ພາຍຫຼັງປະຕິບັດມາເປັນເວລາກວ່າໜຶ່ງເດືອນ, ສັນຍາຢຸດຍິງຢູ່ຢູແກຼນໄດ້ຊ່ວຍ ຫຼຸດຜ່ອນຄວາມເຄັ່ງຕຶງໃນການສູ້ຮົບລະຫວ່າງກອງທັບລັດຖະບານ ແລະ ກຳລັງແຍກຕົວ. ແຕ່ບັນດາກໍລະນີລະເມີດ ສັນຍາຢຸດຍິງຍັງຄົງສືບຕໍ່ເກີດຂຶ້ນ, ພ້ອມກັບບັນດາການກະທຳໃໝ່ຈາກອຳນາດການປົກຄອງກີແອບ ພວມນາບຂູ່ປົກຄຸມ ດ້ວຍເງົາມືດໄປທົ່ວແຜນການຟື້ນຟູສັນຕິພາບຢູ່ພາກຕາເວັນອອກທີ່ຂາດສະຖຽນລະພາບນີ້. ຕໍ່ໄປນີ້, ພວກເຮົາມີບົດຂຽນຂອງນັກຂ່າວ ແອງຮ່ວຽນທີ່ພາດຫົວຂໍ້ວ່າ : “ສັນຕິພາບຢູ່ຢູແກຼນຍັງຄົງຢູ່ທາງໜ້າ” .
ສັນຍາຢຸດຍິງຢູ່ຢູແກຼນໄດ້ຮັບການລົງນາມລະຫວ່າງລັດຖະບານກີແອບ ແລະ ກຳລັງລຸກຮື້ຂຶ້ນເມື່ອວັນທີ 5/9 ຢູ່ມິນ. ສັນຍາຢຸດຍິງສະບັບນີ້ກໍໄດ້ຮັບການເພີ່ມທະວີດ້ວຍຂໍ້ຕົກລົງກັນເມື່ອວັນທີ 19/9 ແນໃສ່ສ້າງຕັ້ງເຂດປອດການທະຫານ. ແຕ່ນັບຕັ້ງແຕ່ເວລານັ້ນ, ທັງ 2 ຝ່າຍລ້ວນແຕ່ຕຳໜິຊຶ່ງກັນ ແລະ ກັນກ່ຽວກັບການລະເມີດບັນດາມາດຕາຂອງສັນຍາ. ເຖິງວ່າສະໜາມຮົບໄດ້ສະຫງົບງຽບນັບແຕ່ຕົ້ນເດືອນ 10 ກໍຕາມ, ແຕ່ຈຳນວນຜູ້ຮັບບາດເຈັບລົ້ມຕາຍທີ່ສະຫະປະຊາຊາດຍົກອອກມາເມື່ອວັນທີ 7/10 ແມ່ນໄດ້ສ່ອງແສງເຖິງຫຼາຍສິ່ງຫຼາຍຢ່າງ. ຕາມຕົວເລກສະຖີຕິຫຼ້າສຸດຂອງ ສະຫະປະຊາຊາດແລ້ວ, ຈຳນວນຜູ້ເສຍຊີວິດຍ້ອນການປະທະກັນທີ່ແ່ກຍາວ 2-3 ເດືອນທີ່ຜ່ານມາຢູ່ ຢູແກຼນ ແມ່ນ 3660 ຄົນ, ໃນນັ້ນ,ມີ 330 ຄົນເສຍຊີວິດພາຍຫຼັງທີ່ ສັນຍາຢຸດຍິງໄດ້ຮັບການລົງນາມ.
ປະທານາທິບໍດີ ຢູແກຼນ Petro Poroshenko
photo:TTXVN
|
ປະຊາຄົມໂລກມານະພາຍາມກອບກູ້ເອົາສັນຍາສັນຕິພາບ.
ເພື່ອແນໃສ່ ກອບກູ້ເອົາສັນຍາສັນຕິພາບຕໍ່ໜ້າໄພລົ້ມລະລາຍ, ລັດຖະມົນຕີການຕ່າງປະເທດອາເມລິກາ John Kerry ໄດ້ມີການເຈລະຈາທາງໂທລະສັບກັບ ລັດຖະມົນຕີການຕ່າງປະເທດລັດເຊຍ Lavrov ເພື່ອປຶກສາຫາລືສະພາບການພາກຕາເວັນອອກ ຢູແກຼນ. ທາງຝ່າຍລັດເຊຍ, ປະເທດນີ້ຢືນຢັນວ່າ ພວມເຮັດທຸກສິ່ງທຸກຢ່າງເທົ່າທີ່ສາມາດປະຕິບັດໄດ້ເພື່ອຮັບປະກັນ ສັນຍາຢຸດຍິງຢູ່ຢູແກຼນ.
ຢູແກຼນ, ລັດເຊຍ ແລະ ອົງການປ້ອງກັນຄວາມສະຫງົບ ແລະ ຮ່ວມມືເອີລົບ (OSCE) ໄດ້ສ້າງຕັັ້ງສູນຮ່ວມແຫ່ງຫນຶ່ງ, ສົມທົບບັນດາຄວາມມານະພະຍາຍາມ ເພື່ອຕິດຕາມສັນຍາຢຸດຍິງທີ່ບັນລຸໄດ້. ຫນ້າທີ່ຂອງກຸ່ມນີ້ ແມ່ນເພື່ອຫລຸດຜ່ອນຄວາມເຄັ່ງຕຶງໃນພາກພື້ນ, ຮັບປະກັນການຄວບຄຸມ ບັນດາສັນຍາທີ່ບັນລຸໄດ້ ຢ່າງມີປະສິດທິຜົນ, ສ້າງຕັ້ງບັນດາຫົວຫນ່ວຍຄວບຄຸມຢູ່ເຂດຊາຍແດນ ລະຫວ່າງ ລັດເຊຍ ແລະ ຢູແກຼນ. ປະຈຸບັນ ເຢຍລະມັນ ພວມຄິດໄລ່ຊັ່ງຊາເຖິງເລື່ອງສົ່ງກຳລັງທະຫານໄປເຖິງພາກຕາເວັນອອກ ຢູແກຼນ ເພື່ອຕິດຕາມກວດກາສັນຍາຢຸດຍິງ. ຄຽງຄູ່ກັນນັ້ນ ເລື່ອງຮັບປະກັນສັນຍາຢຸດຍິງ ສືບຕໍ່ມີຜົນສັກສິດຢູ່ ຢູແກຼນ, ບັນດາປະເທດ ກໍພວມຕັ້ງຫນ້າປະຕິບັດບັນດາການເຄື່ອນໄຫວມະນຸດສະທຳ ເພື່ອຫນູນຊ່ວຍປະຊາຊົນພາກຕາເວັນອອກ ຢູແກຼນ.
ຜົນປະໂຫຍດດ້ານການເມືອງພາຍຫລັງສັນຍາຢຸດຍິງ
ໃນຂະນະບັນດາຄວາມມານະພະຍາຍາມດ້ານການທູດພວມດຳເນີນຢ່າງຮີບເຮັ່ງນັ້ນ ມີນັກໄຈ້ແຍກຫລາຍທ່ານພັດຮູ້ສຶກບໍ່ປະເອີບໃຈປານໃດ. ຕາມຂ້າພະເຈົ້າແລ້ວ, ສັນຍາຢຸດຍິງ ຢູ່ພາກຕາເວັນອອກ ຢູແກຼນ ຍາກທີ່ຮັກສາໄດ້. ເພາະວ່າ ຄວາມຈິງ ສັນຍາຢຸດຍິງພຽງນຳມາເຊິ່ງຜົນປະໂຫຍດດ້ານການເມືອງໃຫ້ແກ່ອຳນາດການປົກຄອງ Kiev ແລະ ຝ່າຍຕາເວັນຕົກ.
ໃນສະພາວະ ການເລືອກຕັ້ງສະພາແຫ່ງຊາດ ຢູແກຼນ ໃກ້ຈະດຳເນີນນັັ້ນ, ແນ່ນອນວ່າ ທ່ານ ປະທານາທິບໍດີ ຢູແກຼນ Petro Poroshenko ຢາກດຶງດູດບັດສະຫນັບສະຫນູນຈາກຜູ້ມີສິດເລືອກຕັ້ງຫລາຍກວ່າ ດ້ວຍວິທີສ້າງຄວາມປະທັບໃຈກ່ຽວກັບພື້ນຖານສັນຕິພາບຂອງປະເທດຊາດ. ສ່ວນບັນດາປະເທດ ສະຫະພາບເອີລົບ ກໍຢາກອີງໃສ່ສັນຍາຢຸດຍິງ ຫາກບໍ່ຢາກເຮັດໃຫ້ການພົວພັນກັບລັດເຊຍ ຖືກຕົກເຂົ້າສູ່ສະພາບຈົນຕາແຈຕື່ມອີກ ເພາະວ່າ ລັດເຊຍ ແມ່ນປະເທດສະຫນອງ ອາຍແກສ ຕົ້ນຕໍໃຫ້ແກ່ເຂົາເຈົ້າ ເມື່ອລະດູຫນາວ ໃກ້ວຽນມາແລ້ວ. ບັນດາພັກຝ່າຍຄ້ານ ຢູແກຼນ ໄດ້ຕຳຫນີຕິຕຽນກ່ຽວກັບປະສິດທິຜົນສັນຍາຢຸດຍິງດັ່ງກ່າວ. ທ່ານນາງ Yulia Timoshenko, ອະດີດນາຍົກລັດຖະມົນຕີ ຢູແກຼນ ໃຫ້ຮູ້ວ່າ: ທ່ານນາງເອງ ບໍ່ເຊື່ອໝັັ້ນຕໍ່ແຜນການສັນຕິພາບຂອງທ່ານ Porosshenko ຢູ່ພາກຕາເວັນອອກ ຢູແກຼນ ແລະ ຖື ບັນດາການເຈລະຈາ 3 ຝ່າຍ ຢູ່ Minsk ແມ່ນການຫລອກລວງ.
ໄພເກີດການປະທະກັນຄັ້ງໃຫຍ່ຢູ່ ຢູແກຼນ
ປະຈຸບັນ ບັນດາຄວາມສັບສົນວຸນວາຍ ຢູ່ ຢູແກຼນ ພວມນາບຂູ່ເຖິງການເລືອກຕັ້ງສະພາແຫ່ງຊາດຢູແກຼນ ໃນວັນທີ 26/10 ຈະມາເຖິງ. ການຈັດຕັັ້ງປ່ອນບັດເລືອກຕັ້ງຢູ່ບັນດາເຂດ ໂດຍກຳລັງຝ່າຍຄ້ານຢູ່ພາກຕາເວັນອອກ ຄວບຄຸມ ຈະດຳເນີນໄປຄືແນວໃດ. ອຳນາດການປົກຄອງສູນກາງ ກີແອບຢືນຢັນວ່າ ການເລືອກຕັ້ງໃນວັນທີ 26/10 ໄດ້ດຳເນີນຢູ່ 11 ຂົງເຂດຂອງແຂວງ Donetsk ແລະ 4 ຂົງເຂດທີ່ຂຶ້ນກັບແຂວງ Lugansk . ໃນຂະນະນັ້ນ, ກຳລັງຝ່່າຍຄ້າຍຢູ່ Lugansk ແລະ Donetsk ໄດ້ປະກາດປະຕິເສດການເລືອກຕັ້ງ, ແລະ ຈັດຕັ້ງການເລືອກຕັ້ງສະເພາະດ້ວຍຕົນເອງໃນວັນທີ 2/11ເພື່ອເລືອກຕັ້ງການນຳທ້ອງຖິ່ນ ແລະ ບັນດາອົງການສຳນັກງານນິຕິບັນຍັດ. ປະທານາທິບໍດີ ຢູແກຼນ Poroshenko ໄດ້ຮຽກຮ້ອງລັດເຊຍ ແລະ ໂລກບໍ່ຮັບຮູ້ການເລືອກຕັ້ງທ້ອງຖິ່ນໂດຍກຸ່ມຝ່າຍຄ້ານປະຕິບັດ.
ມີວິທີການແກ້ໄຂອັນສຳຄັນເພື່ອຫຼຸດຜ່ອນຄວາມເຄັ່ງຕຶງໃນປະຈຸບັນ ແມ່ນການສົນທະນາລະຫວ່າງຜູ້ຕາງໜ້າອຳນາດການປົກຄອງ ຢູແກຼນ ແລະ ສ. ປະຊາຊົນ Donetsk ແລະ Lugansk ໂດຍຂະໜານນາມເອງ, ໃນນັ້ນ, OSCE ສວມບົດບາດເປັນກາງ, ຄວນຖືກຈັດຕັ້ງໂດຍໄວ. ແຕ່ບັນດາການຜັນແປໃນປະຈຸບັນ ແມ່ນບໍ່ນຳມາເຊິ່ງຄວາມຫວັງ ແລະ ໄພເກີດການປະທະກັນຄັ້ງໃໝ່ຢູ່ ຢູແກຼນ ແມ່ນອາດຈະເປັນໄປໄດ້. /.