(vovworld)- ປີ 2014, ເປັນຄັ້ງທຳອິດ ຫວຽດນາມ ສົ່ງຄົນງານກວ່າ 100.000 ຄົນໄປເຮັດວຽກຢູ່ຕ່າງປະເທດ, ບັນລຸກວ່າ 110% ເມື່ອທຽບໃສ່ແຜນການວາງອອກ. ປີ 2015, ການຮັກສາບັນດາຕະຫລາດແຮງງານເກົ່າ, ເປີດກວ້າງບັນດາຕະຫລາດແຮງງານມີລາຍຮັບສູງສືບຕໍ່ແມ່ນຈຸດໝາຍຊື່ງກະຊວງແຮງງານ ທະຫານເສຍອົງຄະ ແລະ ສັງຄົມຫວຽດນາມ ມຸ່ງໄປເຖິງ. ຄຽງຄູ່ກັນນັ້ນ, ຫວຽດນາມ ກໍເອົາໃຈໃສ່ຍົກສູງຄຸນນະພາບຄົນງານໄປເຮັດວຽກຢູ່ຕ່າງປະເທດ ເພື່ອຕອບສະຫນອງຄວາມຮຽກຮ້ອງຕ້ອງການຂອງຕະຫລາດແຮງງານ.
ປີ 2014, ຈຳນວນຄົນງານຫວຽດນາມໄປເຮັດວຽກຢູ່ຕະຫລາດແຮງງານຈຸດສຸມຈຳນວນຫນຶ່ງ ແມ່ນເພີ່ມຂຶ້ນສູງພໍສົມຄວນ. ຕົວຢ່າງຄື: ໄຕ້ຫວັນ(ປະເທດຈີນ) ແມ່ນ ກວ່າ 60.000 ຄົນ(ເພີ່ມຂຶ້ນ 15.000 ຄົນເມື່ອທຽບໃສ່ປີ 2013). ຍີ່ປຸ່ນ ເກືອບ 20.000 ຄົນ(ເພີ່ມຂຶ້ນ 10400 ຄົນເມື່ອທຽບໃສ່ປີ 2013), ອາຮັບບີ ຊາອຸດີ ເກືອບ 4000 ຄົນ, ກາຕາ ເກືອບ 1000 ຄົນ.
ຮັກສາບັນດາຕະຫລາດແຮງງານເກົ່າ, ເປີດກວ້າງບັນດາຕະຫລາດແຮງງານມີລາຍຮັບສູງ
ໄຕ້ຫວັນແມ່ນຕະຫລາດແຮງງານຈຸດສຸມຂອງການສົ່ງຄົນງານຫວຽດນາມໄປເຮັດວຽກຢູ່ຕ່າງປະເທດໃນປີ 2015 ຍ້ອນບັນດານະໂຍບາຍພັດທະນາເສດຖະກິດ ແລະ ຊຸກຍູ້ວຽກເຮັດງານທຳຂອງໄຕ້ຫວັນ. ນັບແຕ່ທ້າຍປີ 2011 ມາຮອດປະຈຸບັນ, ຫວຽດນາມຍັງສືບຕໍ່ຮັກສາການສົ່ງຄົນງານໄປເຮັດວຽກຢູ່ຕະຫລາດໄຕ້ຫວັນໃນຂະນະທ່າອ່ຽງບັນດາປະເທດອື່ນສົ່ງຄົນງານມາເຮັດວຽກຢູ່ຕະຫລາດນີ້ຫລຸດລົງ. ທ່ານ ຕົງຫາຍນາມ, ຮອງຫົວຫນ້າກົມຄຸ້ມຄອງຄົນງານໄປເຮັດວຽກຢູ່ຕ່າງປະເທດໃຫ້ຮູ້ວ່າ:
“ປີ 2015, ຕະຫລາດໄຕ້ຫວັນ ຍັງຄົງແມ່ນຕະຫລາດແຮງງານສາມາດຮັບຄົນງານຫວຽດນາມເປັນຈຳນວນຫລວງຫລາຍ. ໄລຍະຜ່ານມາ, ຫວຽດນາມ ໄດ້ປະຕິບັດວຽກງານຮັບສະໝັກ,ຄັດເລືອກ ແລະ ບຳລຸງສ້າງ ສະນັ້ນ ຄຸນນະພາບຄົນງານໄດ້ຮັບການຍົກສູງຂຶ້ນ. ຂ້າພະເຈົ້າເຊື່ອໝັ້ນວ່າ ໃນຊຸມປີຈະມາເຖິງ ໄຕ້ຫວັນ ສືບຕໍ່ແມ່ນຕະຫລາດຮັບຄົນງານຫວຽດນາມມາເຮັດວຽກເປັນຈຳນວນຫລາຍ.”
ນອກຈາກຕະຫລາດໄຕ້ຫວັນ, ປີ 2015 ຍີ່ປຸ່ນ ແມ່ນຕະຫລາດ ສ້າງກາລະໂອກາດໃຫ້ຄົນງານຫວຽດນາມ ມາເຮັດວຽກ ກໍ່ຄື ຮ່ຳຮຽນ, ຄົ້ນຄ້ວາ. ຄາດວ່າ ບັນດາຂະແຫນງອາຊີບຮັບສະໝັກຄົນງານຫວຽດນາມຫລາຍ ນັ້ນແມ່ນ: ຂະແຫນງກໍ່ສ້າງ, ກົນຈັກ, ກະສິກຳ, ປຸງແຕ່ງອາຫານ.
ຄຽງຄູ່ກັບການຮັກສາພັດທະນາບັນດາຕະຫລາດແຮງງານເກົ່າ, ປີ 2015 ຫວຽດນາມ ສືບຕໍ່ຄົ້ນຄ້ວາມຸ່ງໄປເຖິງເປີດກວ້າງບັນດາຕະຫລາດແຮງງານມີເງື່ອນໄຂເຮັດວຽກ ແລະ ນຳມາເຊິ່ງລາຍຮັບສູງໃຫ້ແກ່ຄົນງານ. ຕະຫລາດແຮງງານໃຫມ່ຈຳນວນຫນຶ່ງຄື: ອາຟຼິກາ ແລະ ຕາເວັນອອກກາງ ແມ່ນຕະຫລາດນຳມາເຊິ່ງລາຍຮັບສູງໃຫ້ແກ່ຄົນງານຫວຽດນາມ ສະນັ້ນ ຫວຽດນາມ ຈະລົງນາມໃນຂໍ້ຕົກລົງກັບ ອັງກໍລາ ແລະ ອາຣັບບີ ຊາອຸດີກ່ຽວກັບຂົງເຂດຈຳນວນຫນຶ່ງ. ຄຽງຄູ່ກັນນັ້ນ ພ້ອມກັບການສ້າງປະຊາຄົມເສດຖະກິດອາຊຽນ ໃນປີ 2015, ຈຳນວນຄົນງານຫວຽດນາມ ໄປເຮັດວຽກຢູ່ ຕ່າງປະເທດ ຄາດວ່າ ຈະເພີ່ມຂຶ້ນ. ໃນນັ້ນ ມີ 8 ຂະແຫນງອາຊີບໃນບັນດາປະເທດອາຊຽນຄື: ບັນຊີ, ສະຖາປະນິກ, ທ່ານໝໍ, ວິສາວະກອນ, ແພດປົວແຂ້ວ, ນາງພະຍາບານ, ພາລະກອນຂະແຫນງທ່ອງທ່ຽວ…
ເອົາໃຈໃສ່ຍົກສູງຄຸນນະພາບແຮງງານ
ເພື່ອຮັກສາຈຳນວນຄົນງານໄປເຮັດວຽກຢູ່ຕ່າງປະເທດສູງໃນປີ 2015 ກໍຄືຊຸມປີຕໍ່ໄປ, ຫວຽດນາມ ເອົາໃຈໃສ່ເປັນພິເສດເຖິງການຍົກສູງຄຸນນະພາບຄົນງານໄປເຮັດວຽກຢູ່ຕ່າງປະເທດ, ພິເສດ ແຮງງານຄຸນນະພາບສູງ. ປະຈຸບັນ ກົມຄຸ້ມຄອງຄົນງານໄປເຮັດວຽກຢູ່ຕ່າງປະເທດ ພວມຜັນຂະຫຍາຍໂຄງການຫນູນຊ່ວຍສົ່ງຄົນງານໄປເຮັດວຽກຢູ່ຕ່າງປະເທດ. ໃນໄລຍະຍາວ, ເພື່ອຍົກສູງຄຸນນະພາບແຮງງານ ຫວຽດນາມ, ທ່ານນາງ ຟ້າມທິຫາຍຈ່ວຽນ, ລັດຖະມົນຕີວ່າການກະຊວງແຮງງານ, ທະຫານເສຍອົງຄະ ແລະ ສັງຄົມ ໃຫ້ຮູ້ວ່າ:
“ລັດຖະບານໄດ້ເຫັນດີ ປ່ຽນໃຫມ່ວຽກງານສອນວິຊາຊີບ ເພື່ອສຳພັດກັບເຕັກໂນໂລຊີ ແລະ ຍົກລະດັບຄວາມຮູ້ຂອງພະນັກງານສອນວິຊາຊີບ. ປີ 2015 ພວກຂ້າພະເຈົ້າໄດ້ຮັບລາຍການສອນວິຊາຊີບ 34 ຊຸດລະດັບ ພາກພື້ນ ອາຊຽນ ຈາກຕ່າງປະເທດ ພ້ອມທັງສົ່ງພະນັກງານໄປຮຽນຢູ່ບັນດາປະເທດກ່ຽວກັບວິທີສິດສອນ. ມາຮອດປະຈຸບັນ, ພວກຂ້າພະເຈົ້າໄດ້ສົ່ງຄູສອນ 500 ຄົນ ແລະ ຜູ້ອຳນວຍການບັນດາໂຮງຮຽນສອນວິຊາຊີບ 45 ຄົນໄປຮຽນຢູ່ຕ່າງປະເທດ.”
ນອກນັ້ນ ຫວຽດນາມ ພວມມຸ່ງໄປເຖິງການສ້າງເຄື່ອງໝາຍໃຫ້ແກ່ຄົນງານຫວຽດນາມໄປເຮັດວຽກຢູ່ຕ່າງປະເທດ, ຮັກສາໄດ້ທີ່ຕັ້ງບົດບາດຂອງແຮງງານຫວຽດນາມໃນສາຍຕາຂອງບັນດາບໍລິສັດຈ້າງຄົນງານ. ທ່ານນາງ ຟ້າມທິຫາຍຈ່ວຽນ, ລັດຖະມົນຕີວ່າການກະຊວງແຮງງານ, ທະຫານເສຍອົງຄະ ແລະ ສັງຄົມ ໃຫ້ຮູ້ຕື່ມອີກວ່າ:
“ຄົນງານຫວຽດນາມ ກ່ອນທີ່ໄປເຮັດວຽກຢູ່ຕ່າງປະເທດ ຈະໄດ້ຮຽນຄວາມຮູ້ກ່ຽວກັບປະເທດຊາດ ແລະ ປະຊາຊົນປະເທດປະຈຳຖິ່ນ ກໍຄືຮີດຄອງປະເພນີ, ພິເສດຂໍ້ກຳນົດ,ກົດລະບຽບການອອກແຮງງານ. ປະຈຸບັນ ວຽກງານນີ້ ໄດ້ມອບໃຫ້ ກວ່າ 70 ວິສາຫະກິດຮັບຜິດຊອບ. ໄລຍະຈະມາເຖິງ, ພວກຂ້າພະເຈົ້າ ຈະປະກາດໃຊ້ບັນດາຂໍ້ກຳນົດລະອຽດໃຫ້ແກ່ບັນດາວິສາຫະກິດ ເພື່ອຮັບປະກັນເມື່ອຄົນງານຫວຽດນາມໄປເຮັດວຽກຢູ່ຕ່າງປະເທດຕ້ອງຮັກສາທີ່ຕັ້ງບົດບາດ, ພາບພົດຂອງຕົນ.”
ເຖິງວ່າ ຢູ່ຕະຫລາດແຮງງານເກົ່າຫລືບັນດາຕະຫລາດແຮງງານຫາກໍ່ພົ້ນເດັ່ນ, ຖ້າຫາກຄົນງານຫວຽດນາມ ຍາດແຍ່ງໄດ້ທ່າແຮງທີ່ມີຢູ່ແລ້ວ ແລະ ໄດ້ຮັບການບຳລຸງສ້າງຕາມມາດຕະຖານສາກົນ ຈຸດໝາຍເພີ່ມການສົ່ງຄົນງານໄປເຮັດວຽກຢູ່ຕ່າງປະເທດໃນປີ 2015 ກໍຄືຊຸມປີຕໍ່ໄປ ແມ່ນສາມາດປະຕິບັດໄດ້, ປະກອບສ່ວນຢ່າງຕັ້ງຫນ້າເຂົ້າໃນການພັດທະນາເສດຖະກິດຂອງປະເທດຊາດ.