(vovworld) – ການໄຊຊະນະຂອງນາຍົກລັດຖະມົນຕີ Angela Merkel ໃນການເລືອກຕັ້ງຢູ່ເຢຍລະມັນ ເມື່ອທ້າຍອາທິດ ໄດ້ສະແດງໃຫ້ເຫັນຄວາມມຸ້ງມາດປາຖະໜາຂອງຜູ້ມີສິດເລືອກຕັ້ງເຢຍລະມັນ ທີ່ສະຫງວນໃຫ້ແກ່ນັກການເມືອງຍິງທີ່ມີສິດອຳນາດກວ່າໝູ່ຢູ່ເອີລົບໃນອາຍຸການຈະມາເຖິງ. ແຕ່ນາຍົກລັດຖະມົນຕີຍິງຜູ້ນີ້ ພັດບໍ່ມີເວລາຫຼາຍເພື່ອຊົມໃຊ້ໄຊຊະນະດັ່ງກ່າວ, ເພາະວ່າທ່ານນາງຕ້ອງປະເຊີນໜ້າກັບເລື່ອງ ຊອກຫາພັນທະມິດເພື່ອກຳອຳນາດ ກໍ່ຄືສືບຕໍ່ແກ້ໄຂບັນດາບັນຫາທີ່ຍັງຄົງຄ້າງໃນສັງຄົມເຢຍລະມັນ.
ນາຍົກລັດຖະມົນຕີ Angela Merkel
(ພາບ: tienphong.vn)
ການທ້າທາຍທຳອິດສຳລັບທ່ານນາງ Angela Merkel ແມ່ນ ຊອກຫາຄູ່ຮ່ວມມືຕື່ມອີກ ເພື່ອສ້າງຕັ້ງສຳພັນທະມິດກຳອຳນາດ. ຜົນຂອງການກວດບັດເລືອກຕັ້ງຢູ່ສະຖານທີ່ເລືອກຕັ້ງ 229 ແຫ່ງຂອງເຢຍລະມັນໃຫ້ເຫັນວ່າ, ພັນທະມິດປະຊາທິປະໄຕ/ສັງຄົມສາສະໜາຄຣິດ (CDU/CSU) ຂອງທ່ານນາງນາຍົກລັດຖະມົນຕີ Angela Merkel ຍາດໄດ້ຈຳນວນບັດສະໜັບສະໜູນສູງສຸດ, ດ້ວຍ 41%. ແຕ່ຜົນງານນີ້, CDU/CSU ພຽງແທີ່ມີ 311 ໃນຈຳນວນ 630 ທີ່ນັ່ງໃນສະພາແຫ່ງຊາດເທົ່ານັ້ນ, ບໍ່ຍາດໄດ້ຈຳນວນທີ່ນັ່ງຢ່າງພຽງພໍຕາມກຳນົດຂອງກົດໝາຍ ດັ່ງນັ້ນຕ້ອງຊອກຫາພັນທະມິດເພື່ອສ້າງຕັ້ງລັດຖະບານໃຫ້ໝັ້ນຄົງ.
ໃນຂະນະນັ້ນ, ພັກປະຊາທິປະໄຕເສລີ (FDP) ເຊິ່ງແມ່ນພັນທະມິດຂອງທ່ານນາງ Merkel ຍາດໄດ້ພຽງ 4,8% ຈຳນວນບັດສະໜັບສະໜູນເທົ່ານັ້ນ, ບໍ່ພຽງພໍເພື່ອມີຕົວແທນໃນສະພາແຫ່ງຊາດ ຕາມກຳນົດຂອງກົດໝາຍແມ່ນ 5%. ດັ່ງນັ້ນ ທ່ານນາງ Merkel ຕ້ອງຊອກຫາສຳພັນທະມິດໃໝ່. ການເຈລະຈາເພື່ອມີສຳພັນທະມິດໃຫຍ່ ແມ່ນຈະຫຍຸ້ງຍາກ ແລະ ຕ້ອງເສຍເວລາຫຼາຍ.
ຕາມທຳມະດາແລ້ວ, ທ່ານນາງ Merkel ສາມາດເຈລະຈາສ້າງຕັ້ງລັດຖະບານປະສົມກັບພັກຂຽວ, ຫຼືພັກປະຊາທິປະໄຕສັງຄົມ (SPD) ໄດ້. ແຕ່ປະຈຸບັນ, ທັງສອງພັກນີ້ຜັດຍັງເມີນເສີຍຕໍ່ສິ່ງດັ່ງກ່າວ. ເລື່ອງສ້າງພັນທະມິດກັບ SPD ຈະປະສົບກັບຄວາມຫຍຸ້ງຍາກ ເພາະວ່າ, ຫົວໜ້າຂອງພັກນີ້, ທ່ານ Peer Steinbrueck ເຄີຍຖະແຫຼງວ່າ ທ່ານນາງ Merkel ຕ້ອງຊອກຫາການສະໜັບສະໜູນເອງໃຫ້ແກ່ຕົນ. ປະທານ SPD, ທ່ານ Sigmar Gabriel ຖືວ່າ ເພື່ອດຳເນີນການເຈລະຈາ, ທ່ານນາງ Merkel ຕ້ອງຕອບບັນດາຄຳຖາມ: ພັກຂອງທ່ານນາງຈະພ້ອມກັບເຢຍລະມັນ ກ້າວໄປໃສ, ມີຄາດໝາຍຄືແນວໃດ ແລະ ເຫັນດີຕໍ່ເງື່ອນໄຂເຈລະຈາໃດ. ສ່ວນທ່ານເລຂາທິການໃຫຍ່ SPD ທ່ານ Andrea Nahkes ພັດຢືນຢັນວ່າ ບໍ່ມີເລື່ອງ SPD ຮັບຮູ້ຮ່ວມສຳພັນກັບພັກ CDU/CSU. ໃນຂະນະນັ້ນ, ການຮ່ວມສຳພັນກັບພັກຂຽວ ກໍ່ປະເຊີນໜ້າກັບການທ້າທາຍບໍ່ແມ່ນໜ້ອຍ ເມື່ອແນວທາງຂອງ CDU/CSU ແລະ ພັກຂຽວ ມີຄວາມແຕກຕ່າງກັນຫຼາຍທີ່ສຸດ, ພິເສດແມ່ນໃນບັນຫາພາສີອາກອນ.
ດັ່ງນັ້ນ, ເພື່ອໃຫ້ສະພາແຫ່ງຊາດຊຸດໃໝ່ສາມາດດຳເນີນກອງປະຊຸມສະໄໝທຳອິດໃນວັນທີ 22/10, ພັກຂອງທ່ານນາງ Merkel ຕ້ອງສະແດງຄວາມສາມາດຂອງຕົນໃນການເຈລະຈາເພື່ອສາມາດສ້າງຕັ້ງພັນທະມິດກຳອຳນາດໃຫ້ໄດ້ ແຕ່ບໍ່ສົ່ງຜົນສະທ້ອນເຖິງນະໂຍບາຍ ເຊິ່ງ CDU/CSU ໄດ້ວາງອອກໃນການຫາສຽງເລືອກຕັ້ງ.
ຍັງມີການທ້າທາຍໜຶ່ງອີກສຳລັບທ່ານນາງ Merkel ແມ່ນເລື່ອງສືບຕໍ່ແກ້ໄຂບັນດາບັນຫາທີ່ຍັງຄົງຄ້າງໃນສັງຄົມເຢຍລະມັນ. ນັ້ນແມ່ນຄວາມແຕກຕ່າງກັນດ້ານລາຍຮັບນັບມື້ນັບສູງ ບັນຫານີ້ພວມສ້າງຄວາມເຄັ່ງຕຶງໃຫ້ແກ່ສັງຄົມ ແລະ ເຢຍລະມັນ ໄດ້ກາຍເປັນປະເທດທີ່ມີຈຳນວນຄົນໄດ້ຮັບເງິນເດືອນຕຳ່ກວ່າກວ່າໝູ່ຢູ່ເອີລົບຫຼາຍທີ່ສຸດ. ຄຽງຂ້າງນັ້ນ, ¼ ຈຳນວນກຳມະກອນຂອງເຢຍລະມັນ ພວມເຮັດວຽກແບບຊົ່ວຄາວ ບໍ່ເປັນປົກກະຕິ ແລະ ມີ 7 ລ້ານຄົນໄດ້ຮັບເງິນເດືອນບໍ່ທັນຮອດ 11 USD/ຊົ່ງໂມງ. ແຕ່ການທ້າທາຍນີ້ບໍ່ຫຼາຍປານໃດ, ເພາະວ່າໃນໄລຍະກຳອຳນາດຜ່ານມາ, ທ່ານນາງ Merkel ໄດ້ນຳພາປະເທດບັນລຸໄດ້ຜົນງານບໍ່ແມ່ນໜ້ອຍ. ເສດຖະກິດຂອງເຢຍລະມັນ ບັນລຸລະດັບເຕີບໂຕ 0.7% ໃນງວດທີ 2/2013. ອັດຕາຄົນວ່າງງານກໍ່ຫຼຸດລົງຢູ່ໃນລະດັບຕຳ່ແມ່ນ 6,8%. ເສດຖະກິດເຢຍລະມັນ ໄດ້ຜ່ານຜ່າວິກິດການ ແຕ່ບໍ່ປະສົບກັບຄວາມເສຍຫາຍ. ເຢຍລະມັນ ຍັງຄົງຖືກຈັດອັນດັບຄວາມໄວ້ເນື້ອເຊື່ອໃຈແມ່ນ AAA. ບັນດາປະສົບການ, ຄຸນນະທາດ ແລະ ຜົນສຳເລັດຂອງທ່ານນາງ Merkel ກໍ່ແມ່ນເງື່ອນໄຂສະດວກ ເພື່ອໃຫ້ທ່ານນາງຜັນຂະຫຍາຍນະໂຍບາຍຂອງພັກ CDU/CSU ດ້ວຍຄວາມເຊື່ອໝັ້ນ.
ທ່ານນາງ Merkel ເຄີຍກ່າວປາໄສວ່າ “ຄວາມຫຍຸ້ງຍາກບໍ່ອາດກີດຂວາງພວກເຮົາໄດ້, ຫາກກົງກັນຂ້າມ ມັນຍັງເປັນແຫຼ່ງປຸກລະດົມກຳລັງໃຈໃຫ້ແກ່ພວກເຮົາ“ ຫວັງວ່າການທ້າທາຍເຫຼົ່ານັ້ນ, ອີກເທື່ອໜຶ່ງຈະເປັນກຳລັງໜູນຊ່ວຍໃຫ້ທ່ານນາງ Merkel ສຳເລັດຜົນໃນການຊີ້ນຳນຳພາປະເທດ, ໃນຕໍ່ໜ້າແມ່ນຊອກຫາສຳພັນທະມິດໃຫ້ໄດ້ ເພື່ອສ້າງຕັ້ງລັດຖະບານເປັນປົກກະຕິ.