(vovworld) - ຄືດັ່ງພວກເຮົາໄດ້ໃຫ້ຂ່າວໄປແລ້ວ, ທີ່ກອງປະຊຸມປະຈຳເດືອນ 9/2012 ຂອງລັດຖະບານ ຫວຽດນາມ ດຳເນີນໄປຢູ່ ຮ່າໂນ້ຍ ໃນວັນທີ 27/9, ລັດຖະບານ ຫວຽດນາມ ຍັງຄົງສືບຕໍ່ວາງຈຸດໝາຍຄວບຄຸມໄພເງິນເຟີ້ ແລະ ຖືວ່າ ນີ້ແມ່ນຫນ້າທີ່ຈຸດສຸມຂອງການບໍລິຫານ, ຊີ້ນຳບັນດາຫນ້າທີ່ພັດທະນາເສດຖະກິດສັງຄົມໃນໄລຍະຈະມາເຖິງ.
ສາຍເຫດຂອງການສຸມໃສ່ບຸລິມະສິດຄວບຄຸມໄພເງິນເຟີ້ນັ້ນແມ່ນ ດັດຊະນີລາຄາໃຊ້ສອຍໃນເດືອນ 9/2012 ເພີ່ມຂຶ້ນ 2,2 %, ແມ່ນລະດັບສູງກວ່າໝູ່ນັບແຕ່ຕົ້ນປີມາຮອດປະຈຸບັນ. ຕາມບົດລາຍງານຂອງຄະນະກຳມະການຕິດຕາມກວດກາການເງິນແຫ່ງຊາດແລ້ວ, ດັດຊະນີລາຄາໃຊ້ສອຍໃນເດືອນ 9 ເພີ່ມຂຶ້ນ ຍ້ອນບັນດາໝວດ ສິນຄ້າຄື: ອຸປະກອນຮັບໃຊ້ການສຶກສາ, ຢຸກຢາ, ບໍລິການສາທາລະນະສຸກ, ນ້ຳມັນ ແລະ ຄ່ານຳນຽມຄົມມະນາຄົມເພີ່ມຂຶ້ນສູງ. ໝວດບໍລິການສາທາລະນະສຸກເພີ່ມຂຶ້ນ 23,8%, ໄດ້ຮັບຖືວ່າແມ່ນໝວດສິນຄ້າເພີ່ມຂຶ້ນສູງກວ່າໝູ່ໃນປະເພດສິນຄ້າທັງໝົດ ແລະ ຕາມການອະພິປາຍຂອງທ່ານນາງ Nguyen Thi Kim Tien ລັດຖະມົນຕີກະຊວງສາທາລະນະສຸກ ຫວຽດນາມ ແລ້ວ, ສາຍເຫດນັ້ນແມ່ນ ປະກັນສຸຂະພາບເພີ່ມຂຶ້ນ ແລະ ບໍ່ສົ່ງຜົນສະທ້ອນເຖິງຜູ້ທຸກຍາກ. ທ່ານນາງ Nguyen Thi Kim Tien ລັດຖະມົນຕີກະຊວງສາທາລະນະສຸກ ໃຫ້ຮູ້ວ່າ:
“ບັດປະກັນສຸຂະພາບທັງໝົດຂອງຜູ້ທຸກຍາກໂດຍລັດຖະບານຮັບຜິດຊອບ. ຫວ່າງແລ້ວນີ້ ລັດຖະບານໄດ້ມີຂໍ້ຕົກລົງຫນູນຊ່ວຍປະກັນສຸຂະພາບໃຫ້ແກ່ຜູ້ເປັນພະຍາດຫນັກ ຄື: ຜ່າຕັດໝາກຫົວໃຈ, ປິນປົວພະຍາດມະເຮັງ ແລະຟອກໝາກໄຂ່ຫລັງ. 100% ຈຳນວນຊາວຊົນເຜົ່າສ່ວນຫນ້ອຍ, ເດັກນ້ອຍອາຍຸຕຳ່ກວ່າ 6 ປີ, ຜູ້ມີຄຸນງາມຄວາມດີກໍໄດ້ຮັບການຫນູນຊ່ວຍປະກັນສຸຂະພາບຈາກລັດຖະບານ. ຄອບຄົວໃກ້ຈະຖືກຈັດຢູ່ໃນລະດັບຄອບຄົວທຸກຍາກກໍໄດ້ຮັບການຫນູນຊ່ວຍ 30% ປະກັນສຸຂະພາບ ແລະ ພວກຂ້າພະເຈົ້າພວມສະເຫນີຫນູນຊ່ວຍ 100% ໃຫ້ແກ່ຜູ້ທີ່ຫາກໍຖືກຫລຸດຜົ້ນອອກຈາກຄວາມທຸກຍາກ. ສຳລັບຊາວກະສິກອນ ແລະ ນັກຮຽນນັກສຶກສາ ຈະໄດ້ຮັບການຫນູນຊ່ວຍ 30 - 50% ປະກັນສຸຂະພາບ.”
ກອງປະຊຸມປະຈຳເດືອນ 9/2012 ຂອງລັດຖະບານ ຫວຽດນາມ
ພາບ: internet
|
ເປັນອັນວ່າ, ສາຍເຫດດັດຊະນີລາຄາໃຊ້ສອຍໃນເດືອນ 9/2012 ເພີ່ມຂຶ້ນ ແມ່ນ ຍ້ອນປັດໄຈຕາມລະດູການເທົ່ານັ້ນ ຫາກບໍ່ແມ່ນຍ້ອນການກະທົບຂອງນະໂຍບາຍເສດຖະກິດມະຫາພາກ. ເຖິງຢ່າງໃດກໍຕາມ, ສິ່ງດັ່ງກ່າວສົ່ງຜົນສະທ້ອນເຖິງປັດໄຈດ້ານຈິດຕະສາດ. ສະນັ້ນ ຫນຶ່ງໃນບັນດາຫນ້າທີ່ຊຶ່ງລັດຖະບານເປັນເອກະພາບຈະສຸມໃສ່ຊີ້ນຳປະຕິບັດການຄວບຄຸມລາຄາໃຫ້ເຂັ້ມງວດໃນໄລຍະຈະມາເຖິງເພື່ອບໍ່ໃຫ້ໄພເງິນເຟີ້ເພີ່ມຂຶ້ນຢູ່ລະດັບ 2 ຕົວເລກ. ທ່ານນາຍົກລັດຖະມົນຕີ Nguyen Tan Dung ຊີ້ນຳວ່າ:
“ຕ້ອງຄວບຄຸມລາຄາຢ່າງເຂັ້ມງວດ, ບໍ່ປະໃຫ້ໄພເງິນເຟີ້ເພີ່ມຂຶ້ນຢູ່ລະດັບ 2 ຕົວເລກ.ນີ້ແມ່ນການຮັກສາເສດຖະກິດມະຫາພາກເປັນປົກກະຕິ, ແລະແມ່ນສິ່ງທີ່ສຳຄັນບໍ່ພຽງແຕ່ບັນລຸຈຸດໝາຍພັດທະນາໃນປີນີ້ໃຫ້ໄດ້ເທົ່ານັ້ນ ຫາກຍັງເພື່ອການພັດທະນາແບບຍືນຍົງໃນຊຸມປີຈະມາເຖິງອີກດ້ວຍ. ນອກຈາກບັນດາປັດໄຈພາວະວິໄສ, ເກີນຄວາມສາມາດຂອງພວກເຮົາແລ້ວ, ຕ້ອງເຮັດແນວໃດບໍ່ປະໃຫ້ລາຄາສິນຄ້າໃນທ້ອງຕະຫລາດ ແລະ ໄພເງິນເຟີ້ເພີ່ມຂຶ້ນ ສູງ.”
ໃນການຄວບຄຸມໄພເງິນເຟີ້, ລັດຖະບານ ໄດ້ສະເຫນີຍູ້ແຮງການເຕີບໂຕສິນເຊື່ອ, ຄວບຄຸມເງິນຝາກປະຢັດຢ່າງແຫນ້ນແຟ້ນ, ຮັກສາອັດຕາແລກປ່ຽນເງິນຕາໃຫ້ເປັນປົກກະຕິ, ຄວບຄຸມອັດຕາດອກເບ້ຍ, ບໍ່ໃຫ້ອັດຕາດອກເບ້ຍເພີ່ມຂຶ້ນສູງກວ່າອີກ. ກ່ຽວກັບດ້ານງົບປະມານ, ໃນສະພາບຄວາມຫຍຸ້ງຍາກປະຈຸບັນ, ພວມມານະພະຍາຍາມສ້າງຄວາມດຸນດຽງລະຫວ່າງລາຍຮັບລາຍຈ່າຍ, ຈຳກັດລາຍຈ່າຍງົບປະມານ ເກີນດຸນຢູ່ໃນລະດັບ 4,8%. ລັດຖະບານກໍຮຽກຮ້ອງຕ້ອງຮັບປະກັນຄວາມສົມດູນກ່ຽວກັບການສະຫນອງສິນຄ້າກັບຄວາມຕ້ອງການສິນຄ້າ, ບໍ່ໃຫ້ເກີດສະພາບຂາດແຄນສິນຄ້າ, ລາຄາເພີ່ມຂຶ້ນສູງ, ເປັນຕົ້ນແມ່ນທັນຍາຫານ, ອາຫານ ແລະ ການສົມດູນສິນຄ້າຕ້ອງໄປຄຽງຄູ່ກັບການຮັກສາລາຄາເປັນປົກກະຕິ, ການຄວບຄຸມ ແລະ ຄຸ້ມຄອງລາຄາ. ລັດຖະບານໄດ້ຊີ້ນຳ ໃຫ້ສືບຕໍ່ປະຕິບັດແຜນນະໂຍບາຍບໍລິຫານລາຄາສິນຄ້າຕາມລາຄາໃນທ້ອງຕະຫລາດຕາມຂັ້ນຕອນ, ຄິດໄລ່ຊັ່ງຊາເຖິງການກະທົບເສດຖະກິດສັງຄົມຢ່າງລະອຽດ ພາຍຫລັງທີ່ໄດ້ດັດປັບລາຄາ.
ຮັກສາລາຄາໃນທ້ອງຕະຫລາດໃຫ້ເປັນປົກກະຕິ
ພາບປະກອບ: sggp.org.vn
|
ໄປຄຽງຄູ່ກັບການຄວບຄຸມໄພເງິນເຟີ້, ເພື່ອບັນລຸລະດັບການຈະເລີນເຕີບໂຕໃຫ້ໄດ້ກວ່າ 5% ໃນປີ 2012, ລັດຖະບານໄດ້ຊີ້ນຳໃຫ້ບັນດາກະຊວງ, ຄະນະ, ຂະແຫນງການສືບຕໍ່ເອົາໃຈໃສ່ແກ້ໄຂຄວາມຫຍຸ້ງຍາກໃຫ້ແກ່ການຜະລິດ, ດຳເນີນທຸລະກິດ, ຍູ້ແຮງການຜະລິດ, ການສົ່ງອອກບັນດາປະເພດສິນຄ້າທີ່ມີທ່າໄດ້ປຽບຄື: ເຂົ້າສານ, ສິນໃນນ້ຳ, ເກີບຫນັງ, ເຄື່ອງຕຳ່ແຜ່ນຕັດຫຍິບ…. ເອົາໃຈໃສ່ເຖິງການພັດທະນາບັນດາການບໍລິການມີທ່າໄດ້ປຽບຄື: ການທ່ອງທ່ຽວ, ການເງິນ, ທະນາຄານ, ໂທລະຄົມມະນາຄົມ, ການບິນ ພ້ອມທັງສຸມໃສ່ແກ້ໄຂສະພາບສິນຄ້າຄ້າງສາງ, ເປັນຕົ້ນແມ່ນວັດສະດຸກໍ່ສ້າງ, ແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະສັບ ເພື່ອຊຸກຍູ້ການຜະລິດ, ດຳເນີນທຸລະກິດໃນໄລຍະຈະມາເຖິງ.
ຍູ້ແຮງການສ້າງໂຄງປະກອບເສດຖະກິດຄືນໃຫມ່, ໃນນັ້ນ ສ້າງໂຄງປະກອບການລົງທຶນຂອງລັດຄືນໃຫມ່, ສ້າງໂຄງປະກອບລັດວິສາຫະກິດຄືນໃຫມ່ ແລະ ສ້າງໂຄງປະກອບທະນາຄານຄືນໃຫມ່ກໍແມ່ນຫນ້າທີ່ຈຸດສຸມຊຶ່ງລັດຖະບານສຸມໃສ່ຊີ້ນຳປະຕິບັດນັບແຕ່ນີ້ຮອດທ້າຍປີ. ໃນໂຄງປະກອບສ້າງລັດວິສາຫະກິດຄືນໃຫມ່, ກ່ອນອື່ນໝົດ ລັດຖະບານໄດ້ສຸມໃສ່ສ້າງໂຄງປະກອບບັນດາກຸ່ມບໍລິສັດ, ບໍລິສັດໃຫຍ່ຄືນໃຫມ່, ຊັບຊ້ອນຄືນຂອບຂະຫນາດໃຫ້ເໝາະສົມກັບຕະຫລາດ, ກຳລັງຄວາມສາມາດດ້ານການເງິນ, ສຸມໃສ່ເຂົ້າໃນຂະແຫນງອາຊີບຕົ້ນຕໍ. ພິເສດ ເລື່ອງສ້າງໂຄງປະກອບທະນາຄານຄືນໃຫມ່ ແມ່ນສຸມໃສ່ການແກ້ໄຂສະພາບຫນິ້ເສຍຕິດພັນກັບການແກ້ໄຂບັນດາທະນາຄານອ່ອນດ້ອຍ. ນອກນັ້ນ ລັດຖະບານກໍສະເຫນີບັນດາກະຊວງ, ຂະແຫນງການ ແລະ ທ້ອງຖິ່ນ ຕ້ອງຮັບປະກັນແຫລ່ງການເງິນໃຫ້ແກ່ນັກສຶກສາທຸກຍາກໄດ້ກູ້ຢືມເພື່ອໄປຮຽນ, ປະຕິບັດຈຸດໝາຍຮັບປະກັນຊີວິດສັງຄົມເປັນຢ່າງດີ. ນັ້ນແມ່ນບັນດາມາດຕະການສັງລວມເພື່ອບັນລຸຈຸດໝາຍການຈະເລີນເຕີບໂຕໃນປີນີ້ ແລະ ພັດທະນາແບບຍືນຍົງໃຫ້ໃນຊຸມປີຕໍ່ໄປ./.