( vovworld ) – ຫວຽດນາມ ພວມດຳເນີນວຽກງານສະຫລຸບການປະຕິບັດລັດຖະທຳມະນູນປີ 1992 (ຊື່ງໄດ້ຮັບການປັບປຸງ, ເພີ່ມເຕີມບາງຂໍ້ມາດຕາໃນປີ 2001) ແລະ ດຳເນີນການປັບປຸງ, ເພີ່ມເຕີມລັດຖະທຳມະນູນຕາມເນື້ອໃນຈິດໃຈມະຕິກອງປະຊຸມໃຫ່ຍຄັ້ງທີ 11 ຂອງພັກກອມມູນິດຫວຽດນາມ. ຮ່າງລັດຖະທຳມະນູນສະບັບປັບປຸງ ໂດຍຮຽບຮຽງປັບປຸງລັດຖະທຳມະນູນປີ 1992 ເປັນຜູ້ກະກຽມ, ຈະຍື່ນຕໍ່ສະພາແຫ່ງຊາດເປັນຄັ້ງທຳອິດໃນສະໄໝປະຊຸມທ້າຍປີນີ້. ຕໍ່ໄປເຊີນແມ່ນບົດຂຽນຂອງນັກຂ່າວ Thu Hoa ທີ່ພາດຫົວເລື່ອງວ່າ: ສືບຕໍ່ສ້າງຮ່າງລັດຖະທຳມະນູນປີ 1992 ສະບັບປັບປຸງໃຫ້ສົມບູນແບບ
ຢູ່ຫວຽດນາມ, ການປັບປຸງ, ເພີ່ມເຕີມລັດຖະທຳມະນູນປີ 1992 ໄດ້ດຳເນີນໄປຕາມຫຼັກການເອກະພາບ, ສືບຕໍ່ສືບທອດບັນດາຂໍ້ກຳນົດຂອງລັດຖະທຳມະນູນປີ 1992 ແລະ ລັດຖະທຳມະນູນສະບັບກ່ອນທີ່ຍັງເໝາະສົມ. ວິວັດການປັບປຸງ, ເພີ່ມເຕີມລັດຖະທຳມະນູນປີ 1992 ຖືກຮັກສາຕາມຫຼັກການລວມສູນປະຊາທິປະໄຕ, ຖືເລື່ອງຮັບເອົາຄວາມເຫັນຈາກປະຊາຊົນເປັນສຳຄັນພິເສດ, ຄືດັ່ງຄຳຢືນຢັນຂອງທ່ານ Nguyen Sinh Hung ປະທານສະພາແຫ່ງຊາດຫວຽດນາມ, ຫົວໜ້າຄະນະຊີ້ນຳປັບປຸງລັດຖະທຳມະນູນປີ 1992 ທີ່ວາລະປະຊຸມຄັ້ງປະຖົມມະເລິກຂອງຄະນະກຳມະການທີ່ວ່າ:
“ເລື່ອງປັບປຸງລັດຖະທຳມະນູນແມ່ນມີຄວາມສຳຄັນຍິ່ງ, ລວມສູນປະຊາທິປະໄຕ. ພວກເຮົາຕ້ອງຮັບປະກັນການນຳພາຂອງພັກ, ຕ້ອງຮັບເອົາຄວາມເຫັນຈາກປະຊາຊົນ, ບັນດານັກວິທະຍາສາດ, ນັກຄຸ້ມຄອງຢ່າງກ້ວາງຂວາງ. ໃນວິວັດການສະຫລຸບ, ຈັດກອງປະຊຸມ, ຮັບອົາຄຳເຫັນກໍ່ຄືວິວັດການຂໍເອົາຄຳເຫັນ ຕ້ອງຮັບປະກັນຫຼັກການລວມສູນມີປະຊາທິປະໄຕ ແຕ່ກໍ່ຕ້ອງໄດ້ປະຕິບັດຢ່າງລະມັດລະວັງ“
ວາລະປະຊຸມຄັ້ງທີ 4 ຂອງຄະນະຊີ້ນຳປັບປຸງລັດຖະທຳມະນູນ
(ພາບ: nguyenxuanphuc.net)
ມາຮອດປະຈຸບັນ, ຄະນະຮຽບຮຽງຮ່າງລັດຖະທຳມະນູນສະບັບປັບປຸງປີ 1992 ໄດ້ຍື່ນສະເໜີຮ່າງລັດຖະທຳມະນູນສະບັບປັບປຸງ ທີ່ວາລະປະຊຸມຂອງຄະນະຊີ້ນຳປັບປຸງລັດຖະທຳມະນູນປີ 1992 ຊື່ງຈັດຂື້ນເມື່ອວັນທີ 27/8/2012 ຢູ່ຮ່າໂນ້ຍ. ຮ່າງລັດຖະທຳມະນູນສະບັບດັ່ງກ່າວລວມມີ 11 ພາກ, 140 ມາດຕາ ຊື່ງໄດ້ຕິດພັນກັບບັນດາທັດສະນະ, ແນວທາງ, ການກຳນົດທິດທາງຄົ້ນຄ້ວາປັບປຸງລັດຖະທຳມະນູນຊື່ງໄດ້ກຳນົດໃນມະຕິກອງປະຊຸມໃຫ່ຍຄັ້ງທີ 11 ຂອງພັກກອມມູນິດຫວຽດນາມ, ມະຕິກອງປະຊຸມສູນກາງພັກຄັ້ງທີ 2 ແລະ ຄັ້ງທີ 5 ຊຸດທີ 11. ຈຸດໃໝ່ທີ່ສຳຄັນຂອງຮ່າງລັດຖະທຳມະນູນ ນັ້ນແມ່ນໄດ້ຮັບຮູ້ບາງຫຼັກການພື້ນຖານກ່ຽວກັບອະທິປະໄຕປະຊາຊົນ ຕິດພັນກັບລັກສະນະອຳນາດສູງສຸດຂອງລັດຖະທຳມະນູນ, ກ່ຽວກັບອົງການຈັດຕັ້ງສິດອຳນາດແຫ່ງລັດ, ກ່ຽວກັບການເຄົາລົບ, ຮັບປະກັນ, ຮັກສາສິດທິມະນຸດ, ສິດຂອງພົນລະເມືອງ. ບັນດາສິດທິມະນຸດໃນຮ່າງລັດຖະທຳມະນູນສະບັບປັບປຸງໄດ້ຮັບການຮັບຮູ້ວ່າ ມີການປ່ຽນໃໝ່ຫຼາຍຢ່າງດ້ວຍເລື່ອງຫັນແນວທາງ, ນະໂຍບາຍໃໝ່ຂອງພັກ ແລະ ລັດຫວຽດນາມ ໃນຂົງເຂດສິດທິມະນຸດເປັນລະບອບລະບຽບການຢ່າງຄົບຖ້ວນ ແລະ ເລິກເຊີ່ງ, ຊື່ງໄດ້ສະແດງໃຫ້ເຫັນພາລະໜ້າທີ່ພື້ນຖານຂອງລັດຖະທຳມະນູນຢ່າງຖືກຕ້ອງ ແລະ ດີກ່ວາ ໃນການຮັບປະກັນ, ຮັກສາສິດທິມະນຸດ, ສິດຂອງພົນລະເມືອງໃນການກຳນົດບາງຫຼັກການ ແລະ ສິດທິມະນຸດຢ່າງລະອຽດໃນບັນດາສົນທິສັນຍາສາກົນກ່ຽວກັບສິດທິມະນຸດຊື່ງຫວຽດນາມ ແມ່ນສະມາຊິກ. ໜື່ງໃນບັນດາຈຸດທີ່ໜ້າຮັບຮູ້ນັ້ນແມ່ນຮ່າງລັດຖະທຳມະນູນໄດ້ແກ້ໄຂຂໍ້ຕິດຂັດ ຂອງລັດຖະທຳມະນູນປະຈຸບັນ ແມ່ນເພີ່ມເຕີມປັດໄຈກວດກາເຂົ້າຫຼັກການອົງການຈັດຕັ້ງສິດອຳນາດແຫ່ງລັດ. ກຳນົດຢ່າງຈະແຈ້ງອົງການປະຕິບັດສິດຕ່າງໆຄື: ສິດນິຕິບັນຍັດ (ສະພາແຫ່ງຊາດ), ສິດບໍລິຫານ (ລັດຖະບານ), ສິດຕຸລາການ (ສານ).
(ພາບ: tapchikiemsat.org.vn)
ຄະນະຮຽບຮຽງຈະນຳບັນດາຈຸດໃໝ່ນີ້ເຂົ້າໃນເນື້ອໃນປັບປຸງ ເພື່ອຍື່ນສະເໜີຕໍ່ຄະນະຮຽບຮຽງຮ່າງລັດຖະທຳມະນູນປີ 1992 ສະບັບປັບປຸງ, ເພີ່ມເຕີມ ເພື່ອພິຈາລະນາ, ໃຫ້ຄຳເຫັນ. ນອກຈາກນັ້ນແລ້ວ, ຫຼາຍເນື້ອໃນກ່ຽວກັບການຈັດຕັ້ງກົງຈັກລັດ, ການຄວບຄຸມສິດລະຫວ່າງບັນດາອົງການແຫ່ງລັດທີ່ຖືກມອບສິດ, ບັນດາສິດພື້ນຖານຂອງພົນລະເມືອງຄື: ສິດໄດ້ດຳລົງຊີວິດ, ສິດເສລີພາບ, ສິດກຳມະສິດຊັບສົມບັດຂອງພົນລະເມືອງຢ່າງຖືກຕ້ອງຕາມກົດໝາຍຫວຽດນາມ ຊື່ງໄດ້ຮັບການປົກປ້ອງຈາກລັດບົນຈິດໃຈເຄົາລົບກົດໝາຍສູງສຸດ…..ໄດ້ລະບຸໄວ້ໃນຮ່າງລັດຖະທຳມະນູນ, ຍັງມີຫຼາຍຄຳເຫັນແຕກຕ່າງກັນ, ຈະສືບຕໍ່ຮັບເອົາຄຳເຫັນເພື່ອກ້າວໄປເຖິງຄວາມເປັນເອກະພາບ, ຄືດັ່ງຄຳຢືນຢັນຂອງທ່ານ Hoang The Lien ລັດຖະມົນຕີຊ່ວຍວ່າການກະຊວງຍຸດຕິທຳຫວຽດນາມ ທີ່ວ່າ:
“ເມື່ອພວກເຮົາມີແຜນນະໂຍບາຍປັບປຸງລັດຖະທຳມະນູນ, ວຽກງານຕົ້ນຕໍແມ່ນຂອງຄະນະຮຽບຮຽງປັບປຸງລັດຖະທຳມະນູນ ແລະ ບັນດາອົງການທີ່ກ່ຽວຂ້ອງ ແຕ່ນີ້ກໍ່ແມ່ນໜ້າທີ່ຂອງທົ່ວປວງຊົນ. ຍ້ອນວ່າລັດຖະທຳມະນູນແມ່ນປະມວນກົດໝາຍອັນເປັນພື້ນຖານ ແຕ່ເຈດຈຳນົງ ແລະ ຄວາມມຸ້ງຫວັງແມ່ນຂອງທົ່ວປວງຊົນ, ທົ່ວສັງຄົມ. ສະນັ້ນ, ທຸກໆຄົນ ແລະ ອົງການຈັດຕັ້ງລ້ວນແຕ່ມີສິດປະກອບຄຳເຫັນ ແລະ ຍ້ອນເຫດນັ້ນ, ນີ້ຈຶ່ງແມ່ນບັ້ນດຳເນີນຊີວິດດ້ານການເມືອງຂະໜາດໃຫ່ຍສຸດ, ເລິກເຊີ່ງ ແລະ ສຳຄັນກ່ວາໝູ່“
ຕາມແຜນການແລ້ວ, ຮ່າງລັດຖະທຳມະນູນສະບັບປັບປຸງຈະສືບຕໍ່ຖືກດັດແກ້ໃຫ້ສົມບູນແບບເພື່ອຍື່ນສະເໜີຕໍ່ສະພາແຫ່ງຊາດໃຫ້ຄຳເຫັນໃນສະໄໝປະຊຸມເດືອນ 10 ປີ 2012 ທີ່ຈະມາເຖິງ. ຫຼັງຈາກນັ້ນ, ຮ່າງລັດຖະທຳມະນູນສະບັບປັບປຸງນີ້ ຈະຖືກຮັບເອົາຄຳເຫັນໃນໝູ່ປະຊາຊົນຢ່າງກ້ວາງຂວາງເພື່ອປັບປຸງ, ກ່ອນທີ່ຈະຍື່ນສະເໜີຕໍ່ສະພາແຫ່ງຊາດຮັບຮອງເອົາໃນສະໄໝປະຊຸມທ້າຍປີ 2013.