ປະທານາທິບໍດີຊີຣີ Bashar al-Assad ພົບປະກັບທູດພິເສດຮ່ວມຂອງ ສ.ປ.ຊ ແລະ ສະຫະພັນອາຣັບ Lakhdar Brahimi ຢູ່ Damascus
(ພາບ : internet )
|
Vovworld- ໃນຂະນະທີ່ເວທີປາໄສການເມືອງໃຫຍ່ກ່ວາໝູ່ໃນໂລກ ຊຶ່ງແມ່ນກອງປະຊຸມປະຈຳປີຂອງສະມັດຊາໃຫຍ່ ສ.ປ.ຊ ພວມຖືກຈັດຂຶ້ນຢູ່ນິວຢອກປະເທດອາເມລິກາດ້ວຍຈຸດໃຈກາງແມ່ນຊອກຫາວິທີການແກ້ໄຂໃຫ້ແກ່ວິກິດການການເມືອງຢູ່ຊີຣີນັ້ນ, ວັນທີ 26/9, ຢູ່ທີ່ສຳນັກງານກອງບັນຊາການກອງທັບຊີຣີທີ່ນະຄອນຫຼວງ Damascus ພັດຖືກສັ່ນສະເທືອ່ນຍ້ອນເກີດເຫດວາງລະເບີດ 2 ຄັ້ງຢ່າງລຽນຕິດ. ການໃຊ້ຄວາມຮຸນແຮງໄດ້ເກີດຂຶ້ນໃນສະພາບການທີ່ຄວາມມານະພະຍາຍາມທາງການທູດຂອງປະຊາຄົມໂລກບໍ່ສາມາດນຳມາເຊິ່ງສັນຍານທີ່ໜ້າຊື່ນຊົມ ແລະ ຫາງສຽງກໍບໍ່ຕັ້ງຄວາມຫວັງຕໍ່ກອງປະຊຸມຄັ້ງນີ້ວ່າ ບັນດາການນຳໃນໂລກຈະຊອກຫາວິທີການແກ້ໄຂເພື່ອສິ້ນສຸດສົງຄາມກາງເມືອງຢູ່ຊີຣີໄດ້.
ການບຸກໂຈມຕີທີ່ແນໃສ່ສຳນັກງານການທະຫານທີ່ສຳຄັນອັນດັບໜຶ່ງຂອງຊີຣີໂດຍແມ່ນກຳລັງລຸກຮື້ຂຶ້ນຊີຣີປະຕິບັດ ແລະ ແມ່ນເຫດການບຸກໂຈມຕີຄັ້ງທີ່ 2 ໃນຮອບເວລາ 2 ວັນທີ່ຜ່ານມາຢູ່ ນະຄອນຫຼວງ Damascus. ເຖິງວ່າ ລັດຖະບານຊີຣີໄດ້ປະກາດຄວາມເສຍຫາຍຈາກເຫດການນີ້ແມ່ນບໍ່ຫຼາຍປານໃດ ແລະ ບໍ່ມີນາຍທະຫານຄົນໃດຖືກເສຍຊີວິດກໍຕາມ, ແຕ່ເຫດການບຸກໂຈມຕີນີ້ໄດ້ເຮັດໃຫ້ຜູ້ຄົນທັງຫຼາຍຄຳນຶງເຖິງເຫດວາງລະເບີດຢູ່ສຳນັກງານອົງການປ້ອງກັນຄວາມສະຫງົບແຫ່ງຊາດກ່ອນນີ້ກ່ວາ 1 ເດືອນ ຊຶ່ງໄດ້ເຮັດໃຫ້ເຈົ້າໜ້າທີຂັ້ນສູງ 4 ທ່ານຂອງອົງການປ້ອງກັນຄວາມສະຫງົບແຫ່ງຊາດຊີຣີຖືກເສຍຊີວິດ ແລະ ຊີຣີພວມນັບມື້ນັບຈົມເລິກເຂົ້າສູ່ສະພາບການໃຊ້ຄວາມຮຸນແຮງ.
ຊີຣີເຄີຍເປັນຫົວເລື່ອງທີ່ຖືກນຳມາປຶກສາຫາລືໃນກອງປະຊຸມລະດັບສາກົນຫຼາຍຄັ້ງ, ແຕ່ພາຍຫຼັງຖືກຕົກເຂົ້າສູ່ສະພາບຂາດສະຖຽນລະພາບເປັນເວລາ 18 ເດືອນ, ມາຮອດປະຈຸບັນ, ທຸກໆຂໍ້ລິເລີ່ມ, ວິທີການແກ້ໄຂດ້ານການເມືອງຂອງພາກພື້ນ ແລະ ສາກົນ ກໍລ້ວນແຕ່ບໍ່ບັນລຸໄດ້ປະສິດທິຜົນ. ຜູ້ຊ່ຽວຊານຫຼາຍທ່ານຖືວ່າ ສາຍເຫດຕົ້ນຕໍຍັງຄົງແມ່ນການຂາດຄວາມເຫັນດີເຫັນພ້ອມຈາກສາກົນໃນບັນດາຂໍ້ຕົກລົງທີ່ສຳຄັນກ່ຽວກັບຊີຣີ.
ຜູ້ຄົນທັງຫຼາຍຍັງຈືດີວ່າ ແຜນການສັນຕິພາບ 6 ຂໍ້ຂອງອະດີດທູດພິເສດຮ່ວມຂອງ ສ.ປ.ຊ ແລະ ສະຫະພັນອາຣັບ Kofi Annan ຖືກຍົກອອກມານັ້ນ, ໄດ້ຮັບການຕອບສະໜອງຈາກທຸກໆຝ່າຍ. ແຕ່ການຂາດກົນໄກການເຄື່ອນໄຫວທີ່ຈະແຈ້ງ, ຂາດການສຳພັນຕົວຈິງຢູ່ຊີຣີ, ເປັນຕົ້ນແມ່ນທັດສະນະລຳອຽງຂອງບາງປະເທດທີ່ມີຕໍ່ຝ່າຍໃດໜຶ່ງໃນການປະທະກັນ, ເຮັດໃຫ້ວິວັດການປະຕິບັດແຜນການສັນຕິພາບນີ້ນັບມື້ນັບປະສົບກັບສິ່ງກີດຂວາງ ແລະ ປະລາໄຊ. ເພື່ອບັງຄັບໃຫ້ປະທານາທິບໍດີຊີຣີ Bashar al-Assad ລາອອກຈາກຕຳແໜ່ງນັ້ນ, ຝະລັ່ງ, ບັນດາປະເທດອາຣັບໄດ້ຮຽກຮ້ອງຝ່າຍຄ້ານຊີຣີຫຼາຍຄັ້ງຈົ່ງສ້າງຕັ້ງລັດຖະບານຊົ່ວຄາວ, ແຕ່ວ່າແນວຄວາມຄິດນີ້ພັດຖືກອາເມລິກາຄັດຄ້ານຢ່າງຮຸນແຮງ. ເຖິງວ່າຍາມໃດກໍສະໜັບສະໜູນຕໍ່ການລາອອກຈາກຕຳແໜ່ງຂອງ ປະທານາທິບໍດີຊີຣີ Bashar al-Assad, ແຕ່ວໍຊິງຕັນໄດ້ຕຳໜິຕິຕຽນຝະລັ່ງ ແມ່ນຟ້າວຟັງ, ຂາດການສົມທົບກັບບັນດາປະເທດອື່ນໃນບັນຫານີ້ ແລະ ຍັງໄວເກີນໄປເພື່ອສ້າງຕັ້ງລັດຖະບານຊົ່ວຄາວຢູ່ຊີຣີຂະນະທີ່ຝ່າຍຄ້າຍຢູ່ປະເທດນີ້ ຊ້ຳບໍໜຳຍັງບໍ່ທັນເຫັນດີຕໍ່ແຜນການຫັນປ່ຽນ. ວໍຊິງຕັນຍັງຢາກລົງໂທດຢ່າງແຂງແຮງກ່ວາ ແລະ ພວມຕັ້ງໃຈຊ່ວຍຝ່າຍຄ້ານທາງດ້ານການທະຫານ. ນັບທັງຝ່າຍຕາເວັນຕົກ ແລະ ບັນດາປະເທດອາຣັບນັ້ນ, ເຖິງວ່າໄດ້ຮຽກຮ້ອງ ປະທານາທິບໍດີຊີຣີ Bashar al-Assad ຈົ່ງລາອອກຕຳແໜ່ງກໍຕາມ, ແຕ່ມາຮອດປະຈຸບັນ ຍັງບໍ່ທັນມີປະເທດໃດໆຮັບຮູ້ຝ່າຍຄ້ານຊີຣີຄືດັ່ງລະບອບການນຳພາທີ່ຖືກຕ້ອງຕາມກົດໝາຍຢ່າງເປັນທາງການ. ໃນຂະນະນັ້ນ, ສະພາຄວາມໝັ້ນຄົງ ສ.ປ.ຊ ໄດ້ອອກມະຕິຫຼາຍສະບັບຮຽກຮ້ອງໃຫ້ ປະທານາທິບໍດີຊີຣີ Bashar al-Assad ລາອອກຈາກຕຳແໜ່ງ, ແຕ່ຍາມໃດກໍຖືກ ລັດເຊຍ ແລະ ຈີນຢັບຢັ້ງ. ຫຼັກໝັ້ນທີ່ເດັດດຽວຂອງມົດສະກູ ແລະ ປັກກິງພັດໄດ້ຮັບການຢັ້ງຢືນອີກຄັ້ງໜຶ່ງເມື່ອວັນທີ 26/9 ພາຍຫຼັງທີ່ ສະພາຄວາມໝັ້ນຄົງ ສ.ປ.ຊ ຊັ່ງຊາກ່ຽວກັບຮ່າງມະຕິສະບັບໜຶ່ງໂດຍມົດສະກູຮຽບຮຽງ ຊຶ່ງຮຽກຮ້ອງໃຫ້ ປະທານາທິບໍດີຊີຣີ Bashar al-Assad ຈົ່ງລາອອກຈາກຕຳແໜ່ງ ແລະ ມອບໂອນສິດອຳນາດໃຫ້ແກ່ ຮອງປະທານາທິບໍດີ. ສ່ວນ ທູດພິເສດຮ່ວມຂອງ ສ.ປ.ຊ ແລະ ສະຫະພັນອາຣັບ Brahimi ເປີດເຜີຍວ່າ ທ່ານພວມສ້າງແຜນການເພື່ອຢຸດຕິສະພາບບໍ່ມີທາງອອກຢູ່ຊີຣີ ແຕ່ຍັງບໍ່ທັນປະກາດເທື່ອຍ້ອນຕ້ອງການມີການສົນທະນາຫາລືກັບຝ່າຍຕ່າງໆທີ່ກ່ຽວຂ້ອງຕື່ມອີກຫຼາຍຄັ້ງເພື່ອສ້າງແຜນການດັ່ງກ່າວໃຫ້ສຳເລັດ. ບັນດາຜູ້ຊ່ຽວຊານໃຫ້ຂໍ້ສັງເກດວ່າ ເຖິງວ່າຍາກທີ່ຈະເກີດກໍລະນີທ່ານປະທານາທິບໍດີຊີຣີ Bashar al-Assad ລາອອກຈາກຕຳແໜ່ງກໍຕາມ, ແຕ່ຄວາມປາດຖະໜາກ່ຽວກັບວິທີການແກ້ໄຂບັນຫາຊີຣີຍັງຈະອາດຈະບັນລຸໄດ້ ຖ້າຫາກບັນດາຝ່າຍຊອກຫາຄວາມເຫັນດີເຫັນພ້ອມ ຊຶ່ງແມ່ນປັດໄຈສຳຄັນຮັບປະກັນໃຫ້ແກ່ວິທີການແກ້ໄຂສັນຕິພາບຢູ່ຊີຣີ.
ໃນຂະນະທີ່ປະຊາຄົມໂລກພວມຊອກຫາວິທີການແກ້ໄຂໃຫ້ແກ່ການປະທະກັນຢູ່ຊີຣີນັ້ນ, ປະເທດນີ້ພັດຕ້ອງປະເຊີນໜ້າກັບບັນດາຜົນພາຍຫຼັງຈາກສົງຄາມ ກາງເມືອງ. ວິກິດການສະບຽງອາຫານຍ້ອນລະດູການຜະລິດຖືກຜົນເສຍຫາຍ, ປະຊາຊົນເຖິງວ່າໄດ້ຮັບບາດເຈັບແຕ່ພັດບໍ່ກ້າໄປປິ່ນປົວຢູ່ໂຮງໝໍ, ເດັກນ້ອຍບໍ່ໄດ້ໄປໂຮງຮຽນ ຍ້ອນວ່າຖ້າຫາກບໍ່ຖືກເປເພນັ້ນ, ກໍຕ້ອງໃຊ້ເປັນບ່ອນຊ້ອນຕົວໃຫ້ ແກ່ປະຊາຊົນນັບໝື່ນຄົນທີ່ຖືກສູນເສຍເຮືອນຊານ. ໂຮງຈັກໂຮງງານ, ກິດຈະກຳຮັບໃຊ້ຊີວິດການເປັນຢູ່ຂອງປະຊາຊົນຖືກທຳລາຍ ແລະ ອື່ນໆ. ສະພາບການທີ່ຊົ່ວຮ້າຍຈົນເຖິງຂັ້ນທີ່ໃນວັນທີ 26/9, ທູດພິເສດຮ່ວມຂອງ ສ.ປ.ຊ ແລະ ສະຫະພັນອາຣັບ Brahimi ໄດ້ຍອມຮັບໃນວາລະປະຊຸມລັບຂອງ ສະພາຄວາມໝັ້ນຄົງ ສ.ປ.ຊ ວ່າ ສະພາບການຢູ່ຊີຣີພວມນັບມື້ນັບຊົ່ວຮ້າຍລົງ ບໍ່ພຽງແຕ່ເປັນໄພນາບຂູ່ຕໍ່ສະຖຽນລະພາບໃນພາກພື້ນເທົ່ານັ້ນ, ຫາກຍັງເປັນໄພນາບຂູ່ຕໍ່ ຄວາມສະຫງົບປອດໄພ, ສະຖຽນລະພາບ ແລະ ສັນຕິພາບໃນໂລກອີກດ້ວຍ.
ເມື່ອໃດ ແລະ ດ້ວຍວິທີໃດທີ່ປະຊາຄົມໂລກຈະເຫັນປະຈັກຕາວັນເວລາສິ້ນສຸດວິກິດການຢູ່ຊີຣີ ຂະນະທີ່ບັນດາການນຳໃນສະພາຄວາມໝັ້ນຄົງ ສ.ປ.ຊ ຍັງຄົງມີຄວາມຂັດແຍ້ງກັນຢ່າງເລິກເຊິ່ງນັ້ນ ? ນີ້ແມ່ນຄຳຖາມທີ່ຍາກຈະຫາຄຳຕອບໄດ້. ໃນເມື່ອບັນດາປະເທດມະຫາອຳນາດຍັງຖືກແບ່ງແຍກກ່ຽວກັບວິທີການແກ້ໄຂບັນຫາຊີຣີນັ້ນ ແລະ ເຖິງແມ່ນວ່າມີຄຳສັ່ງຢຸດຍິງຫຼືຂໍ້ລິເລີ່ມໃດຕື່ມອີກກໍຕາມ, ຊີຣີກໍຍາກທີ່ຈະຫຼີກລ້ຽງສະພາບວິກິດການ ແລະ ອະນາຄົດຂອງຊີຮີຍັງຄົງມືດມົວຢູ່ .