(vovworld)-ສານຕົ້ນປີໃຫມ່ຂອງບັນດາການນຳພັກ, ລັດ, ປະເພນີຕ້ອນຮັບບຸນປີໃຫມ່ປະຈຳຊາດຫວຽດນາມ ໄດ້ລົງພິມຢ່າງຫລວງຫລາຍໃນບັນດາຫນັງສືພິມບຸນປີໃຫມ່ປະຈຳຊາດປີມະແມ 2015. ບັນຍາກາດຕ້ອນຮັບລະດູບານໃຫມ່ຢ່າງເບີກບານມ່ວນຊື່ນ, ມີຄວາມຜາສຸກ, ສະພາບການເສດຖະກິດສັງຄົມຂອງປະເທດຊາດໃນປີຜ່ານມາ ແມ່ນຫົວຂໍ້ຂອງບັນດາຫນັງສືພິມບຸນປີໃຫມ່ປະຊຳຊາດປີນີ້.
ຊາວນະຄອນຫລວງ ຮ່າໂນ້ຍ ເຂົ້າຊົມວັນບຸນຫນັງສືພິມ
ລະດູບານໃຫມ່
|
ໃນສານຕົ້ນປີສົ່ງເຖິງປະຊາຊົນ, ທ່ານ ຫງວຽນຟູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ເນັ້ນຫນັກວ່າ: ປີ 2015 ແມ່ນປີທີ່ມີຄວາມໝາຍຕັດສິນຊີ້ຂາດທຸກໄຊຊະນະຂອງມະຕິກອງປະຊຸມໃຫຍ່ຄັ້ງທີ 11 ຂອງພັກ, ແຜນການພັດທະນາເສດຖະກິດສັງຄົມໄລຍະ 5 ປີ ຄືແຕ່ປີ 2011-2015, ແມ່ນປີສະເຫລີມສະຫລອງຫລາຍເຫດການສຳຄັນຂອງຊາດ, ແມ່ນປີເລີ່ມຕົ້ນປະຕິບັດບັນດາຂັ້ນຕອນ, ຄຳໝັ້ນສັນຍາສາກົນ, ເຊື່ອມໂຍງເຂົ້າກັບພື້ນຖານເສດຖະກິດພາກພື້ນ ແລະ ທົ່ວໂລກຢ່າງເລິກເຊິ່ງ ແລະ ກວ້າງຂວາງກວ່າ. ທ່ານເລຂາທິການໃຫຍ່ ຫງວຽນຟູຈ້ອງ ປາດຖະຫນາຢາກໃຫ້ທົ່ວພັກ, ທົ່ວກອງທັບ ແລະ ທົ່ວປວງຊົນຕັດສິນໃຈສຳເລັດບັນດາຫນ້າທີ່ຂອງປີ 2015 ຢ່າງມີໄຊ. ໃນນັ້ນ ຫນ້າທີ່ຈຸດສຸມແມ່ນເພີ່ມທະວີການຮັກສາເສດຖະກິດມະຫາພາກເປັນປົກກະຕິ, ສ້າງໂຄງປະກອບພື້ນຖານເສດຖະກິດຄືນໃຫມ່ ຕິດພັນກັບຮູບແບບເຕີບໂຕ, ຮັບປະກັນຊີວິດສັງຄົມ, ປັບປຸງຊີວິດການເປັນຢູ່ຂອງປະຊາຊົນ, ຮັກສາເອກະລາດອະທິປະໄຕ ແລະ ສະພາບແວດລ້ອມສັນຕິພາບ, ສະຖຽນລະພາບເພື່ອພັດທະນາປະເທດຊາດ, ຍູ້ແຮງການພົວພັນກັບຕ່າງປະເທດ. ພ້ອມກັນນັ້ນ ສຸມໃສ່ຈັດຕັ້ງກອງປະຊຸມໃຫຍ່ອົງຄະນະພັກທຸກຂັ້ນອາຍຸການ 2015-2020 ໃຫ້ສຳເລັດຜົນ, ກ້າວໄປເຖິງກອງປະຊຸມໃຫຍ່ຄັ້ງທີ 12 ຂອງພັກ.
ໃນຂະນະນັ້ນ, ເມື່ອຕອບສຳພາດຕໍ່ສຳນັກຂ່າວສານຫວຽດນາມ ເນື່ອງໃນໂອກາດປີໃຫມ່, ທ່ານປະທານປະເທດ ເຈືອງເຕີນຊາງ ຖືວ່າ: ຄວາມສາມາດບົ່ມຊ້ອນການເຕີບໂຕຂອງຫວຽດນາມ ຍັງໃຫຍ່ຫລວງຢູ່. ຫວຽດນາມ ຕ້ອງຍູ້ແຮງການປະຕິຮູບ, ປ່ຽນໃຫມ່ຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃຫມ່, ເຮັດໃຫ້ພື້ນຖານເສດຖະກິດມີກຳລັງແກ້ງແຍ້ງສູງ, ມີປະສິດທິຜົນ, ເຕີບໂຕຢ່າງວ່ອງໄວ ແລະ ໝັ້ນຄົງ. ທ່ານປະທານປະເທດ ເຈືອງເຕີນຊາງ ຫວັງວ່າ ປະຊາຊົນທຸກຄົນ ຈະສາມັກຄີກັນ, ເປັນຈິດຫນຶ່ງໃຈດຽວ, ມານະພະຍາຍາມສູ້ຊົນນຳປະເທດຊາດຈະເລີນຮຸ່ງເຮືອງ, ປະຊາຊົນມີຊີວິດດີງາມກວ່າ, ຮັກສາເອກະລາດ ອະທິປະໄຕຂອງປະເທດຊາດໄວ້ຢ່າງໝັ້ນຄົງ.
ປີ 2015, ທົ່ວພັກ, ທົ່ວກອງທັບ ແລະ ທົ່ວປວງຊົນ ອອກແຮງແຂ່ງຂັນສ້າງຜົນງານເພື່ອຂ່ຳນັບຮັບຕ້ອນ 85 ປີແຫ່ງວັນສ້າງຕັ້ງພັກກອມມູນິດຫວຽດນາມ (3/2/1930-3/2/2015). ບົດນຳ “ກ້າວເດີນພາຍໃຕ້ຄັນທຸງຂອງພັກອັນສະຫງ່າລາສີ” ຂອງຫນັງສືພິມ ເຍີນເຢີນ(ກະບອກສຽງຂອງພັກກອມມູນິດຫວຽດນາມ) ໄດ້ຢືນຢັນວ່າ: ດ້ວຍຄຸນນະທາດຂອງພັກປະຕິວັດສັດຈະທຳ, ແນ່ນອນວ່າພັກກອມມູນິດຫວຽດນາມ ຈະນັບມື້ນັບປອດໄສ, ເຂັ້ມແຂງ, ມີຄວາມສາມາດນຳພາ ແລະ ກຳລັງຕໍ່ສູ້ ແນໃສ່ນຳປະເທດຊາດຜ່ານຜ່າຄວາມຫຍຸ້ງຍາກທຸກຢ່າງ, ເພື່ອໃຫ້ປະຊາຊົນຮັ່ງມີ, ປະເທດຊາດເຂັ້ມແຂງ. ໃນຂະນະນັນ, ຫນັງສືພິມ ກວນໂດ້ຍເຍີນເຢີນ (ກະບອກສຽງຂອງກອງທັບປະຊາຊົນຫວຽດນາມ) ໄດ້ລົງພິມບົດນຳທີ່ມີຫົວຂໍ້ວ່າ: “ກຳລັງແຮງແຫ່ງຄວາມໄວ້ເນື້ອເຊື່ອໃຈ” ກໍ່ຊີ້ແຈ້ງເຖິງບັນດາມາດຕະການຂ້ຽວຂາດໃນການປ້ອງກັນ, ຕ້ານການສໍ້ລາດບັງຫລວງ ຕິດພັນກັບການເພີ່ມທະວີ, ການຄຸ້ມຄອງ, ຝືກຝົນຫລໍ່ຫລອມຖັນແຖວພະນັກງານ, ສະມາຊິກພັກ ໃນທຸກດ້ານ, ຕັດສິນໃຈເຮັດໃຫ້ພັກປອດໄສ ນັ້ນແມ່ນມາດຕະການຕົ້ນຕໍເພື່ອຮັກສາຄວາມໄວ້ເນື້ອເຊື່ອໃຈຂອງທົ່ວປວງຊົນ.
ພາບ:vov
|
ປີ 2014 ຕໍ່ຫນ້າບັນດາການຜັນແປຢ່າງສັບສົນຢູ່ທະເລຕາເວັນອອກ, ເປັນຕົ້ນແມ່ນເລື່ອງຈີນ ຕັ້ງຮ້ານເຈາະນ້ຳມັນໄຮ່ຢາງ 981 ຢ່າງຜິດກົດໝາຍ ຢູ່ເຂດເສດຖະກິດຈຳເພາະ ແລະ ເຂດໄລ່ທະວີບຂອງຫວຽດນາມ, ສື່ມວນຊົນໄດ້ຕິດຕາມ, ສ່ອງແສງ, ປະກອບສ່ວນເພື່ອໃຫ້ປະຊາຊົນ, ປະຊາຄົມໂລກເຂົ້າໃຈ ແລະ ສະຫນັບສະຫນູນການຕໍ່ສູ້ເປັນທຳຂອງຫວຽດນາມ. ຫນັງສືພິມຂອງສຳນັກຂ່າວສານຫວຽດນາມ ມີບົດຂຽນທີ່ມີຫົວຂໍ້ວ່າ: “ຕຳຫລວດທະເລຫວຽດນາມ ນຳຫນ້າໃນການປົກປັກຮັກສາອະທິປະໄຕເຂດທະເລໝູ່ເກາະ” ແລະ ພາບສາລະຄະດີ “ສະຫງ່າອົງອາດເຈື່ອງຊາ”. ໃນຂະນະນັ້ນ, ຫນັງສືພິມເຍີນເຢີນ ກໍ່ລົງພິມບົດສາລະຄະດີ ເລົ່າຄືນບັນດາເລື່ອງລາວທີ່ຕຶ້ນຕັນໃຈ, ສະແດງໃຫ້ເຫັນອາລົມຈິດຂອງຄະນະເຈົ້າກົກເຈົ້າເຫລົ່າ ໄຕງວຽນ ທີ່ມີຕໍ່ພະນັກງານ, ນັກຮົບຢູ່ເກາະທີ່ຫ່າງໄກ.
ເນື້ອໃນຂອງຫນັງສືພິມລະດູບານໃຫມ່ 2015 ສ່ວນຫລາຍແມ່ນຕີລາຄາສະພາບການເສດຖະກິດສັງຄົມຂອງປະເທດຊາດໃນປີ 2014 ແລະ ຄາດຄະເນກ່ຽວກັບແງ່ຫວັງເສດຖະກິດສັງຄົມໃນປີ 2015. ໃນຄໍລຳ “ສັງເກດການລົງທຶນ” ຊື່ງໄດ້ລົງພິມໃນຫນັງສືພິມລົງທຶນ ໄດ້ເນັ້ນຫນັກວ່າ ປີ 2014 ບັນລຸໄດ້ 13/14 ຄາດໝາຍເສດຖະກິດສັງຄົມ ແລະ ລື່ນກາຍແຜນການທີ່ໄດ້ວາງອອກ ເປັນການສະແດງໃຫ້ເຫັນວ່າພື້ນຖານເສດຖະກິດພວມຢູ່ໃນທ່າຟື້ນຕົວຢ່າງເຫັນໄດ້ຊັດ. ພ້ອມກັນນັ້ນ ການເຕີບໂຕຂອງ GDP ບັນລຸ 5,98% ແມ່ນລື່ນກາຍຄາດໝາຍທີ່ໄດ້ວາງອອກແມ່ນ 5,8%, ເປັນຄັ້ງທຳອິດການສົ່ງອອກໄດ້ລື່ນກາຍລະດັບ 150 ຕື້ USD, ໄພເງິນເຟີ້ໄດ້ຮັບການຄວບຄຸມຢູ່ໃນລະດັບຕ່ຳສະຖິຕິໃນ 14 ປີມານີ້ແມ່ນ (1,84%). ເມື່ອຕອບສຳພາດຕໍ່ນັກຂ່າວຫນັງສືພິມລົງທຶນ, ທ່ານ ບູ່ຍກວາງວີງ, ລັດຖະມົນຕີວ່າການກະຊວງແຜນການ ແລະ ການລົງທຶນ ໄດ້ໃຫ້ຂໍ້ສັງເກດວ່າ: ປີ 2015 ການຜັນຂະຫຍາຍບັນດາສັນຍາການຄ້າເສລີລະຫວ່າງຫວຽດນາມ ກັບສເກົາຫລີ, ສຳພັນທະມິດພາສີ ລັດເຊຍ -ເບລາຣຸດ- ກາຊັກສະຖານ, ເອີລົບ ແລະ ການສ້າງຕັ້ງປະຊາຄົມເສດຖະກິດອາຊຽນນັ້ນ ໄດ້ສ້າງກາລະໂອກາດໃຫ້ຫວຽດນາມ ເຊື່ອມໂຍງເຂົ້າກັບໂລກຢ່າງເລິກເຊິ່ງ ແລະ ກວ້າງຂວາງ, ຊຸກຍູ້ເສດຖະກິດຫວຽດນາມ ພັດທະນາ. ໃນຂະນະນັ້ນ, ຫນັງສືພິມເສດຖະກິດຫວຽດນາມ ໃຫ້ຮູ້ວ່າ: ບັນດາຜູ້ຊ່ຽວຊານດ້ານເສດຖະກິດ ຄາດຄະເນວ່າເສດຖະກິດຫວຽດນາມ ໃນປີ 2015 ຈະມີສັນຍານດີກວ່າ, ຈຸດໝາຍລະດັບເຕີບໂຕ GDP 6,2% ແມ່ນອາດຈະບັນລຸໄດ້.
ຮີດຄອງປະເພນີຕ້ອນຮັບບຸນເຕັດຂອງຊາວຫວຽດນາມ, ບັນດາງານບຸນໃນລະດູບານໃຫມ່, ບັນຍາກາດຕ້ອນຮັບບຸນເຕັດຂອງຊາວຫວຽດນາມ ຢູ່ທຸກແຖບຖິ່ນຂອງປະເທດຊາດ ແລະ ຊາວຫວຽດນາມ ອາໄສຢູ່ຕ່າງປະເທດ ລ້ວນແຕ່ໄດ້ລົງພິມໃນບັນດາຫນັງສືພິມລະດູບານໃຫມ່.
ຫນັງສືພິມລາວດົ້ງ (ແຮງງານ) ມີພາບສາລະຄະດີ “ນັກຮົບຢູ່ເກາະເຈື່ອງຊາຕ້ອນຮັບບຸນເຕັດ”. ຫນັງສືພິມລາຍການຂ່າວຂອງສຳນັກຂ່າວສານຫວຽດນາມ ໄດ້ລົງພິມພາບສາລະຄະດີ “ຊາວເຜົ່າມົ້ງຮ່ວມກັນຕ້ອນຮັບບຸນເຕັດຢ່າງເບີກບານມ່ວນຊື່ນ”, ໄດ້ພັນລະນາໃຫ້ເຫັນບັນຍາກາດຕ້ອນຮັບບຸນເຕັດຂອງຊາວເຜົ່າມົ້ງຢູ່ ແຂວງອຽນບາຍ ຢ່າງເບີກບານມ່ວນຊື່ນ ແລະ ອົບອຸ່ນ.
ປີໃຫມ່ປີມະແມ 2015, ຫນັງສືພິມລະດູບານໃຫມ່ຫລາຍສະບັບ ໄດ້ວາດພາບຮູບພາບໂຕແບ້. ຫນັງສືພິມລະດູບານໃຫມ່, ສະບັບພິເສດທີ່ສະຫງວນໃຫ້ແກ່ບຸນເຕັດແມ່ນສິ່ງທີ່ຂາດບໍ່ໄດ້ສຳລັບຊາວຫວຽດນາມແຕ່ລະຄົນເມື່ອບຸນເຕັດ,ລະດູບານໃຫມ່ວຽນມາ. ວັນບຸນຫນັງສືພິມລະດູບານໃຫມ່ຖືກຈັດຂຶ້ນແຕ່ວັນທີ 7-10/2/2015 ຢູ່ ຮ່າໂນ້ຍ ເພື່ອແນະນຳບັນດາສິ່ງພິມດັ່ງກ່າວ.