ວິກິດການການເມືອງຢູ່ຊີຮີ
(ພາບ: google.com.vn)
(vovworld) - ວິກິດການການເມືອງຢູ່ຊີຮີ ພວມຜັນແປໄປຕາມທິດຍາກທີ່ຈະຄາດຄະເນກ່ອນໄດ້. ນັບແຕ່ວັນທີ 1/9 ນັກການທູດຊາວອານເຊຮີ ທ່ານ Lakhdar Brahimi ຈະຮັບຕຳແໜ່ງເປັນທູດພິເສດລວມຂອງສະຫະປະຊາຊາດ ແລະ ສະຫະພັນອາຮັບ (AL) ຮັບຜິດຊອບບັນຫາຊີຮີ ແທນໃຫ້ ອະດີດທູດພິເສດ Kofi Annan ຢ່າງເປັນທາງການດ້ວຍຄຳໝັ້ນສັນຍາຖືບັນດາຜົນປະໂຫຍດຂອງປະຊາຊົນຊີຮີ ເປັນສຳຄັນ, ແລະ ຈະເຮັດຈົນສຸດຄວາມສາມາດຂອງຕົນ ເພື່ອຊ່ວຍເຫຼືອປະຊາຊົນປະເທດຕາເວັນອອກກາງນີ້. ພ້ອມກັນນັ້ນ, ອີຮານກໍ່ໃຫ້ຮູ້ວ່າ, ທີ່ກອງປະຊຸມສຸດຍອດຂະບວນການບໍ່ຮ່ວມກຸ່ມ (NAM) ທີ່ຈັດຂຶ້ນຢູ່ເຕເຮຮານ, ໃນທ້າຍເດືອນ 8/2012, ປະເທດນີ້ຈະຍື່ນຂໍ້ສະເໜີເພື່ອແນໃສ່ຢຸດຕິການປະທະກັນຢູ່ຊີຮີ. ເຖິງຢ່າງໃດກໍ່ຕາມ, ສະພາບການຜັນແປໄປຢ່າງສັບສົນຢູ່ະເທດນີ້ ໄດ້ພາໃຫ້ຫາງສຽງບໍ່ສາມາດປະເອີບໃຈໄດ້ເທື່ອ.
ໃນການຜັນແປລ້າສຸດ, ວັນທີ 27/8, ກຳລັງລຸກຮຶ້ຂຶ້ນໄດ້ຍິງຕົກເຮືອບິນເອລີກອບແຕລຳໜຶ່ງຂອງກອງທັບຊີຮີ ໃນຂະນະທີ່ເຮືອບິນລຳນີ້ພວມບຸກໂຈມຕີເມືອງ Jobar, ຢູ່ຊານນະຄອນຫຼວງ Damacus. ໃນຂະນະນັ້ນ, ບັນດານັກເຄື່ອນໄຫວຂອງຝ່າຍຄ້ານໃຫ້ຮູ້ວ່າ, ການບຸກໂຈມຕີດ້ວຍປືນໃຫຍ່ ແລະ ເຮືອບິນເອລີກອບແຕ ເຂົ້າເຂດຊານນະຄອນຫຼວງ Damacus ນັບມື້ນັບຫຼາຍ. ສະເພາະວັນທີ 27/8, ການບຸກໂຈມຕີທາງອາກາດໄດ້ເຮັດໃຫ້ມີຜູ້ເສຍຊີວິດຢ່າງໜ້ອຍສຸດແມ່ນ 60 ຄົນ.
ຫາງສຽງຕັ້ງຄຳຖາມວ່າ, ເປັນຫຍັງວິກິດການນີ້ພັດແກ່ຍາວຄືແນວນັ້ນ ? 17 ເດືອນໄດ້ຜ່ານໄປແລ້ວ, ແຕ່ບໍ່ມີວິທີການແກ້ໄຂ, ແລະ ສັນຍານທີ່ດີໃດໆເທື່ອ. ແຜນການ 6 ຂໍ້ຂອງທູດພິເສດລວມທ່ານ Kofi Annan ກໍ່ບໍ່ມີກາລະໂອກາດເພື່ອປະຕິບັດໃຫ້ສຳເລັດ. ທ່ານ Kofi Annan ໄດ້ຍົກອອກວິທີການແກ້ໄຂສະເພາະໃນຂະນະທີ່ປະຊາຄົມໂລກ ແລະ ອຳນາດການປົກຄອງຊີຮີ ລ້ວນແຕ່ບໍ່ເຫັນດີ ນັ້ນແມ່ນວິທີແກ້ໄຂຜ່ານການເຈລະຈາ. ປະທານາທິບໍດີຊີຮີ Bashar al - Assad ໄດ້ຕອບສຳພາດຫຼາຍເທື່ອວ່າຈະບໍ່ປະລະສິດອຳນາດຢ່າງເດັດຂາດ, ໃນຂະນະນັ້ນ, ພວກລຸກຮຶ້ຂຶ້ນພັດຢາກໃຫ້ທ່ານຕ້ອງລາອອກຈາກຕຳແໜ່ງ ກ່ອນທີ່ຈະເຂົ້າຮ່ວມການເຈລະຈາ. ການໜູນຊ່ວຍຢ່າງໄດ້ການໄດ້ງານຂອງຝ່າຍຕາເວັນຕົກ ແລະ ບັນດາປະເທດທີ່ຂຶ້ນກັບສະພາຮ່ວມມືເຂດອ່າວ (GCC) ໃຫ້ແກ່ກອງທັບຊີຮີເສລີ (FSA) ນັ້ນ ໄດ້ພາໃຫ້ວິກິດການຢູ່ປະເທດຕາເວັນອອກກາງນີ້ສັບສົນຍິ່ງຂຶ້ນ.
ວັນທີ 27/8, ປະທານາທິບໍດີຝລັ່ງ Francois Hollande ໄດ້ຖະແຫຼງວ່າ, ປາຮີຈະຮັບຮູ້ລັດຖະບານຊົ່ວຄາວຂອງຊີຮີ, ພາຍຫຼັງທີ່ອົງການນີ້ໄດ້ຮັບການສ້າງຕັ້ງ, ພ້ອມທັງຊຸກຍູ້ກຳລັງລຸກຮຶ້ນຂຶ້ນສ້າງຕັ້ງລັດຖະບານຊົ່ວຄາວໃນໄລຍະໄວທີ່ສຸດ. ປະທານາທິບໍດີຝລັ່ງ ກໍ່ໄດ້ຮັບຮູ້ເລື່ອງ ປາຮີພວມເຮັດວຽກກັບບັນດາຄູ່ຮ່ວມມື ກ່ຽວກັບຄວາມສາມາດຈະສ້າງຕັ້ງເຂດກັນຊົນຢູ່ຊີຮີ, ເຊິ່ງແມ່ນແນວຄວາມຄິດໂດຍເຕິກກີ ສະເໜີ. ນັ້ນແມ່ນ ”ເຂດປອດໄພ” ຫຼື ”ເຂດປົດປ່ອຍ” ແລະ ເພື່ອສະກັດກັ້ນການບຸກໂຈມຕີທາງອາກາດຂອງ Damascus. ເມື່ອຍົກອອກແນວຄວາມຄິດດັ່ງກ່າວ, ຫາງສຽງຖືວ່າ ເມື່ອສ້າງຕັ້ງ “ເຂດຫ້າມບິນ“ ກໍ່ໝາຍຄວາມວ່າຝ່າຍຕາເວັນຕົກເລີ່ມຕົ້ນການແຊກແຊງຢ່າງເລິກເຊິ່ງແລະກວ້າງຂວາງ ແລະ ສະພາບການຢູ່ຊີຮີ ຈະຄ້າຍຄືກັນທຸກສິ່ງທຸກຢ່າງທີ່ໄດ້ເກີດຂຶ້ນຢູ່ລີບີ. ໄລ່ມາຮອດປະຈຸບັນ, ດ້ວຍການໜູນຊ່ວຍຂອງຝ່າຍຕາເວັນຕົກ, ມີເຈົ້າໜ້າທີ່ກວ່າ 40 ທ່ານ, ໃນນັ້ນລວມມີທ່ານນາຍົກລັດຖະມົນຕີ ໄດ້ລາອອກຈາກລະບອບຂອງທ່ານ Bashar al – Assad. ເຖິງຢ່າງໃດກໍ່ຕາມ, ຫາງສຽງຖືວ່າ, ການລາອອກຈາກຕຳແໜ່ງຂອງທ່ານ Bashar al – Assad ຈະຮັບປະກັນວ່າ ປະຊາທິປະໄຕຈະແທນໃຫ້ລະບອບອຳນາດຜະເດັດການຢູ່ປະເທດນີ້ໄດ້ຫຼືບໍ່ ແລະ ສິ່ງດັ່ງກ່າວຈະມີການກະທົບຄືແນວໃດເຖິງສະພາບການເມືອງຢູ່ພາກພື້ນ? ຍາກທີ່ຈະມີຄຳຕອບຢ່າງຊັດເຈນ.
ດ້ວຍການໜູນຊ່ວຍຂອງຝ່າຍຕາເວັນຕົກ, ຝ່າຍຄ້ານໄດ້ມີທີ່ຕັ້ງຢ່າງແນ່ນອນຢູ່ຊີຮີ. ຫວ່າງແລ້ວນີ້, ກຳລັງດັ່ງກ່າວປະກາດວ່າເຂົາເຈົ້າໄດ້ຄວບ ຄູມ 60% ເນື້ອທີ່ຂອງນະຄອນ Aleppo ຢູ່ມໍ່ກັບເຂດຊາຍແດນຕິດກັບ ເຕິກກີ. ການໜູນຊ່ວຍຢ່າງແຮງຈາກບັນດາປະເທດພາຍນອກ ໄດ້ເຮັດໃຫ້ວິກິດການນັບມື້ນັບຮ້າຍແຮງຍິ່ງຂຶ້ນ. ເຂົາເຈົ້າລະແວງສົ່ງໃສວ່າ, ເມື່ອຖືກກົດດັນ, ອຳນາດການປົກຄອງຂອງທ່ານ Bashar al – Assad ອາດຈະນຳໃຊ້ບັນດາມາດຕະການທີ່ຂັນແຂງ, ບາງເທື່ອຈະນຳໃຊ້ອາວຸດເຄມີ. ຕາມຕົວເລກສະຖິຕິແລ້ວ, ຊີຮີ ພວມມີອາວຸດເຄມີ 1.000 ໂຕນ. ຖ້າຫາກສິ່ງດັ່ງກ່າວເກີດຂຶ້ນ, ມັນຈະແມ່ນໄພພິບັດສຳຫຼັບມະນຸດ. ປະທານາທິບໍດີ ອາເມລິກາ Barac Obama ໄດ້ກ່າວເຕືອນຊີຮີ ວ່າ ຕ້ອງຮັບຜົນຮ້າຍອັນໃຫຍ່ຫຼວງ ຖ້າຫາກເຄື່ອນຍ້າຍ ຫຼຶນຳໃຊ້ອາວຸດເຄມີ. ແຕ່ບໍ່ມີໃຜສາມາດຄາດຄະເນໄດ້ສິ່ງໃດຈະເກີດຂຶ້ນ, ເຖິງຢ່າງໃດກໍ່ຕາມ, ສິ່ງທີ່ແນ່ນອນນັ້ນແມ່ນ, ເມື່ອວິກິດການການເມືອງສິ້ນສຸດລົງ, ຄວາມເສຍຫາຍທາງດ້ານຊີວິດອີນຊີ ແລະ ຊັບສົມບັດຂອງປະຊາຊົນແມ່ນຫຼວງຫຼາຍທີ່ສຸດ.