(vovworld)- ວັນທີ 7/9/2016, ວິທະຍຸກະຈາຍສຽງຫວຽດນາມ (VOV) ສະເຫລີມສະຫລອງ 71 ປີແຫ່ງວັນສ້າງຕັ້ງ (7/9/1945-7/9/2016). ນັບແຕ່ມື້ອອກອາກາດລາຍການກະຈາຍສຽງທຳອິດເມື່ອລະດູໃບໄມ້ຫລົ່ນປີ 1945, ວິທະຍຸກະຈາຍສຽງຫວຽດນາມ ແມ່ນເພື່ອນສະຫນິດສະຫນົມກັບຜູ້ຟັງນັບສີບໆລ້ານຄົນຢູ່ພາຍໃນປະເທດ ພ້ອມທັງແມ່ນແຫລ່ງຂໍ້ມູນຂ່າວທີ່ມີປະໂຫຍດສຳລັບຜູ້ຟັງ, ເພື່ອນມິດສາກົນນັບລ້ານໆຄົນ. ປະຈຸບັນ ວິທະຍຸກະຈາຍສຽງຫວຽດນາມ ແມ່ນຫນຶ່ງໃນບັນດາອົງການສື່ມວນຊົນຫລາຍປະເພດແຖວຫນ້າຂອງປະເທດຊາດ, ດຶງດູດຜູ້ຟັງ, ຜູ້ຊົມ ແລະ ຜູ້ອ່ານເປັນຈຳນວນຫລວງຫລາຍ.
ຊ່ອງລາຍການກະຈາຍສຽງຈາລະຈອນ
|
71 ປີຜ່ານມາ, ຄຳຂຶ້ນຕົ້ນລາຍການ “ທີ່ນີ້ ສະຖານີວິທະຍຸກະຈາຍສຽງຫວຽດນາມ ກະຈາຍສຽງຈາກຮ່າໂນ້ຍ ນະຄອນຫລວງຂອງປະເທດ ສາທາລະນະລັດປະຊາທິປະໄຕຫວຽດນາມ” ແລະ ພາຍຫລັງນັ້ນ ແມ່ນ “ນະຄອນຫລວງຂອງປະເທດ ສສຫວຽດນາມ” ໄດ້ສະຫນິດຕິດພັນກັບຜູ້ຟັງຢູ່ພາຍໃນ ແລະ ຕ່າງປະເທດເປັນຈຳນວນຫລວງຫລາຍ. ໃນປະຫວັດແຫ່ງການພັດທະນາ, VOV ຍາມໃດກໍຮ່ວມເດີນທາງກັບບັນດາການຕໍ່ສູ້ກູ້ຊາດຂອງຊາດ, ວິວັດທະນາການປ່ຽນແປງໃຫມ່ ແລະ ສ້າງສາປະເທດຊາດ ໂດຍພັກກອມມູນິດຫວຽດນາມ ລິເລີ່ມ ແລະ ຊີ້ນຳນຳພາ. VOV ທັງສ່ອງແສງ, ທັງເຂົ້າຮ່ວມໂດຍກົງແນວຮົບຖະແຫລງຂ່າວ. ຊື່ສຽງຂອງ VOV ນັບມື້ນັບດັງກ້ອງກັງວານໄປເຖິງ 5 ທະວີບ, ປະກອບສ່ວນເຊື່ອມຕໍ່ກຳລັງແຮງຂອງຍຸກປະຈຸບັນກັບກຳລັງແຮງຂອງຊາດ, ປະກອບສ່ວນເຂົ້າໃນພາລະກິດສ້າງສາ, ປົກປັກຮັກສາປະເທດຊາດ ແລະ ເຂົ້າຮ່ວມການກໍໍ່ສ້າງ, ຮັກສາສັນຕິພາບໃນໂລກ. ສຳລັບຜູ້ຟັງຢູ່ພາຍໃນປະເທດແລ້ວ, VOV ຍັງຄົງແມ່ນຊ່ອງຂໍ້ມູນຂ່າວຕົ້ນຕໍໃນການເຜີຍແຜ່ແນວທາງ, ແຜນນະໂຍບາຍ, ນະໂຍບາຍຂອງພັກ ແລະ ລັດຫວຽດນາມ, ເປັນການລະດົມກຳລັງໃຈປະຊາຊົນເສີມຂະຫຍາຍກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເສີມຂະຫຍາຍສິດເປັນເຈົ້າໃນການສ້າງສາ ແລະ ພັດທະນາປະເທດຊາດ, ລະດົມ ເຊີດຊູສິ່ງທີ່ດີງາມ ແລະ ຄວາມກ້າວຫນ້າ, ສ້າງພື້ນຖານດ້ານວັດທະນະທຳຫວຽດນາມ ກ້າວຫນ້າເຂັ້ມຂົ້ນໄປດ້ວຍສີສັນຊາດ. ໃນໄລຍະທີ່ຄວາມຕ້ອງການດ້ານຂໍ້ມູນຂ່າວສານ ກະໂດດຂັ້ນຄືປະຈຸບັນ, VOV ມີຜູ້ຟັງນິຍົມເປັນຈຳນວນຫລວງຫລາຍ. ທ່ານ ຫງວຽນວັນຕອງ, ຢູ່ ນະຄອນ ໂຮ່ຈິມີນ ຊື່ງແມ່ນຫນຶ່ງໃນບັນດາຜູ້ຟັງສະຫນິດສະຫນົມກັບ VOV ເປັນເວລານັບສິບປີ ແລະ ຍາມໃດທ່ານກໍມີຄວາມຊີນເຄີຍຕິດຕາມຮັບຟັງບັນດາລາຍການຂອງ VOV ເປັນປະຈຳ. ປະຈຸບັນ ເຖິງວ່າ ອາຍຸສູງແລ້ວກໍຕາມ ແຕ່ ວິທະຍຸຍາມໃດກໍແມ່ນເພື່ອນສະຫນິດສະຫນົມຂອງທ່ານ.
“VOV ມີການປະກອບສ່ວນອັນໃຫຍ່ຫລວງໃນພາລະກິດປະຕິວັດ, ໃນການຕໍ່ສູ້ກູ້ຊາດ. ໃນໄລຍະນັ້ນ ຢູ່ບ່ອນໃດ ເຂົາເຈົ້າກໍເປີດວິທະຍຸເພື່ອຮັບຟັງລາຍການຕ່າງໆ. ປະຈຸບັນກໍເຊັ່ນດຽວກັນ ບັນດາລາຍການຂອງ VOV ມີຄຸນປະໂຫຍດອັນໃຫຍ່ຫລວງ, ແລະ ແມ່ນສິ່ງທີ່ຂາດບໍ່ໄດ້ໃນຊີວິດປະຈຳວັນ.”
ສຳລັບຜູ້ຟັງຫລາຍທ່ານແລ້ວ, ຮັບຟັງບັນດາລາຍການຂອງ VOV ບໍ່ພຽງແຕ່ແມ່ນຄວາມຊີນເຄີຍເທົ່ານັ້ນ ຫາກຍັງແມ່ນແຫລ່ງຂໍ້ມູນຂ່າວຢ່າງວ່ອງໄວ ແລະ ອຸດົມສົມບູນ. ປະຈຸບັນ ຜູ້ຟັງສາມາດຮັບຟັງວິທະຍຸຢູ່ທຸກບ່ອນ, ທຸກເວລາຢ່າງສະດວກສະບາຍ, ນັ້ນແມ່ນຄຳແບ່ງປັນຂອງ ອ້າຍຫງວຽນວັນຕວານຢູ່ ເມືອງ ເກວຫວໍ ແຂວງບັກນິງ ຊື່ງແມ່ນຜູ້ຟັງ VOV. ອ້າຍ ຕວານເວົ້າຄວາມໃນໃຈສູ່ຟັງວ່າ:
“ຂ້າພະເຈົ້າແມ່ນຜູ້ຂັບລົດ, ສະນັ້ນ ເວລາສ່ວນຫລາຍແມ່ນຢູ່ຖະຫນົນ. ສຳລັບຂ້າພະເຈົ້າແລ້ວ, VOV ແມ່ນຊອ່ງຂໍ້ມູນຂ່າວສານທີ່ມີປະໂຫຍດ. ເພາະວ່າ ພວກຂ້າພະເຈົ້າບໍ່ມີເວລານັ່ງອ່ານຫນັງສືພິມ, ຫລື ເຂົ້າຊົມອິນເຕີແນດ, ສະນັ້ນ ບັນດາລາຍການຂອງ VOV ແມ່ນມີປະໂຫຍດທີ່ສຸດ. ບໍ່ພຽງແຕ່ຊ່ວຍໃຫ້ຂ້າພະເຈົ້າໄດ້ຮູ້ຂ່າວຄາວເທົ່ານັ້ນ, ຫາກ VOV ຍັງມີບັນດາລາຍການບັນເທິງ, ລາຍການເພງມ່ວນທີ່ສຸດ. ພິເສດ VOV ມີລາຍການກະຈາຍສຽງຈາລະຈອນ ແມ່ນຊ່ອງຂໍ້ມູນເພື່ອໃຫ້ຜູ້ຂັບລົດຮູ້ຈັກໄດ້ເສັ້ນທາງໄປມາສະດວກຫລືສະພາບລົດຕິດຫລືບໍ່ ກໍຄືສິ່ງທີ່ເກີດຂຶ້ນຢູ່ຖະຫນົນສາຍຕ່າງໆ.”
ສຳນັກງານວິທະຍຸກະຈາຍສຽງຫວຽດນາມ
|
ຮ່ວມເດີນທາງກັບປະເທດຊາດ, VOV ໄດ້ເຕີບໃຫຍ່ຢ່າງບໍ່ຢຸດຢັ້ງ. ໃນໄລຍະປ່ຽນແປງໃຫມ່ ແລະ ເຊື່ອມໂຍງເຂົ້າກັບສາກົນປະຈຸບັນ, VOV ແມ່ນອົງການສື່ສານທີ່ເຂັ້ມແຂງຂອງຊາດ ດ້ວຍ 7 ຊ່ອງກະຈາຍສຽງ ອອກອາກາດເຖິງກວ່າ 97% ເຂດຊຸມຊົນ ແລະ ສົ່ງຂຶ້ນເຖິງເຂດທີ່ກວ້າງໃຫຍ່ຢູ່ທະເລຕາເວັນອອກ ແລະ ຫລາຍເຂດໃນໂລກ. ພິເສດ VOV ມີ ລະບົບລາຍການກະຈາຍສຽງພາກພາສາຕ່າງປະເທດ (VOV5) ດ້ວຍ 11 ພາສາ ແລະ ພາສາຫວຽດ ທີ່ສະຫງວນໃຫ້ຊາວຫວຽດນາມ ຢູ່ ຕ່າງປະເທດ ແລະຊາວຕ່າງປະເທດຮູ້ພາສາຫວຽດ ແລະ ລະບົບລາຍການກະຈາຍສຽງພາກພາສາຊົນເຜົ່າ ດ້ວຍ 12 ພາສາ. ປະຈຸບັນ VOV ມີ 17 ຊ່ອງໂທລະພາບ (ໃນນັ້ນ ມີ 15 ຊ່ອງຂອງໂທລະພາບດີຈີຕອນ VTV2), ແລະ ມີ ສື່ເອເລັກໂຕນິກ 2 ປະເພດຄື VOV.VN ແລະ VTC News, ນອກນັ້ນຍັງມີ ສື່ສິ່ງພິມ . VOV ມີສື່ມວນຊົນ ຄົບ 4 ປະເພດຄື: ກະຈາຍສຽງ, ໂທລະພາບ, ສື່ສິ່ງພິມ ແລະ ສື່ເອເລັກໂຕນິກ. VOV ມີ 6 ສຳນັກງານປະຈຳຢູ່ພາຍໃນປະເທດ ແລະ 10 ສຳນັກງານຜູ້ຕາງຫນ້າຢູ່ຕ່າງປະເທດ.
ໃນ 71 ປີຜ່ານມາ, ສຳລັບ VOV ແມ່ນໄລຍະທາງທີ່ຫຍຸ້ງຍາກ ແລະ ເຕັມໄປດ້ວຍສິ່ງທົດສອບ. ໃນວິວັດການພັດທະນາ, VOV ບັນລຸໄດ້ບັນດາຜົນງານທີ່ຫນ້າເອກອ້າງທະນົງໃຈ ແລະ ພວມພັດທະນາບືນຕົວຂຶ້ນສູ່ລະດັບສູງໃຫມ່.