ປະທານາທິບໍດີອີຢິບ Mohamed Morsi ຕ້ອນຮັບປະທານາທິບໍດີອີຣານ Mahmoud Ahmadinejad (ພາບ : AP )
|
ກອງປະຊຸຸມສຸດຍອດຄັ້ງທີ່ 12 ຂອງອົງການອິດສະລາມ (OIC) ໄດ້ຖືກຈັດຂຶ້ນຢູ່ນະຄອນຫຼວງກາຍໂຣໃນວັນທີ 6 ແລະ 7/2. ພ້ອມກັບບັນດາເນື້ອໃນທີ່ນຳມາປຶກສາຫາລືທີ່ກອງປະຊຸມຄັ້ງນີ້, ຫາງສຽງຍັງສົນໃຈເປັນພິເສດເຖິງການຢ້ຽມຢາມ ອີຢິບຂອງປະທານາທິບໍດີອີຣານ Mahmoud Ahmadinejad, ເພາະວ່າ ນີ້ແມ່ນການຢ້ຽມຢາມອີຢິບເປັນຄັ້ງທຳອິດຂອງຜູ້ນຳປະເທດ ສ.ອິດສະລາມນີ້ນັບຕັ້ງແຕ່ປີ 1979ເປັນຕົ້ນມາ. ການຫຍັບມໍ່ເຂົ້າກັນລະຫວ່າງ 2 ປະເທດມະຫາອຳນາດຢູ່ຕາເວັນອອກກາງນີ້ ອາດຈະນາສັນຍານທີ່ຕັ້ງໜ້າມາສູ່ການສ້າງສັນຕິພາບໃນພາກພື້ນ.
ອີຣານ ແລະ ອີຢິບແມ່ນ 2 ປະເທດທີ່ມີຈຳນວນປະຊາກອນຫຼາຍກ່ວາໝູ່ໃນ ຢູ່ພາກພື້ນຕາເວັນອອກກາງ, ແຕ່ການພົວພັນລະຫວ່າງກາຍໂຣ ແລະ ເຕເຮຣານຖືກຕົກຢູ່ໃນສະພາບບໍ່ມີທາງອອກພາຍຫຼັງການປະຕິວັດອິດສະລາມປີ 1979. ໃນສະໄໝອະດີດປະທານາທິບໍດີ Hosni Mubarak, ການພົວພັນລະຫວ່າງ 2 ປະເທດໄດ້ປະສົບກັບຄວາມຫຍຸ້ງຍາກບໍ່ແມ່ນໜ້ອຍ. ອີຢິບແມ່ນປະເທດ ໂດຍຊາວມຸດສະລິມນິກາຍຊັນນີພວມມີທ່າດີນັ້ນ ຍາມໃດກໍສ້າງສາຍສຳພັນທະມິດກັບບັນດາປະເທດອາຣັບອື່ນໆເພື່ອເຮັດໃຫ້ອີຣານໂດຍ ໂດຍຊາວມຸດສະລິມນິກາຍຊີອະພວມມີທ່າດີ ຖືກຕົກຢູ່ໂດດດຽວ. ໃນຕະຫຼອດໄລຍະຍາວນານ, ອີຢິບໄດ້ກ່າວຫາອີຣານໜູນຫຼັງບັນດາມືປືນລຸກຮື້ຂຶ້ນທີ່ຂຶ້ນກັບກຸ່ມ Hezbollah ທີ່ມີກົນອຸບາຍດຳເນີນການເຄື່ອນໄຫວເປັນປໍລະປັກເພື່ອເຮັດໃຫ້ອີຢິບຂາດສະຖຽນລະພາບ ແລະ ຖືອີຣານແມ່ນປັດໄຈທຳລາຍຄວາມມີສະຖຽນລະພາບຢູ່ຕາເວັນອອກກາງ. ແຕ່ວ່ານັບຕັ້ງແຕ່ລະບອບຂອງ ອະດີດປະທານາທິບໍດີ Hosni Mubarak ພັງທະລາຍລົງ ແລະ ອົງການອ້າຍນ້ອງອິດສະລາມຂຶ້ນກຳອຳນາດຢູ່ປະເທດນີ້, ການພົວພັນລະຫວ່າງກາຍໂຣ ແລະ ເຕເຣຣານໄດ້ມີສັນຍານໄດ້ຮັບການປົວແປງໃຫ້ດີຂຶ້ນ. ເປັນຄັ້ງທຳອິດ ແມ່ນການຢ້ຽມຢາມອີຣານຂອງ ປະທານາທິບໍດີອີຢິບ Mohamed Morsi ເມື່ອເດືອນ 8 ປີກາຍນີ້ເພື່ອເຂົ້າຮ່ວມກອງປະຊຸມຂະບວນບໍ່ຮ່ວມກຸ່ມ. ໃນຈຸດເວລານັ້ນ, 2 ຝ່າຍໄດ້ຕົກລົງເປີດສະຖານທູດປະຈຳແຕ່ລະປະເທດຄືນໃໝ່. ກ່ຽວກັບບັນດາບັນຫາໃນພາກພື້ນ, ເຖິງວ່າ ຍັງມີບັນດາທັດສະນະທີ່ກົງກັນຂ້າມກັນຄືວິກິດການການເມືອງຢູ່ຊີຣີກໍຕາມ, ແຕ່ທັງກາຍໂຣ ແລະ ເຕເຣຣານລ້ວນແຕ່ມີບັນດາປະຕິກິລີຍາທີ່ລະມັດລະວັງທີ່ສຸດເພື່ອຫຼີກລ້ຽງເລື່ອງກໍ່ຜົນເສຍຫາຍຕໍ່ການພົວພັນ 2 ຝ່າຍຊຶ່ງ 2 ປະເທດພວມພະຍາຍາມຟື້ນຟູ. ໃນມໍ່ມານີ້, ທ່ານລັດຖະມົນຕີການຕ່າງປະເທດອີຣານ Ali Akbar Salehi ໄດ້ທຳການຢ້ຽມຢາມກາຍໂຣ ເພື່ອປຶກສາຫາລືບັນຫາຮ່ວມສຳພັນລະຫວ່າງຊາວມຸດສະລິມໃນພາກພື້ນ. ເປັນທີ່ຈະແຈ້ງແລ້ວວ່າ ນີ້ແມ່ນບັນດາສັນຍານອັນຕັ້ງໜ້າໃນການພົວພັນ 2 ຝ່າຍອີຣານ-ອີຢິບພາຍຫຼັງການພົວພັນທາງການທູດຖືກຕັດຕອນເປັນເວລາຍາວນານ.
ໃນສະພາບການດັ່ງກ່່າວ, ການຢ້ຽມຢາມ ອີຢິບ ຂອງປະທານາທິບໍດີອີຣານ Mahmoud Ahmadinejad ໄດ້ຮັບຄວາມສົນໃຈເປັນພິເສດຈາກຫາງສຽງໃນພາກພື້ນກໍຄືໃນໂລກ. ຕາມວົງການນັກໄຈ້ແຍກແລ້ວ, 2 ປະເທດມະຫາອຳນາດຢູ່ຕາເວັນອອກກາງນີ້ ມີເຫດຜົນຢ່າງພຽງພໍເພື່ອຫຍັບມໍ່ເຂົ້າກັນ. ກ່ອນອື່ນໝົດ ແມ່ນເລີ່ມມາຈາກເຈດຈຳນົງຂອງແຕ່ລະຝ່າຍ. ສຳລັບອີຣານ, ການຮ່ວມສຳພັນກັບອີຢິບ ຈະເປີດຊອງທາງໃຫ້ອີຣານໄດ້ເຊື່ອມໂຍງເຂົ້າກັບບັນດາປະເທດອາຣັບ ແລະ ຄວາມເຄັ່ງຕຶງລະຫວ່າງ 2 ກຸ່ມຊາວມຸດສະລິມນິກາຍຊັນນີ ແລະ ຊາວມຸດສະລິມນິກາຍຊີອະ ຜ່ອນຄາຍລົງ. ການສ້າງສາຍພົວພັນທີ່ສະໜິດຕິດພັນກ່ວາກັບອີຢິບ ຍັງເປັນການຊ່ວຍໃຫ້ອີຣານຫຼຸດຜ່ອນສະພາບຕົກຢູ່ໂດດດຽວຕໍ່ໜ້າຄຳສັ່ງຂວ້ຳບາດລົງໂທດຂອງອາເມລິກາ , ຝ່າຍຕາເວັນຕົກ ແລະ ບັນດາປະເທດໃນພາກພື້ນ. ພິເສດ, ຕໍ່ໜ້າປະເທດອິດສະຣາແອນ ຊຶ່ງພວມຮັບຖືວ່າ ແມ່ນສັດຕູອັນດັບໜຶ່ງຂອງ ບັນດາປະເທດອາຣັບຢູ່ຕາເວັນອອກກາງນັ້ນ, ເຕເຣຣານຍິ່ງຕັດສິນໃຈປັດເຂ່ຍທຸກສິ່ງກີດຂວາງເພື່ອຟື້ນຟູການພົວພັນທາງການທູດກັບ ກາຍໂຣ.
ສຳລັບ ອີຢິບ, ຮູບພາບປະເທດໜຶ່ງທີ່ພວມຕົກຢູ່ໃນສະພາບຂາດສະຖຽນລະພາບທາງດ້ານການເມືອງ ແລະ ບັນດາເຫດການແຫ່ຂະບວນປະທ້ວງ, ກໍ່ການຈະລາຈົນໄດ້ເຮັດໃຫ້ທີ່ຕັ້ງບົດບາດຂອງປະເທດນີ້ໃນພາກພື້ນຫຼຸດລົງຫຼາຍ. ເພາະສະນັ້ນ ເພື່ອກັບຄືນສູ່ບົດບາດທີ່ສຳຄັນ ແລະ ປົວແປງທີ່ຕັ້ງຂອງຕົນໃນພາກພື້ນ, ບໍ່ມີທາງເລືອກອື່ນແມ່ນຕ້ອງຫັນບັນດາການພົວພັນໃນພາກພື້ນເປັນຫຼາຍຮູບຫຼາຍແບບ, ຮັກສາ ການພົວພັນກັບບັນດາປະເທດໃຫຍ່, ໃນນັ້ນມີ ອີຣານ. ການຮ່ວມມືຢ່າງແໜ້ນແຟ້ນກັບອີຣານ ຈະເປີດຊອງທາງໃຫ້ແກ່ ອີຢິບ ກາຍເປັນສ່ວນໜຶ່ງໃນທ່າດຸນດຽງດ້ານການເມືອງໃນພາກພື້ນ, ຫຼຸດຜ່ອນການເພິ່ງພາອາໄສອາເມລິກາ. ຍິ່ງໄປກ່ວານັ້ນ, ການພົວພັນລະຫວ່າງອິດສະຣາແອນ-ອີຢິບໃນປະຈຸບັນ ກໍບໍ່ສະດວກປານໃດຍ້ອນບັນດາຄວາມບໍ່ລົງລອຍກັນທີ່ກ່ຽວຂ້ອງເຖິງການປະກົດຕົວຂອງກຳລັງທະຫານເພື່ອປາບປາມພວກກະບົດຢູ່ແຫຼມ Sinai, ຊຶ່ງກໍ ແມ່ນປັດໄຈສົ່ງຜົນກະທົບເພື່ອໃຫ້ ກາຍໂຣ ແລະ ເຕເຣຣານຫຍັບມໍ່ເຂົ້າກັນ.
ການຢ້ຽມຢາມ ອີຢິບຂອງປະທານາທິບໍດີອີຣານ Mahmoud Ahmadinejad ບໍ່ພຽງແຕ່ສ້າງກາລະໂອກາດເພື່ອຊຸກຍູ້ການພົວພັນລະຫວ່າງ 2 ປະເທດມະຫາອຳນາດຢູ່ຕາເວັນອອກກາງເທົ່ານັ້ນ, ຫາກຍັງສົ່ງສັນຍານທີ່ປະເອີບໃຈເພື່ອສ້າງສະຖຽນລະພາບດ້ານການເມືອງຢູ່ແຕ່ລະປະເທດໃນພາກພື້ນ. ການຈັບມືທີ່ມີຄວາມອົບອຸ່ນລະຫວ່າງ ກາຍໂຣ ແລະ ເຕເຣຣານ ພາຍຫຼັງຖືກຕັດຕອນເປັນເວລາຍາວນານນັ້ນ ແມ່ນສັນຍານອັນຕັ້ງໜ້າ, ໝາຍໝັ້ນໃຫ້ມີພື້ນຖານສັນຕິພາບ, ຄວາມວັດທະນາຖາວອນໃນພາກພື້ນທີ່ພວມຮ້ອນເຮັ່ງນີ້.