ວັນທີ 29/1 , ລັດຖະມົນຕີການຕ່າງປະເທດບັນດາປະເທດສະມາຊິກສະຫະພາບເອີລົບ EU ໄດ້ດຳເນີນວາລະປະຊຸມວິສາມັນຢູ່ບຣຸກແຊນ ປະເທດແບນຊິກ. ຈຸດສຸມຂອງກອງປະຊຸມແມ່ນແນໃສ່ຕົກລົງບັນດາມາດຕະການລົງໂທດໃໝ່ ແນໃສ່ລັດເຊຍ, ຊຶ່ງກ່ຽວຂ້ອງເຖິງບັນດາຄວາມເຄັ່ງຕຶງທີ່ເກີດຂຶ້ນຄືນໃໝ່ຢູ່ຢູແກຼນ. ການກະທຳນີ້ ໄດ້ຮັບການຕີລາຄາວ່າ ຈະເພີ່ມຄວາມຂັດແຍ້ງລະຫວ່າງລັດເຊຍ ແລະ ຝ່າຍຕາເວັນຕົກ, ພ້ອມທັງຍູ້ ຢູແກຼນ ຕົກເຂົ້າສູ່ສະພາບວິກິດການທີ່ຮ້າຍແຮງກວ່າ.
ບັນດາລັດຖະມົນຕີການເງິນ EU ທີ່ກອງປະຊຸມ
(ພາບ: AP)
|
ເນື້ອໃນຮ່າງເອກະສານຕໍ່ກຳນົດຄຳສັ່ງລົງໂທດລັດເຊຍຕື່ມອີກ 9 ເດືອນ(ໝາຍຄວາມວ່າ ຮອດເດືອນ 12/2015 ໄດ້ຖືກຮຽບຮຽງໃຫ້ແກ່ກອງປະຊຸມວິສາມັນຂອງບັນດາລັດຖະມົນຕີການຕ່າງປະເທດບັນດາປະເທດສະມາຊິກສະຫະພາບເອີລົບ EU ເມື່ອວັນທີ 29/1. ບັນດາລັດຖະມົນຕີການຕ່າງປະເທດບັນດາປະເທດສະມາຊິກສະຫະພາບເອີລົບ EU ສະເໜີ EC ແລະ ອົງການພົວພັນຕ່າງປະເທດເອີລົບ, ໃນຮອບເວລາອາທິດໜຶ່ງ ຈົ່ງນຳສະເໜີຕື່ມບັນຊີລາຍຊື່ບັນດາຜູ້ຕ້ອງຮັບຄຳສັ່ງລົງໂທດລັດເຊຍ. ຄຳຕັດສິນຢ່າງເປັນທາງການກ່ຽວກັບການ ຕໍ່ກຳນົດຄຳສັ່ງລົງໂທດລັດເຊຍຖືກຍົກອອກມາພາຍຫຼັງກອງປະຊຸມຄັ້ງນີ້.
ຄຳສັ່ງລົງໂທດຊຶ່ງປະຈຸບັນ EU ຈັດວາງຕ້ານລັດເຊຍນັ້ນ, ແມ່ນເລີ່ມແຕ່ເດືອນ 3/2014 ພາຍຫຼັງທີ່ລັດເຊຍໂຮມແຫຼມກະເຣີມເຂົ້າດິນແດນຂອງຕົນ ແລະ ໝົດຜົນສັກສິດໃນເດືອນ 3 ປີນີ້. ຄຳສັ່ງໂລງໂທດນີ້ລວມທັງການປິດລ້ອມຊັບສົມບັດ, ຫ້າມການທ່ອງທ່ຽວສຳລັບຊາວລັດເຊຍ ແລະ ຢູແກຼນ.
ເຮັດໃຫ້ເພີ່ມຄວາມຂັດແຍ້ງຕື່ມອີກ
ອາດຈະເຫັນໄດ້ວ່າ ກຳລັງດັນດ້ານເສດຖະກິດທີ່ມີຕໍ່ລັດເຊຍພວມເພີ່ມທະວີຂຶ້ນຂະນະທີ່ອາເມລິກາ ແລະ ຝ່າຍຕາເວັນຕົກສືບຕໍ່ຮັບຮອງເອົາບັນດາການຂ້ວຳບາດທີ່ຮ້າຍແຮງກວ່າ. ກ່ອນນັ້ນ, ອາເມລິກາຖະແຫຼງວ່າ ປະເທດນີ້ປັດເຂ່ຍລັດເຊຍອອກຈາກລະບົບຊຳລະສາກົນ.
ວົງການນັກໄຈ້ແຍກໃຫ້ຂໍ້ສັງເກດວ່າ ຖ້າຫາກບາດກ້າວເດີນນີ້ຂອງອາເມລິກາ ແລະ ພັນທະມິດຝ່າຍຕາເວັນຕົກກາຍເປັນຄວາມຈິງນັ້ນ, ນີ້ຈະແມ່ນການໂມ້ງບາດຄ້ອນໃສ່ພື້ນຖານເສດຖະກິດລັດເຊຍຢ່າງແຂງແຮງ. ມົດສະກູຈະປະສົບກັບຄວາມຫຍຸ້ງຍາກຫຼາຍຢ່າງໃນການພົວພັນການຄ້າສາກົນ. ເລື່ອງລັດເຊຍປັດເຂ່ຍ ອອກຈາກລະບົບຕິດຕໍ່ພົວພັນດ້ານເງິນຕາສາກົນນີ້ ຈະພາໃຫ້ລະບົບທະນາຄານລັດເຊຍຢືນຢູ່ຕໍ່ໜ້າການພັງທະລາຍລົງ.
ຕໍ່ໜ້າບັນດາຄຳກ່າວເຕືອນກ່ຽວກັບການລົງໂທດໃໝ່ຕ້ານລັດເຊຍຂອງອາເມລິກາ ແລະ EU, ມົດສະກູຖະແຫຼງການໂຕ້ຕອບຂອງລັດເຊຍແມ່ນບໍ່ມີຂອບເຂດຈຳກັດ ແລະ ກ່າວເຕືອນວ່າ ທຸກໆກາລະໂອກາດສົນທະນາຈະປິດລົງ. ນີ້ໄດ້ຮັບຖືວ່າ ແມ່ນຄຳປະກາດສົງຄາມຢ່າງແຂງແຮງທີ່ສຸດນັບແຕ່ກ່ອນເປັນຕົ້ນມາຊຶ່ງມົດສະກູໄດ້ສະຫງວຍໃຫ້ວໍຊິງຕັນ.
ບັນດາການກະທຳຖອກນ້ຳມັນໃສ່ແປວໄຟ
ຄວາມແຕກແຫງໃນການພົວພັນລະຫວ່າງລັດເຊຍ ກັບອາເມລິກາ ແລະ ຝ່າຍຕາເວັນຕົກສືບຕໍ່ເພີ່ມຂຶ້ນພາຍຫຼັງການປະທະກັນຢູ່ພາກຕາເວັນອອກຢູແກຼນແຜ່ລາມອອກກ້ວາງ. ນັບແຕ່ພາຍຫຼັງຄຳສັ່ງຢຸດຍິງໄດ້ຮັບການລົງນາມກ່ອນນີ້ 5 ເດືອນ, ກຳລັງລຸກຮື້ຂຶ້ນນິຍົມລັດເຊຍໄດ້ດຳເນີນບັ້ນຮົບເປີດກ້ວາງອະນາເຂດຄວບຄຸມ ແລະ ດຳເນີນບັ້ນສູ້ຮົບຢູ່ ພາກຕາເວັນອອກຢູແກຼນດ້ວຍການບຸກໂຈມຕີຂະໜາດໃຫຍ່, ອັນໄດ້ເຮັດໃຫ້ສາມັນຊົນນັບຮ້ອຍຄົນເສຍຊີວິດ. ບັນດາປະເທດຝ່າຍຕາເວັນຕົກໄດ້ກ່າວຫາລັດເຊຍໜູນຫຼັງກຳລັງທວງເອົາເອກະລາດຢູ່ ພາກຕາເວັນອອກຢູແກຼນ. ສະພາແຫ່ງຊາດຢູແກຼນໄດ້ຮັບຮອງເອົາຖະແຫຼງການກ່າວປະນາມລັດເຊຍ, ພ້ອມທັງຮຽກຮ້ອງສາກົນຈັດວາງມາດຕະການລົງໂທດລັດເຊຍແຂງແຮງກວ່າເພີ່ມທະວີການຊ່ວຍເຫຼືອກີແອບ.
ບັນດາການກະທຳລົງໂທດໃໝ່ຂອງຂອງ ອາເມລິກາ ແລະ ຝ່າຍຕາເວັນຕົກທີ່ແນໃສ່ລັດເຊຍໃນປະຈຸບັນ ບໍ່ອາດຊ່ວຍແກ້ໄຂວິກິດການຢູ່ຢູແກຼນໄດ້. ບັນດາການຜັນແປໃນປະຈຸບັນ ກໍແມ່ນຄຳກ່າວເຕືອນສະພາບຄວາມເຄັ່ງຕຶງຈະປີນຂັ້ນໄດຍາກທີ່ຈະຄາດຄະເນໄວ້ລວງໜ້າຢູ່ປະເທດຕັ້ງຢູ່ແຄມທະເລດຳນີ້.