ລັດຖະບານຫວຽດນາມຈະສ້າງທຸກເງື່ອນໄຂສະດວກຫຼາຍກວ່າອີກໃຫ້ແກ່ການຄົ້ນຄ້ວາ, ນຳໃຊ້ວິທະຍາສາດເຕັກໂນໂລຢີເຂົ້າໃນການຜະລິດ ກໍຄືການຄົ້ນຄ້ວາ, ປະດິດຄິດສ້າງວິທະຍາສາດເຕັກໂນໂລຢີຂອງປະຊາຊົນ. ນີ້ແມ່ນຄຳຢືນຢັນຂອງທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງທີ່ການພົບປະກັບບັນດານັກປະດິດສ້າງທີ່ດີເດັ່ນປີ 2015, ໂດຍກະຊວງວິທະຍາສາດ ແລະ ເຕັກໂນໂລຢີຈັດຂຶ້ນເມື່ອວັນທີ 12/5ຢູ່ຮ່າໂນ້ຍ.
ການພົບປະລະຫວ່າງທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງກັບນັກປະດິດສ້າງທີ່ດີເດັ່ນປີ 2015 |
ການພົບປະລະຫວ່າງຜູ້ນຳລັດຖະບານຫວຽດນາມ ກັບນັກປະດິດສ້າງທີ່ດີເດັ່ນປີ 2015 ຈຳນວນ 63 ຄົນນັ້ນ, ແມ່ນນອນໃນບັນດາເຫດການຖືກຈັດຕັ້ງເນື່ອງໃນໂອກາດສະເຫຼີມສະຫຼອງວັນວິທະຍາສາດ ແລະ ເຕັກໂນໂລຢີຫວຽດນາມ (18/5) . ການພົບປະຄັ້ງນີ້ໄດ້ສະແດງໃຫ້ເຫັນການເຊີດຊູດ້ານພູມປັນຍາ ແລະ ຄວາມສາມາດ ປະດິດຄິດສ້າງ, ສົ່ງເສີມ ແລະ ລະດົມກຳລັງໃຈຄວາມເມົາມົວອອກແຮງງານ, ປະດິດຄິດສ້າງໃນໝູ່ປະຊາຊົນ, ຄວາມເອົາໃຈໃສ່ຢ່າງເລິກເຊິ່ງຂອງພັກ, ລັດທີ່ມີຕໍ່ຂົງເຂດວິທະຍາສາດເຕັກໂນໂລຢີເວົ້າລວມ, ກໍຄືການເຄື່ອນໄຫວ ປະດິດຄິດສ້າງຂອງປະຊາຊົນເວົ້າສະເພາະໃນກິດຈະການສ້າງສາ ແລະ ພັດທະນາປະເທດຊາດ.
ຖືການພັດທະນາ, ຄົ້ນຄ້ວານຳໃຊ້ວິທະຍາສາດເຕັກໂນໂລຢີ ເປັນສຳຄັນ
ນະໂຍບາຍຂອງພັກ ແລະ ລັດຫວຽດນາມນັບແຕ່ກ່ອນເປັນຕົ້ນມາຍາມໃດກໍເອົາໃຈໃສ່ເປັນພິເສດ ແລະ ຖືການພັດທະນາ, ຄົ້ນຄ້ວານຳໃຊ້ວິທະຍາສາດເຕັກໂນໂລຢີ ເປັນສຳຄັນ, ພິເສດແມ່ນການເສີມຂະຫຍາຍຄວາມຂະຫຍັນຂັ່ນເຄື່ອນ, ມີຫົວຄິດປະດິດສ້າງໃນໝູ່ປະຊາຊົນ. ໃນຕົວຈິງ, ພັກ ແລະ ລັັດຫວຽດນາມໄດ້ເລັ່ງໃສ່ພັດທະນາການສຶກສາ, ບຳລຸງສ້າງ, ຍົກສູງລະດັບຄວາມຮູ້ໃຫ້ປະຊາຊົນ, ພັດທະນາແຫຼ່ງຊັບພະຍາກອນມະນຸດ ສ້າງພື້ນຖານເພື່ອເສີມຂະຫຍາຍການປະດິດຄິດສ້າງ, ຄົ້ນຄ້ວາວິທະຍາສາດເຕັກໂນໂລຢີຂອງປະຊາຊົນ; ພ້ອມກັນນັ້ນ ແມ່ນເອົາໃຈໃສ່, ສົ່ງເສີມສ້າງທຸກເງື່ອນໄຂເພື່ອເສີມຂະຫຍາຍຄວາມສາມາດບົ່ມຊ້ອນ, ກຳລັງແຮງ ປະດິດຄິດສ້າງຢ່າງມະຫາສານຂອງປະຊາຊົນໃນທຸກຂົງເຂດ. ໃນຊຸມປີທີ່ຜ່ານມາ, ກະຊວງວິທະຍາສາດ ແລະ ເຕັກໂນໂລຢີຫວຽດນາມໄດ້ເປັນເສນາທິການໃຫ້ລັດຖະບານ ເພື່ອປະກາດໃຊ້ບັນດາກົນໄກນະໂຍບາຍ ສ້າງສະພາບແວດລ້ອມທີ່ສະດວກໃຫ້ການເຄື່ອນໄຫວປະດິດຄິດສ້າງ ຂອງປະຊາຊົນທຸກຊັ້ນຄົນ, ນອກຈາກນັ້ນ ກໍຍັງມີບັນດາການເຄື່ອນໄຫວລະອຽດເພື່ອໜູນຊ່ວຍບັນດານັກປະດິດຄິດສ້າງ. ທ່ານລັດຖະມົນຕີກະຊວງວິທະຍາສາດ ແລະ ເຕັກໂນໂລຢີ ຫວຽດນາມ ຫງວຽນກວນ ໃຫ້ຮູ້ວ່າ :
“ ປີ 2012, ລັດຖະບານໄດ້ປະກາດໃຊ້ດຳລັດກ່ຽວກັບການມີຫົວຄິດປະດິດສ້າງ, ໃນນັ້ນ, ກຳນົດຢ່າງຈະແຈ້ງວ່າ ປະຊະຊົນເຮັດຫຍັງ? ອົງການຄຸ້ມຄອງຕ້ອງໜູນຊ່ວຍປະຊາຊົນຄືແນວໃດ?...ພວກຂ້າພະເຈົ້າໄດ້ສະເໜີ 63 ພະແນກວິທະຍາສາດ ແລະ ເຕັກໂນໂລຢີຂອງບັນດາທ້ອງຖິ່ນຕ້ອງເອົາໃຈໃສ່ເຖິງການເຄື່ອນໄຫວທີ່ມີຫົວຄິດປະດິດສ້າງຂອງປະຊາຊົນ. ເພາະສະນັ້ນ, ໃນຫຼາຍປີທີ່ຜ່ານມາ, ມີການປະດິດຄິດສ້າງຫຼາຍປະການຂອງປະຊາຊົນໄດ້ຮັບການໜູນຊ່ວຍຈາກກະຊວງວິທະຍາສາດ ແລະ ເຕັກໂນໂລຢີໂດຍຜ່ານບັນດາງານຕະຫຼາດນັດເຕັກໂນໂລຢີ ແລະ ພາຫະນະເຄື່ອງຈັກ ”
ສ້າງທຸກເງື່ອນໄຂໃຫ້ແກ່ການຄົ້ນຄ້ວາວິທະຍາສາດ ເຕັກໂນໂລຢີ
ກ່າວຄຳເຫັນທີ່ການພົບປະກັບບັນດານັກປະດິດສ້າງທີ່ດີເດັ່ນປີ 2015, ໂດຍກະຊວງວິທະຍາສາດ ແລະ ເຕັກໂນໂລຢີຈັດຂຶ້ນເມື່ອວັນທີ 12/5ຢູ່ຮ່າໂນ້ຍ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຢືນຢັນວ່າ : ຜົນງານຂອງປະເທດຊາດໃນຊຸມປີທີ່ຜ່ານມາ, ຍາມໃດກໍຕິດພັນກັບພູມປັນຍາ, ຄວາມສາມາດ ປະດິດຄິດສ້າງ, ຄົ້ນຄ້ວານຳໃຊ້ວິທະຍາສາດເຕັກໂນໂລຢີຂອງປະຊາຊົນ. ໃນສະພາບການທີ່ຫວຽດນາມພວມສຸມໃສ່ສ້າງລະບອບເສດຖະກິດຕະຫຼາດໃຫ້ສົມບູນແບບ, ເຊື່ອມໂຍງຢ່າງເລິກເຊິ່ງ, ກ້ວາງຂວາງເຂົ້າກັບພື້ນຖານເສດຖະກິດໂລກ, ປັດໄຈຫົວຄິດປະດິດສ້າງ, ຄົ້ນຄ້ວານຳໃຊ້ວິທະຍາສາດເຕັກໂນໂລຢີ ສືບຕໍ່ມີບົດບາດສຳຄັນ, ຍົກສູງສະມັດຕະພາບ, ປະສິດທິຜົນ, ກຳລັງແກ່ງແຍ້ງຂອງປະເທດຊາດ, ຂອງພື້ນຖານເສດຖະກິດ, ຂອງວິສາຫະກິດ ແລະ ຜະລິດຕະພັນຂອງຫວຽດນາມໃນເວທີ່ສາກົນ. ນີ້ກໍແມ່ນປັດໄຈຕັດສິນຕໍ່ການພັດທະນາຢ່າງວ່ອງໄວ ແລະ ຍືນຍົງ ແລະ ວິວັດການຫັນປະເທດຊາດເປັນອຸກສາຫະກຳ ແລະ ທັນສະໄໝ. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ສະເໜີໃຫ້ ກະຊວງວິທະຍາສາດ ແລະ ເຕັກໂນໂລຢີ ຈົ່ງພ້ອມກັບບັນດາຂະແໜງການ, ທ້ອງຖິ່ນຕ່າງໆ ສືບຕໍ່ເປັນເສນາທິການ ສ້າງບັນດານະໂຍບາຍທີ່ສອດຄ່ອງເພື່ອສົ່ງເສີມ, ສ້າງທຸກເງື່ອນໄຂໃຫ້ແກ່ການຄົ້ນຄ້ວາ, ນຳໃຊ້ວິທະຍາສາດ ເຕັກໂນໂລຢີເຂົ້າໃນການຜະລິດ. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ເນັ້ນໜັກວ່າ :
“ ສ້າງນະໂຍບາຍຕາມທິດສະດວກທີ່ສຸດ, ສົ່ງເສີມການປະດິດຄິດສ້າງ, ຍົກສູງສະມັດທະພາບອອກແຮງງານເພື່ອປະຊາຊົນມີການດຳລົງຊີວິດທີ່ດີກ່ວາ. ພວກເຮົາຄວນເອົາໃຈໃສ່ເຖິງດ້ານທຶນຮອນ, ການຈຳໜ່າຍຜະລິດຕະພັນ, ການໂຄສະນາ…ຖ້າຫາກສ້າງສະພາບແວດລ້ອມທີ່ສະດວກນັ້ນ, ການປະດິດຄິດສ້າງ, ຄົ້ນຄ້ວາ, ນຳໃຊ້ວິທະຍາສາດ ເຕັກໂນໂລຢີ ຈຶ່ງສາມາດພັດທະນາໄດ້ ”
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໄດ້ຕີລາຄາສູງ ແລະ ຍ້ອງຍໍຊົມເຊີຍຂະບວນການຄົ້ນຄ້ວາ, ປະດິດຄິດສ້າງຂອງຊາວຜູ້ອອກແຮງງານໃນທົ່ວປະເທດ; ຫວັງວ່າບັນດາ ນັກປະດິດສ້າງ, ນັກວິທະຍາສາດ ຈົ່ງເສີມຂະຫຍາຍບັນດາໝາກຜົນທີ່ຍາດມາໄດ້ ເພື່ອສືບຕໍ່ມີບັນດາກິດຈະກຳ, ຜະລິດຕະພັນຄົ້ນຄ້ວາຢ່າງມີຫົວຄິດປະດິດສ້າງໃນການອອກແຮງງານ, ຜະລິດ, ດຳເນີນທຸລະກິດ, ປະກອບສ່ວນສ້າງສາປະເທດຫວຽດນາມເອກະລາດ, ເອກະພາບ, ປະຊາຊົນຮັ່ງມີ ປະເທດຊາດເຂັ້ມແຂງ .