(vovworld)- ວັນທີ 2/11, ແຜນຮ່າງ ສ້າງໂຄງປະກອບພື້ນຖານເສດຖະກິດຄືນໃຫມ່ ໄລຍະ 2016 -2020 ເປັນຄັ້ງທຳອິດໄດ້ນຳມາປຶກສາຫາລືຄົບຄະນະທີ່ຫໍປະຊຸມໃນຂອບເຂດກອງປະຊຸມສະໄຫມສາມັນເທື່ອທີ 2 ສະພາແຫ່ງຊາດຫວຽດນາມຊຸດທີ 14. ແຜນຮ່າງມີຄວາມໝາຍສຳຄັນໃນການປ່ຽນແປງໂຄງປະກອບພື້ນຖານເສດຖະກິດຄືນໃຫມ່, ສ້າງໂຄງປະກອບເສດຖະກິດໃຫ້ເໝາະສົມ, ເພື່ອບັນລຸລະດັບການເຕີບໂຕໃຫຍ່ກວ່າໃນໄລຍະຈະມາເຖິງ.
ພາບປະກອບ:TTXVN
|
ໄລຍະ 2011-2015, ຫວຽດນາມ ໄດ້ດຳເນີນການ ສ້າງໂຄງປະກອບພື້ນຖານເສດຖະກິດຄືນໃຫມ່ ຕາມ ການກຳນົດ 4 ທິດທາງ, ໃນນັ້ນ ມີການປະຕິບັດ 3 ຈຸດສຸມ ສ້າງໂຄງປະກອບພື້ນຖານເສດຖະກິດຄືນໃຫມ່ຢ່າງຂ້ຽວຂາດ ແລະ ມີປະສິດທິຜົນ (ສ້າງໂຄງປະກອບການລົງທຶນຄືນໃຫມ່, ສ້າງໂຄງປະກອບລະບົບວິສາຫະກິດຄືນໃຫມ່, ສ້າງໂຄງປະກອບລະບົບການເງິນ ທະນາຄານຄືນໃຫມ່”; ສືບຕໍ່ສ້າງໂຄງປະກອບຄືນໃຫມ່ ແລະ ພັດທະນາໂຄງປະກອບເຂດເສດຖະກິດຄືນໃຫມ່ໃຫ້ເໝາະສົມ. ເຖິງຢ່າງໃດກໍຕາມ ໝາກຜົນການສ້າງໂຄງປະກອບເສດຖະກິດຄືນໃຫມ່ຍັງບໍ່ທັນບັນລຸຄຳຮຽກຮ້ອງຕ້ອງການຄືດັ່ງໄດ້ວາງອອກ.
ໃນໄລຍະ 2016- 2020, ຄາດໝາຍສັງລວມຂອງແຜນການ ສ້າງໂຄງປະກອບພື້ນຖານເສດຖະກິດຄືນໃຫມ່ ແມ່ນເພື່ອສ້າງໂຄງປະກອບເສດຖະກິດໃຫ້ເໝາະສົມ ແລະ ຂະຫຍັນຂັນເຄື່ອນກວ່າ, ມີສະມັດຕະພາບສູງກວ່າ, ມີກຳລັງຄວາມສາມາດແກ້ງແຍ້ງສູງກວ່າ, ຮັບປະກັນການເຕີບໂຕຂຽວ, ສະອາດ, ໝັ້ນຄົງເຂັ້ມແຂງ.
ວາງຫລາຍແຜນການສ້າງໂຄງປະກອບເສດຖະກິດຄືນໃຫມ່
ສ້າງໂຄງປະກອບພື້ນຖານເສດຖະກິດຄືນໃຫມ່ 2016-2020 ໄດ້ຮັບການສ້າງຂຶ້ນຕາມ 2 ແຜນການຄື: ການປະຕິບັດການສ້າງໂຄງປະກອບຢ່າງຂ້ຽວຂາດ ແລະ ມີຫລາຍບາດກ້າວບຸກທະລຸ (ແຜນການທີ 1) ແລະ ຍູ້ໄວການສ້າງໂຄງປະກອບຄືນໃຫມ່ (ແຜນການທີ 2). ທັງ 2 ແຜນການນີ້ໄດ້ຮັບການຮັບຮູ້ວ່າ ລ້ວນແຕ່ນຳມາເຊິງບັນດາການກະທົບຢ່າງຕັ້ງຫນ້າໃຫ້ແກ່ພື້ນຖານເສດຖະກິດ ແລະ ຮູບແບບການເຕີບໂຕຂຽວຄື: ເຮັດໃຫ້ລະດັບການເຕີບໂຕ GDPເພີ່ມຂຶ້ນຢ່າງວ່ອງໄວ, ຮັກສາໄພເງິນເຟີ້ຢູ່ໃນລະດັບເປັນປົກກະຕິ, ຫລຸດຜ່ອນການຂາດດຸ່ນງົບປະມານແຫ່ງລັດ, ເພີ່ມປະສິດທີຜົນການລົງທຶນ ແລະ ປະກອບສ່ວນຫັນປ່ຽນຮູບແບບເສດຖະກິດ. ໃນນັ້ນ ແຜນການສ້າງໂຄງປະກອບຄືນໃຫມ່ຢ່າງຂ້ຽວຂາດ ໄດ້ສ້າງບັນດາໝາກຜົນຈະແຈ້ງກວ່າ, ພິເສດ ໃນໄລຍະກາງ ແລະ ຍາວ. ໃນແຜນການ ສ້າງໂຄງປະກອບພື້ນຖານເສດຖະກິດຄືນໃຫມ່
ໄລຍະ 2016-2020 ນີ້, ບັນດາຄາດໝາຍ ສ້າງໂຄງປະກອບພື້ນຖານເສດຖະກິດຄືນໃຫມ່ ສ່ວນຫລາຍໄດ້ວາງອອກຢ່າງລະມັດລະວັງ ແລະ ປະຕິບັດຕາມແຜນການທີ 2, ເຖິງວ່າ ມີການສຳຜັດກັບແຜນການທີ 1 ໃນເນື້ອໃນ ສ້າງໂຄງປະກອບພື້ນຖານເສດຖະກິດຄືນໃຫມ່ ອາດຈະຍູ້ໄວຄວາມຄືບຫນ້າ. ທ່ານ ເຈີນຮ່ວາງເງິນ, ສະມາຊິກສະພາແຫ່ງຊາດ ຄະນະນະຄອນ ໂຮ່ຈິມີນ ໃຫ້ຂໍ້ສັງເກດວ່າ:
“ລັດຖະບານ ໄດ້ຍົກອອກຫລາຍມາດຕະການ, ໃນນັ້ນ ວາງອອກບັນດາແຜນການ, ໝາຍຄວາມວ່າ ພວກເຮົາໄດ້ຄາດຄະເນລ່ວງຫນ້າບັນດາສິ່ງທ້າທາຍໃນສະພາບການພື້ນຖານເສດຖະກິດ ຫວຽດນາມ ພວມເຊື່ອມໂຍງຢ່າງເລິກເຊິ່ງ,ກວ້າງຂວາງ, ອາດຈະຖືກຜົນກະທົບ ຈາກສະພາບການເສດຖະກິດ ສັງຄົມໂລກຢ່າງງ່າຍດາຍ. ຂ້າພະເຈົ້າຄິດວ່າ ບັນດາແຜນການນີ້ແມ່ນມີຄວາມຈຳເປັນທີ່ສຸດ. ພິເສດ ແຜນຮ່າງກໍເຕື້ອງເຖິງໄມ້ງັດ, ມາດຕະການແກ້ໄຂກ່ຽວກັບການລະດົມທຶນ, ງົບປະມານແຫ່ງລັດ, ເຕື້ອງເຖິງບັນດາການກະທົບເຖິງພື້ນຖານເສດຖະກິດ.”
ປະຕິບັດ 5 ເນື້ອໃນຈຸດສຸມໃນການສ້າງໂຄງປະກອບພື້ນຖານເສດຖະກິດຄືນໃຫມ່ຢ່າງມີປະສິດທິຜົນ
ແຜນການຍົກອອກ 5 ເນື້ອໃນ ກວມລວມຫນ້າທີ່ສຳຄັນທັງໝົດຂອງການ ສ້າງໂຄງປະກອບພື້ນຖານເສດຖະກິດຄືນໃຫມ່, ຈັດແບ່ງລະອຽດຫນ້າທີ່ຂອງທ້ອງຖິ່ນດ້ວຍ 70 ຫນ້າທີ່. ໃນ 5 ຂົງເຂດຈຸດສຸມ, ມີ 2 ຂົງເຂດໃຫມ່ ນັ້ນແມ່ນ: ສ້າງໂຄງປະກອບລາຍຮັບ, ລາຍຈ່າຍງົບປະມານ ແລະ ຫນີ້ສາທາລະນະຄືນໃຫມ່ ເພື່ອຮັບປະກັນຄວາມປອດໄພຄວາມໝັ້ນຄົງໃຫ້ແກ່ງົບປະມານແຫ່ງລັດ. ທ່ານຮອງນາຍົກລັດຖະມົນຕີ ເວືອງດີງເຫ້ວ, ສະມາຊິກສະພາແຫ່ງຊາດ ແຂວງ ຮ່າຕີງ ຢືນຢັນວ່າ: ໃນການ ສ້າງໂຄງປະກອບພື້ນຖານເສດຖະກິດຄືນໃຫມ່, ບັນຫາປະຢັດການໃຊ້ຈ່າຍ ຕ້ອງແມ່ນລັດຖະນະໂຍບາຍ ດ້ວຍທັດສະນະໃຊ້ຈ່າຍໃນຄວາມສາມາດຂອງພື້ນຖານເສດຖະກິດ ແລະ ກູ້ຢືມທຶນໃນຄວາມສາມາດຈະຊຳລະຫນີ້ສິນໄດ້; ສູ້ຊົນເພີ່ມລາຍຮັບເພື່ອເພີ່ມລາຍຈ່າຍ, ລາຍຮັບບໍ່ບັນລຸໄດ້ຕາມແຜນ ຕ້ອງຫລຸດຜ່ອນລາຍຈ່າຍ, ຕ້ອງເຄັ່ງຄັດໃນນະໂຍບາຍການເງິນ. ໃນການສ້າງໂຄງປະກອບລາຍຮັບ, ລາຍຈ່າຍງົບປະມານຄືນໃຫມ່, ທ່ານຮອງນາຍົກລັດຖະມົນຕີ ເວືອງດີງເຫ້ວ ເນັ້ນຫນັກວ່າ: ລັດຖະບານ ກຳນົດ ບໍ່ເພີ່ມອັດຕາສ່ວນລະດົມງົບປະມານ, ບໍ່ເພີ່ມອັດຕາພາສີອາກອນ ແຕ່ຕ້ອງເປີດກວ້າງຮາກຖານເກັບພາສີອາກອນ. ລັດຖະບານສົ່ງເສີມບັນດາຄອບຄົວດຳເນີນທຸລະກິດຄວນສ້າງວິສາຫະກິດ ແລະ ເພີ່ມທະວີການຄຸ້ມຄອງພາສີອາກອນຢູ່ບັນດາຮາກຖານນີ້ ພ້ອມທັງຊຸກຍູ້ການເລີ່ມປະກອບອາຊີບເພື່ອສ້າງຕັ້ງວິສາຫະກິດ.
ເພື່ອຍົກສູງປະສິດທິຜົນ ສ້າງໂຄງປະກອບພື້ນຖານເສດຖະກິດຄືນໃຫມ່, ທ່ານ ຟຸ່ງວັນຮຸ່ງ, ສະມາຊິກສະພາແຫ່ງຊາດ ແຂວງ ກາວບັ່ງ ສະເຫນີວ່າ: ລັດຖະບານ ຄວນຂ້ຽວຂາດ, ໃກ້ຊິດຕິດແທດກວ່າ, ຍູ້ແຮງຄວາມຮັບຮູ້ກ່ຽວກັບ ສ້າງໂຄງປະກອບພື້ນຖານເສດຖະກິດຄືນໃຫມ່ຢູ່ບັນດາຂະແຫນງການ, ທ້ອງຖິ່ນຕ່າງໆ.
“ໃນແຜນການ ສ້າງໂຄງປະກອບພື້ນຖານເສດຖະກິດຄືນໃຫມ່ ໄລຍະ 2016-2020, ເລື່ອງຕິດຕາມກວດກາວິວັດການສ້າງໂຄງປະກອບຄືນໃຫມ່ ຄວນໄດ້ຮັບການຜັນຂະຫຍາຍ. ຂ້າພະເຈົ້າປາດຖະຫນາວ່າ ໃນກອງປະຊຸມເທື່ອນີ້ ສະພາແຫ່ງຊາດຈະອອກມະຕິສະເພາະກ່ຽວກັບການສ້າງໂຄງປະກອບຄືນໃຫມ່. ລັດຖະບານ ຜັນຂະຫຍາຍການປະຕິບັດຢ່າງງ່າຍດາຍກວ່າ. ນອກນັ້ນ ຄວນເອົາໃຈໃສ່ເຖິງປັດໄຈມະນຸດ. ຜູ້ມີສິດເລືອກຕັ້ງປາດຖະຫນາວ່າ: ພັກ, ລັດຖະບານມີຄວາມຂ້ຽວຂາດກວ່າໃນການຕ້ານການສໍ້ລາດບັງຫລວງ, ຕ້ານການສະແຫວງຫາຜົນປະໂຫຍດເປັນກຸ່ມ ເພື່ອໃຫ້ພາລະກິດສ້າງໂຄງປະກອບເສດຖະກິດຄືນໃຫມ່ສຳເລັດຜົນ.”
ທ່ານ ຟ້າມຟູກວກ, ສະມາຊິກສະພາແຫ່ງຊາດ ຄະນະນະຄອນໂຮ່ຈິມີນ ຖືວ່າ: ແຜນການສ້າງໂຄງປະກອບພື້ນຖານເສດຖະກິດຄືນໃຫມ່ຄວນກຳນົດບົດບາດຂອງປະຊາຄົມວິສາຫະກິດ ຮ່ວມກັບລັດຖະບານໃນວິວັດການນີ້ ຕື່ມອີກ. ບົນພື້ນຖານນັ້ນ ສະມາຊິກສະພາແຫ່ງຊາດ ສະເຫນີວ່າ:
“ກ່ຽວກັບການພັດທະນາເສດຖະກິດພາກເອກະຊົນ, ຄຽງຄູ່ກັບເລື່ອງມີຫົວຄິດປະດິດສ້າງໃນການເລີ່ມປະກອບອາຊີບ, ລັດຖະບານ ຄວນສະຫນັບສະຫນູນການສ້າງຕັ້ງບັນດາກຸ່ມບໍລິສັດເສດຖະກິດພາກເອກະຊົນໃຫຍ່. ກ່ຽວກັບການ ສ້າງໂຄງປະກອບພື້ນຖານເສດຖະກິດແຫ່ງລັດຄືນໃຫມ່, ສະເຫນີ ຄວນສ້າງອົງການຄຸ້ມຄອງທຶນ, ຊັບສິນຂອງລັດໃນວິວັດການຫັນລັດວິສາຫະກິດເປັນຫຸ້ນສ່ວນໂດຍໄວ ເພື່ອຫລີກລ້ຽງການຮົ່ວໄຫລຊັບສິນ, ຄວນນຳໃຊ້ແຫລ່ງລາຍຮັບຈາກການຫັນລັດວິສາຫະກິດເປັນຫຸ້ນສ່ວນໃຫ້ແກ່ການລົງທຶນພັດທະນາ. ຂ້າພະເຈົ້າກໍສະເຫນີ ກຳນົດ 4 ກຳລັງຫນູນໃຫ້ແກ່ການສ້າງໂຄງປະກອບເສດຖະກິດຄືນໃຫມ່ຄື: ເສດຖະກິດພາກເອກະຊົນ, ເສດຖະກິດແຫ່ງລັດ, ພາກທີ່ມີເງິນລົງທຶນຂອງຕ່າງປະເທດ, ຊາວກະສິກອນ.”
ຫວຽດນາມໄດ້ສ້າງແຜນການສ້າງໂຄງປະກອບເສດຖະກິດຄືນໃຫມ່ແຕ່ປີ 2016 -2020 ໃນສະພາບການສ້າງຮູບແບບການເຕີບໂຕເສດຖະກິດ ຍັງອີງໃສ່ສ່ວນຫລາຍຈາກບັນດາປັດໄຈສົ້ນອອກ, ຄຸນນະພາບການເຕີບໂຕ, ສະມັດຕະພາບແຮງງານ ແລະ ກຳລັງແກ້ງແຍ້ງຂອງພື້ນຖານເສດຖະກິດ ຍັງຢູ່ໃນລະດັບຕ່ຳ ແລະ ການປັບປຸງຍັງຊັກຊ້າ. ສະນັ້ນ ການປະຕິບັດການ ສ້າງໂຄງປະກອບພື້ນຖານເສດຖະກິດຄືນໃຫມ່ ໄລຍະ 2016 -2020 ຢ່າງມີປະສິດທິຜົນຈະມີຜົນກະທົບໃຫຍ່, ປະກອບສ່ວນສ້າງ ແລະ ພັດທະນາການສ້າງໂຄງປະກອບເສດຖະກິດຄືນໃຫມ່ໃຫ້ເໝາະສົມ, ປັບປຸງກຳລັງແຮງພາຍໃນເທື່ອລະກ້າວເພື່ອພັດທະນາແບບຍືນຍົງ.