ໂດຍສືບຕໍ່ຜົນສຳເລັດຂອງ “ລະດູບານໃໝ່ຢູ່ບ້ານເກີດເມືອງນອນ” ໃນຊຸມປີຜ່ານມາ, ຄະນະກຳມະການແຫ່ງລັດກ່ຽວກັບຊາວຫວຽດນາມອາໄສຢູ່ຕ່າງປະເທດ-ສັງກັດກະຊວງການຕ່າງປະເທດຫວຽດນາມ ໄດ້ເປັນເຈົ້າການ ແລະ ສົມທົບກັບບັນດາອົງການທີ່ກ່ຽວຂ້ອງ ຈັດຕັ້ງລາຍ ການ “ລະດູບານໃໝ່ຢູ່ບ້ານເກີດເມືອງນອນປີ 2012” ດ້ວຍຫົວຂໍ້ວ່າ “ບ່ອນເຕົ້າໂຮມຂອງມັງກອນສັກສິກ”. ນີ້ແມ່ນໂອກາດເພື່ອໃຫ້ພໍ່ແມ່ປະຊາຊົນ ຊາວຫວຽດນາມທີ່ພວມດຳລົງຊີວິດ ແລະເຮັດວຽກຢູ່ທຸກແຫ່ງຫົນໃນໂລກ ມຸ້ງໄປສູ່ບ້ານເກີດເມືອງນອນ, ເຂົ້າຮ່ວມລາຍການສະແດງສີລະປະພິເສດໃນໂອກາດບຸນປີໃໝ່ປະຈຳຊາດ, ພ້ອມກັນນັ້ນ ນີ້ກໍແມ່ນໂອກາດເພື່ອໃຫ້ບັນດາຜູ້ທີ່ຢູ່ຫ່າງໄກຈາກບ້ານເກີດເມືອງນອນ ອ່ວາຍເມືອຫາກົກເຄົ້າເຫງົ້າກໍຂອງຊາດ.
ຊາວຫວຽດນາມອາໄສຢູ່ຕ່າງປະເທດກ່ວາ 1000 ຄົນ
ເຂົ້າຮ່ວມລາຍການ “ລະດູບານໃໝ່ຢູ່ບ້ານເກີດເມືອງນອນປີ 2012”
ພາບ:Http//:dantri.com.vn
ລາຍການ “ລະດູບານໃໝ່ຢູ່ບ້ານເກີດເມືອງນອນ” ປີນີ້ ໄດ້ຕ້ອນຮັບຊາວຫວຽດນາມອາໄສຢູ່ຕ່າງປະເທດ 1000 ຄົນ ຊື່ງແມ່ນຜູ້ຕາງໜ້າໃຫ້ ວົງຄະນະຍາດຊາວຫວຽດນາມອາໄສຢູ່ກ່ວາ 103 ປະເທດ ແລະເຂດແຄ້ວນໃນທົ່ວໂລກ. ນີ້ແມ່ນການພົບປະສ້າງສັນທີ່ມີຊາວຫວຽດນາມອາໄສຢູ່ຕ່າງປະເທດເຂົ້າຮ່ວມຫຼາຍທີ່ສຸດນັບແຕ່ກ່ອນມາ. ເຂົ້າຮ່ວມລາຍການ “ລະດູບານໃໝ່ຢູ່ບ້ານເກີດເມືອງນອນ” ບັນດາຜູ້ຕາງໜ້າຊາວຫວຽດນາມອາໄສຢູ່ຕ່າງປະເທດ ໄດ້ເຂົ້າຢ້ຽມຂ່ຳນັບສຸສານປະທານໂຮ່ຈິມິນ, ທະຫວາຍທູບທຽນຢູ່ວັງກິງທຽນ-ພະລາຊະວັງຮ່ວາງແທງທັງລອງ, ໄປຢ້ຽມຢາມເຂດປູສະນີຍະສະຖານປະທານໂຮ່ຈິມິນ, ວັດເສົາດຽວ ແລະດຳເນີນພິທີປ່ອຍປາລົງສະປາຂອງລຸງໂຮ່.
ຄະນະຜູ້ຕາງໜ້າຊາວຫວຽດນາມອາໄສຢູ່ຕ່າງປະເທດເຂົ້າຢ້ຽມຂ່ຳນັບສຸສານລຸງໂຮ່
ພາບ: Http//:thanhtra.com.vn
ໃນຕະຫຼອດໄລຍະ 5 ປີມານີ້, ລາຍການ “ລະດູບານໃໝ່ຢູ່ບ້ານເກີດເມືອງນອນ” ໄດ້ກາຍເປັນລາຍການຖືກຈັດຂຶ້ນປະຈຳປີ ໂດຍຄະນະກຳມະການແຫ່ງລັດກ່ຽວກັບຊາວຫວຽດນາມອາໄສຢູ່ຕ່າງປະເທດ-ສັງກັດກະຊວງການຕ່າງປະເທດຫວຽດນາມຈັດຕັ້ງ ເພື່ອຂ່ຳນັບຮັບຕ້ອນຊາວຫວຽດນາມອາໄສຢູ່ທຸກທະວີບ ກັບເມືອປະເທດຕ້ອນຮັບບຸນປີໃໝ່ປະຈຳຊາດ. ເຂົ້າຮ່ວມລາຍການ, ຊາວຫວຽດນາມອາໄສຢູ່ຕ່າງປະເທດໄດ້ມີໂອກາດຊອກຮູ້ສະພາບແວດລ້ອມແຫ່ງການດຳເນີນທຸລະກິດ, ການລົງທຶນຢູ່ພາຍໃນປະເທດກໍຄືຢູ່ປະເທດຕ່າງໆໃນໂລກ ໂດຍຜ່ານການແລກປ່ຽນກັບຊາວຫວຽດນາມອາໄສຢູ່ຕ່າງປະເທດ. ທ່ານຫງວຽວັນດາດ ຊາວຫວຽດນາມອາໄສຢູ່ສເຢຍລະມັນເວົ້າວ່າ:
“ເມື່ອເດີນທາງມາຮອດສະໜາມບິນໂນ້ຍບາຍ, ຂ້າພະເຈົ້າກໍຄິດວ່າ ຕ້ອງໄປຍັງຄະນະກຳມະການແຫ່ງລັດກ່ຽວກັບຊາວຫວຽດນາມອາໄສຢູ່ຕ່າງປະເທດ ເພື່ອຮັບບັດເຊີນເຂົ້າຮ່ວມລາຍການນີ້. ການພົບປະຢູ່ທີ່ນີ້ມີບັນຍາດກາດເບີກບານມ່ວນຊື່ນທີ່ສຸດ”
ໄດ້ຕ້ອນຮັບບຸນປີໃໝ່ປະຈຳຊາດໃນບ້ານເກີດເມືອງນອນຂອງຕົນແມ່ນຈຸດເວລາທີ່ມີຄວາມໝາຍທີ່ສຸດ ສຳລັບຊາວຫວຽດນາມອາໄສຢູ່ຕ່າງປະເທດ. ກັບຄືນເມືອປະເທດ ແມ່ນອ່ວຍເມືອຫາກົກເຄົ້າເຫງົ້າກໍ ຍ້ອນວ່າ ເຖິງຈະໄປເຖິງແຫ່ງຫົນໃດກໍຕາມ ຍາມໃດຊາວຫວຽດນາມກໍມຸ້ງໄປສູ່ບ້ານເກີດເມືອງນອນ. ທ່ານຫງວຽນຮ່ວາງຮຽບ ຊາວຫວຽດນາມອາໄສຢູ່ສະຫະພັນລັດເຊຍກ່າວວ່າ:
“ໄດ້ກັບເມືອບ້ານເກີດເມືອງນອນ ແນ່ນອນວ່າ ໃຜໆກໍມີຄວາມຮູ້ສຶກເຊັ່ນດຽວກັນກັບຂ້າພະເຈົ້າ. ໄດ້ກັບເມືອຫວຽດນາມ ຂ້າພະເຈົ້າມີຄວາມພາກພູມໃຈທີ່ສຸດ. ການກັບເມືອປະເທດ ແມ່ນຕ່າວກັບຄືນສູ່ເຂດດດິນຂອງແມ່. ຢູ່ຕ່າງປະເທດ, ຂ້າພະເຈົ້າເປັນພຽງແຂກເທົ່ານັ້ນ, ສ່ວນກັບມາທີ່ນີ້ ແມ່ນກັບຄືນສູ່ຊາຍຄາຂອງຕົນ, ສະນັ້ນຂ້າພະເຈົ້າມີຄວາມປະທັບໃຈເປັນຢ່າງຍິ່ງ”
ເຖິງວ່າບໍ່ອາໄສຢູ່ຫວຽດນາມກໍຕາມ ແຕ່ຊາວຫວຽດນາມອາໄສຢູ່ຕ່າງປະເທດຍັງໄດ້ຮັກສາ ແລະສືບທອດແບບແຜນການດຳລົງຊີວິດວັດທະນະທຳທີ່ເປັນມູນເຊື້ອອັນຈົບງາມທີ່ມີມາແຕ່ບູຮານນະການຂອງຊາດຫວຽດນາມໄວ້ຢູ່. ເມື່ອລະດູບານໃໝ່ວຽນມາ, ຊາວຫວຽດນາມອາໄສຢູ່ຕ່າງປະເທດໄດ້ສະຫງວນເວລາ ເພື່ອປະຕິບັດພິທີບູຊາຕາມຮີດຄອງປະເພນີຂອງຊາດຫວຽດນາມ. ທ່ານຫງວຽວັນດາດ ຊາວຫວຽດນາມອາໄສຢູ່ສເຢັຍລະມັນເວົ້າວ່າ:
“ປີກາຍ, ພວກຂ້າພະເຈົ້າໄດ້ຕ້ອນຮັບບຸນເຕັດຢູ່ເຢັຍລະມັນພ້ອມກັບລູກ 3 ຄົນ ແລະພວກຫຼານ. ໃນວັນບຸນເຕັດຂອງຫວຽດນາມ, ເຂົາເຈົ້າຍັງເຮັດວຽກເປັນປົກກະຕິ, ແຕ່ເມຍຂອງຂ້າພະເຈົ້າຍັງຫໍ່ເຂົ້າຕົ້ມ ແລະບູຊາບັນພະບູລຸດເທິງແທ່ນບູຊາ. ຢູ່ເຢຍລະມັນ ຄອບຄົວຂ້າພະເຈົ້າກໍມີແທ່ນບູຊາປູ່ຍ່າຕາຍາຍ, ພໍ່ແມ່”
ຕາມການສະຖິຕິແລ້ວ, ປີ 2011 ມີຊາວຫວຽດນາມອາໄສຢູ່ຕ່າງປະເທດກ່ວາ 300.000 ເທື່ອຄົນກັບຄືນເມືອປະເທດ ແລະຈຳນວນເງິນທີ່ເຂົາເຈົ້າສົ່ງມາປະເທດບັນລຸກ່ວາ 9 ຕື້ໂດລາສະຫະລັດ. ນີ້ແມ່ນຕົວເລກສະຖິຕິນັບແຕ່ກອ່ນມາ ເທົ່າກັບ 1/10 ຈີດີພີຂອງຫວຽດນາມ, ນຳຫວຽດນາມກາຍເປັນ 1 ໃນຈຳນວນ 10 ປະເທດທີ່ມີຈຳນວນເງິນຂອງຊາວຫວຽດນາມອາໄສຢູ່ຕ່າງປະເທດ ສົ່ງເມືອປະເທດຫຼາຍກ່ວາໝູ່ໃນປີ 2011. ກ້າວເຂົ້າສູ່ປີ 2012, ທ່ານຫງວຽນຮ່ວາງຮຽບຊາວຫວຽດນາມອາໄສຢູ່ສະຫະພັນລັດເຊຍ ຊື່ງແມ່ນນັກທຸລະກິດໃນຂົງເຂດອະສັງຫາລິມະຊັບຫວັງວ່າ ໃນປີໃໝ່ ປີມະໂຣງ, ຫວຽດນາມຈະສາມາດຜ່ານຜ່າທຸກໆຄວາມຫຍຸ້ງຍາກ, ການທ້າທາຍ, ສືບຕໍ່ບືນຕົວຂຶ້ນ ແລະພັດທະນາຢ່າງວັດທະນະຖາວອນ:
“ປີນີ້ແມ່ນປີທີ່ມີກາລະໂອກາດໃໝ່ຫຼາຍຢ່າງ. ປະຈຸບັນ ສະພາບອະສັງຫາລິມະຊັບຢູ່ຫວຽດນາມພວມສະຫງົບນິ້ງ. ນີ້ແມ່ນເງື່ອນໄຂທີ່ດີສຳລັບຜູ້ທີ່ມີເງິນລົງທຶນເຂົ້າຂົງເຂດນີ້ ຍ້ອນວ່າ ປະຈຸບັນ, ຂົງເຂດອະສັງຫາລິມະຊັບຢູ່ຫວຽດນາມ ມີຄວາມສາມາດບົ່ມຊ້ອນຫຼາຍຢ່າງ”
ວົງຄະນາຍາດຊາວຫວຽດນາມອາໄສຢູ່ຕ່າງປະເທດ ແມ່ນຂົວເຊື່ອມ ຕໍ່ເພື່ອການພັດທະນາສາຍພົວພັນຮ່ວມມືມິດຕະພາບລະຫວ່າງປະຊາຊົນຫວຽດນາມ ກັບປະຊາຊົນປະເທດຕ່າງໆໃນໂລກ ກໍຄືໂຄສະນາວັດທະນະທຳຫວຽດນາມກັບເພື່ອນມິດສາກົນ. ຍາມໃດ, ພັກ ແລະລັດຫວຽດນາມກໍຢືນຢັນວ່າ ຊາວຫວຽດນາມອາໄສຢູ່ຕ່າງປະເທດ ແມ່ນພາກສ່ວນໜື່ງທີ່ບໍ່ສາມາດຕັດແຍກອອກຈາກວົງຄະນາຍາດບັນດາຊົນເຜົ່າຫວຽດນາມໄດ້. ເມືອລະດູບານໃໝ່ວຽນມາ, ເຖິງວ່າ ຂ້ອງຄາກັບວຽກງານ ທຳມາຫາກິນຢູ່ຕ່າງປະເທດກໍຕາມ ແຕ່ຊາວຫວຽດນາມອາໄສຢູ່ຕ່າງປະເທດຫຼາຍຄົນ ຍັງພະຍາຍາມຊັບຊ້ອນເວລາ ເພື່ອກັບເມືອບ້ານ ແລະຕ້ອນຮັບບຸນປີໃໝ່ປະຈຳຊາດພ້ອມກັບຄອບຄົວ, ເພື່ອນມິດ ແລະຍາດຕິພີ່ນ້ອງຢູ່ພາຍໃນປະເທດ ແລະເຂົ້າຮ່ວມລາຍການ “ລະດູບານໃໝ່ຢູ່ບ້ານເກີດເມືອງນອນ”. ນີ້ແມ່ນຈຸດວັດທະນະທຳທີ່ເປັນມູນເຊື້ອ ຊື່ງຍາມໃດຊາວຫວຽດນາມອາໄສຢູ່ຕ່າງປະເທດໄດ້ຮັກສາ ແລະທະນຸຖະໜອມຢູ່.
ບູ່ຍຮັ່ງ-ເຟືອງ