(vovworld) - ຄືດັ່ງໄດ້ໃຫ້ຂ່າວໄປແລ້ວ, ໃນຂອບເຂດການຢ້ຽມຢາມ ສະຫະພາບເອີລົບ (ຫລື EU), ທ່ານ Pham Binh Minh ລັດຖະມົນຕີການຕ່າງປະເທດ ຫວຽດນາມ ພ້ອມກັບທ່ານນາງ Catherine Ashton ຜູ້ຕາງຫນ້າຂັ້ນສູງຂອງ EU ກ່ຽວກັບນະໂຍບາຍການຕ່າງປະເທດ ແລະ ຄວາມໝັ້ນຄົງ ທັງເປັນຮອງປະທານຄະນະກຳມະການເອີລົບ ໄດ້ລົງນາມໃນສັນຍາແມ່ຄູ່ຮ່ວມມື ແລະ ການຮ່ວມມືຮອບດ້ານ ຫລື PCA ລະຫວ່າງ ຫວຽດນາມ ແລະ EU ຢ່າງເປັນທາງການ. ສັນຍາສະບັບນີ້ ໄດ້ຮັບການຕີລາຄາວ່າ ຈະສ້າງກອບກົດໝາຍໃຫມ່, ເປີດກວ້າງການພົວພັນຮ່ວມມືລະຫວ່າງ ຫວຽດນາມ ແລະ EU ໃນຊຸມປີຈະມາເຖິງ.
ທ່ານລັດຖະມົນຕີການຕ່າງປະເທດ ຫວຽດນາມ Pham Binh Minh ແລະ ທ່ານນາງ Catherine Ashton ຜູ້ຕາງຫນ້າຂັ້ນສູງຂອງ EU
ພາບ:ec.europa.eu |
ເລື່ອງ ຫວຽດນາມ ໄດ້ລົງນາມໃນສັນຍາແມ່ຄູ່ຮ່ວມມື ແລະ ການຮ່ວມມືຮອບດ້ານ ຫລື PCA ລະຫວ່າງ ຫວຽດນາມ ແລະ EU ຢ່າງເປັນທາງການ ເປັນຂີດໝາຍແຫ່ງບາດກ້າວຫັນປ່ຽນສຳຄັນຂອງສາຍພົວພັນລະຫວ່າງສອງຝ່າຍ. ຈາກ ເລື່ອງ EU ຫນູນຊ່ວຍຫວຽດນາມ ພັດທະນາ, ຫລຸດຜ່ອນຄວາມທຸກຍາກ ຫັນປ່ຽນ ພື້ນຖານເສດຖະກິດໄປສູ່ສາຍພົວພັນຄູ່ຮ່ວມມືຢ່າງສະເຫມີພາບ ແລະ ການຮ່ວມມືຮອບດ້ານ. PCA ແມ່ນພະຍານຫລັກຖານຢ່າງມີຊີວິດຊີວາໃຫ້ແກ່ການພັດທະນາຮອບດ້ານ ແລະ ເລິກເຊິ່ງຂອງການພົວພັນລະຫວ່າງ ຫວຽດນາມ ແລະ EU ໃນກວ່າ 20 ປີ ຜ່ານມາ ພ້ອມທັງເປັນຂີດໝາຍສຳຄັນ, ນຳການພົວພັນສອງຝ່າຍຂຶ້ນສູ່ລະດັບສູງໃຫມ່, ສອດຄ່ອງກັບລະດັບຮ່ວມສຳພັນຢ່າງເລິກເຊິ່ງ, ກວ້າງຂວາງ ແລະ ບົດບາດທີ່ຕັ້ງຂອງ EU ໃນສັດຕະວັດທີ 21 ກໍຄື ທີ່ຕັ້ງບົດບາດ ແລະ ກຳລັງແຮງຮັບມື້ນັບເພີ່ມຂຶ້ນຂອງ ຫວຽດນາມ ພາຍຫລັງ 25 ປີແຫ່ງການປ່ຽນແປງໃຫມ່ ແລະ ເຊື່ອມໂຍງກັບສາກົນສຳເລັດຜົນ. ເມື່ອຕອບສຳພາດຕໍ່ນັກຂ່າວພາຍຫລັງພິທີລົງນາມ, ທ່ານລັດຖະມົນຕີກະຊວງການຕ່າງປະເທດ ຫວຽດນາມ Pham Binh Minh ໄດ້ຢືນຢັນວ່າ: ຖ້າທຽບໃສ່ກັບສັນຍາແມ່ທີ່ໄດ້ລົງນາມເມື່ອປີ 1995 ລະຫວ່າງ ຫວຽດນາມ ແລະ ຄະນະກຳມະການເອີລົບ ຫລື EC, ສັນຍາ PCA ຄັ້ງນີ້ແມ່ນສ່ອງແສງຢ່າງກົມກຽວລະຫວ່າງຜົນປະໂຫຍດ ແລະ ການໃຫ້ບຸລິມະສິດຂອງສອງຝ່າຍ. ທ່ານ Pham Binh Minh ກ່າວວ່າ:
“ສັນຍາ PCA ຄັ້ງນີ້ ແມ່ນເປີດກວ້າງບັນດາຂອບເຂດຊຶ່ງ ຫວຽດນາມ ມີຄວາມຕ້ອງການທີ່ສຸດ, ຕົວຢ່າງຄື: ຂົງເຂດວິທະຍາສາດ ເຕັກໂນໂລຊີ, ສຶກສາບຳລຸງສ້າງ.ນັ້ນແມ່ນບັນດາຂົງເຂດຊຶ່ງ ຫວຽດນາມ ຕ້ອງການ ແລະ EU ມີທ່າແຮງ. ພ້ອມກັນນັ້ນ ສຳລັບສັນຍາ PCA, EU ສາມາດຊຸກຍູ້ການຮ່ວມມືກັບ ຫວຽດນາມ ໃນບັນດາຂົງເຂດສາກົນ, ທົ່ວໂລກ,ນັ້ນແມ່ນການສະແດງໃຫ້ເຫັນບົດບາດຂອງ ຫວຽດນາມ ໃນເວທີສາກົນ, ຕົວຢ່າງຄື: ການປ່ຽນແປງຂອງດິນຟ້າອາກາດ, ການຮັບມືກັບສິ່ງທ້າທາຍກ່ຽວກັບອາດຊະຍາກຳຂ້າມຊາດຄື: ໄພກໍ່ການຮ້າຍ, ຕ້ານການແຜ່ຂະຫຍາຍອາວຸດລ້າງຜານ. ນັ້ນແມ່ນບັນດາຂົງເຂດຊຶ່ງ EU ຕ້ອງການມີການຮ່ວມມືຈາກຝ່າຍຫວຽດນາມ.”
ເມື່ອຕີລາຄາກ່ຽວກັບແງ່ຫວັງການພົວພັນລະຫວ່າງ ຫວຽດນາມ ແລະ EU ພາຍຫລັງລົງນາມໃນສັນຍາ PCA, ທ່ານລັດຖະມົນຕີການຕ່າງປະເທດ ຫວຽດນາມ Pham Binh Minh ເນັ້ນຫນັກວ່າ: ສອງຝ່າຍລ້ວນແຕ່ມີຄວາມປະເອີບໃຈ ຍ້ອນຫລາຍເຫດຜົນ. ທີຫນຶ່ງແມ່ນ: ຍາມໃດ ການນຳຂັ້ນສູງສອງຝ່າຍ ກໍຖືການພັດທະນາການພົວພັນສອງຝ່າຍເປັນສຳຄັນ. ຄຽງຄູ່ກັນນັ້ນ ດ້ວຍທີ່ຕັ້ງບົດບາດດ້ານການເມືອງ ເສດຖະກິດສຳຄັນຂອງ ຫວຽດນາມ ໃນພາກພື້ນ, ເລື່ອງພັດທະນາການພົວພັນກັບ ຫວຽດນາມ ຈະສ້າງເງື່ອນໄຂສະດວກເພື່ອໃຫ້ EU ຊຸກຍູ້ການພົວພັນ ແລະ ເພີ່ມທະວີບົດບາດຢູ່ ພາກພື້ນອາຊີຕາເວັນອອກສຽງໃຕ້. ສິ່ງດັ່ງກ່າວຍິ່ງໄດ້ຮັບການປັບປຸງ ເມື່ອ ຫວຽດນາມ ດຳລົງຕຳແຫນ່ງເປັນປະທານ ອາຊຽນ ປີ 2010 ປະສົບຜົນສຳເລັດ ແລະ ວັນທີ 1/7 ຈະມາເຖິງ ຫວຽດນາມ ຈະເປັນປະເທດປະສານງານການພົວພັນລະຫວ່າງ ອາຊຽນ ແລະ EU ແລະ ດຳລົງຕຳແຫນ່ງເປັນເລຂາທິການໃຫຍ່ ອາຊຽນ ໃນປີ 2013. ເຫດຜົນຫນຶ່ງອີກ ນັ້ນແມ່ນຄວາມສາມາດບົ່ມຊ້ອນການຮ່ວມມືການຄ້າການລົງທຶນລະຫວ່າງສອງຝ່າຍ ຍັງໃຫຍ່ຫລວງຢູ່. ເຖິງວ່າ ໃນໄລຍະຜ່ານມາ ຫວຽດນາມ ແລະ EU ລ້ວນແຕ່ປະສົບກັບຄວາມຫຍຸ້ງຍາກກ່ຽວກັບເສດຖະກິດ ແຕ່ການຄ້າສອງສົ້ນລະຫວ່າງ ຫວຽດນາມ ແລະ EU ຍັງມີການເຕີບໂຕຢ່າງຕັ້ງຫນ້າ. ປີ 2011, ການຄ້າສອງສົ້ນ ຫວຽດນາມ ແລະ EU ບັນລຸກວ່າ 24 ຕື້ USD, ເພີ່ມຂຶ້ນກວ່າ 36% ເມື່ອທຽບໃສ່ປີ 2010. ເຖິງຢ່າງໃດກໍຕາມ, EU ຍັງແມ່ນຕະຫລາດໃຫຍ່ ແຕ່ການພົວພັນດ້ານການຄ້າກັບ ຫວຽດນາມ ບັນລຸພຽງກວ່າ 0,5% ມູນຄ່າການຄ້າສາກົນຂອງ EU. ເລື່ອງ ຫວຽດນາມ ແລະ EU ລົງນາມໃນສັນຍາ PCA ແລະ ເລີ່ມຕົ້ນການເຈລະຈາສັນຍາການຄ້າເສລີ (FTA) ຢ່າງເປັນທາງການ ຈະຊ່ວຍໃຫ້ສອງຝ່າຍຂຸດຄົ້ນຄວາມສາມາດບົ່ມຊ້ອນດ້ານເສດຖະກິດການຄ້າ ແລະ ການລົງທຶນຢ່າງມີປະສິດທິຜົນກວ່າ. ທ່ານ Franz Jessen ເອກອັກຄະລັດຖະທູດ, ຫົວຫນ້າຄະນະກຳມະການເອີລົບ ປະຈຳ ຫວຽດນາມ ຖືວ່າ:
“ໂດຍບໍ່ຫົວຊາຕໍ່ວິກິດການ, ເມື່ອຕີລາຄາກ່ຽວກັບການພົວພັນດ້ານການຄ້າສອງຝ່າຍ ຫວຽດນາມ ແລະ EU ບໍ່ຖືກຜົນສະທ້ອນປານໃດ. ແລະ ປີນີ້ ວົງເງິນການຄ້າສອງສົ້ນອາດຈະເພີ່ມຂຶ້ນຢ່າງກ້າວກະໂດດ. ສະນັ້ນ ຂ້າພະເຈົ້າຖືວ່າ: ການເຈລະຈາ FTA ບໍ່ພຽງແຕ່ນຳມາຊຶ່ງຜົນປະໂຫຍດໃຫ້ແກ່ ຫວຽດນາມ ເທົ່ານັ້ນ ຫາກ EU ກໍຈະໄດ້ຮັບຜົນດີອີກດ້ວຍ.”
ປະຈຸບັນ ພາຍຫລັງລົງນາມໃນສັນຍາ PCA ແລະ ເລີ່ມຕົ້ນການເຈລະຈາ FTA ລະຫວ່າງ ຫວຽດນາມ ແລະ EU, ສອງຝ່າຍພວມຮີບເຮັ່ງຜັນຂະຫຍາຍບາງເນື້ອໃນຄື: ເພີ່ມທະວີການຮ່ວມມືໃນບັນດາເວທີປາໄສສາກົນ ແລະ ພາກພື້ນ, ຊຸກຍູ້ EU ຮັບຮອງຂໍ້ກຳນົດເສດຖະກິດການຕະຫລາດໃຫ້ແກ່ ຫວຽດນາມ ໂດຍໄວ ແລະ ຮ່ວມມືໃນບັນດາຂົງເຂດອື່ນຄື: ການສຶກສາ ແລະ ບຳລຸງສ້າງ, ສິ່ງແວດລ້ອມ ແລະ ການປ່ຽນແປງຂອງດິນຟ້າອາກາດ, ພະລັງງານ, ສະກັດກັ້ນ ແລະ ບັນເທົາໄພທຳມະຊາດ. ສອງຝ່າຍກໍເຫັນດີຈະເພ່ີມທະວີການພົບປະ ແລະ ແລກປ່ຽນຄະນະຜູ້ແທນຂັ້ນສູງ,ໃນນັ້ນມີການຢ້ຽມຢາມຫວຽດນາມ ຢ່າງເປັນທາງການຂອງທ່ານ Herman Van Rompuy ປະທານສະພາເອີລົບ ໃນໄລຍະທ້າຍປີນີ້.
ເລື່ອງຜັນຂະຫຍາຍບັນດາເນື້ອໃນທີ່ບັນລຸໄດ້ໃນສັນຍາ PCA ໃນໄລຍະຈະມາເຖິງແນ່ນອນວ່າຈະປະສົບກັບສິ່ງທ້າທາຍຫລາຍຢ່າງ. ແຕ່ດ້ວຍຄວາມຕັດສິນໃຈດ້ານການເມືອງຢ່າງແຂງແຮງຂອງການນຳຂັ້ນສູງສອງຝ່າຍ, PCA ຈະແມ່ນປະຖົມປັດໃຈສຳຄັນ, ສ້າງກຳລັງຫນູນໃຫ້ແກ່ການພັດທະນາການພົວພັນສອງຝ່າຍ ຫວຽດນາມ ແລະ EU ເຂົ້າສູ່ລວງເລິກ, ແທດຈິງໃນທຸກຂົງເຂດໃນຊຸມປີຈະມາເຖິງ.