(vovworld) – ກອງປະຊຸມໃຫຍ່ສະຫະພັນ ລັດຖະສະພາສາກົນ IPU – 132 ຈະໄຂຂຶ້ນຢູ່ຮ່າໂນ້ຍ ເປັນເວລາ 5 ວັນຢ່າງເປັນທາງການ, ແຕ່ວັນທີ 28/3. ເປັນຄັ້ງທຳອິດທີ່ສະພາແຫ່ງຊາດຫວຽດນາມ ເປັນເຈົ້າພາບຈັດຕັ້ງເຫດການການທູດລັດຖະສະພາສຳຄັນທີ່ມີລະດັບສາກົນນີ້, ສະແດງໃຫ້ເຫັນຄວາມໄວ້ເນື້ອເຊື່ອໃຈຂອງເພື່ອນມິດສາກົນທີ່ສະຫງວນໃຫ້ແກ່ຫວຽດນາມ, ທັງເປັນຜົນງານຂອງຫວຽດນາມ ໃນກວ່າ 35 ປີທີ່ເປັນສະມາຊິກທີ່ຕັ້ງໜ້າ ແລະ ເປັນເຈົ້າການຂອງ IPU.
ປະທານສະພາແຫ່ງຊາດ ຫງວຽນຊິງຮຸ່ງ ກ່າວຄຳເຫັນທີ່IPU-130, Geneva
(ພາບ: ipu132vietnam.vn)
ສະພາແຫ່ງຊາດຫວຽດນາມ ໄດ້ຮັບເຂົ້າເປັນສະມາຊິກຂອງ ສະຫະພັນ ລັດຖະສະພາສາກົນ (IPU) ແຕ່ເດືອນ 4/1979. ເມື່ອເປັນ ສະມາຊິກຂອງ IPU, ຫວຽດນາມ ໄດ້ຮັບການຕີລາຄາສູງຈາກເພື່ອນມິດສາກົນໃນທຸກດ້ານ. ບໍ່ພຽງແຕ່ເຂົ້າຮ່ວມການເຄື່ອນໄຫວຕ່າງໆຂອງ IPU ຢ່າງຄົບຖ້ວນເທົ່ານັ້ນ, ສະພາແຫ່ງຊາດຫວຽດນາມ ຍັງປະກອບຄວາມເຫັນຫຼາຍຢ່າງກັບເພື່ອນມິດສາກົນ ແລະ ແບ່ງປັນບົດຮຽນໃນການປະຕິບັດບັນດາຄາດໝາຍພັດທະນາປະເທດຊາດອີກດ້ວຍ.
ເປັນເຈົ້າການເຂົ້າຮ່ວມການເຄື່ອນໄຫວຕ່າງໆຂອງ IPU
ສະພາແຫ່ງຊາດຫວຽດນາມ ຖືເລື່ອງເຂົ້າຮ່ວມການເຄື່ອນໄຫວຕ່າງໆຂອງ IPU ແມ່ນໜ້າທີ່ສຳຄັນອັນດັບໜຶ່ງໃນການເຄື່ອນໄຫວການທູດລັດຖະສະພາຫຼາຍຝ່າຍຂອງສະພາແຫ່ງຊາດ, ເພື່ອແນໃສ່ຊຸກຍູ້ ແລະ ປົກປ້ອງບັນດາສິດຜົນປະໂຫຍດຂອງຫວຽດນາມ, ສະແດງທັດສະນະແຫ່ງຊາດກ່ຽວກັບຄວາມເອົາໃຈໃສ່ລວມໃນທົ່ວໂລກ, ປະກອບສ່ວນຍົກສູງທີ່ຕັ້ງ, ບົດບາດຂອງສະພາແຫ່ງຊາດຫວຽດນາມ ເວົ້າສະເພາະ ແລະ ຫວຽດນາມ ເວົ້າລວມໃນເວທີສາກົນ. ນີ້ກໍ່ແມ່ນແຫ່ງທີ່ສະພາແຫ່ງຊາດຫວຽດນາມ ສາມາດສຳພັດດ້ວຍຫຼາຍເນື້ອໃນ, ບົດຮຽນໃນການເຄື່ອນໄຫວ ກໍ່ຄືພຶດຕິກຳຕົວຈິງທີ່ດີຂອງລັດຖະສະພາສາກົນ, ເພື່ອປະກອບສ່ວນປັບປຸງ ແລະ ຍົກສູງຄຸນນະພາບການເຄື່ອນໄຫວຂອງຕົນ.
ໃນໄລຍະ 35 ກວ່າປີທີ່ເປັນສະມາຊິກຂອງ IPU, ສະພາແຫ່ງຊາດຫວຽດນາມ ໄດ້ເປັນເຈົ້າການເຂົ້າຮ່ວມ ແລະ ປະກອບສ່ວນຢ່າງຕັ້ງໜ້າຢູ່ກອງປະຊຸມປະຈຳປີ ແລະ ກອງປະຊຸມຫົວເລື່ອງສະເພາະຕ່າງໆຂອງ IPU. ສະພາແຫ່ງຊາດຫວຽດນາມ ເປັນເຈົ້າພາບຈັດຕັ້ງບັນດາກອງປະຊຸມຫົວເລື່ອງສະເພາະຂອງ IPU ຫຼາຍຄັ້ງເຊັ່ນ: ກອງປະຊຸມພາກພື້ນອາຊີ - ປາຊີຝິກກ່ຽວກັບ “ການເພີ່ມທະວີບົດບາດຂອງລັດຖະສະພາໃນການປົກປ້ອງເດັກ“ ປີ 2006; ກອງປະຊຸມສຳມະນາພາກພື້ນອາຊີ - ປາຊີຝິກ ກ່ຽວກັບ “ບົດບາດຂອງລັດຖະສະພາໃນການປ້ອງກັນ ແລະ ຕ້ານ HIV/AIDS“ ປີ 2009. ທ່ານ ໂງດຶກແມ້ງ, ຮອງຫົວໜ້າກຳມາທິການການຕ່າງປະເທດ, ຫົວໜ້າອະອະນຸກຳມະການສື່ສານໂຄສະນາ IPU -132, ໃຫ້ຮູ້ວ່າ:
“ສະພາແຫ່ງຊາດຫວຽດນາມ ຢືນຢັນທີ່ຕັ້ງ, ບົດບາດຂອງຕົນໃນ IPU ເທື່ອລະກ້າວ, ແລະສະແດງອອກຜ່ານເລື່ອງເປັນເຈົ້າພາບຈັດຕັ້ງກອງປະຊຸມຫົວເລື່ອງສະເພາະຫຼາຍຄັ້ງຂອງ IPU ເຊັ່ນ: ບັນດາກອງປະຊຸມຫົວເລື່ອງສະເພາະກ່ຽວກັບບັນຫາສຸຂະພາບ, ຄວາມສະເໝີພາບລະຫວ່າງຍິງ - ຊາຍ. ພ້ອມກັບການຢັ້ງຢືນທີ່ຕັ້ງ, ບົດບາດຂອງຕົນ, ສະພາແຫ່ງຊາດຫວຽດນາມ ໄດ້ສະແດງໃຫ້ເຫັນລັກສະນະເປັນເຈົ້າການ, ຕັ້ງໜ້າຂອງຕົນໃນ IPU“.
ດ້ວຍການປະກອບສ່ວນຢ່າງຕັ້ງໜ້າຂອງຕົນ, ສະພາແຫ່ງຊາດຫວຽດນາມ ໄດ້ຮັບເລືອກຕັ້ງເປັນປະທານກຸ່ມພູມສາດການເມືອງພາກພື້ນອາຊີ - ປາຊີຝິກ ປີ 2006, ເປັນຜູ້ປະສານການເຄື່ອນໄຫວລວມຂອງ 27 ລັດຖະສະພາທີ່ເປັນສະມາຊິກ IPU ໃນພາກພື້ນນີ້ໂດຍກົງ. ປີ 2007, IPU -117 ໄດ້ເລືອກຕັ້ງຜູ້ຕາງໜ້າຂອງສະພາແຫ່ງຊາດຫວຽດນາມ ເຂົ້າຄະນະບໍລິຫານງານອາຍຸການ 2007-2011 ແລະ ເລືອກຕັ້ງຫວຽດນາມ ເປັນຮອງປະທານ IPU ໃນປີ 2009, ຜ່ານນັ້ນ, ຫວຽດນາມ ມີເງື່ອນໄຂປະກອບສ່ວນໂດຍກົງ ແລະ ແທດຈິງກວ່າອີກ ເຂົ້າໃນການປະຕິບັດບັນດາຄາດໝາຍສະຫັດສະວັດ ກ່ຽວກັບເລື່ອງສຳເລັດການສຶກສາຊັ້ນປະຖົມ, ເພີ່ມທະວີຄວາມສະເໝີພາບລະຫວ່າງຍິງ - ຊາຍ, ຍົກສູງບົດບາດ, ທີ່ຕັ້ງຂອງແມ່ຍິງຂື້ນຕື່ມ. ທ່ານ ໂງກວາງຊວນ, ຮອງຫົວໜ້າກຳມາທິການການຕ່າງປະເທດ, ສະພາແຫ່ງຊາດຫວຽດນາມ, ໃຫ້ຮູ້ວ່າ:
“ພວກຂ້າພະເຈົ້າຮູ້ສຶກເອກອ້າງທະນົງໃຈເມື່ອເວົ້າວ່າ, ສະພາແຫ່ງຊາດຫວຽດນາມ ນັບມື້ນັບກາຍເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບໃນອົງການຫຼາຍຝ່າຍນີ້, ດັ່ງນັ້ນພວກເຮົາບໍ່ພຽງແຕ່ເຂົ້າຮ່ວມການເຄື່ອນໄຫວຕ່າງໆຂອງອົງການນີ້ຢ່າງຄົບຖ້ວນເທົ່ານັ້ນ, ຫາກນັບມື້ນັບປະກອບຄວາມເຫັນ, ແບ່ງປັນບົດຮຽນຫຼາຍຢ່າງກັບເພື່ອນມິດສາກົນອີກດ້ວຍ. ນັ້ນແມ່ນສາຍເຫດທີ່ພາໃຫ້ IPU ເລືອກຕັ້ງຫວຽດນາມເຂົ້າອົງການການນຳຂອງ IPU “.
ອົງການ IPU – 132 - ຈຸດພົ້ນເດັ່ນທີ່ສຳຄັນໃນພື້ນຖານການທູດລັດຖະສະພາຫວຽດນາມ
ເລື່ອງຮັບຮູ້ການປະກອບສ່ວນຢ່າງໃຫຍ່ຫຼວງຂອງຫວຽດນາມ ເຂົ້າ IPU ສະແດງອອກຢ່າງຈະແຈ້ງ, ເມື່ອຫວຽດນາມ ໄດ້ຮັບມອບໜ້າທີ່ເປັນເຈົ້າພາບຈັດກອງປະຊຸມໃຫຍ່ IPU 132 ໃນທ້າຍສັບປະດານີ້, ຢູ່ຮ່າໂນ້ຍ. ນີ້ກໍ່ແມ່ນກາລະໂອກາດເພື່ອໃຫ້ຫວຽດນາມ ເຂົ້າຮ່ວມຢ່າງຕັ້ງໜ້າ, ລະອຽດກວ່າ, ປະກອບແນວຄວາມຄິດ, ຂໍ້ສະເໜີຫຼາຍກວ່າໃນ IPU 132. ສະພາແຫ່ງຊາດຫວຽດນາມ ຈະພ້ອມກັບບັນດາສະມາຊິກ IPU ປຶກສາຫາລືຫົວຂໍ້ສັງລວມນັ້ນແມ່ນ “ບັນດາຄາດໝາຍພັດທະນາແບບຍືນຍົງ: ຫັນຄຳເວົ້າເປັນການກະທຳ“, ຄາດຄະເນຈະຮັບຮອງເອົາບັນດາຮ່າງມະຕິເຊັ່ນ: ມະຕິສົງຄາມທາງເຄືອຂ່າຍອິນເຕີແນດ; ມະຕິສ້າງກົນໄກໃໝ່ກ່ຽວກັບການຄຸ້ມຄອງແຫຼ່ງນຳ້; ມະຕິກ່ຽວກັບກົດໝາຍສາກົນໃນສາຍພົວພັນກັບອະທິປະໄຕແຫ່ງຊາດ, ບໍ່ແຊກແຊງເຂົ້າວຽກງານພາຍໃນຂອງປະເທດຕ່າງໆ ແລະ ສິດທິມະນຸດ. ພິເສດ, IPU 132, ຄາກວ່າຈະອອກຖະແຫຼງການຮ່າໂນ້ຍ, ເຊິ່ງແມ່ນເອກະສານການເມືອງ - ການທູດ ກ່ຽວກັບບັນດາບັນຫາໃຫຍ່ທົ່ວໂລກ, ຖະແຫຼງການຮ່າໂນ້ຍ ຍັງແມ່ນສານສັນຕິພາບ, ມິດຕະພາບຂອງສະພາແຫ່ງຊາດ ແລະ ປະຊາຊົນຫວຽດນາມ ທີ່ສົ່ງເຖິງສະພາແຫ່ງຊາດ ແລະ ປະຊາຊົນທົ່ວໂລກ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ, ຢືນຢັນວ່າ:
“ພວກເຮົາຫວັງວ່າຮູບພາບປະເທດຊາດ, ປະຊາຊົນ ແລະ ປະຫວັດສາດ, ວັດທະນະທຳຫວຽດນາມ ຈະສ້າງເປັນຂີດໝາຍໃນກອງປະຊຸມຄັ້ງນີ້ ແລະ ນີ້ແມ່ນຈຸດເວລາເພື່ອໃຫ້ພວກເຮົາສະແດງໃຫ້ເຫັນຄວາມຕັ້ງໜ້າ, ເປັນເຈົ້າການໃນການເຊື່ອມໂຍງເຂົ້າກັບສາກົນ. ທີສອງແມ່ນບັນດາຂໍ້ສະເໜີຂອງຫວຽດນາມ ທີ່ວາລະປຶກສາຫາລືຫົວເລື່ອງສະເພາະຕ່າງໆ ຕ້ອງສະແດງໃຫ້ເຫັນຫຼັກໝັ້ນຮັກຫອມສັນຕິພາບຂອງປະເທດຊາດ ກໍ່ຄືມູນເຊື້ອວັດທະນະທຳປະຫວັດສາດອັນພິລະອາດຫານ, ຄວາມສະໜິດຕິດພັນ, ຈິດໃຈຮ່ວມມື, ເປີດກວ້າງການພົວພັນກັບເພື່ອນມິດສາກົນຢ່າງຈະແຈ້ງ“.
ເລື່ອງສະພາແຫ່ງຊາດຫວຽດນາມ ເປັນເຈົ້າພາບຈັດຕັ້ງ IPU 132, ຢູ່ຮ່າໂນ້ຍ ຈະມາເຖິງນັ້ນ, ແມ່ນຈຸດພົ້ນເດັ່ນໃນການເຄື່ອນໄຫວການທູດລັດຖະສະພາຂອງສະພາແຫ່ງຊາດຫວຽດນາມ, ປະກອບສ່ວນສະແດງໃຫ້ເຫັນແນວທາງການຕ່າງປະເທດສັນຕິພາບ, ມິດຕະພາບ, ເປີດກວ້າງ, ຫັນການພົວພັນກັບສາກົນຂອງພັກ ແລະ ລັດຫວຽດນາມ ເປັນຫຼາຍຮູບ, ຫຼາຍແບບ, ຫຼາຍຝ່າຍ, ແລະ ຢືນຢັນເຖິງການເຊືອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງຂອງຫວຽດນາມ.