ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີ
(ບົດລາຍງານຂອງລັດຖະບານ)
(vovworld)- ບົດລາຍງານຂອງລັດຖະບານ ໂດຍທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີ ທີ່ວາລະໄຂກອງປະຊຸມສະໄຫມສາມັນເທື່ອທີ 10 ສະພາແຫ່ງຊາດຊຸດທີ 13 ດຳເນີນ ໃນຕອນເຊົ້າວັນທີ 20/10 ຢູ່ ຮ່າໂນ້ຍ ໄດ້ສຸມໃສ່ຕີລາຄາສະພາບການເສດຖະກິດ ສັງຄົມ ໄລຍະ 2011-2015, ທິດທາງ, ຫນ້າທີ່ໄລຍະ 5 ປີ ຄືແຕ່ປີ 2016-2020 ແລະ ແຜນການພັດທະນາເສດຖະກິດ ສັງຄົມປີ 2016.
ຕາມທ່ານນາຍົກລັດຖະມົນຕີ ຫງວຽນເຕີນຢູງ ແລ້ວ, ໃນໄລຍະ 2011-2015, ຫວຽດນາມ ປະຕິບັດຈຸດໝາຍ, ຫນ້າທີ່ພັດທະນາເສດຖະກິດແມ່ນ: ສຸມໃສ່ບຸລິມະສິດແກ່ການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັບປະກັນຊີວິດສັງຄົມ, ປັບປຸງຊີວິດການເປັນຢູ່ຂອງປະຊາຊົນ, ຮັກສາການເຕີບໂຕຢູ່ໃນລະດັບເໝາະສົມ ຕິດພັນກັບການຍູ້ແຮງການປະຕິບັດ 3 ຂອດບຸກທະລຸຍຸດທະສາດ, ສ້າງໂຄງປະກອບພື້ນຖານເສດຖະກິດຄືນໃຫມ່ ແລະ ປ່ຽນໃຫມ່ຮູບແບບການເຕີບໂຕ, ຮັບປະກັນການປ້ອງກັນຊາດປ້ອງກັນຄວາມສະຫງົບ ແລະ ສະຖຽນລະພາບດ້ານການເມືອງສັງຄົມ, ເພີ່ມທະວີການເຄື່ອນໄຫວການຕ່າງປະເທດ ແລະ ຍົກສູງປະສິດທິຜົນການເຊື່ອມໂຍງເຂົ້າກັບສາກົນ. ຜ່ານນັ້ນ ສ້າງປະຖົມປັດໄຈຢ່າງໝັ້ນແກ່ນເພື່ອໃຫ້ການເຕີບໂຕເສດຖະກິດສັງຄົມບັນລຸລະດັບສູງກວ່າຊຸມປີທ້າຍຂອງແຜນການ 5 ປີ ຄືແຕ່ປີ 2016-2020.
ໝາກຜົນແຫ່ງການພັດທະນາເສດຖະກິດສັງຄົມປີ 2015 ແລະ ໄລຍະ 5 ປີຄືແຕ່ປີ 2011-2015
ຫວຽດນາມ ປະຕິບັດແຜນການພັດທະນາເສດຖະກິດ ສັງຄົມ ປີ 2015 ແລະ ໄລຍະ 5 ປີ ຄືແຕ່ປີ 2011-2015 ໃນທຸກຂົງເຂດ ລ້ວນແຕ່ບັນລຸໝາກຜົນດີພໍສົມຄວນ. ໃນ ຈຳນວນ 26 ມາດຖານ ຕົ້ນຕໍ ຂອງແຜນການ 5 ປີ ຄືແຕ່ປີ 2011-2015, ມີ 17 ມາດຖານ ບັນລຸ ແລະ ລື່ນກາຍແຜນການ, 9 ມາດຖານ ບໍ່ບັນລຸແຜນການວາງອອກ, ໃນນັ້ນ GDP ຂອງປີ 2014 ແລະ 2015 ໄດ້ມີການຫັນປ່ຽນຢ່າງຕັ້ງຫນ້າ, ລື່ນກາຍແຜນການວາງອອກ. ການເຕີບໂຕ GDP ປີ 2015 ຄາດວ່າ ບັນລຸ 6,5%, ຊື່ງແມ່ນລະດັບສູງສຸດໃນ 5 ປີຜ່ານມາ, ລື່ນກາຍແຜນການວາງອອກ 6,2%, ສະເລ່ຍ 5 ປີ ແມ່ນບັນລຸປະມານ 5,9%/ປີ. ທ່ານນາຍົກລັດຖະມົນຕີ ຫງວຽນເຕີນຢູງ ໃຫ້ຮູ້ວ່າ:
“ທົບທວນຄືນໄລຍະ 5 ປີ ຜ່ານມາ, ເຖິງວ່າ ຕ້ອງປະເຊີນຫນ້າກັບຄວາມຫຍຸ້ງຍາກ ສິ່ງທ້າທາຍຫລາຍຢ່າງ ແຕ່ຍ້ອນມີຄວາມມານະພະຍາຍາມສູ້ຊົນຂອງທົ່ວພັກ, ທົ່ວກອງທັບ, ທົ່ວປວງຊົນ, ພວກເຮົາປະຕິບັດຄາດໝາຍທີ່ວາງອອກໂດຍພື້ນຖານ, ເປັນຕົ້ນແມ່ນຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັບປະກັນຊີວິດສັງຄົມ, ປັບປຸງຊີວິດການເປັນຢູ່ຂອງປະຊາຊົນ. ຮັກສາການເຕີບໂຕຢູ່ໃນລະດັບເໝາະສົມ ແລະ ບັນລຸການເຕີບໂຕສູງກວ່າໃນຊຸມປີທ້າຍຂອງແຜນການ, ປະຕິບັດບັນດາບຸກທະລຸຍຸດທະສາດໃຫ້ມີໝາກຜົນໃນເບື້ອງຕົ້ນ ແລະ ສ້າງໂຄງປະກອບເສດຖະກິດຄືນໃຫມ່ ຕິດພັນກັບການປ່ຽນໃຫມ່ຮູບແບບການເຕີບໂຕ, ປົກປັກຮັກສາອະທິປະໄຕຜືນແຜ່ນດິນແຫ່ງຊາດຢ່າງໝັ້ນຄົງ ແລະ ຮັກສາສັນຕິພາບ, ມິດຕະພາບ ກັບບັນດາປະເທດ, ຮັບປະກັນສະຖຽນລະພາບການເມືອງ ສັງຄົມ, ຍົກສູງອິດທິພົນຊື່ສຽງ, ທີ່ຕັ້ງບົດບາດຂອງຫວຽດນາມ ໃນເວທີສາກົນ, ສ້າງປະຖົມປັດໄຈສະດວກເພື່ອໃຫ້ການພັດທະນາສູງກວ່າໃນໄລຍະຈະມາເຖິງ.”
ທິດທາງ, ໜ້າທີ່ ແລະ ມາດຕະການພັດທະນາເສດຖະກິດ, ສັງຄົມໄລຍະ5ປີ 2016-2020 ແລະ ປີ2016
ໃນໄລຍະນີ້, ຫວຽດນາມ ສືບຕໍ່ປະຕິບັດຄາດໝາຍຮັບປະກັນສະຖຽນລະພາບດ້ານເສດຖະກິດມະຫາພາກ, ສູ້ຊົນເພື່ອບັນລຸລະດັບເຕີບໂຕເສດຖະກິດໃຫ້ສູງກວ່າ 5 ປີກ່ອນ, ປີ 2016 ສູງກວ່າປີ 2015. ພ້ອມກັນນັ້ນ ແມ່ນຍູ້ແຮງການປະຕິບັດບັນດາບາດກ້າວບຸກທະລຸດ້ານຍຸດທະສາດ, ສ້າງໂຄງປະກອບພື້ນຖານເສດຖະກິດຄືນໃໝ່ ຕິດພັນກັບການປ່ຽນໃໝ່ຮູບແບບເຕີບໂຕ, ຍົກສູງສະມັດຕະພາບ, ປະສິດທິຜົນ ແລະ ກຳລັງແກ່ງແຍ້ງ. ພັດທະນາວັດທະນະທຳ, ປະຕິບັດຄວາມກ້າວໜ້າຍຸດຕິທຳສັງຄົມ ແລະ ປັບປຸງຊີວິດການເປັນຢູ່ຂອງປະຊາຊົນ. ເປັນເຈົ້າການຮັບມືກັບການປ່ຽນແປງຂອງດິນຟ້າອາກາດ, ຄຸ້ມຄອງຊັບພະຍາກອນຢ່າງມີປະສິດທິຜົນ ແລະ ປົກປັກຮັກສາສິ່ງແວດລ້ອມ. ເພີ່ມທະວີການປ້ອງກັນຊາດ, ປ້ອງກັນຄວາມສະຫງົບ, ຮັກສາອະທິປະໄຕແຫ່ງຊາດ, ຜືນແຜ່ນດິນອັນຄົບຖ້ວນ ແລະ ຮັບປະກັນຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ. ຍົກສູງປະສິດທິຜົນວຽກງານການຕ່າງປະເທດ ແລະ ເປັນເຈົ້າການເຊື່ອມໂຍງກັບສາກົນ. ຮັກສາສັນຕິພາບ, ສະຖຽນລະພາບ, ສ້າງສະພາບແວດລ້ອມ, ເງື່ອນໄຂສະດວກ ເພື່ອສ້າງສາ ແລະ ປົກປັກຮັກສາປະເທດຊາດ. ຍົກສູງທີ່ຕັ້ງຂອງຫວຽດນາມໃນເວທີສາກົນ, ສືບຕໍ່ສ້າງພື້ນຖານເພື່ອໃຫ້ຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານຢ່າງໄວ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຊີ້ແຈ້ງວ່າ, ບັນດາຄາດໝາຍຕົ້ນຕໍດ້ານເສດຖະກິດ, ສັງຄົມ ແລະ ບັນດາມາດຕະການ ແມ່ນເພື່ອປະຕິບັດຄາດໝາຍເຫຼົ່ານັ້ນ. ກ່ຽວກັບໜ້າທີ່ພັດທະນາເສດຖະກິດ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ເນັ້ນໜັກເປັນພິເສດເຖິງການຍູ້ແຮງການສ້າງໂຄງປະກອບເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບເຕີບໂຕ, ຍົກສູງສະມັດຕະພາບ, ປະສິດທິຜົນ ແລະ ກຳລັງແກ່ງແຍ້ງ.
“ປ່ຽນໃໝ່ຮູບແບບການເຕີບໂຕ, ຮັບປະກັນການພັດທະນາຢ່າງວ່ອງໄວ ແລະ ໝັ້ນຄົງ. ສົມທົບກັນພັດທະນາທັງລວງກວ້າງກັບລວງເລິກຢ່າງມີປະສິດທິຜົນ, ເອົາໃຈໃສ່ເປັນພິເສດເຖິງການພັດທະນາຕາມລວງເລິກ; ຍົກສູງສະມັດຕະພາບ, ຄຸນນະພາບ, ປະສິດທິຜົນ, ກຳລັງແຮງແກ່ງແຍ້ງຢ່າງບໍ່ຢຸດຢັ້ງ; ການເຕີບໂຕດ້ານເສດຖະກິດຕິດພັນກັບການພັດທະນາວັດທະນະທຳຢ່າງກົມກຽວ, ປະຕິບັດຄວາມກ້າວໜ້າຍຸຕິທຳສັງຄົມ, ຍົກສູງຊີວິດການເປັນຢູ່ຂອງປະຊາຊົນ; ປົກປັກຮັກສາ, ປັບປຸງສະພາບແວດລ້ອມ, ຮັບມືກັບການປ່ຽນແປງຂອງດິນຟ້າອາກາດ ແລະ ຮັບປະກັນການປ້ອງກັນຊາດ, ປ້ອງກັນຄວາມສະຫງົບ. ສືບຕໍ່ຜັນຂະຫຍາຍແຜນຮ່າງສັງລວມໃນການສ້າງໂຄງປະກອບພື້ນຖານເສດຖະກິດ ແລະ ບັນດາຂະແໜງ, ຂົງເຂດຄືນໃໝ່. ປະຕິບັດບັນດາມາດຕະການຍູ້ແຮງ ແລະ ຍົກສູງປະສິດທິຜົນໃນການສ້າງໂຄງປະກອບກະສິກຳ ຕິດພັນກັບການກໍ່ສ້າງຊົນນະບົດໃໝ່. ສູ້ສົບບັນລຸລະດັບເຕີບໂຕມູນຄ່າເພີ່ມ, ຂົງເຂດກະສິກຳສະເລ່ຍ 3 – 3,5% ແລະ ຮອດປີ 2020 ຈະມີ 50% ຈຳນວນຕາແສງບັນລຸມາດຕະຖານຊົນນະບົດໃໝ່. ຍູ້ແຮງການສ້າງໂຄງປະກອບອຸດສາຫະກຳ, ສ້າງພື້ນຖານໃຫ້ການຫັນເປັນອຸດສາຫະກຳ ແລະ ທັນສະໄໝ”.
ທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ແຈ້ງບັນດາມາດຕະການປະຕິບັດໜ້າທີ່ພັດທະນາເສດຖະກິດສັງຄົມ, ໃນນັ້ນມີເລື່ອງຍົກສູງຄຸນນະພາບແຫຼ່ງຊັບພະຍາກອນມະນຸດ, ເພື່ອກຳລັງບົ່ມຊ້ອນດ້ານວິທະຍາສາດ, ເຕັກໂນໂລຊີ, ພັດທະນາວັດທະນະທຳ ແລະ ປະຕິບັດຄວາມກ້າວໜ້າດ້ານຍຸຕິທຳສັງຄົມ, ຍົກສູງຊີວິດການເປັນຢູ່ໃຫ້ແກ່ປະຊາຊົນ ຕິດພັນກັບການພັດທະນາເສດຖະກິດຢ່າງກົມກຽວ. ທ່ານນາຍົກລັດຖະມົນຕີ ຫງວຽນເຕີນຢຸງ ກໍເນັ້ນໜັກເຖິງໜ້າທີ່ຍົກສູງຜົນສັກສິດ, ປະສິດທິຜົນການຄຸ້ມຄອງລັດ, ສ້າງກົງຈັກລັດໃຫ້ກະທັດລັດ, ປອດໄສ, ໝັ້ນຄົງເຂັ້ມແຂງ, ມີຜົນສັກສິດ, ປະສິດທິຜົນ, ຍົກສູງປະສິດທິຜົນການເຄື່ອນໄຫວຕ່າງປະເທດ, ເປັນເຂົ້າການເຊື່ອມໂຍງເຂົ້າກັບສາກົນ, ສ້າງສະພາບແວດລ້ອມແຫ່ງສັດຕິພາບ ແລະ ສ້າງເງື່ອນໄຂສະດວກເພື່ອພັດທະນາປະເທດຊາດ.