(vovworld) - ວັນທີ 25/8, ພັກ Salafish Nour, ເຊິ່ງແມ່ນພັກອິດສະລາມໃຫຍ່ອັນດັບ 2 ຢູ່ອີຢີບ, ປະກາດຈະເຂົ້າຮ່ວມຄະນະກຳມະການປັບປຸງລັດຖະທຳມະນູນ. ໃນຂະນະທີ່ປະເທດອາຟະລິກາເໜືອ ນີ້ ພວມຕົກຢູ່ໃນສະພາບປະທະກັນນັ້ນ, ຄຳປະກາດຂອງພັກ Salafish Nour ພ້ອມກັບການຜັນແປທີ່ດີອື່ນໆໃນເວທີການເມືອງໄດ້ສ້າງຄວາມຫວັງໃຫ້ແກ່ການຊຸກຍູ້ຂະບວນວິວັດແຫ່ງການຂ້າມຜ່ານ ໂດຍກອງທັບປຸກລະດົມ. ແຕ່ອີຢີບ ສາມາດໝູນໃຊ້ບັນດາກາລະໂອກາດນີ້ໄດ້ຫຼືບໍ, ເຊີນທ່ານຮັບຟັງບົດຂຽນຂອງບັນນາທິການວິທະຍຸກະຈາຍສຽງຫວຽດນາມທີ່ມີຫົວຂໍ້ວ່າ: “ສະພາບການເມືອງບໍ່ມີທາງອອກຢູ່ອີຢີບ ກ່ອນກາລະໂອກາດໄດ້ຮັບການແກ້ໄຂ“.
ການແຫ່ຂະບວນປະທ້ວງຂອງຊາວອີຢີບ
(ພາບ: AFP/TTXVN)
ພາຍຫຼັງຂົ່ມຂູ່ຖອນອອກຈາກວິວັດທະນາການການເມືອງໂດຍກອງທັບປຸກລະດົມຫຼາຍຄັ້ງ ຍ້ອນຖືກສະເໜີໃຫ້ຍົກເລີກບາງມາດຕາທີ່ກ່ຽວຂ້ອງເຖິງກົດໝາຍອິດສະລາມ Sharia ນັ້ນ, ເລື່ອງພັກ Salafish Nour ປະກາດເຂົ້າຮ່ວມຄະນະກຳມະການປັບປຸງລັດຖະທຳມະນູນໄດ້ກໍ່ຄວາມຕົກສະເງີ້ໃຫ້ແກ່ຫາງສຽງ. ຄຳປະກາດນີ້ຖືກຍົກອອກມາໃນສະພາບທີ່ພັກອ້າຍນ້ອງອິດສະລາມ, ເຊິ່ງແມ່ນກຳລັງອິດສະລາມໃຫຍ່ກວ່າໝູ່ຢູ່ປະເທດນີ້, ເດັດດຽວຄັດຄ້ານລັດຖະບານຊົ່ວຄາວ ແລະ ກອງທັບ ດ້ວຍເລື່ອງປຸກລະດົມຂະບວນການແຫ່ຂະບວນປະທ້ວງຂະໜາດໃຫຍ່ທີ່ບໍ່ເຄີຍມີມາກ່ອນ. ອະທິບາຍກ່ຽວກັບຂໍ້ຕົກລົງນີ້, ຜູ້ຕາງໜ້າພັກ Salafish Nour ໃຫ້ຮູ້ວ່າ, ໜຶ່ງໃນບັນດາຈຸດປະສົງເຂົ້າຮ່ວມຄະນະກຳມະການປັບປຸງລັດຖະທຳມະນູນນັ້ນ ແມ່ນເພື່ອແນໃສ່ຮັກສາສີສັນຂອງອິດສະລາມໄວ້.
ນັກໄຈ້ແຍກຫຼາຍທ່ານຫວັງວ່າ, ການກະທຳຂອງພັກ Salafish Nour ຈະເປັນການປະກອບສ່ວນຊຸກຍູ້ວິວັດທະນາການຂ້າມຜ່ານໂດຍກອງທັບປຸກລະດົມເມື່ອວັນທີ 3/7 ພາຍຫຼັງໂຄ່ນລົ້ມທ່ານ Morsi. ໃນວິວັດທະນາການນີ້, ອີຢີບຈະປັບປຸງລັດຖະທຳມະນູນປີ 2012, ຈັດຕັ້ງການເລືອກຕັ້ງສະພາແຫ່ງຊາດ ແລະ ປະທານາທິບໍດີ.
ໃນຂະນະນັ້ນ, ການແຫ່ຂະບວນປະທ້ວງ ໂດຍພັກອ້າຍນ້ອງອິດສະລາມປຸກລະດົມພວມມີສັນຍານອ່ອນລົງ. ຕົວຢ່າງຄືໃນການແຫ່ຂະບວນຢູ່ເມືອງ Maadi, ໃກ້ກັບສຳນັກງານສານລັດຖະທຳມະນູນສູງສຸດທີ່ນະຄອນຫຼວງ Cairo ມີຜູ້ເຂົ້າຮ່ວມພຽງປະມານ 300 ຄົນເທົ່ານັ້ນ ແລະ ການແຫ່ຂະບວນບາງຄັ້ງໂດຍອົງການອ້າຍນ້ອງອິດສະລາມປຸກລະດົມຢູ່ທ້ອງຖີ່ນຈຳນວນໜຶ່ງກໍ່ມີຂອບຂະໜາດນ້ອຍ. ການແຫ່ຂະບວນທັງໝົດເຫຼົ່ານັ້ນບໍ່ພາໄປເຖິງການປະທະກັນກັບກຳລັງປ້ອງກັນຄວາມສະຫງົບ ຫຼື ຊາວທ້ອງຖີ່ນ. ເມື່ອທຽບໃສ່ກ່ອນນີ້ກໍ່ເຫັນວ່າ, ຈຳນວນຜູ້ເຂົ້າຮ່ວມການແຫ່ຂະບວນປະທ້ວງໂດຍພັກອ້າຍນ້ອງອິດສະລາມປຸກລະດົມໄດ້ຫຼຸດລົງຢ່າງວ່ອງໄວ.
ຕໍ່ໜ້າສັນຍານທີ່ດີດັ່ງກ່າວ, ທ່ານ Ahmed El-Meslemani, ທີ່ປຶກສາສື່ສານຂອງປະທານາທິບໍດີຊົ່ວຄາວອີຢີບ, ຢືນຢັນວ່າ, ປະເທດອາຟະລິກາເໜືອ ນີ້ ໄດ້ຜ່ານຜ່າກົນອຸບາຍໂຄ່ນລົ້ມລັດ ແລະ ປະຈຸບັນພວມດຳເນີນການເຄື່ອນໄຫວຕ້ານຄືນບັນດາພາກສ່ວນຫົວຮຸນແຮງໃນອົງການອ້າຍນ້ອງອິດສະລາມ (MB) ແລະ ບັນດາກຳລັງອິດສະລາມພັນທະມິດ. ທ່ານຜູ້ນີ້ກໍ່ເປີດເຜີຍວ່າ, ລັດຖະບານພວມມີການພົບປະ ແລະ ປຶກສາຫາລືກັບບັນດາກຳລັງການເມືອງພາຍໃນປະເທດ, ໃນນັ້ນມີພັກ Salafish Nour, ພ້ອມທັງຢືນຢັນວ່າ ລະບອບການເມືອງໄລຍະຂ້າມຜ່ານ ໂດຍກອງທັບປຸກລະດົມນັ້ນພວມດຳເນີນຢ່າງຖືກທິດ. ໃນສະພາບການນັ້ນລັດຖະບານຊົ່ວຄາວອີຢີບ ໄດ້ຕົກລົງຖອນເວລາປະກາດສະພາວະສຸກເສີນໃນຍາມກາງຄືນໃຫ້ສັ້ນລົງ.
ເຖິງວ່າເຈົ້າໜ້າທີ່ອີຢີບ ປະກາດຄືແນວນັ້ນກໍ່ຕາມ, ແຕ່ຫາງສຽງຍັງສະແດງຄວາມວິຕົກກັງວົນວ່າ, ການຈັບຕົວບັນດາສະມາຊິກຂອງອົງການອ້າຍນ້ອງອິດສະລາມ ອາດຈະພາໃຫ້ອົງການນີ້ຮ່ວມສຳພັນກັບພາກສ່ວນອິດສະລາມຫົວຮຸນແຮງຂອງຕ່າງປະເທດ ເພື່ອຍາດເອົາສິດອຳນາດ. ຍິ່ງກວ່ານັ້ນ, ເລື່ອງສານປະກາດປ່ອຍຕົວປະທານາທິບໍດີ Hosni Mubarak ເປັນອິດສະລະ ກໍ່ແມ່ນສາຍເຫດທີ່ອາດຈະເຮັດໃຫ້ສະພາບມີຄວາມສັບສົນຍິ່ງຂຶ້ນ. ໃນຂະນະນັ້ນ, ລັດຖະບານຊົ່ວຄາວພວມປະເຊີນໜ້າກັບຄຳສັ່ງລົງໂທດຂອງຝ່າຍຕາເວັນຕົກ. ສະຫະພາບເອີລົບ, ເຊິ່ງແມ່ນຄູ່ຮ່ວມມືການຄ້າໃຫຍ່ກວ່າໝູ່ຂອງອີຢີບ, ໄດ້ຕົກລົງຢຸດຕິການຂາຍອຸປະກອນປ້ອງກັນຄວາມສະຫງົບ ແລະ ອາວຸດໃຫ້ອີຢີບ. ອາເມລິກາ ປະກາດຈະພິຈາລະນາຄືນກ່ຽວກັບແຫຼ່ງທຶນໃຫ້ປະເທດນີ້. ທ່ານນາຍົກລັດຖະມົນຕີອີຢີບ Hazem El-Beblawi ກໍ່ເນັ້ນໜັກເຖິງຄວາມວິຕົກກັງວົນຂອງຫາງສຽງ ເມື່ອຕອບສຳພາດຕໍ່ຊ່ອງໂທລະພາບ ABC News, ວ່າປະເທດນີ້ຈະຕ້ອງປະເຊີນໜ້າກັບບາງບັນຫາຫຍຸ້ງຍາກທີ່ສຸດ.
ຖ້າຫາກລັດຖະບານຊົ່ວຄາວຢູ່ອີຢີບບໍ່ແກ້ໄຂສາຍເຫດຂອງການປະທະກັນໄດ້ຢ່າງເຖິງຖອງ ແລະ ຮູ້ໝູນໃຊ້ກາລະໂອກາດທີ່ມີຢູ່ແລ້ວ, ຄວາມປາຖະໜາຂອງປະຊາຊົນປະເທດນີ້ກ່ຽວກັບພື້ນຖານການເມືອງ, ເສດຖະກິດຈະບໍ່ສາມາດປະກົດຜົນເປັນຈິງໄດ້.