ລະດູບານໃໝ່ໄດ້ວຽນມາສູ່ທຸກແຖບຖິ່ນຂອງປະເທດຊາດ, ດ້ວຍດອກເໝີຍ, ດອກຄາຍພາກັນບານສະພັ່ງເອ້ຄວາມງາມ. ສານປ່ຽນແປງໃໝ່, ພັດທະນາ ແລະ ເຊື່ອມໂຍງເຂົ້າກັບສາກົນກໍໄດ້ມາພ້ອມກັບ ລະດູບານໃໝ່, ອັນໄດ້ສ້າງຄວາມເຊື່ອໝັ້ນຕໍ່ຜົນສຳເລັດຂອງປະເທດຊາດໃນປີ 2015.
ຕະຫຼາດດອກໄມ້ນະຄອນໂຮ່ຈິມິນ (ພາບ: baodautu) |
ຈຸດເວລານີ້, ທົ່ວທັງຊາດຫວຽດນາມພວມເຕັມໄປດ້ວຍພະລັງຊີວິດເພື່ອກ້າວເຂົ້າສູ່ປີ 2015 ຊຶ່ງແມ່ນປີຂອງບັນດາເຫດການໃຫຍ່ຄື : 85 ປີແຫ່ງວັນສ້າງຕັ້ງພັກກອມມູນິດຫວຽດນາມ, 70 ປີແຫ່ງວັນການປະຕິວັດເດືອນສິງຫາ ແລະ ວັນທີ 2/9, 40 ປີແຫ່ງວັນປົດປ່ອຍພາກໃຕ້ ແລະ ທ້ອນໂຮມປະເທດຊາດເປັນເອກະພາບ, 125 ປີແຫ່ງວັນຄ້າຍວັນເກີດທ່ານປະທານໂຮ່ຈິມິນ, 30 ປີແຫ່ງການປ່ຽນແປງໃໝ່ຂອງປະເທດຊາດບົນເສັ້ນທາງສັງຄົມນິຍົມ, ກ້າວໄປສູ່ກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ…ຄວາມເຊື່ອໝັ້ນໄດ້ຖືກປຸກລຸກເມື່ອທ່ານຫງວຽນຟູ້ຈ້ອງ ເລຂາທິການໃຫຍ່ພັກກອມມູນິດຫວຽດນາມຢືນຢືນສືບຕໍ່ຍົກສູງກຳລັງຕໍ່ສູ້ ແລະ ບົດບາດນຳພາຂອງພັກ, ເມື່ອທ່ານປະທານປະເທດຫວຽດນາມ ເຈືອງເຕີ້ນຊາງຊີ້ແຈ້ງວ່າ ກຳລັງແຮງຂອງຊາດແມ່ນຢູ່ໃນຈິດໃຈຂອງປະຊາຊົນ. ແລະ ນັບທັງໃນຂະນະທີ່ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຊີ້ແຈ້ງວ່າ ນ້ຳໃຈຮ່ວມມື,ການ ເຊື່ອມໂຍງເຂົ້າກັບສາກົນ ແລະ ຄວາມສາມັກຄີຈະແມ່ນຍຸດທະສາດການຕ່່າງປະເທດຂອງຫວຽດນາມໃນພາກພື້ນ ແລະ ປະຊາຄົມໂລກ.
ຄວາມເຊື່ອໝັ້ນກໍຖືກທະວີຄູນ ຂະນະທີ່ຊາວຫວຽດນາມຢູ່ພາຍໃນປະເທດ 93 ລ້ານຄົນພ້ອມກັບຊາວຫວຽດນາມອາໄສຢູ່ຕ່າງປະເທດ 4,5 ລ້ານຄົນຈະດຳເນີນບັ້ນດຳເນີນຊີວິດການເມືອງທີ່ກ້ວາງຂວາງ, ປະກອບຄຳເຫັນສ້າງປະມວນກົດໝາຍແພ່ງສະບັບປັບປຸງໃຫ້ສົມບູນແບບໃນຊຸມມື້ຕົ້ນ ລະດູບານໃໝ່ນີ້. ແລ້ວກໍຮອດບັນດາປະມວນກົດໝາຍໃນຂົງເຂດເສດຖະກິດຄືກົດໝາ່ຍວ່າດ້ວຍວິສາຫະກິດ, ກົດໝາຍວ່າການລົງທຶນສະບັບປັບປຸງ, ກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ…ເລີມມີຜົນສັກສິດນັບແຕ່ ລະດູບານໃໝ່ນີ້, ອັນໄດ້ສ້າງຄວາມເຊື່ອໝັ້ນທີ່ສຸດໃຫ້ວົງການນັກທຸລະກິດ ຊຶ່ງແມ່ນບັນດາຜູ້ສ້າງຄວາມຈະເລີນຮຸ່ງເຮືອງຂອງປະເທດຊາດໃນປີນີ້. ຄວາມເຊື່ອໝັ້ນກໍຖືກປຸກລຸກ ຂະນະທີ່ບັນດາສັນຍາການຄ້າເສລີກັບບັນດາຄູ່ຮ່ວມມືໄດ້ຮັບການລົງນາມ ແລະ ຜັນຂະຫຍາຍປະຕິບັດ, ຂະນະທີ່ກຸ່ມອາຊຽນ, ໃນນັ້ນມີຫວຽດນາມໄດ້ກາຍເປັນປະຊາຄົມເສດຖະກິດອາຊຽນ. ເວລານັ້ນ, ຫວຽດນາມຈະເພີ່ມຄວາມໄວການປ່ຽນໃໝ່ລະບອບລະບຽບການ, ເປີດກ້ວາງຕະຫຼາດ, ເຊື່ອມໂຍງຢາ່ງຮອບດ້ານເພື່ອກາຍເປັນສະຖານທີລົງທຶນທີ່ດູດດື່ມຂອງບັນດາວິສາຫະກິດສາກົນ. ປະເທດພັດທະນາ, ຊາດຫວຽດນາມນິຍົມສັນຕິພາບ, ມີຈິດໃຈຮັກແພງແຂກຈະເຮັດໃຫ້ຫວຽດນາມກາຍເປັນສະຖານທີ່ດູດດື່ມຂອງແຂກທ່ອງທ່ຽວໃນທົ່ວໂລກ…
ການພັດທະນາແບບຍືນຍົງ, ຮັດແຄບຄວາມຜິດໂຕນກັນກ່ຽວກັບລະດັບການພັດທະນາເສດຖະກິດກັບບັນດາປະເທດທີ່ກ້າວໜ້າໃນພາກພື້ນ ແລະ ໂລກ, ເພື່ອຈຸດໝາຍປະຊາຊົນຮັ່ງມີ, ປະເທດຊາດເຂັ້ມແຂງ ກໍແມ່ນໜ້າທີ່ຄວາມຮັບຜິດຊອບທີ່ບໍ່ອາດທໍ້ຖອຍ, ແມ່ນພາລະກຳທີ່ສັກກະລະບູຊາ, ແມ່ນຄວາມເປັນກຽດຂອງຊາວຫວຽດນາມແຕ່ລະຄົນ…ເພາະສະນັ້ນ, ໃນປີ 2015ນີ້, ດ້ວຍຄຸນນະທາດ, ພູມປັນຍາ, ຄວາມສາມາດບົ່ມຊ້ອນຂອງປະເທດຊາດ ແລະ ປະຊາຊົນ, ຫວຽດນາມສຸມໃສ່ແກ້ໄຂສິ່ງກີດຂວາງ, ຂໍ້ຄວາມຈຳກັດ, ອ່ອນດ້ອຍເພື່ອນຳພື້ນຖານເສດຖະກິດເຕີບໂຕຄືນໃໝ່; ສືບຕໍ່ຍູ້ແຮງກິດຈະການປ່ຽນແປງໃໝ່, ພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ, ເຊື່ອມໂຍງເຂົ້າກັບສາກົນ, ເຮັດສຳເລັດໜ້າທີ່ປ່ຽນໃໝ່ຮູບແບບການເຕີບໂຕເພື່ອໃຫ້ເສດຖະກິດຂອງປະເທດຊາດມີຄຸນນະພາບໃໝ່, ລະດັບໃໝ່, ທຽບເທົ່າກັບບັນດາປະເທດທີ່ກ້າວໜ້າໃນພາກພື້ນ. ການພັດທະນາແບບຍືນຍົງແມ່ນການເລືອກເຟັ້ນທີ່ມີລະດັບຍຸດທະສາດຂອງປະເທດຊາດຫວຽດນາມໃນປະຈຸບັນ. ການພັດທະນາແບບຍືນຍົງກໍແມ່ນໄມ້ວັດແທກທາງດ້ານ ຄຸນນະທາດ, ພູມປັນຍາຂອງຫວຽດນາມໃນການແກ່ງແຍ້ງທົ່ວໂລກເພື່ອຈຸດໝາຍພັດທະນາປະເທດຊາດ. ການພັດທະນາແບບຍືນຍົງກໍແມ່ນພາບພົດໃນອະນາຄົດຂອງປະເທດຊາດຫວຽດນາມ.
ລະດູບານໃໝ່ພວມວຽນມາສູ່ບ້ານເກີດເມືອງນອນ, ປະເທດຊາດ. ໃນຊຸມມື້ນີ້, ຫວຽດນາມສືບຕໍ່ຂ້ອງຄ່າກັບບັນດາການເຄື່ອນໄຫວໃນປີທີ 2 ຂອງອາຍຸການແມ່ນສະມາຊິກເປັນສະມາຊິກສະພາສິດທິມະນຸດແຫ່ງສະຫະປະຊາຊາດ ແລະ ຄະນະກຳມະການມໍລະດົກແຫ່ງສະຫະປະຊາຊາດ. ບັນດາງວດສິນຄ້າໃນສັນຍາສົ່ງອອກປີ 2015 ໄດ້ຖືກຂົນຂຶ້ນກຳປັ່ນ, ຢູ່ຕາມໂຮງຈັກໂຮງງານ, ວິສາຫະກິດຍັງຄົງເຄື່ອນໄຫວຢ່າງຄຶກຄື້ນໃນຊຸມມື້ລະດູບານໃໝ່ . ບັນດາງານບຸນລົງນາກໍຈະຖືກຈັດຂຶ້ນໃນມໍ່ໆນີ້…
ດ້ວຍທຸກສິ່ງທຸກຢ່າງເຊັ່ນນັ້ນ, ລະດູບານໃໝ່ ປີມະແມ 2015 ໄດ້ທະວີຄູນຄວາມເຊື່ອໝັ້ນຕໍ່ກາລະໂອກາດທີ່ສະດວກເພື່ອໃຫ້ຊາວຫວຽດນາມສືບຕໍ່ສ້າງສາ ແລະ ພັດທະນາປະເທດຊາດ.