(vovworld)-ໃນປີ 2013, ສະພາແຫ່ງຊາດຫວຽດນາມໄດ້ສ້າງຂີດໝາຍພົ້ນເດັ່ນດ້ວຍການເຄື່ອນໄຫວສຳຄັນຫລາຍຢ່າງ,ມີຜົນສະທ້ອນເຖິງຊີວິດທາງດ້ານການເມືອງຂອງປະເທດຊາດ, ສ້າງປະຖົມປັດໄຈສຳຄັນໃຫ້ແກ່ການເສິມຂະຫຍາຍປະສິດທິຜົນບັນດາພາລະບົດບາດໂດຍລັດຖະທຳມະນູນກຳນົດຂອງບັນດາອົງການມີສິດອຳນາດແຫ່ງລັດສູງສູດ.
ກອງປະຊຸມສະໄຫມສາມັນເທື່ອທີ 5 ສະພາແຫ່ງຊາດຫວຽດນາມ
ຊຸດທີ 13
ພາບ:internet
|
ການເຄື່ອນໄຫວຂອງສະພາແຫ່ງຊາດຊຸດທີ 13 ປີ 2013 ແມ່ນສະແດງໃຫ້ເຫັນຢ່າງຈະແຈ້ງຜ່ານກອງປະຊຸມສະໄຫມສາມັນເທື່ອທີ 5 ແລະ ທີ 6. ມີຫລາຍລັດຖະນະໂຍບາຍສຳຄັນໄດ້ຮັບການຮັບຮອງເອົາຈາກສະພາແຫ່ງຊາດ, ໃນນັ້ນ ສຳຄັນກວ່າໝູ່ແມ່ນການລົງຄະແນນສຽງໄວ້ວາງໃຈສຳລັບບັນດາຕຳແຫນ່ງໂດຍສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນ, ການຮັບຮອງເອົາລັດຖະທຳມະນູນສະບັບປັບປຸງ, ການຮັບຮອງເອົາກົດໝາຍວ່າດ້ວຍທີ່ດິນສະບັບປັບປຸງ ພ້ອມກັບບັນດາລັດຖະນະໂຍບາຍກ່ຽວກັບການພັດທະນາເສດຖະກິດສັງຄົມ.
ລົງຄະແນນສຽງໄວ້ວາງໃຈ-ການເຄື່ອນໄຫວໃຫ່ມທີ່ກອງປະຊຸມຂອງສະພາແຫ່ງຊາດ
ເປັນຄັ້ງທຳອິດພາຍຫລັງ 67 ປີນັບແຕ່ເມື່ອກອງປະຊຸມສະໄຫມສາມັນເທື່ອທຳອິດປີ 1946, ສະພາແຫ່ງຊາດຫວຽດນາມ ດຳເນີນການລົງຄະແນນສຽງໄວ້ວາງໃຈສຳລັບ 47 ຕຳ່ແຫນ່ງໂດຍສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນ. ນີ້ແມ່ນການດຳເນີນຊີວິດດ້ານການເມືອງສຳຄັນ, ແມ່ນບາດກ້າວໃຫຍ່ໃນການເຄື່ອນໄຫວຕິດຕາມກວດກາຂອງສະພາແຫ່ງຊາດເພື່ອຕີລາຄາກ່ຽວກັບບັນດາຜູ້ທີ່ໄດ້ຮັບການເລືອກຕັ້ງຫລືໃຫ້ສັດຕະຍາບັນຈາກສະພາແຫ່ງຊາດເພື່ອເຊີດຊູຄວາມຮັບຜິດຊອບຂອງສະມາຊິກສະພາແຫ່ງຊາດ(ສສຊ)ແຕ່ລະທ່ານໃນການເລືອກເຟັ້ນຜູ້ມີຄວາມເກັ່ງກ້າສາມາດ, ມີຄຸນສົມບັດໃຫ້ແກ່ປະເທດຊາດ. ເຖິງວ່າ ຈຸດປະສົງຂອງການລົງຄະແນນສຽງໄວ້ວາງໃຈແມ່ນເພື່ອຍົກສູງປະສິດທິຜົນການຕິດຕາມກວດກາຂອງສະພາແຫ່ງຊາດ ແຕ່ນີ້ກໍແມ່ນສັນຍານເປັນຫນ້າຊື່ນຊົມກ່ຽວກັບລັກສະນະປະຊາທິປະໄຕ ແລະ ລັກສະນະຜູ້ຕາງຫນ້າຢ່າງແທ້ຈິງຂອງອົງການສູງສຸດຂອງປະເທດຊາດໂດຍປະຊາຊົນເລືອກຕັ້ງ. ທ່ານປະທານສະພາແຫ່ງຊາດ ຫງວຽນຊີງຮູ່ງ ຕີລາຄາວ່າ:
“ໝາກຜົນລົງຄະແນນສຽງໄວ້ວາງໃຈຂອງສະພາແຫ່ງຊາດໄດ້ສອ່ງສອງຢ່າງຈິງຈັງສະພາບເສດຖະກິດສັງຄົມ, ການປ້ອງກັນຊາດປ້ອງກັນຄວາມສະຫງົບ, ການຕ່າງປະເທດ ແລະ ບັນດາການເຄື່ອນໄຫວຕຸລາການຂອງປະເທດຊາດ. ນີ້ກໍແມ່ນບົດຮຽນທີ່ດີເພື່ອໃຫ້ບັນດາອົງການ,ອົງການຈັດຕັ້ງມີຄວາມຮັບຜິດຊອບຢູ່ສູນກາງ ແລະ ທ້ອງຖິ່ນ, ສະພາປະຊາຊົນທຸກຂັ້ນຄິດໄລ່ຊັ່ງຊາ, ໝູນໃຊ້ເມື່ອຜັນຂະຫຍາຍການລົງຄະແນນສຽງໄວ້ວາງໃຈສຳລັບບັນດາຜູ້ດຳລົງຕຳແຫນ່ງໂດຍສະພາປະຊາຊົນເລືອກຕັ້ງໃນໄລຍະຈະມາເຖິງ, ຮັບປະກັນການເພີ່ມທະວີຜົນສັກສິດ, ປະສິດທິຜົນການຕິດຕາມກວດກາຂອງບັນດາອົງການໂດຍປະຊາຊົນເລືອກຕັ້ງ, ຕອບສະຫນອງຄວາມມຸ່ງມາດປາດຖະຫນາຂອງປະຊາຊົນ.”
ຮັບຮອງເອົາຮ່າງກົດໝາຍຫລາຍສະບັບທີ່ສຳຄັນ
ປີ 2013, ວຽກງານສ້າງກົດໝາຍຂອງສະພາແຫ່ງຊາດໄດ້ຮັບການເສີມຂະຫຍາຍຢ່າງມີປະສິດທິຜົນ,ໃນນັ້ນ ຕ້ອງເຕື້ອງເຖິງເລື່ອງສະພາບແຫ່ງຊາດຮັບຮອງເອົາລັດຖະທຳມະນູນສະບັບປັບປຸງ. ນີ້ໄດ້ຮັບການຕີລາຄາວ່າແມ່ນເຫດການການເມືອງ-ນິຕິກຳທີ່ມີລັກສະນະປະຫວັດສາດ, ເປີດໄລຍະໃຫມ່ຂອງກິດຈະການສ້າງສາ ແລະ ປົກປັກຮັກສາປະເທດຊາດ. ເລື່ອງຮັບຮອງເອົາລັດຖະທຳມະນູນສະບັບປັບປຸງໄດ້ຮັບຖືວ່າແມ່ນຮັບປະກັນດ້ານການເມືອງ-ນິຕິກຳຢ່າງໝັ້ນຄົງເພື່ອໃຫ້ປະເທດຫວຽດນາມກ້າວຂຶ້ນຢ່າງໝັ້ນຄົງຕໍ່ຫນ້າບັນດາສິ່ງທ້າທາຍໃຫມ່ຂອງຍຸກປະຈຸບັນ. ທ່ານນາງ ຫງວຽນແທງຫາຍ, ສສຊ ແຂວງ ຮ່ວາບີ່ງ ຢືນຢັນວ່າ:
“ຂ້າພະເຈົ້າເຊື່ອໝັ້ນວ່າ, ລັດຖະທຳມະນູນສະບັບປັບປຸງໄດ້ຮັບຮອງເອົາ ຈະປະກອບສ່ວນຢ່າງຕັ້ງຫນ້າເຂົ້າໃນການຊຸກຍູ້ການພັດທະນາເສດຖະກິດສັງຄົມໃນໄລຍະຈະມາເຖິງ, ພິເສດຈະປະກອບສ່ວນຈຳກັດທຸກຂໍ້ຄົງຂ້າງ, ຂັດແຍ້ງ, ກ້າວກ່າຍລະຫວ່າງບັນດາກົດໝາຍນັບແຕ່ກ່ອນມາຮອດປະຈຸບັນ.”
ພ້ອມກັບເລ່ືອງຮັບຮອງເອົາລັດຖະທຳມະນູນສະບັບປັບປຸງ ປີ 2013, ສະພາແຫ່ງຊາດໄດ້ຮັບຮອງເອົາກົດໝາຍເກືອບ 20 ສະບັບ ແລະ ໃຫ້ຄຳເຫັນໃສ່ຮ່າງກົດໝາຍອື່ນຫລາຍສະບັບ. ນີ້ລ້ວນແຕ່ແມ່ນບັນດາຮ່າງກົດໝາຍສຳຄັນ, ປະກອບສ່ວນຊຸກຍູ້ການພັດທະນາເສດຖະກິດສັງຄົມ, ວິທະຍາສາດເຕັກໂນໂລຊີ, ປັບປຸງການປ້ອງກັນຊາດປ້ອງກັນຄວາມສະຫງົບ ແລະ ພັດທະນາປະເທດຊາດແບບຍືນຍົງ. ໃນນັ້ນ ເປັນຫນ້າສົນໃຈແມ່ນຮ່າງກົດໝາຍວ່າດ້ວຍທີ່ດິນສະບັບປັບປຸງ. ນີ້ແມ່ນກົດໝາຍສົ່ງຜົນກະທົບໂດຍກົງເຖິງທຸກດ້ານຂອງຊີວິດທາງດ້ານເສດຖະກິດສັງຄົມ, ສະຖຽນລະພາບ, ການພັດທະນາແບບຍືນຍົງຂອງປະເທດຊາດ ແລະ ຊີວິດການເປັນຢູ່ຂອງປະຊາຊົນ. ທ່ານຮອງປະທານສະພາແຫ່ງຊາດ ອວງຈູລືວ ເນັ້ນຫນັກວ່າ:
“ກົດໝາຍວ່າດ້ວຍທີ່ດິນສະບັບປັບປຸງໄດ້ຮັບການປັບປຸງຕາມທິດຕ້ອງຮັບປະກັນບັນດາຂໍ້ກຳນົດຖອນຄືນທີ່ດິນຢ່າງແຫນ້ນແຟ້ນ, ຕິດພັນກັບສິດອຳນາດຂອງສະພາແຫ່ງຊາດ, ລັດຖະບານ, ສະພາປະຊາຊົນ,ຄະນະກຳມະການປະຊາຊົນ. ໃນການຖອນຄືນທີ່ດິນຕ້ອງອີງໃສ່ຫລັກການເປີດເຜີຍໂປ່ງໃສການຊົດເຊີຍຕ້ອງປະຕິບັດຖືກຕ້ອງກັບການກຳນົດຂອງກົດໝາຍ ແລະ ໃນບັນດາກໍລະນີທີ່ຈຳເປັນ.”
ເພີ່ມທະວີການເຜີຍແຜ່ຂໍ້ມູນຂ່າວສານເຖິງຜູ້ມີສິດເລືອກຕັ້ງ
ດ້ວຍໂຄງການເຄື່ອນໄຫວຕາມໄລຍະເວລາທີ່ກຳນົດ, ໃນປີ 2013, ວາລະເຮັດວຽກຫລາຍຄັ້ງຂອງສະພາແຫ່ງຊາດຖືກອອກອາກາດໂດຍກົງທາງວິທະຍຸ, ໂທລະພາບເພື່ອໃຫ້ຜູ້ມີສິດເລືອກຕັ້ງຕິດຕາມກວດກາ, ປະກອບສ່ວນສະຫນອງຂໍ້ມູນຂ່າວທີ່ມີລັກສະນະຊື່ຕົງ, ທັນການກ່ຽວກັບການເຄື່ອນໄຫວທີ່ກອງປະຊຸມສະພາແຫ່ງຊາດເຖິງຜູ້ມີສິດເລືອກຕັ້ງ. ທ່ານ ເລຍືຕຽນ,ສສຊ ແຂວງ ກວ້າງຈີ້, ຕີລາຄາວ່າ:
“ກອງປະຊຸມສະໄຫມສາມັນຄັ້ງມໍ່ມານີ້, ພິເສດແມ່ນອາຍຸການສະພາແຫ່ງຊາດຊຸດທີ 13, ສະພາແຫ່ງຊາດ ແລະ ຄະນະປະຈຳສະພາແຫ່ງຊາດໄດ້ມີແຜນນະໂຍບາຍເປີດເຜີຍຫລາຍກວ່າ. ກ່ອນນັ້ນ ພຽງມີວາລະປະຊຸມໄຂ, ອັດ, ການຊັກຖາມຫລືການປຶກສາຫາລືກ່ຽວກັບເສດຖະກິດສັງຄົມເທົ່ານັ້ນ. ໄລຍະມໍ່ໆມານີ້ ແມ່ນການຕິດຕາມກວດກາຫົວເລື່ອງສະເພາະ, ບາງກົດໝາຍ, ຮ່າງລັດຖະທຳມະນູນປີ 1992 ສະບັບປັບປຸງ, ປຶກສາຫາລືເພື່ອໃຫ້ປະຊາຊົນກຳໄດ້ຢ່າງລະອຽດກວ່າ. ນີ້ແມ່ນກາລະໂອກາດທີ່ດີເພື່ອໃຫ້ສະພາແຫ່ງຊາດເຜີຍແຜ່ຂໍ້ມູນຂ່າວສານເຖິງຜູ້ມີສິດເລືອກຕັ້ງ.”
ພ້ອມກັບບັນດາຂີດໝາຍດັ່ງກ່າວ, ປີ 2013, ສະພາແຫ່ງຊາດໄດ້ຮັບຮອງເອົາບັນດາມະຕິກ່ຽວກັບການພັດທະນາເສດຖະກິດສັງຄົມ, ສ້າງປະຖົມປັດໄຈເພື່ອໃຫ້ຫວຽດນາມສຳເລັດບັນດາຈຸດໝາຍທີ່ວາງອອກ. ຄືຮັບຮອງເອົາມະຕິກ່ຽວກັບການດັດປັບແຜນງົບປະມານແຫ່ງລັດປີ 2013 ແລະ ແຜນງົບປະມານແຫ່ງລັດປີ 2014, ຂໍ້ຕົກລົງຍົກລະດັບເພດານລາຍຈ່າຍງົບປະມານແຫ່ງລັດເກີນດຸນໃຫ້ແກ່2 ປີແມ່ນຂຶ້ນເຖິງ 5,3% GDP.
ອາດຈະຢືນຢັນໄດ້ວ່າ ບັນດາຂີດໝາຍສຳຄັນຊື່ງສະພາແຫ່ງຊາດບັນລຸໄດ້ໃນປີ 2013 ແມ່ນມີລັກສະນະປະຫວັດສາດ, ແມ່ນກຳລັງຫນູນເພື່ອໃຫ້ອົງການມີສິດອຳນາດແຫ່ງລັດສູງສຸດສືບຕໍ່ປະຕິບັດ 3 ພາລະບົດບາດນິຕິບັນຍັດ, ຕັດສິນບັນດາບັນຫາສຳຄັນຂອງປະເທດຊາດ ແລະ ຕິດຕາມກວດກາສູງສຸດສຳລັບການເຄື່ອນໄຫວ ທັງໝົດຂອງລັດເປັນຢ່າງດີ.