(vovworld) - ວັນທີ 10/12/2012, ແມ່ນວັນສ້າງຕັ້ງສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 ຄົບຮອບ 30 ປີ. ເນື່ອງໃນໂອກາດນີ້, ທ່ານ ໂຮ່ຊວນເຊີນ ຮອງລັດຖະມົນຕີການຕ່າງປະເທດ ຫວຽດນາມ, ຫົວຫນ້າຄະນະກຳມະການຊາຍແດນແຫ່ງຊາດ, ສັງກັດກະຊວງການຕ່າງປະເທດ ຫວຽດນາມ ມີບົດຂຽນພາຍໃຕ້ຫົວຂໍ້ວ່າ: ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 ລັດຖະທຳມະນູນມະຫາສະມຸດ ໃນນັ້ນຊີ້ແຈງຄຸນຄ່າຂອງສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 ແລະ ການປະຕິບັດ, ຄວາມຮັບຜິດຊອບຂອງຫວຽດນາມ ເມື່ອປະຕິບັດສົນທິສັນຍາສະບັບດັ່ງກ່າວ.
ທ່ານ ໂຮ່ຊວນເຊີນ ຮອງລັດຖະມົນຕີການຕ່າງປະເທດ ຫວຽດນາມ
ພາບ: internet
|
ທ່ານ ໂຮ່ຊວນເຊີນ ຮອງລັດຖະມົນຕີການຕ່າງປະເທດ ຫວຽດນາມ ໃຫ້ຮູ້ວ່າ: ກ່ອນນີ້ 30 ປີເຕັມ, ສົນທິສັນຍາ ສປຊ ກ່ຽວກັບກົດໝາຍ ວ່າດ້ວຍທະເລປີ 1982 (UNCLOS 1982), ໄດ້ຮັບການລົງນາມ ຈາກ 107 ປະເທດ ທີ່ອ່າວ Montego ຂຶ້ນກັບ Jamaica, ໃນນັ້ນ ມີ ຫວຽດນາມ ເປັນຂີດໝາຍແຫ່ງຜົນສຳເລັດຂອງກອງປະຊຸມ ສປຊ ກ່ຽວກັບກົດໝາຍວ່າດ້ວຍທະເລຄັ້ງທີ 3 ໂດຍມີການເຂົ້າຮ່ວມຂອງກວ່າ 150 ປະເທດ ແລະ ອົງການຈັດຕັ້ງສາກົນຫລາຍແຫ່ງ ນັບທັງອົງການຈັດຕັ້ງສາກົນບໍ່ຂຶ້ນກັບລັດຖະບານ. ສົນທິສັນຍາ ສປຊ ກ່ຽວກັບກົດໝາຍ ວ່າດ້ວຍທະເລປີ 1982 (ເອີ້ນຫຍໍ້ວ່າ ສົນທິສັນຍາ) ແມ່ນເອກະສານສາກົນຫລາຍຝ່າຍທີ່ອຸດົມສົມບູນ ລວມມີ 320 ຂໍ້ມາດຕາ ແລະ ເອກະສານເພີ່ມເຕີມ 9 ສະບັບ. ສົນທິສັນຍາມີຜົນສັກສິດນັບແຕ່ວັນທີ 16/11/1994 ເປັນຕົ້ນໄປ ແລະ ກາຍເປັນຫນຶ່ງໃນບັນດາສົນທິສັນຍາສາກົນຫລາຍຝ່າຍທີ່ສຳຄັນກວ່າໝູ່ຂອງສັດຕະວັດທີ 20 ແລະ ແມ່ນສົນທິສັນຍາສາກົນທົ່ວໄປ ດ້ວຍ 164 ປະເທດສະມາຊິກ ໄລ່ມາຮອດປະຈຸບັນ. ທ່ານຮອງລັດຖະມົນຕີ ໂຮ່ຊວນເຊີນ ຊີ້ແຈງວ່າ: ສົນທິສັນຍາກົດໝາຍວ່າດ້ວຍທະເລປີ 1982 ກຳນົດ ບັນຫາກ່ຽວຂ້ອງທັງໝົດເຖິງບັນດາເຂດທະເລຂອງບັນດາປະເທດແຄມທະເລກໍ່ຄືບັນຫາຕ່າງໆທີ່ກ່ຽວຂ້ອງເຖິງການນຳໃຊ້, ຂຸດຄົ້ນເຂດທະເລສາກົນ ແລະ ທ້ອງມະຫາສະມຸດ. ບັນດາບັນຫາພື້ນຖານໄດ້ນຳເຂົ້າເນື້ອໃນສົນທິສັນຍາ ນັ້ນແມ່ນ: ກົດລະບຽບນິຕິກຳຂອງບັນດາເຂດທະເລຂຶ້ນກັບອະທິປະໄຕ, ສິດອະທິປະໄຕ ແລະ ສິດຕັດສິນສະເພາະຂອງບັນດາປະເທດ ຊຶ່ງລວມມີ: ເຂດທະເລພາຍໃນ, ນ່ານທະເລ, ເຂດເຊື່ອມຕໍ່ນ່ານທະເລ, ເຂດເສດຖະກິດພິເສດ ແລະ ໄຫລ່ທະວີບ; ລະບອບດ້ານນິຕິກຳຂອງເຂດທະເລສາກົນ ແລະ ທ້ອງມະຫາສະມຸດ ມໍລະດົກລວມຂອງມວນມະນຸດ; ການນຳໃຊ້ ແລະ ຄຸ້ມຄອງຊັບພະຍາກອນທະເລ, ບັນຫາປົກປັກຮັກສາສິ່ງແວດລ້ອມທະເລ, ການຄົ້ນຄ້ວາວິທະຍາສາດທະເລ, ຄວາມໝັ້ນຄົງຄວາມເປັນລະບຽບຮຽບຮ້ອຍບົນທະເລ.
ຕາມທ່ານຮອງລັດຖະມົນຕີ ໂຮ່ຊວນເຊີນ ແລ້ວ, ຫວຽດນາມ ແມ່ນຫນຶ່ງໃນຈຳນວນ 107 ປະເທດທີ່ລົງນາມສົນທິສັນຍາ. ວັນທີ 23/6/1994, ສະພາແຫ່ງຊາດ ຫວຽດນາມ ໄດ້ອອກມະຕິກ່ຽວກັບການໃຫ້ສັດຕະຍາບັນເອກະສານດ້ານນິຕິກຳສຳຄັນນີ້. ຂໍ້ທີ1 ຂອງມະຕິໄດ້ຊີ້ແຈງວ່າ: “ດ້ວຍການໃຫ້ສັດຕະຍາບັນສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982, ສສ ຫວຽດນາມ ສະແດງຄວາມຕັດສິນໃຈພ້ອມກັບປະຊາຄົມໂລກສ້າງກົດໝາຍຢ່າງຍຸຕິທຳ, ສົ່ງເສີມການພັດທະນາ ແລະ ການຮ່ວມມືບົນທະເລ.” ເລື່ອງ ຫວຽດນາມ ກາຍເປັນສະມາຊິກ ສົນທິສັນຍາແມ່ນມີຄວາມໝາຍອັນໃຫຍ່ຫລວງ ເພາະວ່າ ສົນທິສັນຍາສະບັບນີ້ແມ່ນພື້ນຖານດ້ານນິຕິກຳສາກົນໂດຍກຳນົດບັນດາເຂດທະເລ, ເຂດເສດຖະກິດພິເສດ ແລະ ໄຫລ່ທະວີບຂອງ ຫວຽດນາມ ກໍ່ຄືບັນດາສິດ ແລະ ຜົນປະໂຫຍດອັນຊອບທຳຂອງ ຫວຽດນາມ ບົນທະເລ. ເລື່ອງ ເຂົ້າຮ່ວມສົນທິສັນຍາແມ່ນຫັນພື້ນຖານດ້ານນິຕິກຳສາກົນກ່ຽວກັບຂອບເຂດບັນດາເຂດທະເລ, ເຂດເສດຖະກິດພິເສດ ແລະ ໄຫລ່ທະວີບຂອງຫວຽດນາມ ຢ່າງເປັນທາງການ. ເຂົ້າຮ່ວມສົນທິສັນຍາ, ຫວຽດນາມ ໄດ້ຮັບການຮັບຮູ້ຈາກສາກົນ ແມ່ນປະເທດທີ່ມີນ່ານທະເລ ມີ12 ໄມທະເລ, ມີເຂດເສດຖະກິດພິເສດດ້ວຍ 200 ໄມທະເລ, ໄຫລ່ທະວີບມີລວງກວ້າງຢ່າງຫນ້ອຍສຸດ 200 ໄລທະເລ ແລະ ສາມາດເປີດກວ້າງເຖິງ 350 ໄມທະເລ ໄລ່ຈາກເສັ້ນພື້ນຖານ. ສົນທິສັນຍາຍັງແມ່ນພື້ນຖານດ້ານນິຕິກຳສາກົນເພື່ອແບ່ງກຳນົດເຂດທະເລທັບຊ້ອນກັນລະຫວ່າງ ຫວຽດນາມ ກັບບັນດາປະເທດແຄມທະເລຕາເວັນອອກ, ປະກອບສ່ວນສ້າງສະພາບແວດລ້ອມເປັນປົກກະຕິ, ສັນຕິພາບ, ການຮ່ວມມື ແລະ ພັດທະນາໃນພາກພື້ນ.
ທ່ານຮອງລັດຖະມົນຕີ ໂຮ່ຊວນເຊີນ ໃຫ້ຮູ້ວ່າ: ໃນຊຸມປີຜ່ານມາ, ຫວຽດນາມ ໄດ້ນຳໃຊ້ສົນທິສັນຍາ, ດຳເນີນການເຈລະຈາ, ແບ່ງກຳນົດເຂດທະເລ ແລະ ໄຫລ່ທະວີບທັບຊ້ອນກັນລະຫວ່າງ ຫວຽດນາມ ກັບບັນດາປະເທດໃນເຂດທະເລຕະເວັນອອກຄື: ແບ່ງກຳນົດຊາຍແດນທະເລກັບໄທ(ປີ 1997); ແບ່ງກຳນົດຊາຍແດນເຂດທະເລ, ເຂດເສດຖະກິດພິເສດ ແລະ ໄຫລ່ທະວີບໃນອ່າວພາກເຫນືອ ກັບ ຈີນ (ປີ 2000), ແບ່ງກຳນົດເຂດຊາຍແດນໄຫລ່ທະວີບກັບ ອິນໂດເນເຊຍ (ປີ 2003). 18 ປີພາຍຫລັງໃຫ້ສັດຕະຍາບັນສົນທິສັນຍາດັ່ງກ່າວ, ວັນທີ 21/6 ຜ່ານມາ, ທີ່ກອງປະຊຸມສະໄຫມສາມັນເທື່ອທີ 3, ສະພາແຫ່ງຊາດ ຫວຽດນາມ ໄດ້ຮັບຮອງເອົາກົດໝາຍວ່າດ້ວຍທະເລ ຫວຽດນາມ. ເປັນຄັ້ງທຳອິດ, ກົດໝາຍວ່າດ້ວຍທະເລ ຫວຽດນາມ ໄດ້ກຳນົດລະບອບດ້ານ ນິຕິກຳຂອງບັນດາເຂດທະເລ, ໝູ່ເກາະຂຶ້ນກັບອະທິປະໄຕ, ສິດອະທິປະໄຕ ແລະ ສິດຕັນສິນສະເພາະຂອງຫວຽດນາມ ຕາມເນື້ອໃນຂອງສົນທິສັນຍາຢ່າງຄົບຖ້ວນ. ກົດໝາຍວ່າດ້ວຍທະເລ ຫວຽດນາມ ແມ່ນພື້ນຖານສຳຄັນເພື່ອເປັນເອກະພາບໃນການຄຸ້ມຄອງ, ນຳໃຊ້, ປົກປັກຮັກສາ ແລະ ພັດທະນາເສດຖະກິດທະເລ, ໝູ່ເກາະຂອງ ຫວຽດນາມ. ຜ່ານການຮັບຮອງເອົາກົດໝາຍທະເລ ຫວຽດນາມ, ຫວຽດນາມ ໄດ້ເຮັດໃຫ້ໂລກເຫັນໄດ້ຢ່າງຈະແຈ້ງວ່າ ຫວຽດນາມ ແມ່ນສະມາຊິກມີຄວາມຮັບຜິດຊອບໃນປະຊາຄົມໂລກ, ຍາມໃດກໍ່ປະຕິບັດຕາມ ແລະ ເຄົາລົບກົດໝາຍສາກົນ, ສະແດງໃຫ້ເຫັນຄວາມຕັດສິນໃຈຂອງລັດ ຫວຽດນາມ ແມ່ນສູ້ຊົນເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຂອງພາກພື້ນ ແລະ ໃນໂລກ.
ໃນຊຸມປີມໍ່ໆມານີ້, ສະພາບການຢູ່ທະເລຕາເວັນອອກໄດ້ຜັນແປໄປຢ່າງສັບສົນ, ແຜນນະໂຍາຍຂອງພັກ ແລະ ລັດ ຫວຽດນາມ ແມ່ນເຄົາລົບ ແລະ ປະຕິບັດຕາມ ສົນທິສັນຍາ, ໝູນໃຊ້ ສົນທິສັນຍາເພື່ອແກ້ໄຂການພິພາດບົນທະເລຕາເວັນອອກ ໂດຍສັນຕິວິທີບົນພື້ນຖານເຄົາລົບເອກະລາດ, ອະທິປະໄຕ ແລະ ຜືນແຜນດິນອັນຄົບຖ້ວນກໍຄືເຄົາລົບຜົນປະໂຫຍດຂອງບັນດາປະເທດກ່ຽວຂ້ອງ. ໃນຂະນະຊອກຫາມາດຕະການພື້ນຖານຍາວນານໃຫ້ແກ່ບັນຫາທະເລຕາເວັນອອກ, ບັນດາຝ່າຍກ່ຽວຂ້ອງຄວນລະງັບໃຈ, ບໍ່ມີການກະທຳໃດໆເພື່ອເຮັດໃຫ້ສະພາບການສັບສົນຂຶ້ນຕື່ມ, ສອດຄ່ອງກັບບັນດາການກຳນົດຂອງສົນທິສັນຍາ. ຫວຽດນາມ ຢືດໝັ້ນແນວທາງການຕ່າງປະເທດເອກະລາດ, ເປັນເຈົ້າ, ຫັນການພົວພັນເປັນຫລາຍຮູບຫລາຍແບບ ແລະ ຫລາຍຝ່າຍ, ຕໍ່ສູ້ປົກປັກຮັກສາອະທິປະໄຕທະເລ, ໝູ່ເກາະ ດ້ວຍກຳລັງແຮງສັງລວມ, ຢືດໝັ້ນແກ້ໄຂການພິພາດທະເລຕາເວັນອອກ ແລະ ບັນດາບັນຫາເກີດຂຶ້ນບົນທະເລໂດຍສັນຕິວິທີ ບົນພື້ນຖານກົດໝາຍສາກົນ, ພິເສດ ແມ່ນ ສົນທິສັນຍາກົດໝາຍວ່າດ້ວຍທະເລປີ 1982, ຫວຽດນາມ ໄດ້ ແລະ ພວມສະແດງໃຫ້ເຫັນແມ່ນສະມາຊິກມີຄວາມຮັບຜິດຊອບຂອງສົນທິສັນຍາ, ຕັ້ງຫນ້າໝູນໃຊ້ສົນທິສັນຍາເພື່ອສ້າງນິຕິກຳຢ່າງຍຸຕິທຳ, ຮັບປະກັນສິດ ແລະ ຜົນປະໂຫຍດອັນຊອບທຳຂອງປະຊາຊາດຕ່າງໆ.