ພາຍຫຼັງດຳເນີນວາລະປະຊຸມ 20 ຄັ້ງດ້ວຍຄວາມເຄັ່ງຕຶງນັ້ນ, ວັນທີ 4/2, ສັນຍາຄູ່ຮ່ວມມືຂ້າມປາຊີຝິກ TPP ໄດ້ຮັບການລົງນາມຢູ່ Auckland – New Zealand. ສັນຍາສະບັບນີ້,ກໍເປັນການຊຸກຍູ້ ແລະ ສ້າງທ່າພັດທະນາໃຫ້ແກ່ພື້ນຖານເສດຖະກິດຂອງປະເທດຊາດ. ແຕ່ເຖິງຢ່າງໃດກໍດີ, ໄປພ້ອມກັບກາລະໂອກາດ ກໍມີບັນດາສິ່ງທ້າທາຍບໍ່ໜ້ອຍ.
TPP ໄດ້ຮັບການລົງນາມ, ພາຍຫຼັງທີ່ສະພາແຫ່ງຊາດຂອງ 12 ຄູ່ຮ່ວມມືເຂົ້າຮ່ວມສັນຍາຮັບຮອງເອົາ, ຈະແມ່ນເຂດການຄ້າເສລີໃຫຍ່ກວ່າໝູ່ ດ້ວຍຈຳນວນປະຊາກອນ 800 ລ້ານຄົນ, ຍອດ GDP ຂຶ້ນເຖິງ 28.000 ຕື້ USD, ກວມ 30% ວົງເງິນການຄ້າທົ່ວໂລກ ແລະ ເກືອບ 40%ປະລິມານການຜະລິດດ້ານເສດຖະກິດຂອງໂລກ. ນີ້ແມ່ນສັນຍາຮອບດ້ານ ແລະ ມີຄຸນນະພາບສູງບົນພື້ນຖານການສົມດຸ່ນດ້ານຜົນປະໂຫຍດ ແລະ ເອົາໃຈໃສ່ເຖິງລະດັບການພັດທະນາທີ່ແຕກຕ່າງກັນລະຫວ່າງບັນດາປະເທດທີ່ເຂົ້າຮ່ວມສັນຍາ ຈະຊຸກຍູ້ການເຕີບໂຕເສດຖະກິດຢູ່ທຸກໆປະເທດ TPP ໃນນັ້ນມີຫວຽດນາມ.
ກຳລັງຊຸກຍູ້ເພື່ອເຕີບໂຕດ້ານການສົ່ງອອກ, ພິເສດແມ່ສຳລັບຂະແໜງຕ່ຳແຜ່ນຕັດຫຍິບ
ຕາມການຄິດໄລ່ຂອງບັນດາຜູ້ຊ່ຽວຊານແລ້ວ, ສັນາ TPP ຈະຊ່ວຍຫວຽດນາມເພີ່ມລະດັບ GDP ຕື່ມອີກ 23,5 ຕື້ USD ໃນປີ 2020 ແລະ 33,5 ຕື້ USD ໃນປີ 2025. ພ້ອມກັນນັັ້ນ, ການສົ່ງອອກຈະເພີ່ມຕື່ມ 68 ຕື້ USDໃນປີ 2025. ເລື່ອງບັນດາຕະຫຼາດໃຫຍ່ເຊັ່ນ ອາເມລິກາ, ຍີປຸ່ນ ແລະ ການາດາ ຫຼຸດຜ່ອນພາສີນຳເຂົ້າລົງ 0% ຈະຊ່ວຍສ້າງກຳລັງຊຸກຍູ້ຢ່າງໃຫຍ່ຫຼວງທີ່ມີຕໍ່ການເຄື່ອນໄຫວສົ່ງອອກຂອງຫວຽດນາມ. ບັນດາຂະແໜງສົ່ງອອກທີ່ສຳຄັນເຊັ່ນ: ຕ່ຳແຜ່ນຕັດຫຍິບ, ເກີບ, ສິນໃນນ້ຳ…ມີຫຼາຍກໍລະນີຈະມີບາດກ້າວຂະຫຍາຍຕົວຢ່າງກະໂດດຂັ້ນກ່ຽວກັບວົງເງິນສົ່ງອອກໄປຍັງຕະຫຼາດເຫຼົ່ານີ້. TPP ຍັງຈະສ້າງເງື່ອນໄຂສະດວກໃຫ້ແກ່ຫວຽດນາມໃນການດຶງດູດການລົງທຶນຈາກບັນດາວິສາຫະກິດ, ບັນດາກຸ່ມບໍລິສັດເສດຖະກິດ, ຂອງບັນດາປະເທດ TPP, ເປັນຕົ້ນແມ່ນບັນດາຂົງເຂດທີ່ມີອັດຕາການນຳໃຊ້ເຕັກໂນໂລຢີສູງ, ມີຄຸນຄ່າເພີ່ມສູງ. ໜຶ່ງໃນບັນດາຂະແໜງການທີ່ໄດ້ຮັບຜົນປະໂຫຍດຫຼາຍກ່ວາໝູ່, ນັ້ນແມ່ນຂະແໜງຕ່ຳແຜ່ນຕັດຫຍິບ. ທ່ານນາງ ດັ້ງເຟືອງຢຸງ ເລຂາທິການໃຫຍ່ສະຫະສະມາຄົມ ຕ່ຳແຜ່ນຕັດຫຍິບຫວຽດນາມໃຫ້ຮູ້ວ່າ :
“TPP ແມ່ນສັນຍາທີ່ມີລັກສະນະສະຕະວັດ, ນຳມາເຊິ່ງຜົນປະໂຫຍດຫຼາຍຢ່າງໃຫ້ແກ່ວິສາຫະກິດຂອງຫວຽດນາມເວົ້າລວມ, ເວົ້າສະເພາະແມ່ນບັນດາວິສາຫະກິດຕ່ຳແຜ່ນຕັດຫຍິບຂອງຫວຽດນາມ. ສຳລັບບັນດາສັນຍາ FTA ຫຼື TPP ເມື່ອໄດ້ຮັບການລົງນາມນັ້ນ, ຈະນຳມາເຊິ່ງບັນດາຜົນປະໂຫຍດທຳອິດ, ນັ້ນແມ່ນການຫຼຸດຜ່ອນພາສີສຳລັບສິນຄ້ານຳເຂົ້າ, ເປັນຕົ້ນແມ່ນສິນຄ້າປະເພດເຄື່ອງຕ່ຳແຜ່ນຕັດຫຍິບ ”
ກາລະໂອກາດພ້ອມກັບສິ່ງທ້າທາຍ
ດ້ວຍວົງເງິນນຳເຂົ້າ ແລະ ສົ່ງອອກຂອງບັນດາປະເທດໃນ TPP ທີ່ຂຶ້ນເຖິງ 230 ຕື້ USD, ຄາດຄະເນວ່າ ການເຂົ້າຮ່ວມສັນຍານີ້ ຈະຊ່ວຍຫວຽດນາມເພີ່ມມູນຄ່າການຄ້າຂຶ້ນເຖິງ 20-30%. ເພື່ອຮັບຜົນປະໂຫຍດທີ່ດີທີ່ສຸດຈາກ TPP ແລະ ນຳໃຊ້ທຸກໆທ່າດີຂອງຕົນພາຍຫຼັງເຊື່ອມໂຍງເຂົ້າກັບສາກົນນັ້ນ, ກ່ອນອື່ນໝົດ ຫວຽດນາມຕ້ອງປ່ຽນແປງນະໂຍບາຍ ແລະ ກົດໝາຍເພື່ອຊຸກຍູ້ການພັດທະນາບັນດາຂະແໜງການທີ່ມີທ່າໄດ້ປຽບ. ສຳລັບບັນດາຂະແໜງການທີ່ໄດ້ຮັບຜົນປະໂຫຍດພາຍຫຼັງທີ່ TPP ມີຜົນສັກສິດຄື ຕ່ຳແຜ່ນຕັດຫຍິບ, ສິນໃນນ້ຳ, ຜະລິດຕະພັນກະເສດ… ແມ່ນຄວນເປັນເຈົ້າການກ່ຽວກັບບັນດາປັດໄຈແຮງງານ, ທຶນຮອນ, ທີ່ດິນ ແລະ ຊັບພະຍາກອນອື່ນໆ. ສ່ວນສຳລັບບັນດາຂະແໜງການບໍ່ມີທ່າໄດ້ປຽບເຊັ່ນ ການລ້ຽງສັດ, ປ່າໄມ້, ອຸດສາຫະກຳ… ແມ່ນຄວນສ້າງໂຄງປະກອບຄືນໃໝ່ເພື່ອເພີ່ມສະມັດຕະພາບ, ປະສິດທິຜົນໃຫ້ດີກວ່າ.
ສັນຍາ TPP ໄດ້ວາງອອກບັນດາມາດຕະຖານສູງ, ຄຳໝັ້ນສັນຍາຢ່າງເລິກເຊິ່ງກ້ວາງຂວາງ, ເງື່ອື່ນໄຂປະຕິບັດກໍຫຍຸ້ງຍາກກ່ວາ, ອັນໄດ້ຮຽກຮ້ອງໃຫ້ພື້ນຖານເສດຖະກິດຫວຽດນາມຕ້ອງຍູ້ແຮງການສ້າງໂຄງປະກອບຈາກພາຍໃນຄືນໃໝ່. ທ່ານ ດຣ ວໍ້ຈີ້ແທ່ງ ອະດີດຮອງຫົວໜ້າສະຖາບັນຄົ້ນຄ້ວາຄຸ້ມຄອງເສດຖະກິດສູນກາງໃຫ້ຮູ້ວ່າ :
“ ພາກຕ່າງໆສ່ວນຫຼາຍໃນສັນຍາ TPP ແມ່ນມີສ່ວນກ່ຽວຂ້ອງເຖິງນະໂຍບາຍຢູ່ພາຍໃນປະເທດ. ບັນຫາແມ່ນປອດພາສີ, ນະໂຍບາຍ, ການດັດປັບ…ແມ່ນສິ່ງກີດຂວາງດ້ານການຄ້າ, ການລົງທຶນທີ່ໃຫຍ່ກວ່າໝູ່. ເພາະສະນັ້ນ, ປະຈຸບັນແມ່ນຍັງຂຶ້ນກັບເລື່ອງຫວຽດນາມຈະປະຕິຮູບຄືແນວໃດ, ບັນດາຜົນປະໂຫຍດທີ່ພວກເຮົາບັນລຸຈາກ TPP ໄດ້ເທົ່ານັ້ນ ”
ກະກຽມຢ່າງວ່ອງໄວເພື່ອປະຕິບັດສັນຍາ
ຕີລາຄາກ່ຽວກັບບັນດາຜົນປະໂຫຍດຂອງສັນຍາ TPP, ທ່ານລັດຖະມົນຕີກະຊວງອຸດສາຫະກຳການຄ້າ ວູ້ຮີຮ່ວາງ ໃຫ້ຂໍ້ສັງເກດວ່າ : TPP ຈະຊ່ວຍຍົກສູງທີ່ຕັ້ງບົດບາດຂອງຫວຽດນາມໃນພາກພື້ນ ກໍຄືໃນເວທີສາກົນ. ທ່ານໃຫ້ຮູ້ວ່າ ນັບແຕ່ຈຸດເວລານີ້, ຫວຽດນາມຕ້ອງກະກຽມບັນດາເງື່ອນໄຂກ່ອນທີ່ສັນຍາມີຜົນສັກສິດຢ່າງເປັນທາງການ. ທ່ານລັດຖະມົນຕີກະຊວງອຸດສາຫະກຳການຄ້າ ວູ້ຮີຮ່ວາງ ເນັ້ນໜັກວ່າ :
“ ວຽກງານທຳອິດແມ່ນຕ້ອງຈັດຕັ້ງການຖະແຫຼງຂ່າວໂຄສະນາບັນດາເນື້ອໃນຂອງສັນຍາເຖິງບັນດາວິສາຫະກິດ ແລະ ເປົ້າໝາຍອື່ນໆ ແລະຕ້ອງປະຕິບັດບັນດາຄຳໝັ້ນສັນຍານັ້ນເພື່ອຮັບເອົາບຸລິມະສິດໂດຍສັນຍານີ້ນຳມາໃຫ້. ພ້ອມກັນນັ້ນ ກໍຄວນເປັນເຈົ້າການຮັບມືກັບບັນດາສິ່ງທ້າທາຍ. ທີ່ 2 ແມ່ນສ້າງກອບກົດໝາຍໃຫ້ສົມບູນແບບ, ສືບຕໍ່ປະກາດໃຊ້ບາງກົດໝາຍໃໝ່ ຫຼືປັບປຸງເພີ່ມເຕີມບາງກົດໝາຍທີ່ຍັງບໍ່ທັນສອດຄ່ອງ. ທີ່ 3 ແມ່ນວຽກງານປຕິບັດ, ຂະແໜງອຸດສາຫະກຳການຄ້າຕ້ອງນຳໜ້າໃນການປະຕິບັດບັນດາເນື້ອໃນຂອງສັນຍາ, ສົມທົບຢ່າງກັບບັນດາກະຊວງ, ຂະແໜງການຕ່າງໆແໜ້ນແຟ້ນໃນການປະຕິບັດບັນດາຄຳໝັ້ນສັນຍາ. ພ້ອມກັນນັ້ນ ຕ້ອງສ້າງເງື່ອນໄຂສະດວກໃຫ້ແກ່ບັນດາວິສາຫະກິດເຂົ້າຮ່ວມຢ່າງມີປະສິດທິຜົນ ”
ຄາດວ່າພາຍຫຼັງປີ 2018, ສັນຍາ TPP ຈະໄດ້ຮັບການປະຕິບັດ. ພາຍຫຼັງທີ່ສັນຍາໄດ້ຮັບການລົງນາມຢ່າງເປັນທາງການ, ເພື່ອຕອບສະໜອງຄວາມມຸ່ງຫວັງຂອງປະຊາຄົມວິສາຫະກິດກໍຄືປະຊາຊົນ, ບັນດາຜູ້ວາງນະໂຍບາຍຫວຽດນາມໄດ້ມີບັນດາການກະທຳທີ່ຕັ້ງໜ້າ ແລະ ມີປະສິດທິຜົນເພື່ອບໍ່ປະໃຫ້ພາດໂອກາດທີ່ດີທີ່ສຸດຂອງປະເທດຊາດໃນໄລຍະເຊື່ອມໂຍງເຂົ້າກັບສາກົນ.