶນສິນເຊື່ອໃຫ້ພື້ນຖານເສດຖະກິດ, ໂດຍສະເພາະແມ່ນບັນດາຂົງເຂດບຸລິມາສິດ“.
ຫວຽດນາມກໍ່ຈະປະຕິບັດນະໂຍບາຍປີການເງິນຢ່າງແໜ້ນແຟ້ນ, ຮັດແໜ້ນກົດລະບຽບການເງິນ - ງົບປະມານແຫ່ງລັດ; ປະຢັດການໃຊ້ຈ່າຍຢ່າງສຸດຂີດ. ເລື່ອງຍູ້ແຮງການລະດົມບັນດາແຫຼ່ງກຳລັງໃຫ້ການລົງທຶນ, ພັດທະນາ, ໃນນັ້ນຄົ້ນຄວ້າ, ປະກາດໃຊ້ບັນດາກົນໄກ, ນະໂຍບາຍທີ່ເໝາະສົມເພື່ອລະດົມຊັບພະຍາກອນຄຳ ແລະ ເງິນຕາຕ່າງປະເທດໃນສັງຄົມ ກໍໄດ້ຮັບຄວາມເອົາໃຈໃສ່ເປັນພິເສດ. ດຶງດູດການລົງທຶນນອກປະເທດຢ່າງແຮງ, ນັບທັງ FDI ເຂົ້າຮ່ວມການພັດທະນາອົງປະກອບໂຄງລ່າງ. ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ.
“ຍູ້ແຮງການສົ່ງເສີມດ້ານການຄ້າ, ເປີດກວ້າງຕະຫຼາດສົ່ງອອກ ຕິດພັນກັບການສ້າງເຄື່ອງໝາຍການຄ້າສິນຄ້າໃຫ້ຫວຽດນາມ, ເຂົ້າຮ່ວມເຄືອຂ່າຍຜະລິດ ແລະ ລະບົບມູນຄ່າພາກພື້ນ, ທົ່ວໂລກ. ກວດກາຄືນ, ຫັນລະບຽບການຂາອອກ, ຂາເຂົ້າເປັນງ່າຍດ່າຍ, ປະຕິບັດກົນໄກປະຕູດຽວແຫ່ງຊາດຢ່າງມີປະສິດທິຜົນ. ໜູນຊ່ວຍວິສາຫະກິດເປັນເຈົ້າການໃນການເຊື່ອມໂຍງ, ເຂົ້າຮ່ວມປະຊາຄົມອາຊຽນ ແລະ ບັນດາສັນຍາການຄ້າເສລີ (FTA) ຢ່າງມີປະສິດທິຜົນ. ພັດທະນາລະບົບຂາຍຍ່ອຍ, ການຜະລິດຕິດພັນກັບການຈຳໜ່າຍສິນຄ້າພາຍໃນປະເທດ”.
ລັດຖະບານຫວຽດນາມ ກໍ່ສືບຕໍປັບປຸງສະພາບແວດລ້ອມແຫ່ງການລົງທຶນ ດຳເນີນທຸລະກິດ, ຊຸກຍູ້ການເຕີບໂຕ, ໃນນັ້ນສຸມໃສ່ສ້າງປັບປຸງກົນໄກ, ນະໂຍບາຍ, ກົດໝາຍໃຫ້ສຳເລັດ.
“ຍື່ນສະເໜີຕໍ່ສະພາແຫ່ງຊາດຮ່າງກົດໝາຍວ່າດ້ວຍໜູນຊ່ວຍວິສາຫະກິດຂະໜາດກາງ ແລະ ນ້ອຍ; ປັບປຸງກົດລະບຽບຮັບປະກັນດ້ານສິນເຊືຶ່ອ ແລະ ກອງທຶນຮັບປະກັນດ້ານສິນເຊື່ອສຳລັບວິສາຫະກິດຂະໜາດກາງ ແລະ ນ້ອຍ. ຜັນຂະຫຍາຍກົດໝາຍປັບປຸງ, ເພີ່ມເຕີມບາງຂໍ້ມາດຕາຂອງບັນດາກົດໝາຍທີ່ກ່ຽວຂ້ອງເຖິງການລົງທຶນ, ດຳເນີນທຸລະກິດ ເມື່ອສະພາແຫ່ງຊາດຮັບຮອງເອົາຢ່າງມີປະສິດທິຜົນ. ວາງອອກຄາດໝາຍຢ່າງລະອຽດສຳລັບແຕ່ລະກະຊວງ, ຂະແໜງການ, ທ້ອງຖິ່ນ, ສ້າງການຫັນປ່ຽນຢ່າງຈະແຈ້ງໃນການຈັດຕັ້ງການປະຕິບັດມະຕິເລກທີ 19 ກ່ຽວກັບການປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ຍົກສູງກຳລັງແກ່ງແຍ້ງ.”
ເລື່ອງສ້າງໂຄງປະກອບເສດຖະກິດຄືນໃໝ່ ຈະໄດ້ຮັບການດຳເນີນຢ່າງແທດຈິງ, ຕິດພັນກັບການຫັນປ່ຽນຮູບແບບການເຕີບໂຕ, ຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງ. ປະກາດໃຊ້ ແລະ ພັນຈະຫຍາຍການປະຕິບັດແຜນຮ່າງສ້າງໂຄງປະກອບລະບົບບັນດາອົງການສິນເຊື່ອຄືນໃໝ່ ຕິດພັນກັບການແກ້ໄຂໜີ້ເສຍໄລຍະ 2016 – 2020 ຢ່າງມີປະສິດທິຜົນ. ຜັນຂະຫຍາຍແຜນການສັງລວມສ້າງໂຄງປະກອບລັດວິສາຫະກິດໄລຍະ 2016 – 2020.
ປີ 2017, ຄາດຄະເນວ່າ ສະພາບການຢູ່ພາຍໃນປະເທດ ແລະ ສາກົນມີການຜັນແປ ສັບສົນຫຼາຍຢ່າງ. ເຖິງຢ່າງໃດກໍ່ຕາມ, ລັດຖະບານຫວຽດນາມ ຈະມີການກະທຳຢ່າງເດັດດ່ຽວ, ມານະພະຍາຍາມສູ້ຊົນເພື່ອບັນລຸບັນດາເປົ້າໝາຍ, ຕົວເລກຄາດໝາຍພັດທະນາເສດຖະກິດ, ສັງຄົມທີ່ໄດ້ວາງອອກໃນລະດັບສູງສຸດ.