ບັ້ນຮົບຕ້ານກຳລັງລັດອິດສະລາມ IS ໂດຍຂະໜາມນາມເອງ ແລະ ບັນດາກຸ່ມກໍໍ່ການຮ້າຍ, ຫົວຮຸນແຮງພວມກ້າວເຂົ້າສູ່ໄລຍະດຸເດືອດ ແລະ ໄດ້ຮັບການຮ່ວມແຮງຮ່ວມໃຈຈາກຫຼາຍປະເທດໃນໂລກ. ພ້ອມກັບບັນດາການບຸກໂຈມຕີທາງອາກາດ, ບຸກໂຈມຕີໂດຍກົງ, ສ່ວນໜຶ່ງທີ່ສຳຄັນໃນຍຸດທະສາດຮ່ວມຕ້ານກໍໍ່ການຮ້າຍນັ້ນ, ແມ່ນຕ້ອງສະກັດກັ້ນແຫຼ່ງການເງິນຂອງ IS, ຈາກນັ້ນສາມາດດັບສູນອົງການ ກໍໍ່ການຮ້າຍນີ້ເຖິງກົກເຖິງຮາກ.
(ພາບ: doanhnhansaigon.vn)
|
ການຄ້າຂາຍອາວຸດ, ຄ້າຂາຍມະນຸດ, ຢາຟິນ, ລອກຈັບເປັນຕົວປະກັນເພື່ອຮຽກຄ່າໄຖ່, ຂາຍນ້ຳມັນຢູ່ບັນດາເຂດຢຶດຄອງ, ຫຼັກຖອນເງິນຈາກບັນຊີເງິນຝາກທະນາຄານ. ນີ້ແມ່ນບັນດາສາຍເຫດເພື່ອພາໄປເຖິງການສ້າງແຫຼ່ງການເງິນຢ່າງມະຫາສານໃຫ້ແກ່ IS. ຕາມການປະເມີນແລ້ວ, ງົບປະມານຂອງ IS ໃນປີ 2015 ແມ່ນປະມານ 2 ຕື້ USD . ແຫຼ່ງການເງິນຢ່າງມະຫາສານນີ້ ໄດ້ຊ່ວຍ IS ເຖິງວ່າແມ່ນອົງການໂດຍຂະໜາມນາມເອງ ສາມາດຄວບຄຸມເຂດດິນທີ່ກ້ວາງໃຫຍ່ ແລະ ປະເຊີນໜ້າກັບບັນດາປະເທດມະຫາອຳນາດ ແລະ ພວມກາຍເປັນໄພນາບຂູ່ອັນຮ້າຍແຮງຂອງທົ່ວໂລກຢ່າງແທ້ຈິງ.
ກຳລັງແຮງອັນໂຫດຮ້າຍ ແລະ ກຳລັງບົ່ມຊ້ອນດ້ານເສດຖະກິດຢ່າງແຂງແຮງ
ບັນດາເຫດວາງລະເບີດ, ບຸກໂຈມຕີອັນນອງເລືອດ, ການລອກຈັບຕົວ ແລະ ສັງຫານຕົວປະກັນແບບສາມານໃນໄລຍະທີ່ຜ່ານມາ ໄດ້ສະແດງໃຫ້ເຫັນຜົນສະທ້ອນຂອງ IS ພວມກະທົບໂດຍກົງເຖິງຄວາມຄວາມໝັ້ນຄົງໃນທົ່ວໂລກ. IS ຍັງໄດ້ຮັບຖືວ່າ ແມ່ນອົງການທີ່ມີ ກຳລັງບົ່ມຊ້ອນດ້ານເສດຖະກິດຢ່າງແຂງແຮງ. ດ້ວຍສະຖານທີ່ຂຸດຄົ້ນນ້ຳມັນ 8 ແຫ່ງຢູ່ອີຣັກ ແລະ ຊີຣີນັ້ນ, ຕາມການປະເມີນແລ້ວ, ດ້ວຍລາຄາຂາຍນ້ຳມັນດິບແຕ່ 30-40 USD / ຖັງນັ້ນ, ແຕ່ລະມື້ IS ມີລາຍຮັບຈາກການຂາຍນ້ຳມັນແມ່ນ ແຕ່ 1-2 ລ້ານ USD . ແຫຼ່ງລາຍຮັບເປັນຈຳນວນຫຼາຍພໍສົມຄວນອີກຂອງ IS ນັ້ນແມ່ນໄດ້ຈາກການຂາຍວັດຖຸບູຮານທີ່ພວກມັນຊອກຫາໄດ້ໃນເຂດດິນແດນທີ່ຢຶດຄອງຢ່າງຜິດກົດໝາຍ. ພ້ອມກັນນັ້ນ, IS ຍັງເກັບອາກອນຂອງປະຊາຊົນຢູ່ດິນແດນທີ່ພວກເຂົາຄວບຄຸມ ແລະ ບວກກັບແຫຼ່ງຮັບອື່ນໆຈາກການລອກຈັບເປັນຕົວປະກັນເພື່ອຮຽກຄ່າໄຖ່, ແຫຼ່ງເງິນອຸປະຖຳຈາກບັນດາສ່ວນບຸກຄົນ ແລະ ອົງການຕ່າງໆ. ເມື່ອມີເງິນທຶນ, ບັນດາກຸ່ມກໍໍ່ການຮ້າຍພວມນັບມື້ນັບເພີ່ມທະວີການສົ່ງຜົນສະທ້ອນໂດຍຜ່ານການຈາ່ຍເງິນຫຼາຍສົມຄວນໃຫ້ແກ່ວຽກງານເກນທະຫານ, ຊື້ຈ້າງຊາວມຸດສະລີມຝ່າຍຕາເວັນຕົກ. ບັນດາເຫດການບຸກໂຈມຕີແບບ ກໍໍ່ການຮ້າຍຢູ່ປາຣີເມື່ອບໍ່ດົນມານີ້ ໄດ້ສະແດງໃຫ້ເຫັນລະດັບການຝຶກຊ້ອມທີດີ ແລະ ມີການຂຶ້ນແຜນຢ່າງລະມັດລະວັງເປັນເວລາດົນນານຂອງອົງການ ກໍໍ່ການຮ້າຍນີ້. ແລະ ບັນດາການເຄື່ອນໄຫວນີ້ ບໍ່ສາມາດປະຕິບັດໄດ້ຖ້າຫາກຂາດແຫຼ່ງການເງິນ.
ໃນຕົວຈິງ, ບໍ່ແມ່ນວ່າຮອດເວລານີ້, ວົງຄະນະຍາດສາກົນຈຶ່ງເລີ່ມຄິດໄລ່ເຖິງເລື່ອງສະກັດກັ້ນແຫຼ່ງການເງິນຂອງພວກກໍໍ່ການຮ້າຍ, ແລະ ໃນ 14 ປີທີ່ຜ່ານມານັບຕັ້ງແຕ່ເກີດເຫດບຸກໂຈມຕີກໍໍ່ການຮ້າຍເມື່ອວັນທີ 11/9/2001 ຢູ່ອາເມລິກາ, ວົງຄະນະຍາດສາກົນໄດ້ຜັນຂະຫຍາຍຫຼາຍມາດຕະການ, ໃນນັ້ນມີບັນດາມະຕິຂອງສະພາຄວາມໝັ້ນຄົງ ສ.ປ.ຊ, ແບ່ງປັນຂໍ້ມູນຂ່າວສານດ້ານການເງິນ, ຮົ້ວກີດຂວາງຂອງລະບົບທະນາຄານ. ແຕ່ບັນດາຄວາມມານະພະຍາຍາມນີ້ ຍັງບໍ່ທັນປະສົບຜົນສຳເລັດຍ້ອນຂາດກົນໄກຮ່ວມມືລວມ.
ສ້າງຍຸດທະສາດທົ່ວໂລກກ່ຽວກັບການສະກັດກັ້ນແຫຼ່ງການເງິນຂອງພວກກໍໍ່ການຮ້າຍ
ໂດຍເຂົ້າໃຈໄດ້ເຖິງຄວາມເປັນອັນຕະລາຍຂອງແຫຼ່ງການເງິນທີ່ເປື້ອນເປີ້ນີ້, ບັນດາການນຳໃນໂລກຮວມເຮັ່ງຮັດຊອກຫາວິທີສະກັດກັ້ນແຫຼ່ງໜູນຊ່ວຍການເງິນໃຫ້ແກ່ພວກ ກໍໍ່ການຮ້າຍດ້ວຍການເພີ່ມທະວີການ ແບ່ງປັນຂໍ້ມູນຂ່າວສານສືບລາຊະການລັບ, ປິດລ້ອມຊັບສົມບັດຂອງພວກກໍໍ່ການຮ້າຍ. ອາເມລິກາໄດ້ເລີ່ມເປີດກ້ວາງບັ້ນບຸກໂຈມຕີທາງອາກາດ ແນໃສ່ບັນດາຮາກຖານຂຸດຄົ້ນນ້ຳມັນ ຊຶ່ງຖືກຖືວ່າ ແມ່ນແຫຼ່ງລາຍຮັບຕົ້ນຕໍຂອງ IS . ຕາມນັ້ນແລ້ວ, ໃນຮອບເວລາ 1 ເດືອນຜ່ານມາ, ບັ້ນບຸກໂຈມຕີທາງອາກາດຂອງກຳລັງທະຫານປະສົມໂດຍອາເມລິການຳໜ້າໄດ້ທຳລາຍລົດບັນທຸກນ້ຳມັນ 400 ກວ່າຄັນ, ທຳລາຍ ຮາກຖານກັ່ນ ນ້ຳມັນ 3 ແຫ່ງຂອງຊີຣີໂດຍ IS ຄວບຄຸມ. ໃນມໍ່ໆມານີ້, ປະທານາທິບໍດີລັດເຊຍ ປູຕິນ ຫາກໍເຊັນລັດຖະດຳລັດວ່າດ້ວຍການສ້າງຕັ້ງຄະນະກຳມະການ ສະກັດກັ້ນແຫຼ່ງການເງິນຂອງບັນດາກຸ່ມ ກໍໍ່ການຮ້າຍ. ທີ່ກອງປະຊຸມ G 20 ຊຶ່ງຫາກໍຖືກຈັດຂຶ້ນຢູ່ຕວກກີນັ້ນ, ບັນດາການນຳໄດ້ເຫັນດີເປັນເອກະສັນກ່ຽວກັບການສ້າງຕັ້ງກົນໄກຮ່ວມມືທົ່ວໂລກແນໃສ່ ແບ່ງປັນຂໍ້ມູນຂ່າວສານສືບລາຊະການລັບ, ຕິດຕາມຢູ່ບັນດາດ່ານຊາຍແດນ ແລະ ເພີ່ມທະວີການປ້ອງກັນຄວາມປອດໄພທາງການບິນເພື່ອສະກັດກັ້ນພວກກໍໍ່ການຮ້າຍເຄື່ອນຍ້າຍຈາກປະເທດນີ້ໄປຍັງປະເທດອື່ນ. ບັນດາການນຳໃນໂລກໃຫ້ຄຳໝັ້ນສັນຍາ ຮ່ວມມືກັນເພື່ອຕ້ານລັດທິຫົວຮຸນແຮງ, ເກນທະຫານ ແລະ ສະກັດກັ້ນພວກ ກໍໍ່ການຮ້າຍນຳໃຊ້ນຳໃຊ້ເຕັກໂນໂລຢີ, ໃນນັ້ນມີລະບົບອິນເຕີເນັດ ຊຶ່ງຖືກຖືວ່າແມ່ນເຄື່ອງມືເພື່ອສົ່ງເສີມກໍໍ່ການຮ້າຍ, ຊົມເຊີຍການໃຊ້ຄວາມຮຸນແຮງ. ພ້ອມກັນນັ້ນ, ບັນດາລະບອບການເງິນສາກົນ ກໍສ້າງບັນດາມາດຕະການລະອຽດ ແລະ ແຂງແຮງກວ່າໃນການຄຸ້ມຄອງແຫຼ່ງເງິນ ແລະ ການໂອນເງິນຜ່ານທະນາຄານ, ອົງການຈັດຕັ້ງສັງຄົມ ແລະ ອົງການກຸສົນ.
ຕາມບັນດານັກໄຈ້ແຍກແລ້ວ, ການສູ້ຮົບສະກັດກັ້ນແຫຼ່ງການເງິນຂອງພວກ ກໍໍ່ການຮ້າຍ IS ກໍດຸເດືອດ ແລະ ນ້ອຍໜ້າກວ່າການບຸກໂຈມຕີທາງອາກາດ ກໍຄືທາງບົກຕ້ານ IS ໂດຍກົງ. ເພາະສະນັ້ນ, ເພື່ອສະກັດກັ້ນແຫຼ່ງການເງິນຂອງອົງການທີ່ບໍ່ເຊື່ອມໂຍງກັບໂລກພາຍນອກ, ບໍ່ມີການຕິດຕໍ່ພົວພັນດ້ານການຄ້າກັບພາຍນອກ ແມ່ນບໍ່ງ່າຍດາຍແຕ່ຢ່າງໃດ. ເພາະສະນັ້ນ,ການສູ້ຮົບນີ້ຈຳເປັນ ຕ້ອງມີຄວາມອົດທົນ ແລະ ມານະພະຍາຍາມຮ່ວມມືຍາວນານຂອງທັງວົງຄະນະຍາດສາກົນ.