(vovworld)- ໃນຂະນະທີ່ສະພາບຂາດຄວາມສະຖຽນລະພາບຢູ່ ຢູແກຼນ ບໍ່ທັນມີສັນຍານຫລຸດລົງ, ແຕ່ໃນໂລກນີ້, ພັດເກີດຄວາມຂັດແຍ່ງຂຶ້ນຢ່າງແຮງ ລະຫວ່າງ ລັດເຊຍ ກັບ ສະຫະພາບເອີລົບ ແລະ ອາເມລິກາ ທີ່ກ່ຽວຂ້ອງເຖິງເລື່ອງ ລັດເຊຍ ສົ່ງກຳລັງທະຫານ ເຂົ້າປະເທດສາທາລະນະລັດປົກຄອງດ້ວຍຕົນເອງ Crimea ທີ່ຂຶ້ນກັບ ຢູແກຼນ ເພື່ອປ້ອງກັນ ພົນລະເມືອງລັດເຊຍ. ການຜັນແປດ້ານການເມືອງໃນສອງສາມມື້ຜ່ານມາ ພວມເຮັດໃຫ້ການພົວພັນລະຫວ່າງ ລັດເຊຍ ແລະ ຝ່າຍຕາເວັນຕົກ ບໍ່ປົກກະຕິນັບແຕ່ໄລຍະສົງຄາມເຢັນ ຍິ່ງເກີດຄວາມເຄັ່ງຕືງຂຶ້ນຕື່ມ.
ສະພາຄວາມໝັ້ນຄົງ ສປຊ, NATO ແລະ ສະຫະພາບເອີລົບ(ອີຢູ) ໄດ້ຈັດກອງປະຊຸມຫລາຍຄັ້ງຢ່າງລຽນຕິດ, ການໂອ້ລົມສົນທະນາຜ່ານໂທລະສັບທີ່ແກ່ຍາວລະຫວ່າງປະມຸກລັດບັນດາປະເທດ ຝ່າຍຕາເວັນຕົກກັບປະທານາທິບໍດີ ລັດເຊຍ V.Putin ໃນນັ້ນມີຄຳກ່າວເຕືອນໂດຍບັນດາຝ່າຍຍົກອອກມາ.
ຝ່າຍຕາເວັນຕົກປະກາດຫລາຍມາດຕະການປັບໄຫມລົງໂທດ
ທ່ານນາງ Catherine Ashton, ຜູ້ຕາງຫນ້າຂັ້ນສູງ ຂອງ ອີຢູ, ຮັບຜິດຊອບການປ້ອງກັນຄວາມສະຫງົບ ແລະ ນະໂຍບາຍການຕ່າງປະເທດ ຫາກໍໃຫ້ຮູ້ວ່າ: ອີຢູ ພວມພິຈາລະນາບັນດາມາດຕະການປັບໄຫມລົງໂທດ ສຳລັບບັນດາບຸກຄົນທີ່ກ່ຽວຂ້ອງ ຜ່ານການຢຸດຕິຊົ່ວຄາວການພົວພັນ ຫລືບໍ່ອອກວິຊາໄປມາໃນ ອີຢູ. ສ່ວນທ່ານ Frank-Walter Steinmeier, ລັດຖະມົນຕີການຕ່າງປະເທດ ເຢຍລະມັນ ພັດຖະແຫລງວ່າ ຖ້າຫາກ ລັດເຊຍ ບໍ່ມີການກະທຳຢ່າງວ່ອງໄວທີ່ຫນ້າໄວ້ເນື້ອເຊື່ອໃຈ ອາດຈະຖືກຮັບຜົນຮ້າຍຢ່ອນຫລັງໃນການພົວພັນກັບ ເອີລົບ. ບັນດາຜົນຮ້າຍຢ່ອນຫລັງນັ້ນແມ່ນຢາກເວົ້າເຖິງການເຈລະຈາກ່ຽວກັບການໂຍະຍານການກຳນົດອອກວິຊາທີ່ມີຕໍ່ ພົນລະເມືອງ ລັດເຊຍ ແລະ ກ່ຽວກັບສັນຍາຄູ່ຮ່ວມມື ແລະ ການຮ່ວມມືລະຫວ່າງ ລັດເຊຍ ແລະ ອີຢູ, ຊ້ຳບໍ່ຫນຳນັບທັງການປິດລ້ອມບັນຊີເງິນຝາກຂອງບັນດາເຈົ້າຫນ້າທີ່ລັດເຊຍ.
ໃນການໂອ້ລົມສົນທະນາຜ່ານໂທລະສັບມາເປັນເວລາ 90 ນາທີ ກັບປະທານາທິບໍດີ ລັດເຊຍ Vladimir Putin, ປະທານາທິບໍດີ ອາເມລິກາ Barack Obama ກໍກ່າວເຕືອນ: ເລື່ອງ ມົດສະກູ ປະຕິເສດຖອນບັນດາກຳລັງປະກອບອາວຸດກັບຄືນຖານທີ່ໝັ້ນຂອງຕົນ ຢູ່ Crimea ຈະສົ່ງຜົນກະທົບບໍ່ດີເຖິງຊື່ສຽງຮຽງນາມຂອງລັດເຊຍໃນເວທີສາກົນ ແລະ ແນ່ນອນວ່າ ລັດເຊຍ ຈະຖືກໂດດດ່ຽວກ່ຽວກັບດ້ານການເມືອງ ແລະ ເສດຖະກິດຢ່າງເລິກເຊິ່ງກວ່າ.ພາຍຫລັງຄຳກ່າວເຕືອນດັ່ງກ່າວ, ວໍຊີງຕັນ ໄດ້ຖະແຫລງ ຢຸດຕິບັນດາການເຈລະຈາກ່ຽວກັບດ້ານການຄ້າ ແລະ ການລົງທຶນ ກັບມົດສະກູ. ທຳນຽບ 5 ແຈ່ ກໍປະກາດວ່າ: ອາເມລິກາ ຢຸດຕິທັງໝົດການຮ່ວມມືດ້ານການທະຫານກັບ ລັດເຊຍ ທີ່ກ່ຽວຂ້ອງເຖິງວິກິດການຢູ່ ຢູ່ແກຼນ, ໃນນັ້ນ ມີການຊ້ອມຮົບ ແລະ ການຢ້ຽມຢາມທ່າກຳປັ່ນ.
ສະພາບຄວາມເຄັ່ງຕຶງຢູ່ ຢູແກຼນ ກະທົບຢ່າງຫຍໍ້ທໍ້ເຖິງ
ຕະຫຼາດການເງິນທົ່ວໂລກ
(ພາບ: dantri.com)
ກ່ຽວກັບດ້ານການຄ້າ, ອາເມລິກາ, ການາດາ, ອັງກິດ ແລະ ຝລັ່ງ ພ້ອມກັນຖະແຫລງ ຈະຢຸດຕິວິວັດການເຂົ້າຮ່ວມການກະກຽມໃຫ້ແກ່ກອງປະຊຸມສຸດຍອດ "G-8" ຢູ່ Sochi ປະເທດ ລັດເຊຍ ໃນເດືອນ 6 ຈະມາເຖິງ.
ໃນຂະນະນັ້ນ, ສ່ວນຝ່າຍ NATO, ເລຂາທິການໃຫຍ່ NATO Fogh Rasmussen ຖືວ່າ ບັນດາການຜັນແປພາຍໃນ ແລະ ກ່ຽວຂ້ອງເຖິງ ຢູແກຼນ ອາດຈະນາບຂູ່ເຖິງບັນດາປະເທດສະມາຊິກ NATO ທີ່ຕິດກັບຊາຍແດນ ຢູແກຼນ ແລະ ອາດຈະນາບຂູ່ເຖິງຄວາມສະຫງົບປອດໄພ ແລະ ສະຖຽນລະພາບຢູ່ພາກພື້ນ ເອີລົບ- ມະຫາສະມຸດອັດລັງຕິກ.
ປະຕິກິລາຍາທີ່ແຂງກະດ້າງຈາກຝ່າຍລັດເຊຍ
ຕໍ່ຫນ້າທຸກການຜັນແປດັ່ງກ່າວ, ປະທານາທິບໍດີ ລັດເຊຍ Vladimir Putinໄດ້ອະທິບາຍຫລັກໝັ້ນຂອງຕົນ ເມື່ອສົ່ງກຳລັງທະຫານເຂົ້າ Crimea ບໍ່ເພື່ອຈຸດປະສົງຫຍັງນອກເຫນືອແນໃສ່ປ້ອງກັນພົນລະເມືອງ ລັດເຊຍ ທີ່ພວມຖືກນາບຂູ່ເຖິງຊີວິດອິນຊີ ຕໍ່ຫນ້າຄວາມອັນຕະລາຍອາດຈະເກີດຂຶ້ນຈາກບັນດາພວກກໍ່ຄວາມວຸນວາຍຢູ່ ຢູແກຼນ. ຕາມທ່ານ Putin ແລ້ວ, ບັນດາການກະທຳຂອງລັດເຊຍທີ່ມີຕໍ່ ຢູແກຼນ ມາຮອດປະຈຸບັນ ແມ່ນເໝາະສົມ, ດ້ວຍຈຸດປະສົງຢາກເຮັດໃຫ້ສະພາບການໄປຕາມທິດສັນຕິພາບ.
ລັດເຊຍ ກໍຖືວ່າ ການຕຳນິຕິຕຽນຂອງ NATO ກ່ຽວກັບການເຄື່ອນໄຫວຂອງປະເທດນີ້ ຢູ່ Crimea ຈະບໍ່ຊ່ວຍໃຫ້ສະພາບການຢູ່ ຢູແກຼນ ເປັນປົກກະຕິ ພາຍຫລັງທີ່ກຸ່ມນີ້ ຖືວ່າ ມົດສະກູ ໄດ້ນາບຂູ່ສັນຕິພາບ ແລະ ຄວາມສະຫງົບປອດໄພຢູ່ ເອີລົບ. ທ່່ານ Sergei Lavrov ລັດຖະມົນຕີການຕ່າງປະເທດ ລັດເຊຍ ໄດ້ຕຳນິຕິຕຽນບັນດາການນາບຂູ່, ປັບໄຫມລົງໂທດ ແລະ ປະຕິເສດ ຊື່ງຝ່າຍຕາເວັນຕົກຍົກອອກມາ ຍ້ອນບົດບາດຂອງລັດເຊຍ ໃນວິກິດການພວມປີນຂັ້ນໄດຢູ່ ຢູແກຼນ.
ສິ່ງສຳຄັນຕ້ອງມີການພົບປະສົນທະນາລະຫວ່າງບັນດາຝ່າຍກ່ຽວຂ້ອງ
ເຖິງວ່າ ມີຄຳກ່າວເຕືອນຫລາຍຢ່າງຕໍ່ລັດເຊຍ ກໍຕາມ, ແຕ່ຄວາມຈິງ ຫລາຍປະເທດຝ່າຍຕາເວັນຕົກ ບໍ່ມີຄວາມຫວັງປານໃດຕໍ່ປະສິດທິຜົນຂອງບັນດາມາດຕະການດັ່ງກ່າວ. ທ່ານ Chris Murphy ສະມາຊິກສະພາສູງ, ປະທານອະນຸກຳມະການ ເອີລົບ ຂຶ້ນກັບກຳມາທິການຕ່າງປະເທດ ສະພາສູງ ອາເມລິກາ ຖືວ່າ: ເລື່ອງ ອາເມລິກາ ຈັດວາງການປັບໄຫມລົງໂທດພຽງຝ່າຍດຽວ ຈະບັນລຸປະສິດທິຜົນບໍ່ຫລາຍ ຖ້າຫາກບໍ່ສົມທົບກັບບັນດາການກະທຳຈາກ ເອີລົບ. ສ່ວນ ທ່ານ Robert Gates, ອະດີດລັດຖະມົນຕີກະຊວງປ້ອງກັນປະເທດ ອາເມລິກາ ກ່າວເຕືອນວ່າ ປະທານາທິບໍດີ ອາເມລິກາ Barak Obama ຄວນຄິດໄລ່ຊັ່ງຊາທຸກປະຕິກິລິຍາຂອງລັດເຊຍ. ຕາມທ່ານ Robert Gates ແລ້ວ, ທ່ານປະທານາທິບໍດີ Obama ຈະປະສົບກັບຄວາມຫຍຸ້ງຍາກຖ້າຫາກບັນດາປະເທດພັນທະມິດຂອງອາເມລິກາ ຢູ່ ເອີລົບ ອອກສຽງຄັດຄ້ານ ແຕ່ບໍ່ມີການກະທຳຢ່າງແຮງ. ທ່ານ John McCain ສະມາຊິກສະພາສູງ ອາເມລິກາ ຍອມຮັບວ່າ ເລື່ອງນາບຂູ່ປະຕິເສດ ກອງປະຊຸມສຸດຍອດ G-8 ຈັດຂຶ້ນຢູ່ ລັດເຊຍ ບໍ່ແມ່ນມາດຕະການເໝາະສົມ. ເຢຍລະມັນ ກໍຄັດຄ້ານເລື່ອງປັດເຂ່ຍ ລັດເຊຍອອກຈາກ G8 ແລະ ຮຽກຮ້ອງບັນດາປະເທດສະມາຊິກ ຄວນຄິດໄລ່ຊັ່ງຊາຄືນ.
ນອກຈາກຄວາມສາມາດ ອາເມລິກາ ອາດຈະປັບໄຫມລົງໂທດທະນາຄານ, ປິດລ້ອມດ້ານການເງິນຂອງລັດເຊຍ ຄືດັ່ງໄດ້ປະຕິບັດສຳລັບ ອີຣານ, ແມ່ນສິ່ງທີ່ຍາກເກີດຂຶ້ນໄດ້ ເພາະຖ້າເຮັດຄືແນວນັ້ນ ເອີລົບ ຈະຄັດຄ້ານທຳອິດ ເພາະເຂົາເຈົ້າມີການພົວພັນດ້ານເສດຖະກິດຢ່າງແຫນ້ນແຟ້ນກັບລັດເຊຍ. ລັດຖະມົນຕີການຕ່າງປະເທດ ລຸກຊຳບວກ Jean Asselborn ໃຫ້ຮູ້ວ່າ: 25% ປະລິມານພະລັງງານທີ່ໄດ້ສະຫນອງໃຫ້ແກ່ ເອີລົບ ແມ່ນມາຈາກລັດເຊຍ ແລະ ການພົວພັນດ້ານເສດຖະກິດ ລະຫວ່າງ ລັດເຊຍ ແລະ ອີຢູ ປະຈຸບັນ ແມ່ນແຫນ້ນແຟ້ນທີ່ສຸດ. ວໍຊີງຕັນ ບໍ່ອາດປະລະລັດເຊຍ ໃນການແກ້ໄຂບັນຫາຊີຣີ ຫລື ສຳເນົາເອກະສານນິວເຄຼຍ ຂອງ ອີຣານ ເພາະວ່າ ບົດບາດຂອງລັດເຊຍ ບໍ່ແມ່ນຫນ້ອຍ ຫລືເວົ້າແນວອື່ນລັດເຊຍຍັງສວມບົດບາດສຳຄັນໃນຫລາຍບັນຫາສາກົນ.
ຕາມບັນດານັກສັງເກດການສາກົນແລ້ວ, ວິກິດການ ຢູ່ Crimea ແນ່ນອນວ່າ ຈະກາຍເປັນຄວາມຂັດແຍ່ງໃຫຍ່ໃນການພົວພັນລະຫວ່າງ ລັດເຊຍ ແລະ ຝ່າຍຕາເວັນຕົກ ນັບແຕ່ເມື່ອເກີດສົງຄາມເຢັນເປັນຕົ້ນມາ. ເຖິງຢ່າງໃດກໍຕາມ, ການແກ້ໄຂສາຍພົວພັນນີ້ ບໍ່ແມ່ນວາງອອກບັນດມາດຕະການປັບໄຫມລົງໂທດຈາກຝ່າຍໃດ ຫາກແມ່ນການພົບປະສົນທະນາຢ່າງເປີດເຜີຍ ແລະ ຈິງໃຈ.