ໃນການຢ້ຽມຢາມເອີລົບ ມາເປັນເວລາກວ່າ ອາທິດຫນຶ່ງ, ເລີ່ມຕົ້ນແຕ່ວັນທີ 6/9, ທ່ານ Kang Sok Ju, ຊື່ງແມ່ນຜູ້ສວມບົດບາດຫລັກແຫລ່ງໃນໄລຍະຍາວໃນການແກ້ໄຂການພົວພັນລະຫວ່າງ ສປປ ເກົາຫລີ ກັບບັນດາປະເທດ ຈະເດີນທາງເຖິງ ແບນຊິກ, ສະວິດ ແລະ ປະເທດ ເອີລົບ ຈຳນວນຫນຶ່ງ. ນີ້ເປັນຄັ້ງທຳອິດ ທ່ານ Kang Sok Ju ໄປຢ້ຽມຢາມຕ່າງປະເທດ ນັບແຕ່ເມື່ອທ່ານຮັບດຳລົງຕຳແຫນ່ງເປັນເລຂາທິການ ຮັບຜິດຊອບບັນຫາພົວພັນກັບຕ່າງປະເທດ ຂອງພັກແຮງງານ ສປປ ເກົາຫລີ ແຕ່ເດືອນ 4 ຜ່ານມາ.
ທ່ານ Kang Sok Ju
photo:internet
|
ຊອກວິທີຫລຸດພົ້ນອອກຈາກຄວາມໂດດດ່ຽວກ່ຽວກັບການພົວພັນກັບຕ່າງປະເທດ ແລະ ເສດຖະກິດ
ການຢ້ຽມຢາມເອີລົບ ຂອງ ທ່ານ Kang Sok Ju ນອນໃນຂອບເຂດບັນດາຄວາມມານະພະຍາຍາມຂອງ ພຽງຢາງ ຫວ່າງແລ້ວນີ້ ເພື່ອຫລຸດພົ້ນອອກຈາກສະພາບຖືກໂດດດ່ຽວ. ຕາມວາລະສານການເມືອງໂລກຂອງ ຝລັ່ງ ສະບັບອອກເດືອນ 2/2014, ໃນຍອດວົງເງິນສິນຄ້ານຳເຂົ້າຂອງ ສປປ ເກົາຫລີ, ຈີນ ກວມເອົາ 67,2 %, ສເກົາຫລີ ກວມເອົາ 19,4% ແລະ ສະຫະພາບເອີລົບ (EU) ກວມເອົາ 3,6%. ສ່ວນສິນຄ້າສົ່ງອອກຂອງ ສປປ ເກົາຫລີ ໄປຍັງ ຈີນ ກວມເອົາ 61,6%, ໄປຍັງ ສເກົາຫລີ ກວມເອົາ 20% ແລະ ໄປຍັງ EU 4%. ມາຮອດປະຈຸບັນ, ສປປ ເກົາຫລີ ມີເຂດເສດຖະກິດພິເສດ 3 ແຫ່ງ ແລະ ມີແຜນການກໍ່ສ້າງເຂດເສດຖະກິດພິເສດຕື່ມອີກ 19 ແຫ່ງ ເພື່ອດຶງດູດບັນດານັກລົງທຶນຕ່າງປະເທດ. ໃນສະພາບການນັ້ນ, ຄຳສັ່ງລົງໂທດຂອງປະຊາຄົມໂລກ ໄດ້ສົ່ງຜົນກະທົບບໍ່ຫນ້ອຍເຖິງແຜນການນີ້ຂອງ ພຽງຢາງ. ນັບທັງການພົວພັນແບບພິເສດກັບຈີນ ກໍຖືກເສຍຫາຍ. ທ່ານ Yun Byung se, ລັດຖະມົນຕີການຕ່າງປະເທດ ສເກົາຫລີ ໄດ້ໃຫ້ຂໍ້ສັງເກດວ່າ: ພຽງຢາງ ພວມຕົກໃນສະພາບຄວາມຫຍຸ້ງຍາກກ່ຽວກັບການພົວພັນກັບຕ່າງປະເທດ ແລະ ເສດຖະກິດ ຍິ່ງກວ່າເວລາໃດໝົດ ຍ້ອນຄຳສັ່ງລົງໂທດຈາກປະຊາຄົມໂລກ ທີ່ກ່ຽວຂ້ອງເຖິງບັນຫາຍິງທົດລອງລູກສອນໄຟ ແລະ ນິວເຄຼຍ.
ໃນສະພາບການນີ້ກໍ່ຕ້ອງຄິດໄລ່ຊັ່ງຊາເຖິງການພົວພັນລະຫວ່າງ ສປປ ເກົາຫຼີ ກັບ 3 ປະເທດ: ສ. ເກົາຫຼີ, ອາເມລິກາ ແລະ ຈີນ. ໃນຕົວຈິງແລ້ວ, ນະໂຍບາຍສຳລັບທັງ 3 ປະເທດດັ່ງກ່າວ, ສປປ ເກົາຫຼີ ລ້ວນແຕ່ມານະພະຍາຍາມຮັບປະກັນຄວາມສະຫງົບຂອງປະເທດ, ພັດທະນາບັນດາການພົວພັນດ້ານເສດຖະກິດຢ່າງສະດວກ. ເຖິງຢ່າງໃດກໍ່ຕາມ, ໄລຍະມໍ່ໆມານີ້, ການພົວພັນຕ່າງປະເທດ ຂອງ ສປປ ເກົາຫຼີ ໄດ້ປະເຊີນໜ້າກັບບັນດາບັນຫາກັບທັງ 3 ປະເທດດັ່ງກ່າວ.
ສຳລັບ ອາເມລິກາ, ເງື່ອນໄຂທຳອິດເພື່ອປັບປຸງການພົວພັນກັບ ສປປ ເກົາຫຼີ ຕ້ອງແມ່ນການປະຕິເສດຂອງ ພຽງຢາງ ກັບໂຄງການອາວຸດນິວເຄຼຍ. ແຕ່ວ່າ, ສປປ ເກົາຫຼີ ຖືນີ້ແມ່ນຄຳຮຽກຮ້ອງບໍ່ສາມາດຮັບຮູ້ໄດ້.
ການພົວພັນກັບ ສ. ເກົາຫຼີ ກໍ່ຊົ່ວຮ້າຍລົງຫຼາຍພໍສົມຄວນນັບແຕ່ປີ 2008. ຄວາມເຄັ່ງຕຶງລະຫວ່າງ 2 ພາກ ເກົາຫຼີ ຍັງສືບຕໍ່ເກີດຂຶ້ນ. ການຖົກຖຽງກັນ, ຄວາມບໍ່ລົງລອຍກັນຍັງຄົງເກີດຂຶ້ນ ແທນທີການສ້າງຕັ້ງບັນດາການຮ່ວມມືທີ່ຕັ້ງໜ້າ.
ການພົວພັນຂອງ ສປປ ເກົາຫຼີ ກັບ ຈີນ ໃນໄລຍະມໍ່ໆມານີ້ກໍ່ບໍ່ສະດວກປານໃດ. ເລື່ອງທ່ານປະທານປະເທດ ຈີນ ສີຈີ້ນຜິງ ພາຍຫຼັງຮັບດຳລົງຕຳແໜ່ງໄດ້ໄປປະຕິບັດງານຢູ່ ສ ເກົາຫຼີ ແທນທີ ຢ້ຽມຢາມ ສປປ ເກົາຫຼີ ຄືມູນເຊື້ອສະແດງໃຫ້ເຫັນວ່າການພົວພັນລະຫວ່າງ 2 ປະເທດບໍ່ຄືເກົ່າອີກແລ້ວ. ຊ້ຳບໍ່ໜຳ, ໃນສື່ມວນຊົນ ສປປ ເກົາຫຼີ ໃນໄລຍະມໍ່ໆມານີ້ ໄດ້ເລີ່ມປະກົດອອກບັນດາຄຳຕຳນິຕິຕຽນແນໃສ່ ຈີນ.
ໃນຕົວຈິງແລ້ວ, ໄລຍະມໍ່ໆມານີ້, ພຽງຢາງ ພະຍາຍາມປັບປຸງການພົວພັນກັບ ລັດເຊຍ. ເຖິງຢ່າງໃດກໍ່ຕາມ, ວິກິດການຢູ່ ຢູແກຼນ ແລະ ການພົວພັນ ລັດເຊຍ - ຝ່າຍຕາເວັນຕົກ ພວມຊົ່ວຮ້າຍລົງ ໄດ້ສົ່ງຜົນກະທົບໃດໜຶ່ງເຖິງຄວາມເອົາໃຈໃສ່ຂອງ ມົດສກູ ຕໍ່ ພຽງຢາງ.
ທຸກໆສາຍເຫດເຫຼົ່ານັ້ນ ໄດ້ເຮັດໃຫ້ ພຽງຢາງ ຕົກລົງຫັນທິດໄປສູ່ ເອີລົບ.
ແງ່ຫວັງແຫ່ງການຮ່ວມມືກັບ ເອີລົບອາດຈະປະສົບກັບຄວາມຫຍຸ້ງຍາກ
ວົງການນັກໄຈ້ແຍກຖືວ່າ: ປະຈຸບັນຍາກທີ່ຄາດຄະເນບັນດາຄວາມມານະພະຍາຍາມຂອງ ພຽງຢາງ ໃນການຊຸກຍູ້ການຮ່ວມມືກັບ ເອີລົບ ຈະສຳເລັດຜົນຄືແນວໃດ. ເຖິງຢ່າງໃດກໍຕາມ, ບັນດາການນຳ ເອີລົບ ບໍ່ສ້າງຄວາມຫຍຸ້ງຍາກປານໃດຕໍ່ ສປປ ເກົາຫລີ ເມື່ອທຽບໃສ່ກັບການນຳ ອາເມລິກາ ຫລື ສເກົາຫລີ ແຕ່ບັນຫານິວເຄຼຍ ກໍຄືເນື້ອແທ້ນະໂຍບາຍພາຍໃນຂອງ ພຽງຢາງ ອາດຈະເປັນສິ່ງກີດຂວາງບໍ່ຫນ້ອຍສຳລັບການປັບປຸງສາຍພົວພັນລະຫວ່າງ 2 ຝ່າຍ. ນອກນັ້ນ ໃນຂົງເຂດເສດຖະກິດ, ເອີລົບ ຜ່ານຜ່າວິກິດການຢ່າງຫນັກຫນ່ວງ,ສະນັ້ນເຂົາເຈົ້າກໍບໍ່ອາດສາມາດຫນູນຊ່ວຍໃນຈຸດເວລານີ້.
ມີແຫລ່ງຂ່າວໃຫ້ຮູ້ວ່າ ພ້ອມກັບການຢ້ຽມຢາມ ເອີລົບ ຂອງທ່ານ Kang Sok Ju, ເລຂາທິການ ຮັບຜິດຊອບບັນຫາການພົວພັນກັບຕ່າງປະເທດ ຂອງພັກແຮງງານ ສປປ ເກົາຫລີ, ຄາດວ່າ ທ່ານ Ri Su Yong, ລັດຖະມົນຕີການຕ່າງປະເທດ ສປປ ເກົາຫລີ ຈະເດີນທາງເຖິງ ນິວຢອກ ໃນທ້າຍເດືອນ 9 ນີ້ ເພື່ອເຂົ້າຮ່ວມກອງປະຊຸມຂອງສະພາຄວາມໝັ້ນຄົງ ສປຊ. ຖ້າຫາກແຜນການນີ້ ໄດ້ຮັບການຜັນຂະຫຍາຍ ນີ້ຈະເປັນຄັ້ງທຳອິດທ່ານລັດຖະມົນຕີການຕ່າງປະເທດ ສປປ ເກົາຫລີ ເດີນທາງເຖິງ ອາເມລິກາ ໃນຮອບເວລາ 15 ປີຜ່ານມາ ແລະ ເປັນສັນຍານຕັ້ງຫນ້າຈາກ ຝ່າຍ ພຽງຢາງ.
ດ້ວຍບັນດາຄວາມມານະພະຍາຍາມຂອງ ສປປ ເກົາຫລີ ເພື່ອຕັ້ງຫນ້າຫັນສາຍພົວພັນຂອງເຂົາເຈົ້າກັບໂລກພາຍນອກທີ່ໄດ້ຮັບຖືວ່າແມ່ນກຳລັງຫນູນໃຫມ່ໃນວິວັດການເຮັດໃຫ້ສະພາບການຢູ່ແຫລມເກົາຫລີປອດໃສກວ່າ. ເຖິງຢ່າງໃດກໍຕາມ, ບັນດາຄວາມມານະພະຍາຍາມນີ້ສາມາດບັນລຸໝາກຜົນດີຫລືບໍ່ ຍັງອີງໃສ່ຫລາຍປັດໄຈ, ຄຽງຂ້າງເຈດຕະນາດີຂອງພຽງຢາງ.