(vovworld)- ວາລະຊັກຖາມບັນດາສະມາຊິກລັດຖະບານທີ່ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 ອັດລົງໃນຕອນບ່າຍວັນທີ 21/11 ພາຍຫລັງເຮັດວຽກມາເປັນເວລາ 3 ວັນ. ມີຫລາຍບັນຫາຮ້ອນເຮັ່ງຂອງປະເທດຊາດຖືກຍົກອອກທີ່ີກອງປະຊຸມ. ພ້ອມກັບບັນດາຄຳຖາມກົງໄປກົງມາຂອງບັນດາສະມາຊິກສະພາແຫ່ງຊາດ ແມ່ນການຮັບເອົາຄຳຄິດຄຳເຫັນປະກອບຂອງບັນດາສະມາຊີກລັດຖະບານເມື່ອຕອບຄຳຊັກຖາມ. ສິ່ງສຳຄັນກວ່າ, ຜ່ານການຊັກຖາມ, ຫາງສຽງເຫັນວ່າ ມີການປ່ຽນແປງໃຫມ່ໃນການເຄື່ອນໄຫວຕິດຕາມກວດກາຂອງສະພາແຫ່ງຊາດກໍຄືຄວາມຕັດສິນໃຈສຳເລັດຈຸດໝາຍພັດທະນາເສດຖະກິດສັງຄົມຂອງລັດຖະບານ.
ທ່ານນາຍົກລັດຖະມົນຕີຫງວຽນເຕີນຢູງຕອບຄຳຊັກຖາມ
|
ການຊັກຖາມ ແລະ ຕອບຄຳຊັກຖາມແມ່ນເນື້ອໃນທີ່ໄດ້ຮັບຄວາມຄອງຄອຍ ແລະ ສົນໃຈຫລາຍສຸດທີ່ກອງປະຊຸມສະໄຫມສາມັນຄັ້ງຕ່າງໆຂອງສະພາແຫ່ງຊາດຫວຽດນາມ. ແຕ່ລະວາລະຊັກຖາມຜູ້ມີສິດເລືອກຕັ້ງກໍຖືວ່າ: ແມ່ນບັ້ນກວດກາຄວາມໄວ້ວາງໃຈບັນດາຫົວຫນ້າຂະແຫນງກໍຄືເພື່ອວັດແທກຄຸນນະພາບການເຄື່ອນໄຫວຂອງສະພາແຫ່ງຊາດຢ່າງຈະແຈ້ງທີ່ສຸດ.
ມີຫລາຍຈຸດໃຫມ່
ມີການປ່ຽນແປງໃຫມ່ຫລາຍຢ່າງໃນບັນດາວາລະຊັກຖາມ ແລະ ຕອບຄຳຊັກຖາມທີ່ກອງປະຊຸມເທື່ອນີ້. ທີຫນຶ່ງ, ເວລາຊັກຖາມຫລາຍກວ່າ. ແທນທີ 2 ມື້ເຄິ່ງ ຄືບັນດາກອງປະຊຸມສະໄຫມສາມັນຄັ້ງກ່ອນ, ທີ່ກອງປະຊຸມເທື່ອນີ້, ບັນດາ ສສຊ ມີເວລາ 3 ມື້ເພື່ອຊັກຖາມບັນດາ ສະມາຊິກລັດຖະບານ. ທີສອງ, ນີ້ແມ່ນກອງປະຊຸມເທື່ອທຳອິດ ສະພາແຫ່ງຊາດຈັດວາງວາລະປຶກສາຫາລືກ່ຽວກັບໝາກຜົນການປະຕິບັດຄຳໝັ້ນໝາຍຂອງບັນດາສະມາຊິກລັດຖະບານ ພາຍຫລັງກອງປະຊຸມຂອງສະພາແຫ່ງຊາດ 3 ຄັ້ງກ່ອນນີ້. ວາລະປຶກສາຫາລືດຳເນີນໄປຢ່າງກົງໄປກົງມາ ແລະສ້າງກາລະໂອກາດໃຫ້ແກ່ບັນດາຫົວຫນ້າຂະແຫນງການທີ່ບໍ່ມີຊື່ໃນບັນຊີລາຍຊື່ຖືກຊັກຖາມ, ແລະ ໄດ້ຮັບການອະພິປາຍຕື່ມອີກກ່ຽວກັບບັນດາບັນຫາຮ້ອນເຮັ່ງທີ່ເຮັດໃຫ້ຜູ້ມີສິດເລືອກຕັ້ງ ແລະ ຫາງສຽງສົນໃຈ. ທ່ານຮອງປະທານສະພາແຫ່ງຊາດຫວຽດນາມ ຮີ່ງງອກເຊີນ ຕີລາຄາວ່າ:
“ເລື່ອງສະພາແຫ່ງຊາດປຶກສາຫາລືກ່ຽວກັບໝາກຜົນການປະຕິບັດບັນດາມະຕິຂອງສະພາແຫ່ງຊາດກ່ຽວກັບການຊັກຖາມ ແລະ ຕອບຄຳຊັກຖາມແມ່ນຈຸດໃຫມ່ໃນການເຄື່ອນໄຫວຕິດຕາມກວດກາຂອງສະພາແຫ່ງຊາດ. ພ້ອມກັບການປະກາດໃຊ້ບັນດາມະຕິກ່ຽວກັບການຊັກຖາມ ແລະ ຕອບຄຳຊັກຖາມທີ່ກອງປະຊຸມຂອງສະພາແຫ່ງຊາດແຕ່ລະເທື່ອນັ້ນ, ການເຄື່ອນໄຫວນີ້ ຈະນຳມາເຊິ່ງປະສິດທິຜົນຢ່າງແທດຈິງໃນການເຄື່ອນໄຫວຕິດຕາມກວດກາຂອງສະພາແຫ່ງຊາດ, ປະກອບສ່ວນແກ້ໄຂບັນດາຂໍ້ຄົງຂ້າງ, ຂໍ້ຈຳກັດ, ສ້າງລະບົບນະໂຍບາຍກົດໝາຍໃຫ້ສົມບູນແບບ, ຕອບສະຫນອງຄວາມຕ້ອງການຂອງ ສສຊ ແລະ ຄວາມມຸ້ງມາດປາດຖະຫນາຂອງ ປະຊາຊົນ ຜູ້ມີສິດເລືອກຕັ້ງໃນທ່ົວປະເທດ.”
ມີຫລາຍບັນຫາຮ້ອນເຮັ່ງໄດ້ຮັບການເຕື້ອງເຖິງ
ອາດຈະເວົ້າວ່າ ຄຸນນະພາບຂອງວາລະຊັກຖາມແຕ່ລະຄັ້ງແມ່ນອີງໃສ່ເຄິ່ງຫນຶ່ງຄຸນນະພາບຄຳຊັກຖາມຂອງ ສສຊ. ໃນຕະຫລອດວິວັດການຊັກຖາມທີ່ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມຊຸດທີ 13, ມີຫລາຍຄຳເຫັນຮ້ອນເຮັ່ງໄດ້ຮັບການເຕື້ອງເຖິງ, ຈາກຜົນພາຍຫລັງໃນການວາງແຜນກຳນົດ, ການກໍ່ສ້າງເຂື່ອນໄຟຟ້ານຳ້ຕົກ, ວຽກງານຕ້ານການສໍ້ລາດບັງຫລວງຕະຫລອດຮອດຖັນແຖວພະນັກງານ, ລັດຖະກອນ… ຄວາມຈິງທັງໝົດຂອງຊີວິດ, ບັນດາບັນຫາລວມຂອງສັງຄົມ, ຂອງປະເທດຊາດ ລ້ວນແຕ່ຖືກຍົກອອກໃນບັນດາຄຳຖາມຂອງ ສສຊ, ຖືກຕ້ອງກັບການສັງເກດຂອງທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ເມື່ອສະຫລຸບວາລະຊັກຖາມ ແລະ ຕອບຄຳຊັກຖາມຂອງສະພາແຫ່ງຊາດວ່າ: ບັນດາບັນຫາຂອງສະພາແຫ່ງຊາດຄັດເລືອກເພື່ອດຳເນີນການຊັກຖາມ ແມ່ນບັນດາບັນຫາຮ້ອນເຮັ່ງ, ຕ້ອງແກ້ໄຂ, ໂດຍຊີວິດຕົວຈິງຂອງປະຊາຊົນວາງອອກ.”
ການຕອບຄຳຊັກຖາມຂອງທ່ານນາຍົກລັດຖະມົນຕີ ແລະ ລັດຖະມົນຕີ 4 ທ່ານ, ຫົວຫນ້າຂະແຫນງທີ່ຕາງຫນ້າໃຫ້ແກ່ເຂດເສດຖະກິດ,ສັງຄົມ ແລະ ຕຸລາການ ກໍໄດ້ຕອບສະຫນອງສ່ວນໃຫຍ່ຄຳຊັກຖາມຂອງ ສສຊ. ບໍ່ພຽງແຕ່ເທົ່ານັ້ນ ເລື່ອງລັດຖະມົນຕີອື່ນ 7 ທ່ານ ຕອບຄຳຊັກຖາມ, ອະພິປາຍຕາມໝວດບັນຫາຊື່ງ ສສຊ ວາງອອກ ກໍຊ່ວຍຜູ້ມີສິດເລືອກຕັ້ງເຂົ້າໃຈຢ່າງຈະແຈ້ງກວ່າເນື້ອແທ້ຂອງບັນຫາ ແລະ ກຳໄດ້ເນື້ອໃນຈິດໃຈຊີ້ນຳລວມຂອງລັດຖະບານ. ທ່ານນາງ ບູ່ຍທິອານ, ສສຊ ນະຄອນ ຮ່າໂນ້ຍ ໃຫ້ຂໍ້ສັງເກດວ່າ:
“ກອງປະຊຸມສະໄຫມສາມັນ ຄັ້ງກ່ອນນີ້ ຂອງສະພາແຫ່ງຊາດນັ້ນ ເລື່ອງຊັກຖາມບໍ່ທັນເລັ່ງໃສ່ຄືຄັ້ງນີ້. ປະຈຸບັນ, ການຊັກຖາມແມ່ນວາງອອກຖືກກັບລະດັບ, ການຊັກຖາມແມ່ນດຳເນີນໄປຢ່າງເປີດເຜີຍ ແລະ ຕອບຄຳຊັກຖາມກໍເປີດເຜີຍ. ຂ້າພະເຈົ້າຄິດວ່າ ແນ່ນອນພາຍຫລັງກອງປະຊຸມເທື່ອນີ້, ສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ຈະມີການສະເຫນີໃຫ້ກຸ່ມສຳນັກງານໃນລັດຖະບານ, ຄະນະກຳມະການປະຊາຊົນແຂວງຕ່າງໆ ຈ່ົງປະຕິບັດບັນດາບັນຫາ ທີ່ໄດ້ຕອບຕໍ່ຜູ້ມີສິດເລືອກຕັ້ງຢ່າງເຂັ້ມງວດ.”
ຮັບເອົາຄຳປະກອບຄຳຄິດຄຳເຫັນ
ທີ່ວາລະຊັກຖາມບັນດາສະມາຊິກສະພາແຫ່ງຊາດ, ມີຄຳສະເຫນີຫລາຍຂໍ້ຂອງ ສສຊ ກ່ຽວກັບບັນດາຂົງເຂດເສດຖະກິດ, ສັງຄົມ, ວຽກງານບໍລິຫານທີ່ໄດ້ຮັບການຮັບເອົາຈາກທ່ານນາຍົກລັດຖະມົນຕີ ແລະ ຍົກອອກທິດແກ້ໄຂບົນຈິດໃຈຮັບເອົາຄຳປະກອບຄຳຄິດຄຳເຫັນ. ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນຕໍ່ສະພາແຫ່ງຊາດວ່າ:
“ລັດຖະບານຮັບຟັງຄຳເຫັນຢ່າງຊັດເຈນຂອງສສຊ ແລະ ຜູ້ມີສິດເລືອກຕັ້ງໃນທົ່ວປະເທດຢ່າງເຂັ້ມງວດ, ສືບຕໍ່ເສີມຂະຫຍາຍບັນດາຄວາມກ້າວຫນ້າ, ໝາກຜົນທີ່ບັນລຸໄດ້, ແກ້ໄຂຂໍ້ຈຳກັດອ່ອນດ້ອຍ, ຍົກສູງປະສິດທິຜົນການຄຸ້ມຄອງບໍລິຫານ, ຄວາມມາພະຍາຍາມສູງສຸດເພື່ອໃຫ້ທົ່ວພັກ, ທົ່ວປວງຊົນ, ທົ່ວກອງທັບປະຕິບັດມະຕິຂອງສະພາແຫ່ງຊາດຢ່າງມີໄຊ.”
ການຊັກຖາມ ແມ່ນຫນຶ່ງໃນບັນດາບັນຫາສູງສຸດສະແດງໃຫ້ເຫັນສິດຕິດຕາມກວດກາຂອງສະພາແຫ່ງຊາດ. ວາລະຊັກຖາມ ແລະ ຕອບຄຳຊັກຖາມທີ່ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 ອີກຄັ້ງຫນ່ຶງສະແດງໃຫ້ເຫັນບັນດາຄວາມມານະພະຍາຍາມຂອງສະພາແຫ່ງຊາດ ເພື່ອຕອບສະຫນອງຄວາມມຸ່ງມາດປາດຖະຫນາຂອງຜູ້ມີສິດເລືອກຕັ້ງຕໍ່ບັນດາບັນຫາຮ້ອນເຮັ່ງໃນຊີວິດສັງຄົມ.