ວິທີການໃໝ່ເພື່ອຊຸກຍູ້ວິວັດທະນາສັນຕິພາບຢູ່ຕາເວັນອອກກາງ

Anh huyen -

ວັນພະຫັດ ທີ 4 ທັນວາ ຄ.ສ. 2014 | 14:00:00

ຫວ່າງມໍ່ໆມານີ້, ສະພາແຫ່ງຊາດຝະລັ່ງໄດ້ຮັບຮອງເອົາມະຕິຮັບຮອງ ປາແລັດສະຕິນແມ່ນປະເທດເອກະລາດ. ເປັນອັນວ່າ ຖັດຈາກຊູແອດ, ອັງກິດ, ອຽກລັງ, ແອັດສະປາຍນັ້ນ, ຝະລັ່ງແມ່ນປະເທດທີ່ 5 ໃນເຂດເອີລົບຕາເວັນຕົກ ໄດ້ສະໜັບສະໜູນ ປາແລັດສະຕິນສ້າງຕັ້ງລັດຂອງສະເພາະຕົນເອງ. ໃນສະພາບບັນດາການເຈລະຈາຊອກຫາວິທີການແກ້ໄຂດ້ວຍການຄົງຕົວ 2 ລັດລະຫວ່າງ ປາແລັດສະຕິນ ແລະ ອິດສະຣາແອນ ຖືຕົກເຂົ້າສູ່ສະພາບບໍ່ມີທາງອອກນັ້ນ, ນັບມື້ນັບມີຫຼາຍປະເທດສະໜັບສະໜູນຄວາມມານາພະຍາຍາມສ້າງຕັ້ງລັດ ປາແລັດສະຕິນ ຊຶ່ງໄດ້ຮັບຖືວ່າ ແມ່ນວິທີການເພື່ອຊຸກຍູ້ວິວັດທະນາສັນຕິພາບຢູ່ຕາເວັນອອກກາງ .

ວິທີການໃໝ່ເພື່ອຊຸກຍູ້ວິວັດທະນາສັນຕິພາບຢູ່ຕາເວັນອອກກາງ - ảnh 1

ສະພາແຫ່ງຊາດຝະລັ່ງໄດ້ລົງຄະແນນສຽງຮັບຮອງລັດ ປາແລັດສະຕິນ

(ພາບ:EPA)

ດ້ວຍຈຳນວນບັດສະໜັບສະໜູນ 339 ບັດ, ບັດຄັດຄ້ານ 151 ບັດ ແລະ ບັດຂາວ 16 ບັດ, ວັນທີ 2/12, ສະພາແຫ່ງຊາດຝະລັ່ງໄດ້ຮັບຮອງເອົາມະຕິສະເໜີລັດຖະບານຝະລັ່ງຮັບຮອງລັດ ປາແລັດສະຕິນ ແນໃສ່ບັນລຸວິທີການແກ້ໄຂສຸດທ້າຍໃຫ້ແກ່ການປະທະກັນລະຫວ່າງ ປາແລັດສະຕິນ ແລະ ອິດສະຣາແອນ ຊຶ່ງໄດ້ແກ່ຍາວມາຫຼາຍທົດສະວັດທີ່ຜ່ານມາ.

ປະຊາຄົມໂລກຮ່ວມແຮງຮ່ວມໃຈກະທຳເພື່ອສັນຕິພາບ

ກ່ອນທີ່ດຳເນີນການປ່ອນບັດ, ທ່ານລັດຖະມົນຕີການຕ່າງປະເທດຝະລັ່ງ Laurent Fabius ໄດ້ເນັ້ນໜັກວ່າ ສະພາບປະຈຸບັນຢູ່ເຂດກາຊາຍັງບໍ່ທັນມຸ່ງໄປສູ່ວິວັດທະນາການສັນຕິພາບ, ດັ່ງນັ້ນ, ຝະລັ່ງຢາກຮັບຮອງລັດ ປາແລັດສະຕິນເອກະລາດ ຫາກບໍ່ຕ້ອງການຜ່ານການເຈລະຈາ. ກ່ອນໜ້ານັ້ນ, ຜູ້ຕ່າງໜ້າຂັ້ນສູງກ່ຽວກັບນະໂຍບາຍປ້ອງກັນຄວາມສະຫງົບ ແລະ ການພົວພັນຕ່າງປະເທດຂອງ EU ທ່ານນາງ Federica Mogherini ໃນການຢ້ຽມຢາມເຂດກາຊາ ກໍໄດ້ສະແດງໃຫ້ເຫັນແຈ້ງທັດສະນະທີ່ວ່າ ບໍ່ພຽງແຕ່ປະຊາຊົນຢູ່ເຂດກາຊາເທົ່ານັ້ນ, ຫາກຍັງທົ່ວໂລກ ກໍລ້ວນແຕ່ບໍ່ຢາກເກີດການສູ້ຮົບຢູ່ເຂດນີ້ອີກ. ເຖິງເວລາແລ້ວ, ໂລກບໍ່ພຽງແຕ່ນັ່ງລໍ່ຖ້າ, ຫາກຕ້ອງກະທຳ, ຖ້າບໍ່ດັ່ງນັ້ນ, ສະພາບການປະທະກັນຈະແກ່ຍາວ 40 ປີ ຕື່ມອີກ . ໃນຂະນະນັ້ນ, ທ່ານເລຂາທິການໃຫຍ່ ສ.ປ.ຊ Ban Ki moon ໄດ້ຍອມຮັບວ່າ ຄວາມປະລາໄຊໃນການຊຸກຍູ້ວິທີການແກ້ໄຂດ້ານການເມືອງໃຫ້ແກ່ການປະທະກັນ ປາແລັດສະຕິນ - ອິດສະຣາແອນ ໄດ້ເຮັດໃຫ້ລັດຖະບານ ແລະ ສະພາແຫ່ງຊາດຂອງຫຼາຍປະເທດມີການກະທຳ ເພື່ອຮັບຮອງລັດ ປາແລັດສະຕິນ.

ວິທີການສຳພັດໃໝ່ ຊຸກຍູ້ມາດຕະການຄົງຕົວ 2 ລັດ

ນັບແຕ່ກ່ອນເປັນຕົ້ນມາ, ອຳນາດການປົກຄອງ ປາແລັດສະຕິນ ຍາມໃດກໍມານະພະຍາຍາມຊອກຫາຖານະເປັນລັດເອກະລາດສຳລັບເຂດຝັ່ງຕາເວັນຕົກແມ່ນ້ຳຈໍແດນ ແລະ ເຂດກາຊາ, ພ້ອມກັນນັ້ນ, ກໍຢາກຕັ້ງນະຄອນຫຼວງຢູ່ເຢລູຊາແລມຕາເວັນອອກ. ໃນປີ 2012, ກອງປະຊຸມສະມັດຊາໃຫຍ່ ສ.ປ.ຊ ໄດ້ຮັບຮູ້ບົດບາດ “ ລັດສັງເກດການ, ບໍ່ແມ່ນສະມາຊິກ” ຂອງປາແລັດສະຕິນ. ແຕ່ປີ 2012 ມາຮອດປະຈຸບັນ, ໃນຂະນະທີ່ບັນດາປະເທດພວມພັດທະນາເກືອບທັງໝົດລ້ວນແຕ່ຮັບຮອງລັດ ປາແລັດສະຕິນນັ້ນ, ບັນດາປະເທດເອີລົບຕາເວັນອອກ, ຊຶ່ງເຄີບສະໜັບສະໜູນເອເມລິກາ ພັດຖືວ່າ ລັດ ປາແລັດສະຕິນເອກະລາດຕ້ອງໄດ້ຮັບການກໍ່ສ້າງໂດຍອີງໃສ່ບັນດາການເຈລະຈາສັນຕິພາບກັບ ອິດສະຣາແອນ. ແຕ່ພາຍຫຼັງຄວາມມານະພະຍາຍາມຄັ້ງຫຼ້າສຸດຂອງອາເມລິກາ ແນໃສ່ຟື້ນຟູບັນດາການເຈລະຈາລະຫວ່າງ ປາແລັດສະຕິນ ອິດສະຣາແອນ ຖືກປະລາໄຊນັ້ນ, ບັນດາປະເທດເອີລົບພວມນັບມື້ນັບສະແດງທ່າທີສູນເສຍຄວາມມານະອົດທົນຕໍ່ບັນດານະໂຍບາຍຂອງ ອິດສະຣາແອນ. ພ້ອມກັບ 7 ປະເທດຂຶ້ນກັບກຸ່ມ EU ຢູ່ເອີລົບຕາເວັນອອກທີ່ຮັບຮອງລັດ ປາແລັດສະຕິນ ນັ້ນ, ເລື່ອງ 5 ປະເທດເອີລົບຕາເວັນຕົກປ່ຽນແປງທັດສະນະສະໜັບສະໜູນການສ້າງຕັ້ງລັດ ປາແລັດສະຕິນນັ້ນ ໄດ້ສະແດງໃຫ້ເຫັນຄວາມເສຍຫວັງຢ່າງໃຫຍ່ຫຼວງຕໍ່ໜ້າຄວາມປະລາໄຊຂອງ ວິວັດທະນາການສັນຕິພາບ ແລະ ບໍ່ມີການເລືອກເຟັ້ນໃດໆອີກນອກເໜືອຈາກເລື່ອງຕ້ອງມີຄວາມຕັດສິນແຂງແຮງກວ່າ.

ເປັນທີ່ຈະແຈ້ງແລ້ວວ່າ ຈຳນວນບັນດາປະເທດ ຮັບຮອງລັດ ປາແລັດສະຕິນ ພວມສືບຕໍ່ເພີ່ມຫຼາຍຂຶ້ນ, ຊຶ່ງເປັນສັນຍານທີ່ໜ້າພູມໃຈສຳລັບບັນຫາໜຶ່ງທີ່ຄົງຕົວຍາວນານມາເປັນເວລາຫຼາຍປີໃນຊີວິດການເມືອງ, ການປ້ອງກັນຄວາມສະຫງົບສາກົນ. ການປະທະກັນທີ່ແກ່ຍາວຢູ່ຕາເວັນອອກກາງບໍ່ພຽງແຕ່ເຮັດໃຫ້ປະຊາຊົນຢູ່ແຫ່ງນີ້ກາຍເປັນຜູ້ຮັບເຄາະຮ້າຍເປັນໜ້າສົມເພດເວດທະນາທີ່ສຸດໃນໂລກເທົ່ານັ້ນ, ຫາກຍັງສົ່ງຜົນສະທ້ອນເຖິງຄວາມໝັ້ນຄົງທົ່ວພາກພື້ນອີກດ້ວຍ. ອາເມລິກາ ຊຶ່ງແມ່ນປະເທດພັນທະມິດທີ່ໃກ້ຊິດຂອງ ອິດສະຣາແອນ , ແນ່ນອນວ່າປະຈຸບັນຕ້ອງຊອກຫາວິທີແກ້ໄຂໃໝ່ໃຫ້ແກ່ບັນຫາປະທະກັນລະຫວ່າງ ເຢລູຊາແລມ-ຣາມາລາ. ໃນເບື້ອງຕົ້ນການສະໜັບສະໜູນລັດ ປາແລັດສະຕິນ ຂອງບັນດາປະເທດເອີລົບ ພຽງແຕ່ມີລັກສະນະເປັນສັນຍາລັກເທົ່ານັ້ນ, ແຕ່ມັນມີຄວາມໝາຍສຳຄັນທີ່ສຸດ. ທັງນີ້ກໍເປັນການສະແດງໃຫ້ເຫັນວ່າ ເມື່ອຄວາມມານະພະຍາຍາມເຈລະຈາໄກ່ເກັ່ຍຖືກບັນດານະໂຍບາຍ, ຂາດເຈດຕະນາດີທຳລາຍນັ້ນ, ກຳລັງດັນຂອງທັງປະຊາຄົມໂລກພັດແມ່ນວິທີແກ້ໄຂທີ່ມີປະສິດທິຜົນເພື່ອໃຫ້ ວິວັດທະນາການສັນຕິພາບຢູ່ຕາເວັນອອກກາງໄປຮອດຈຸດໝາຍປາຍທາງ.

Anh huyen