(vovworld)-ໃນມື້ປຶກສາຫາລືກ່ຽວກັບສະພາບການເສດຖະກິດສັງຄົມໃນວັນທີ 24/10 ໃນຂອບເຂດກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມຊຸດທີ 13, ສະພາບເສດຖະກິດຫວຽດນາມ ແລະ ກຳນົດທິດພັດທະນາໃນໄລຍະຈະມາເຖິງໄດ້ຮັບການເຕື້ອງເຖິງຈາກສະມາຊິກສະພາແຫ່ງຊາດ (ສສຊ) ຫລາຍທ່ານ. ນັກຂ່າວວິທະຍຸກະຈາຍສຽງຫວຽດນາມຂໍຄັດສະເຫນີບາງຄຳເຫັນຂອງ ສສຊ ກ່ຽວກັບການແກ້ໄຂຄວາມຫຍຸ້ງຍາກໃຫ້ແກ່ພື້ນຖານເສດຖະກິດ.
ຕີລາຄາສັງລວມ, ສສຊ ຫລາຍທ່ານໃຫ້ຂໍ້ສັງເກດວ່າ ປີ 2013 ພື້ນຖານເສດຖະກິດຫວຽດນາມ ບໍ່ທັນສາມາດຫລຸດພົ້ນອອກຈາກໄລຍະຫຍຸ້ງຍາກໄດ້ເທື່ອ. ສິ່ງດັ່ງກ່າວບໍ່ພຽງແຕ່ສະແດງໃຫ້ເຫັນການເຕີບໂຕບັນລຸລະດັບຕຳ່ເທົ່ານັ້ນ ຫາກຍັງສະແດງຢູ່ໃນການຟື້ນຕົວ ແລະ ຄວາມສາມາດນຳໃຊ້ທຶນຮອນຊັກຊ້າອີກດ້ວຍ. ສະນັ້ນ ຄວນມີນະໂຍບາຍເໝາະສົມເພື່ອຢຸດຕິສະພາບການດັ່ງກ່າວ. ທ່ານ ເຈີນຢູລີກ, ສສຊ ນະຄອນໂຮ່ຈິມີນ ສະເຫນີລັດຖະບານສ້າງຍຸດທະສາດພັດທະນາຍາວນານກວ່າ, ບໍ່ຄວນສ້າງແຜນການສະເພາະປີ 2014 ຫາກຕ້ອງຄິດໄລ່ເຖິງໄລຍະກາງໃຫ້ທັງໄລຍະ 2014-2015.
“ລະອຽດ ຄວນວາງຈຸດໝາຍການເຕີບໂຕສະເລ່ຍໃນ 2 ປີ ປະມານ 6%, ບໍ່ຄວນຟ້າວຟັ່ງຊຸກຍູ້ຄວາມຕ້ອງການ ແລະ ຕະຫລາດດ້ວຍທຸກວິທີ. ດັດຊະນີລາຄາໃຊ້ສອຍໃນ 2 ປີຈະມາເຖິງ ຄວນສູ້ຊົນຈຳກັດຢູ່ລະດັບປະມານ 7%. ລັດຖະບານໄດ້ສະເຫນີເພີ່ມລາຍຈ່າຍງົບປະມານເກີນດຸນໃນ 2 ປີ 2014-2015 ໃຫ້ຂຶ້ນເຖິງ 5,3%. ແຕ່ສິ່ງສຳຄັນທີ່ສຸດແມ່ນຕ້ອງແກ້ໄຂຄວາມຫຍຸ້ງຍາກໃນການເພີ່ມສິນເຊື່ອ. ຖ້າຫາກສິນເຊື່ອບໍ່ເພີ່ມຂຶ້ນເຖິງ 15% ພື້ນຖານເສດຖະກິດຍາກທີ່ສາມາດຫລຸດພົ້ນອອກຈາກສະພາບຊັກຊ້າໄດ້. ຄວນກຳນົດການຮັກສາເສດຖະກິດມະຫາພາກເປັນປົກກະຕິ ແມ່ນຫນ້າທີ່ຕົ້ນຕໍນັບແຕ່ນີ້ຮອດປີ 2015 ເພື່ອສຸມໃສ່ສ້າງໂຄງປະກອບພື້ນຖານເສດຖະກິດຄືນໃຫມ່.”
ສສຊ ຫລາຍທ່ານໃຫ້ຂໍ້ສັງເກດວ່າ ປີ 2013 ພື້ນຖານເສດຖະກິດຫວຽດນາມ ບໍ່ທັນສາມາດຫລຸດພົ້ນອອກຈາກໄລຍະຫຍຸ້ງຍາກໄດ້ເທື່ອ
ພາບ: internet
|
ກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່, ລະອຽດ ໃນ 3 ຂົງເຂດສຳຄັນ ນັ້ນແມ່ນການລົງທຶນຂອງລັດ, ລະບົບທະນາຄານການຄ້າ, ບັນດາອົງການການເງິນ ແລະ ລະບົບລັດວິສາຫະກິດ, ເຖິງວ່າໄດ້ຮັບການປະຕິບັດຈາກລັດຖະບານແລ້ວກໍຕາມ ແຕ່ຕາມບັນດາ ສສຊ ຍັງບໍ່ທັນບັນລຸປະສິດທິຜົນຄືດັ່ງຄວາມຫວັງ. ທ່ານ ເຈືອງຈ້ອງເຫງ້ຍ, ສສຊ ນະຄອນ ຮ່າໂຮ່ຈິມີນ ສະເຫນີ ຄວນສ້າງຕັ້ງຄະນະກຳມະການສະເພາະກິດກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່. ຄະນະກຳມະການຈະນຳເຂົ້າເຄື່ອນໄຫວຢ່າງເປັນທາງການໃນປີ 2014 ດ້ວຍບັນດາພາກສ່ວນຄື: ສະມາຊິກຂອງສະພາແຫ່ງຊາດ, ບັນດາອົງການຈັດຕັ້ງ, ອົງການກຳນົດລາຄາ, ຕິດຕາມກວດກາເອກະລາດ. ທ່ານ ດີງຊວນຖາວ,ສສຊ ນະຄອນ ຮ່າໂນ້ຍ ສະເຫນີ: ລັດຖະບານ ໄຈ້ແຍກ, ເຮັດແຈ້ງ ແລະ ວາງອອກຫລາຍມາດຕະການໃຫ້ແຂງແຮງກວ່າເພື່ອຊຸກຍູ້ການລົງທຶນຂອງລັດ. ໃນຂະນະນັ້ນ ຢູ່ຂົງເຂດລັດວິສາຫະກິດ, ຕາມທ່ານ ເຈີນຢູລີກ ສສຊ ນະຄອນ ໂຮ່ຈິມີນ ແລ້ວ, ສືບຕໍ່ສະເຫນີຖ້າຫາກລັດຢາກດຳເນີນການຫັນລັດວິສາຫະກິດເປັນຫຸ້ນສ່ວນ, ວິສາຫະກິດແຫ່ງໃດບໍ່ຈຳເປັນຮັກສາຫຸ້ນສ່ວນ ຕ້ອງເອົາທຶນຮອນສ່ວນ ນັ້ນນຳໃຊ້ໃຫ້ວຽກອື່ນ.
“ພວກເຮົາຫັນບໍລິສັດລູກເປັນຫຸ້ນສ່ວນ ແລ້ວມອບທຶນໃຫ້ບໍລິສັດແມ່ ເຮັດຄືແນວນັ້ນບໍ່ມີປະສິດທິຜົນ. ຕາມຂ້າພະເຈົ້າແລ້ວ, ກຸ່ມບໍລິສັດແຫ່ງລັດຄວນຮັກສາ 51% ຫຸ້ນສ່ວນ, 49% ຍັງເຫລືອຕ້ອງຂາຍໃຫ້ບໍລິສັດອື່ນ. ຢາກສັບຊ້ອນຄືນ ຕ້ອງເບິ່ງສັງລວມແຕ່ລະໝວດ, ແຕ່ລະຂົງເຂດຊື່ງລັດຄວນລົງທຶນກຳນົດໃຫ້ຕະຫລາດ.”
ກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່ ຄວນໄດ້ຮັບການຜັນຂະຫຍາຍຢ່າງເປັນລະບົບກວ່າ. ທ່ານ ເຈີນຊວນຮ່ວາ, ສສຊ ແຂວງ ກວ໋າງນີງ ຖືວ່າ:
“ມະຕິກອງປະຊຸມຂອງຄະນະບໍລິຫານງານສູນກາງພັກກອມມູນິດຫວຽດນາມ ຄັ້ງທີ 3 ຊຸດທີ 11 ກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່ ແມ່ນຖືກຕ້ອງ ແຕ່ບັນດາມາດຕະການຕໍ່ໄປເພື່ອປະຕິບັດບໍ່ທັນຄົບຊຸດ. ຢາກປະຕິບັດການສ້າງໂຄງປະກອບພື້ນຖານເສດຖະກິດຄືນໃຫມ່ຢ່າງມີປະສິດທິຜົນ ຕ້ອງຮັບຟັງຄຳເຫັນຈາກຫລາຍຝ່າຍ.”
ກ່ຽວກັບການປະຕິບັດແຜນການ 5 ປີ (2011-2015), ຕາມ ສສຊ ຫລາຍທ່ານແລ້ວ, ຕໍ່ຫນ້າສະພາບການດັ່ງກ່າວ ລັດຖະບານບໍ່ຄວນຟ້າວຟັ່ງຊຸກຍູ້ຄວາມຕ້ອງການ, ຍູ້ການເຕີບໂຕສູງ. ບັນຫາຄຸນນະພາບຂອງການເຕີບໂຕ ແລະ ຮັກສາເສດຖະກິດມະຫາພາກຈຶ່ງແມ່ນບັນຫາຕ້ອງສຸມໃສ່ຕົ້ນຕໍ.
ລັດຖະບານຫວຽດນາມ ສຸ້ຊົນບັນລຸການເຕີບໂຕສະເລ່ຍ 6%/ປີໃຫ້ໄດ້ໃນ 2 ປີ 2014-2015. ບັນດາຂໍ້ສະເຫນີຂອງ ສສຊ ພ້ອມກັບບັນດາມາດຕະການ, ການຊີ້ນຳນຳພາຂອງລັດຖະບານ ຈະປະກອບສ່ວນຊ່ວຍພື້ນຖານເສດຖະກິດກັບຄືນສູ່ທ່າເຕີບໂຕຢ່າງໝັ້ນຄົງຫນັກແຫນ້ນກວ່າໃນໄລຍະຈະມາເຖິງ.