(vovworld)- ວັນທີ 20/7 ທີ່ວາລະໄຂກອງປະຊຸມຄັ້ງປະຖົມມະລຶກຂອງສະພາແຫ່ງຊາດຫວຽດນາມ ຊຸດທີ XIV, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ມີບົດກ່າວປາໄສສຳຄັນ, ເຕື້ອງເຖິງບັນດາຫນ້າທີ່ຈຸດສຸມໃນກອງປະຊຸມຄັ້ງນີ້ ແລະ ບັນດາການກຳນົດທິດພັດທະນາໃຫຍ່ຂອງສະພາແຫ່ງຊາດໃນອາຍຸການ 5 ປີ ຄືແຕ່ປີ 2016-2021. ຕໍ່ໄປນີ້ ບັນນາທິການວິທະຍຸກະຈາຍສຽງຫວຽດນາມ ຄັດສະເຫນີ ບາງເນື້ອໃນຕົ້ນຕໍໃນບົດກ່າວປາໄສຂອງທ່ານເລຂາທິການໃຫຍ່ ຫງວຽນຟູຈ້ອງ.
ທ່ານເລຂາທິການໃຫຍ່ຫງວຽນຟູຈ້ອງກ່າວຄຳປາໄສທີ່ກອງປະຊຸມ
|
ບົດກ່າວປາໄສຂອງທ່ານ ເລຂາທິການໃຫຍ່ ຫງວຽນຟູຈ້ອງ ເນັ້ນຫນັກ ເຖິງພາລະບົດບາດການສ້າງລະບົບກົດໝາຍ, ຍົກສູງຄຸນນະພາບ, ປະສິດທິຜົນການຕິດຕາມກວດການສູງສຸດ; ປະສິດທິຜົນການເຄື່ອນໄຫວການພົວພັນກັບຕ່າງປະເທດ, ຍົກສູງປະສິດທິຜົນສິດຕິດຕາມກວດກາຂອງສະມາຊິກສະພາແຫ່ງຊາດ (ສສຊ) ແຕ່ລະທ່ານກໍຄືບັນດາອົງການຂອງສະພາແຫ່ງຊາດ.
ສູ້ຊົນຮອດປີ 2020 ມີບັນດາກົດໝາຍທີ່ຈຳເປັນຢ່າງພຽງພໍ, ຕອບສະຫນອງຄວາມຮຽກຮ້ອງຕ້ອງການໃນການສ້າງສາປະເທດຊາດ
ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າເຖິງຫນ້າທີ່ທຳອິດຂອງສະພາແຫ່ງຊາດຊຸດທີ XIV ນັ້ນແມ່ນ ຄວນສຸມໃສ່ກໍ່ສ້າງ ແລະ ປັບປຸງລະບົບກົດໝາຍຢ່າງຄົບຊຸດ, ເປັນເອກະພາບ ແລະ ມີຄວາມເປັນໄປໃຫ້ສົມບູນແບບ. ຢາກເຮັດໄດ້ຄືແນວນັ້ນ, ສະພາແຫ່ງຊາດ ຕ້ອງຕັ້ງຫນ້າຍົກສູງຄຸນນະພາບນິຕິບັນຍັດໃຫ້ສູງກວ່າ, ປ່ຽນໃຫມ່ຂັ້ນຕອນສ້າງກົດໝາຍ, ຮັບປະກັນລັກສະນະປະຊາທິປະໄຕ, ລະບອບນິຕິບັນຍັດ, ຄວາມເປີດເຜີຍ, ໂປ່ງໃສຂອງລະບົບກົດໝາຍ.
“ສຸມໃສ່ເຂົ້າໃນບັນດາຂົງເຂດສ້າງລັດແຫ່ງກົດໝາຍ, ຮັບປະກັນສິດທິມະນຸດ, ສິດພົນລະເມືອງ, ຖືເປັນສຳຄັນລະບົບກົດໝາຍກ່ຽວກັບທີ່ດິນ, ຊັບພະຍາກອນທຳມະຊາດ, ການເງິນ, ເງິນຕາ, ການລົງທຶນດຳເນີນທຸລະກິດ, ສິ່ງແວດລ້ອມ ພ້ອມທັງເອົາໃຈໃສ່ເຖິງບັນດາຂົງເຂດວິທະຍາສາດ, ເຕັກໂນໂລຊີ, ການສຶກສາບຳລຸງສ້າງ. ໃນການສ້າງລະບົບກົດໝາຍ, ຍາມໃດກໍຕ້ອງຢືດໝັ້ນຫລັກໝັ້ນແນວຄິດຮັກສາຈຸດໝາຍ, ທັດສະນະແນວທາງຂອງພັກຢ່າງໝັ້ນຄົງ, ເອົາໃຈໃສ່ຄົ້ນຄວ້າບົດຮຽນຈາກບັນດາປະເທດ, ຮັບເອົາສິ່ງທີ່ເໝາະສົມກັບສະພາບການຂອງຫວຽດນາມ, ເດັດຂາດບໍ່ປະໃຫ້ອິດທິກຳລັງທີ່ເປັນປໍລະປັກສວຍໃຊ້ດ້ວຍວິທີເຮັດໃຫ້ລະບົບກົດໝາຍໄປຕາມເສັ້ນທາງອື່ນ.”
ຍົກສູງປະສິດທິຜົນການຕິດຕາມກວດກາ, ຄຸນນະພາບຕັດສິນບັນດາບັນຫາສຳຄັນຂອງປະເທດຊາດ, ຍູ້ແຮງການເຄື່ອນໄຫວການພົວພັນຕ່າງປະເທດ
ສະພາແຫ່ງຊາດຊຸດທີ XIV ຄວນຍົກສູງຄຸນນະພາບການຕິດຕາມກວດກາ, ຜ່ານການຕິດຕາມກວດກາຢ່າງທັນການ, ມີຄຳເຫັນປັບປຸງໃຫ້ເໝາະສົມ, ດັດປັບສິ່ງທີ່ຜິດພາດໃນວິວັດການປະຕິບັດຢ່າງທັນການ, ຄົ້ນຄ້ວາເພີ່ມເຕີມ, ສ້າງເອກະສານທີ່ກ່ຽວຂ້ອງເຖິງການເຄື່ອນໄຫວຕິດຕາມກວດກາໃຫ້ສົມບູນແບບ. ການເຄື່ອນໄຫວຕິດຕາມກວດກາຕ້ອງສຸມໃສ່ເຂົ້າໃນບັນດາບັນຫາສຳຄັນ, ບັນຫາຮ້ອນເຮັ່ງຊື່ງປະຊາຊົນ ແລະ ຜູ້ມີສິດເລືອກຕັ້ງສົນໃຈ; ເພີ່ມທະວີບົດບາດຕິດຕາມກວດກາຂອງບັນດາຄະນະ ສສຊ, ບັນດາກຳມາທິການຂອງສະພາແຫ່ງຊາດ, ສືບຕໍ່ບັນດາການເຄື່ອນໄຫວຊັກຖາມ ແລະ ຕອບຄຳຊັກຖາມ, ຮັບປະກັນເສີມຂະຫຍາຍປະຊາທິປະໄຕ, ເພີ່ມລັກສະນະປຶກສາຫາລື.
ຕາມທ່ານເລຂາທິການໃຫຍ່ ຫງວຽນຟູຈ້ອງແລ້ວ, ສະພາແຫ່ງຊາດ ຊຸດທີ XIV ຄວນຍົກສູງຄວາມຮັບຜິດຊອບກວ່າອີກ ແລະ ຍົກສູງຄຸນນະພາບການຕັດສິນບັນດາບັນຫາສຳຄັນຂອງປະເທດຊາດ, ເປັນຕົ້ນແມ່ນບັນຫາເສດຖະກິດ ສັງຄົມ, ງົບປະມານແຫ່ງລັດ, ກ່ຽວກັບບັນດາໂຄງການລົງທຶນສຳຄັນທີ່ມີຄວາມສະດຸ້ງໄວສົ່ງຜົນກະທົບເຖິງສະຖຽນລະພາບເສດຖະກິດມະຫາພາກ, ສົ່ງຜົນສະທ້ອນຢ່າງເລິກເຊິ່ງກວ້າງຂວາງເຖິງສິດຜົນປະໂຫຍດຂອງຜູ້ມີສິດເລືອກຕັ້ງເປັນຈຳນວນຫລວງຫລາຍ ຕະຫລອດຮອດ ການປ້ອງກັນຊາດປ້ອງກັນຄວາມສະຫງົບ, ການຮັບປະກັນຜົນປະໂຫຍດລວມຂອງປະເທດຊາດ.
ທີ່ກອງປະຊຸມຄັ້ງນີ້, ສະພາແຫ່ງຊາດ ຈະດຳເນີນການເລືອກຕັ້ງ ຫລືໃຫ້ສັດຕະຍາບັນບັນດາຖານະຕຳແຫນ່ງການນຳຫລັກແຫລ່ງບັນດາອົງການລັດ ອາຍຸການ 2016-2021. ນີ້ແມ່ນຫນ້າທີ່ສຳຄັນຍິ່ງ, ຮຽກຮ້ອງຈິດໃຈ, ຄວາມຮັບຜິດຊອບສູງຂອງບັນດາ ສສຊ ບົນພື້ນຖານຊາບຊືມ ແລະ ປະຕິບັດທິດທາງວຽກງານພະນັກງານຢ່າງສະເຫມີຕົ້ນສະເຫມີປາຍ ໂດຍກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກໄດ້ວາງອອກ. ເລຂາທິການໃຫຍ່ ຫງວຽນຟູຈ້ອງ ໄດ້ສະເຫນີບັນດາ ສສຊ ມີຄວາມປະຊາທິປະໄຕ ປຶກສາຫາລື, ມີຄວາມສະຫລາດສ່ອງໄສໃນການຄັດເລືອກ ຫລື ໃຫ້ສັດຕະຍາບັນບັນດາຜູ້ເໝາະສົມບັນດາຖານະຕຳແຫນ່ງການນຳຫລັກແຫລ່ງຂອງບັນດາອົງການໃນສະພາແຫ່ງຊາດ, ລັດ, ລັດຖະບານ.
ກ່ຽວກັບວຽກງານການຕ່າງປະເທດ, ເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ:
“ສືບຕໍ່ຍູ້ແຮງບັນດາການເຄື່ອນໄຫວພົວພັນຕ່າງປະເທດຂອງສະພາແຫ່ງຊາດ, ປະກອບສ່ວນປະຕິບັດແນວທາງການຕ່າງປະເທດເປີດກວ້າງຢ່າງມີປະສິດທິຜົນ, ຫັນການພົວພັນກັບຕ່າງປະເທດຂອງພັກ, ລັດ ແລະ ປະຊາຊົນເປັນຫລາຍຮູບຫລາຍແບບຫລາຍຝ່າຍ. ເພີ່ມທະວີການພົວພັນຕ່າງປະເທດແບບອງຝ່າຍ ສ້າງການຫັນປ່ຽນຢ່າງຕັ້ງຫນ້າໃນການພົວພັນມິດຕະພາບ, ການຮ່ວມມືກັບສະພາແຫ່ງຊາດບັນດາປະເທດຕ່າງໆ, ຍູ້ແຮງການເຄື່ອນໄຫວການຕ່າງປະເທດຫລາຍຝ່າຍໃນບັນດາເວທີປາໄສພາກພື້ນ ແລະ ສາກົນ.”
ຍົກສູງປະສິດທິຜົນການເຄື່ອນໄຫວຂອງບັນດາອົງການຂອງສະພາແຫ່ງຊາດ, ສະມາຊິກສະພາແຫ່ງຊາດ
ຕາມທ່ານ ເລຂາທິການໃຫຍ່ ຫງວຽນຟູຈ້ອງ ແລ້ວ, ຄຸນນະພາບການເຄື່ອນໄຫວຂອງສະພາແຫ່ງຊາດ ແມ່ນອີງໃສ່ສ່ວນຫລາຍຈາກບັນດາອົງການຂອງສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ. ສະນັ້ນ ຄວນສືບຕໍ່ປ່ຽນໃຫມ່, ຍົກສູງປະສິດທິຜົນການເຄື່ອນໄຫວຂອງຄະນະປະຈຳສະພາແຫ່ງຊາດ, ເພີ່ມທະວີສິດອຳນາດຂອງບັນດາອົງການຂອງສະພາແຫ່ງຊາດ. ກ່ຽວກັບ ສະມາຊິກສະພາແຫ່ງຊາດ, ທ່ານ ເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ:
“ສຳລັບບັນດາສະມາຊິກສະພາແຫ່ງຊາດ ເຖິງວ່າໃນຖານະຕຳແຫນ່ງວຽກງານໃດ ກໍຄວນມີສະຕິກ່ຽວກັບສິດ, ຄວາມຮັບຜິດຊອບຂອງຜູ້ເປັນຕົວແທນຂອງປະຊາຊົນ, ປະຕິບັດໂຄງການດຳເນີນງານເປັນຢ່າງດີ, ຕິດຕໍ່ພົວພັນກັບຜູ້ມີສິດເລືອກຕັ້ງເປັນປະຈຳ, ຕັ້ງຫນ້າ, ເປັນເຈົ້າການໃນການປະກອບສ່ວນກຳລັງເຫື່ອແຮງ, ພູມປັນຍາ, ປະກອບສ່ວນຍົກສູງປະສິດທິຜົນການເຄື່ອນໄຫວຂອງສະພາແຫ່ງຊາດ ແລະ ບັນດາອົງການຂອງສະພາແຫ່ງຊາດ. ພ້ອມທັງເຊີດຊູ ຈັນຍາບັນຄຸນສົມບັດ, ດຸໝັ່ນຂະຫຍັນພຽນ, ປະຢັດມັດທະຍັດ, ສັດຊື່ບໍລິສຸດ, ເຫັນແກ່ສ່ວນລວມບໍ່ເຫັນແກ່ສ່ວນຕົວ, ເດັດດ່ຽວຕໍ່ສູ້ຕ້ານທຸກປະກົດການອາດຍາສິດ, ສໍ້ລາດບັງຫລວງ, ຟຸມເຟືອຍ ແລະ ບັນດາປະກົດການຫຍໍ້ທໍ້ອື່ນ.”
ຄວາມຮຽກຮ້ອງຕ້ອງການໃນການສ້າງສາ ແລະ ປົກປັກຮັກສາປະເທດຊາດໃນໄລຍະຈະມາເຖິງ ໄດ້ວາງໃຫ້ສະພາແຫ່ງຊາດຊຸດທີ XIV ແລະ ບັນດາສະມາຊິກສະພາແຫ່ງຊາດ ບັນດາຫນ້າທີ່ຫນັກຫນ່ວງ. ທ່ານ ເລຂາທິການໃຫຍ່ ຫງວຽນຟູຈ້ອງ ປາດຖະຫນາວ່າ ສະພາແຫ່ງຊາດຊຸດທີ XIV ຈະມີຫລາຍມາດຕະການບຸກທະລຸ, ປ່ຽນໃຫມ່ເນື້ອໃນ ແລະ ວິທີການເຄື່ອນໄຫວເພື່ອປະຕິບັດສຳເລັດພາລະກຳຂອງຕົນ, ສືບຕໍ່ສ້າງຂີດໝາຍໃຫມ່ໃນປະຫວັດສາດອັນສະງ່າລາສີ ແລະ ວິວັດການພັດທະນາຂອງສະພາແຫ່ງຊາດຫວຽດນາມ.