(vovworld) - ປີ 2015, ກະຊວງຖະແຫຼງຂ່າວ ແລະ ສື່ສານຫວຽດນາມ ຈະເພີ່ມທະວີວຽກງານຄຸ້ມຄອງລັດໃນທຸກຂົງເຂດຄື: ສື່ມວນຊົນ, ພິມຈຳໜ່າຍ, ໄປສະນີ, ໂທລະຄົມ, ເຕັກໂນໂລຢີຂໍ້ມູນຂ່າວສານ ເພື່ອຮັບປະກັນຄວາມປອດໄພໃນການສື່ຂ່າວ… ສິ່ງດັ່ງກ່າວເພື່ອແນໃສ່ຜັນຂະຫຍາຍມະຕິກອງປະຊຸມຄະນະບໍລິຫານງານສູນກາງພັກກອມມູນິດຫວຽດນາມ ຄັ້ງທີ 10 ຢ່າງແທດຈິງ, ໃນນັ້ນມີເນື້ອໃນວາງແຜນພັດທະນາສື່ມວນຊົນຫວຽດນາມ ເຖິງປີ 2025.
ໃນການຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ຫວ່າງແລ້ວນີ້, ທ່ານລັດຖະມົນຕີຊ່ວຍວ່າການກະຊວງຖະແຫຼງຂ່າວ ແລະ ສື່ສານ, ເຈືອງມິງຕ໋ວນ, ໄດ້ຢືນຢັນເຖິງບັນດາທິດທາງພັດທະນາ ຂົງເຂດສື່ສານໄລຍະຈະມາເຖິງ, ໃນນັ້ນວຽກງານຈຸດສຸມແມ່ນການວາງແຜນພັດທະນາສື່ມວນຊົນ.
ປັບປຸງແຜນຮ່າງກ່ຽວກັບແຜນພັດທະນາ ແລະ ຄຸ້ມຄອງສື່ມວນຊົນເຖິງປີ 2025
ທ່ານລັດຖະມົນຕີຊ່ວຍວ່າການກະຊວງຖະແຫຼງຂ່າວ ແລະ ສື່ສານ, ເຈືອງມິງຕ໋ວນ ເນັ້ນໜັກວ່າ, ກະຊວງຖະແຫຼງຂ່າວ ແລະ ສື່ສານພວມ ປັບປຸງແຜນຮ່າງ ວາງແຜນພັດທະນາ ແລະ ຄຸ້ມຄອງສື່ມວນຊົນເຖິງປີ 2025 ເພື່ອຍື່ນຕໍ່ກົມການເມືອງໃນໄລຍະຈະມາເຖິງ. ແຜນຮ່າງວາງແຜນພັດທະນາ ແລະ ຄຸ້ມຄອງສື່ມວນຊົນ ເພື່ອແນໃສ່ສ້າງພື້ນຖານນິຕິກຳໃຫ້ສື່ມວນຊົນພັດທະນາຢ່າງປອດໄສ, ຖືກທິດ. ທ່ານລັດຖະມົນຕີຊ່ວຍວ່າການ ເຈືອງມິງຕ໋ວນ, ໃຫ້ຮູ້ວ່າ:
“ແຜນຮ່າງວາງແຜນພັດທະນາ ແລະ ຄຸ້ມຄອງສື່ມວນຊົນເຖິງປີ 2025 ເນັ້ນໜັກເຖິງເລື່ອງພັດທະນາໄປຄຽງຄູ່ກັບການຄຸ້ມຄອງທີ່ດີ. ມີຫຼາຍຄົນຄິດວ່າແຜນຮ່າງມີແຕ່ຊັບຊ້ອນສື່ມວນຊົນຄືນໃຫມ່ເທົ່ານັ້ນ, ແຕ່ຄວາມຈິງແລ້ວແມ່ນຊັບຊ້ອນບົນພື້ນຖານເພື່ອໃຫ້ສື່ມວນຊົນພັດທະນາຢ່າງແຮງ ແລະ ຖືກທິດກວ່າ, ເພື່ອສື່ຂ່າວເຖິງປະຊາຊົນຢ່າງຄົບຖ້ວນ, ຊັດເຈນກວ່າ. ສື່ມວນຊົນຫວຽດນາມ ແມ່ນສື່ມວນຊົນປະຕິວັດ. ສື່ມວນຊົນຕ້ອງແມ່ນອົງການກະບອກສຽງ, , ແມ່ນເວທີປາໄສຂອງປະຊາຊົນ, ຍົກອອກບັນດາບັນຫາທີ່ປະຊາຊົນເອົາໃຈໃສ່ ແລະ ໂຄສະນາແຜນນະໂຍບາຍຂອງພັກ, ນະໂຍບາຍຂອງລັດເຖິງປະຊາຊົນ. ຍ້ອນເຫດນັ້ນ, ສື່ມວນຊົນຕ້ອງມີລັກສະນະພາວະວິໄສ, ບໍລິສຸດ ແລະ ສະດຸງໄວ“.
ປະຈຸບັນ, ຫວຽດນາມ ມີ 845 ອົງການສື່ມວນຊົນ. ຕາມທ່ານລັດຖະມົນຕີຊ່ວຍວ່າການ ເຈືອງມິງຕ໋ວນ ແລ້ວ, ເລື່ອງຈັດຕັ້ງ, ຊັບຊ້ອນບັນດາອົງການສື່ມວນຊົນຈະໄດ້ຮັບການຜັນຂະຫຍາຍຕາມທິດສ້າງຕັ້ງບັນດາອົງການສື່ມວນຊົນຫຼາຍຮູບການ. ສິ່ງສຳຄັນກວ່ານັ້ນແມ່ນບັນດາສື່ສິ່ງພິມທີ່ຂາດສີສັນຊາດ, ໃຫ້ຂ່າວບໍ່ຖືກກັບຄະຕິທຳ,ຈຸດປະສົງ, ຜິດກັບຄວາມຈິງ, ລະເມີດລິຂະສິດຈະຖືກຍຸບເລີກ. ບັນດາອົງການສື່ມວນຊົນກໍ່ຈະມີເງື່ອນໄຂດີທີ່ສຸດເພື່ອພັດທະນາໃຫ້ທັນກັບວິວັດແຫ່ງການພັດທະນາຂອງວິທະຍາສາດເຕັກໂນໂລຢີ.
ການພັດທະນາໄປຄຽງຄູ່ກັບການຄຸ້ມຄອງ
ທ່ານລັດຖະມົນຕີຊ່ວຍວ່າການ ເຈືອງມິງຕ໋ວນ, ໃຫ້ຮູ້ວ່າ, ອິນເຕີແນດ ແລະ ເວັບໄຊສັງຄົມນັບມື້ນັບພັດທະນາ. ນີ້ແມ່ນທ່າອ່ຽງລວມຂອງໂລກ ແລະ ຫວຽດນາມ ກໍ່ນອນໃນທ່າອ່ຽງນັ້ນ. ເລື່ອງອິນເຕີແນດ ແລະ ເວັບໄຊສັງຄົມຢູ່ຫວຽດນາມ ພັດທະນາຢ່າງແຮງ ຈະແມ່ນໂອກາດເພື່ອໃຫ້ປະຊາຊົນສຳພັດກັບຂໍ້ມູນຂ່າວໄວທີ່ສຸດ ແລະ ຮອບດ້ານທີ່ສຸດ, ແຕ່ກໍ່ເປັນການທ້າທາຍໃຫ້ວຽກງານຄຸ້ມຄອງສື່ມວນຊົນ, ສື່ສານຢູ່ຫວຽດນາມ. ໜຶ່ງໃນບັນດາໜ້າທີ່ສຳຄັນເຊິ່ງກະຊວງຖະແຫຼງຂ່າວ ແລະ ສື່ສານຫວຽດນາມໄດ້ວາງອອກໃນປີ 2015 ນັ້ນແມ່ນ, ຕ້ອງຄຸ້ມຄອງຄືແນວໃດເພື່ອບໍ່ໃຫ້ຂ່າວບໍ່ດີສົ່ງຜົນສະທ້ອນເຖິງສະພາບແວດລ້ອມແຫ່ງການສື່ສານຂອງຫວຽດນາມ. ທ່ານລັດຖະມົນຕີຊ່ວຍວ່າການ ເຈືອງມິງຕ໋ວນ, ຢືນຢັນວ່າ:
“ໃນຂົງເຂດສື່ຂ່າວ, ຂໍ້ມູນຂ່າວໃດໄດ້ຮັບການໂຄສະນາກ່ອນ, ແມ່ນມີປະໂຫຍດກວ່າ. ຍ້ອນເຫດນັ້ນ, ພວກເຮົາຕ້ອງເປັນເຈົ້າການໃນການສື່ຂ່າວ ແລະ ບັນດາອົງການສື່ມວນຊົນຕ້ອງເຂົ້າຮ່ວມ, ເພື່ອເປັນເຈົ້າການສະໜອງຂໍ້ມູນຂ່າວໃຫ້ທົ່ວປວງຊົນໄດ້ຮັບຊາບ, ທີສອງແມ່ນ, ບັນດາອົງການຂອງລັດກໍ່ຕ້ອງເປັນເຈົ້າການສະໜອງຂໍ້ມູນຂ່າວ, ພິເສດແມ່ນສຳລັບຂົງເຂດທີ່ປະຊາຊົນມີຄວາມສົນໃຈ“.
ກ່ຽວຂ້ອງເຖິງການເຄື່ອນໄຫວພິມຈຳໜ່າຍ, ທ່ານລັດຖະມົນຕີຊ່ວຍວ່າການ ເຈືອງມິງຕ໋ວນ, ເນັ້ນໜັກວ່າ: ກະຊວງຖະແຫຼງຂ່າວ ແລະ ສື່ສານ ກໍ່ຈະມີມາດຕະການຕ່າງໆເພື່ອຮັບປະກັນໃຫ້ສະພາບແວດລ້ອມແຫ່ງການພິມຈຳໜ່າຍໃນປີ 2015 ມີຄວາມປອດໄສ. ພ້ອມກັບເລື່ອງຍູ້ແຮງການປະຕິບັດກົດໝາຍວ່າດ້ວຍພິມຈຳໜ່າຍ, ກະຊວງຖະແຫຼງຂ່າວ ແລະ ສື່ສານ ຈະສືບຕໍ່ປະກາດໃຊ້ບັນດາເອກະສານນິຕິກຳ ເພື່ອປະຕິບັດການຮ່ວມສຳພັນພິມຈຳໜ່າຍ ແລະ ເພີ່ມທະວີການຕິດຕາມກວດກາ, ກວດກາວຽກງານຮ່ວມສຳພັນພິມຈຳໜ່າຍ, ນັບແຕ່ຂອດສະໜອງໜັງສືອະນຸຍາດ, ການຈົດທະບຽນພິມຈຳໜ່າຍ, ການກວດຕົ້ນສະບັບ, ການພິມ ແລະ ຈຳໜ່າຍ.