ຕາບໃດທີ່ອົງການອ້າຍນ້ອງອິດສະລາມຍັງທ່ວງໃຫ້ຟື້ນຟູຕຳແໜ່ງໃຫ້ທ່ານ Mohamed Morsi , ສະຖານະການການເມືອງຢູ່ອີຢິບກໍຍັງຖືກຕົກເຂົ້າສູ່ສະພາບບໍ່ມີທາງອອກ (ພາບ: AP)
|
ວິກິດການການເມືອງຢູ່ອີຢິບໄດ້ກ້າວເຂົ້າສູ່ໄລຍະເຄັ່ງຕຶງທີ່ສຸດ, ຂະນະທີ່ໃນ ວັນທີ 14/8, ໄດ້ກາຍ ເປັນມື້ທີ່ນອງເລືອດທີ່ສຸດຢູ່ປະເທດນີ້ ດ້ວຍຈຳນວນຜູ້ເສຍຊີວິດເກືອບ 300 ຄົນ ແລະ ນັບພັນຄົນອື່ນໄດ້ຮັບບາດເຈັບ. ພາຍຫຼັງບັນດາຄວາມມານະພະຍາຍາມໄກ່ເກ່ຍຂອງສາກົນຖືກປະລາໄຊນັ້ນ, ບັນດາຄຳນາບຂູ່ດ້ວຍການກະທຳຕ້ານຄືນບັນດາຜູ້ແຫ່ຂະບວນປະທ້ວງສະໜັບສະໜູນອະດີດປະທານາທິບໍດີຜູ້ຖືກໂຄ່ນລົ້ມ ທ່ານ Mohamed Morsi ຂອງລັດຖະບານ, ສຸດທ້າຍໄດ້ກາຍເປັນຄວາມຈິງ. ສະພາບການໃນປະຈຸບັນ ໄດ້ເຮັດໃຫ້ຫາງສຽງບໍ່ປະເອີບໃຈກ່ຽວກັບເລື່ອງຊອກຫາວິທີໃດເພື່ອຊ່ວຍອີຢິບສາມາດຊອກຫາທາງອອກໃນຊຸມວັນທີ່ຈະມາເຖິງ.
ໃນການຜັນແປຄັ້ງຫຼ້າສຸດ, ວັນທີ 14/8, ລັດຖະບານອີຢິບໄດ້ປະກາດສະພາວະສຸກເສີນທີ່ແກ່ຍາວເປັນເວລາ 1 ເດືອນ ຂະນະທີ່ການໃຊ້ຄວາມຮຸນແຮງໄດ້ລະເບີດຂຶ້ນຢ່າງຮ້າຍແຮງໃນທົ່ວປະເທດ ພາຍຫຼັງທີ່ກຳລັງປ້ອງກັນຄວາມສະຫງົບປາບປາມ ບັນດາຜູ້ແຫ່ຂະບວນປະທ້ວງສະໜັບສະໜູນອະດີດປະທານາທິບໍດີຜູ້ຖືກໂຄ່ນລົ້ມ ທ່ານ Mohamed Morsi. ແຈ້ງການຂອງຫ້ອງວ່າການປະທານາທິບໍດີອີຢິບ ໄດ້ຊີ້ແຈ້ງວ່າ ມາດຕະການທີ່ຮີບດ່ວນນີ້ ຕ້ອງໄດ້ວາງອອກ ຂະນະທີ່ “ ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງປະເທດຊາດປະເຊີນໜ້າກັບໄພອັນຕະລາຍຍ້ອນການມ້າງເພທຳລາຍໂດຍມີການຄິດໄລຂອງກຸ່ມຄົນຫົວຮຸນແຮງ. ພ້ອມກັນນັ້ນ, ປະທານາທິບໍດີຊົ່ວຄາວ ທ່ານ Adly Mansour ກໍໄດ້ຖະແຫຼງວ່າ ໄດ້ມອບໝາຍໜ້າທີ່ໃຫ້ແກ່ກຳລັງປະກອບອາວຸດ, ສົມທົບກັບຕຳຫຼວດ, ນຳໃຊ້ທຸກມາດຕະການທີ່ຈຳເປັນເພື່ອຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ປົກປັກຮັກສາຊັບສິນສ່ວນລວມ ແລະ ຊັບສິນຂອງເອກະຊົນ, ກໍຄືຊີວິດອີນຊີຂອງປະຊາຊົນ ” . ແຕ່ຄວາມຈິງທີ່ໜ້າໂສກເສົ້າແມ່ນຈຳນວນສາມັນຊົນຜູ້ຖືກເສຍຊີວິດໃນບັນດາການປະທະກັນໄດ້ຂຶ້ນເຖິງ 525 ຄົນ ແລະ ອີກນັບພັນຄົນໄດ້ຮັບບາດເຈັບ. ຮອງປະທານາທິບໍດີອີຢິບ ທ່ານ Mohamed El Baradei ໄດ້ຖະແຫຼງລາອອກຈາກຕຳແໜ່ງເພາະຮູ້ສຶກວ່າ ບໍ່ມີກຳລັງຄວາມສາມາດຢ່າງພຽງພໍ ແລະ ເສຍໃຈເມື່ອມີຫຼາຍຄົນເສຍຊີວິດ, ຊຶ່ງຕາມທ່ານແລ້ວ, ຄວາມສູນເສຍເຫຼົ້ານັ້ນ ແມ່ນອາດຈະຫຼີກເວັ້ນໄດ້.
ປະຊາຄົມໂລກໄດ້ມີປະຕິກິລີຍາຢ່າງຮຸນແຮງພາຍຫຼັງທີ່ກຳລັງປ້ອງກັນຄວາມສະຫງົບອີຢິບໄດ້ປາບປາມ ບັນດາຜູ້ແຫ່ຂະບວນປະທ້ວງ. ສະຫະພາບເອີລົບ EU ຖືວ່າ ກໍລະນີນີ້ແມ່ນເປັນໜ້າວິຕົກກັງວົນທີ່ສຸດ ແລະ ຮຽກຮ້ອງໃຫ້ວົງການເຈົ້າໜ້າທີ່ຂອງປະເທດນີ້ຕ້ອງລະງັບໃຈ. ເຢັຍລະມັນ, ຝະລັ່ງ, ອັງກິດ, ຕວກກີ ໄດ້ກະຕຸກຊຸກຍູ້ ບັນດາຜູ້ສະໜັບສະໜູນລັດຖະບານຊົ່ວຄາວ ແລະ ຝ່າຍສະໜັບສະໜູນອະດີດປະທານາທິບໍດີຜູ້ຖືກໂຄ່ນລົ້ມ ທ່ານ Mohamed Morsi ຈົ່ງປະລະການໃຊ້ຄວາມຮຸນແຮງ, ພ້ອມທັງຮຽກຮ້ອງໃຫ້ສະພາຄວາມໝັ້ນຄົງສະຫະປະຊາຊາດ ແລະ ສະຫະພັນອາຮັບ AL ຈົ່ງມີບັນດາບາດກ້າວເດີນຢ່າງວ່ອງໄວ ແນໃສ່ຢຸດຕິການເຂັ່ນຂ້າສາມັນຊົນຢູ່ອີຢິບ ແລະ ຖືວ່າ ຄວາມມິດງຽບຂອງປະຊາຄົມໂລກໄດ້ເປີດຊ່ອງທາງໃຫ້ແກ່ການປາບປາມໂດຍໃຊ້ຄວາມຮຸນແຮງຂອງບັນດາເຈົ້າໜ້າທີ່ ອີຢິບ. ສ່ວນ ອີຣານກໍເອີ້ນວ່າ ນີ້ແມ່ນການເຂັ່ນຂ້າຢູ່ອີຢິບ. ໃນຂະນະນັ້ນຊາວຈໍແດນນັບສິບຄົນໄດ້ດຳເນີນການປະທ້ວງດ້ວຍການນັ່ງຢູ່ຕໍ່ໜ້າສະຖານທູດອີຢິບທີ່ນະຄອນຫຼວງໂອມານເພື່ອຄັດຄ້ານການກະທຳປາບປາມ ບັນດາຜູ້ແຫ່ຂະບວນປະທ້ວງຂອງກອງທັບອີຢິບ. ໂດຍມີທັດສະນະເຊັ່ນດຽວກັນກັບຫຼາຍປະເທດ, ກາຕາ ກໍໄດ້ອອກສຽງຕຳໜິຕິຕຽນການປາບປາມ ແລະ ຖະແຫຼງສະໜັບສະໜູນອົງການອ້າຍນ້ອງອິດສະລາມຂອງທ່ານ Mohamed Morsi ຢ່າງແຂງແຮງ.
ເປັນທີ່ຈະແຈ້ງແລ້ວວ່າ ສະພາບການຢູ່ອີຢິບພວມຕົກເຂົ້າສູ່ສະພາບບໍ່ມີທາງອອກຢ່າງຮອບດ້ານ. ປະຊາຊົນປະເທດນີ້ພວມຊຶມເລິກຄວາມຈິງທີ່ເຈັບແສບກ່ວາໝູ່ເມື່ອທຽບໃສ່ປະຊາຊົນຢູ່ບໍ່ວ່າປະເທດອື່ນໆໃນຂະບວນການລະດູບານໃໝ່ອາຣັບວ່າ ການໂຄ່ນລົ້ມອຳນາດການປົກຄອງຜະເດັດການແມ່ນງ່າຍກ່ວາຫຼາຍເມື່ອທຽບໃສ່ການທົດແທນມັນດ້ວຍລະບົບລັດຖະບານອື່ນ. ກ່ວາ 2 ປີ, ພາຍຫຼັງໂຄ່ນລົ້ມອຳນາດການປົກຄອງຜະເດັດການຂອງທ່ານ Hosni Mubarac, ອີຢິບຍັງບໍ່ສາມາດສ້າງຕັ້ງລະບົບ ການເມືອງຢ່າງແທ້ຈິງ, ສາຍເຫດແມ່ນຍ້ອນ ສະພາບແບ່ງຂັ້ນ ແລະ ຂາດເຈດຕະນາດີ ຜ່ອນສັ້ນ ຜ່ອນຍາວເພື່ອ ຜົນປະໂຫຍດ ລວມ. ນີ້ກໍແມ່ນຈຸດອ່ອນທີ່ພາໃຫ້ວິວັດທະນາການປະຕິຮູບຂອງປະເທດ ອາຟະລິກາເໜືອນີ້ ບໍ່ໄປເຖິງເປົ້າໝາຍ. ນັບແຕ່ເວລາປະທານາທິບໍດີ Hosni Mubarak ຖືກໂຄ່ນລົ້ມ, ຄວາມແຕກແຫງໃນສັງຄົມອີຢິບນັບມື້ນັບເພີ່ມທະວີຂຶ້ນ. ເຖິງວ່າອົງການອ້າຍນ້ອງອິດສະລາມຍາດໄດ້ໄຊຊະນະໃນການເລືອກຕັ້ງ ແລະ ກຳສິດອຳນາດ ນຳພາປະເທດຊາດກໍຕາມ, ແຕ່ເຂົາເຈົ້າພັດບໍ່ສາມາດເກ້ຍກອມຊາວອີຢິບນັບລ້ານຄົນໃຫ້ມີຄວາມເຊື່ອໝັ້ນວ່າ ນະໂຍບາຍຂອງເຂົາເຈົ້າແມ່ນຮອບດ້ານຂະນະທີ່ສະພາບໄພວ່າງງານ ແລະ ອຶດຫິວທຸກຍາກໄດ້ເພີ່ມທະວີຂຶ້ນ. ກ່ອນຈຸດເວລາທີ່ປະທານາທິບໍດີ Mohamed Morsi ຖືກໂຄ່ນລົ້ມ, ກອງທັບຍັງຄົງຮັບຖືວ່າ ກຳມະການດ້ານການເມືອງໜຶ່ງດຽວເທົ່ານັ້ນຢູ່ອີຢິບ, ແຕ່ປະຈຸບັນ ພວມມີບັນດາບາດກ້າວເດີນເປັນອັນຕະລາຍເມື່ອດຳເນີນການປາບປາມບັນດາຜູ້ແຫ່ຂະບວນປະທ້ວງສະໜັບສະໜູນອະດີດປະທານາທິບໍດີຜູ້ຖືກໂຄ່ນລົ້ມ ທ່ານ Mohamed Morsi. ສິ່ງທ້າທາຍຢ່າງໜັກຂອງອີຢິບແມ່ນບັນດາຝ່າຍພວມສະແດງຫຼັກໝັ້ນ ແຂງກະດ້າງທີ່ສຸດ, ຄວາມຂັດແຍ້ງກັນລະຫວ່າງບັນດາຝ່າຍພວມນັບມື້ນັບຮ້າຍແຮງ. ກອງທັບເດັດດຽວບໍ່ຜ່ອນສັ້ນຜ່ອນຍາວ ແລະ ຖະແຫຼງວ່າຈະສືບຕໍ່ເພີ່ມທະວີກຳລັງດັນຕໍ່ບັນດາຜູ້ແຫ່ຂະບວນປະທ້ວງ. ສ່ວນອົງການອ້າຍນ້ອງອິດສະລາມຢືນຢັນວ່າ ການແຫ່ຂະບວນປະທ້ວງຈະສືບຕໍ່ດຳເນີນ ຕາບໃດທີ່ລັດຖະບານໂດຍກອງທັບໜູນຫຼັງລາອອກຈາກຕຳແໜ່ງ ແລະ ທ່ານ Mohamed Morsi ກັບຄືນສູ່ດຳລົງຕຳແໜ່ງປະທານາທິບໍດີ.
ຈາກການຜັນແປເຫຼົ້ານັ້ນ, ຫາງສຽງຍັງບໍ່ທັນເຫັນສັນຍານແຫ່ງຄວາມຫວັງໃດໆເພື່ອແກ້ໄຂສະພາບການເມືອງບໍ່ມີທາງອອກໃນປະຈຸບັນຢູ່ອີຢິບ. ຄວາມຂັດແຍ້ງກັນລະຫວ່າງບັນດາຝ່າຍພວມພາໃຫ້ປະເທດອີຢິບຕົກເຂົ້າສູ່ສະພາບໃຊ້ຄວາມຮຸນແຮງຢ່າງຮ້າຍແຮງ, ພ້ອມທັງຍູ້ວິວັດທະນາການປະຕິຮູບຢູ່ປະເທດນີ້ກ້າວເດີນຢ່າງເຂວທິດ.