(vovworld) - ທີ່ກອງປະຊຸມບັນດາປະທານສະພາແຫ່ງຊາດໂລກຄັ້ງທີ 4, ເຊິ່ງໄຂຂຶ້ນໃນວັນທີ 31/8 ຢູ່ສຳນັກງານສະຫະປະຊາຊາດ (ສປຊ) ທີ່ນິວຢອກ (ອາເມລິກາ), ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ມີບົດປາໄສສຳຄັນຕໍ່ໜ້າ 140 ຄະນະຜູ້ແທນລັດຖະສະພາຂັ້ນສູງ ທີ່ມາຈາກປະເທດຕ່າງໆໃນໂລກ. ວິທະຍຸກະຈາຍສຽງຫວຽດນາມ ຂໍຄັດສະເໜີເນື້ອໃນບົດປາໄສສຳຄັນນີ້ ຜ່ານບົດຂຽນ “ສະພາແຫ່ງຊາດຫວຽດນາມໃຫ້ຄຳໝັ້ນສັນຍາ ແລະ ກະທຳເພື່ອໂລກພັດທະນາຢ່າງໝັ້ນຄົງ“.
ທ່ານປະທານສະພາແຫ່ງຊາດ ຫງວຽນຊິງຮຸ່ງ
ຕ້ອນຮັບສະມາຊິກສະພາສູງອາເມລິກາ
ທ່ານປະທານສະພາແຫ່ງຊາດ ຫງວຽນຊິງຮຸ່ງ ຊີ້ແຈ້ງວ່າ, ສະພາແຫ່ງຊາດ ແມ່ນພື້ນຖານປະຊາທິປະໄຕ. ກອງປະຊຸມສຸດຍອດປະທານສະພາແຫ່ງຊາດບັນດາປະເທດໃນໂລກຄັ້ງນີ້ ແມ່ນໂອກາດເພື່ອທົບທວນຄືນບັນດາຄຳໝັ້ນສັນຍາ ເຊິ່ງສະພາແຫ່ງຊາດປະເທດຕ່າງໆໄດ້ຍົກອອກມາ ແລະ ຢືນຢັນຄືນບັນດາຄຳໝັ້ນສັນຍານັ້ນ, ດ້ວຍບັນດາເນື້ອຄວາມໃໝ່ທີ່ເໝາະສົມກັບສະພາບການໂລກທີ່ພວມປ່ຽນແປງໃນແຕ່ລະວັນ, ແຕ່ລະຊົ່ວໂມງ.
ມານະພະຍາຍາມສ້າງໂຄງການດຳເນີນງານພັດທະນາຢ່າງໝັ້ນຄົງ
ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ຢືນຢັນວ່າ, ທຸກປະເທດ, ຊົນຊາດໃນທົ່ວໂລກ ລ້ວນແຕ່ມີຄວາມມຸ້ງຫວັງກ່ຽວກັບໂລກສັນຕິພາບ ກໍ່ຄືຕັດສິນໃຈກໍ່ສ້າງພື້ນຖານປະຊາທິປະໄຕ. ເພື່ອເສີມຂະຫຍາຍປະຊາທິປະໄຕ, ແມ່ນຕ້ອງສ້າງຄວາມໄວ້ເນື້ອເຊື່ອໃຈເຊິ່ງກັນແລະກັນຢ່າງບໍ່ຢຸດຢັ້ງ, ຮັບປະກັນສັນຕິພາບຢ່າງໝັ້ນຄົງ, ຜ່ານການຮ່ວມມື, ການເຈລະຈາ. ເມື່ອສັນຕິພາບ ແລະ ປະຊາທິປະໄຕ ໄດ້ຮັບປະກັນແລ້ວ, ພື້ນຖານເພື່ອຊຸກຍູ້ຄວາມຈະເລີນ ແລະ ພັດທະນາແບບຍືນຍົງຈຶ່ງໄດ້ຮັບປະກັນ ແລະ ກົງກັນຂ້າມ, ເມື່ອມີປະຊາທິປະໄຕ ແລະ ການພັດທະນາຢ່າງໝັ້ນຄົງ ຈະສ້າງເງື່ອນໄຂໃຫ້ແກ່ການປັບປຸງສັນຕິພາບຢ່າງໝັ້ນຄົງ.
ຕາມທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ, ປະຊາຄົມໂລກພວມຮ່ວມແຮງຮ່ວມໃຈມານະພະຍາຍາມສ້າງໂຄງການດຳເນີນງານພັດທະນາໃໝ່ຢ່າງໝັ້ນຄົງ, ດ້ວຍຄາດໝາຍລົບລ້າງຄວາມອຶດຫີວ, ທຸກຍາກ, ແກ້ໄຂສະພາບຂາດຄວາມສະເໝີພາບ ແລະ ປົກປັກຮັກສາພິພົບໃຫ້ໂລກໃນພາຍພາກໜ້າ. ດ້ວຍຄວາມຕັດສິນໃຈດ້ານການເມືອງຢ່າງແຮງ, ບັນດາລັດຖະສະພາສະມາຊິກ IPU ໄດ້ຮັບຮອງເອົາຖະແຫຼງການຮ່າໂນ້ຍ “ບັນດາຄາດໝາຍພັດທະນາຢ່າງໝັ້ນຄົງ: ຫັນທັດສະນະເປັນການກະທຳ“ ທີ່ກອງປະຊຸມໃຫຍ່ IPU -132 ເຊິ່ງຈັດຂຶ້ນຢູ່ຮ່າໂນ້ຍ, ໃນເດືອນ 3/2015 ຜ່ານມາ. ບັນດາສະມາຊິກລັດຖະສະພາ ໄດ້ຢືນຢັນເຖິງວິໄສທັດພັດທະນາຢ່າງໝັ້ນຄົງ, ຖືປະຊາຊົນເປັນໃຈກາງປະຕິບັດບັນດາສິດທິມະນຸດ, ມອບສິດໃຫ້ທຸກຄົນເສີມຂະຫຍາຍຄວາມສາມາດບົ່ມຊ້ອນທັງໝົດ, ໂດຍອີງໃສ່ 3 ເສົາຄຳ້ຄື: ເສດຖະກິດ, ສັງຄົມ ແລະ ສິ່ງແວດລ້ອມ; ພ້ອມທັງຮັບປະກັນສັນຕິພາບ ແລະ ຄວາມໝັ້ນຄົງສາກົນ, ເຄົາລົບກົດບັດ ສປຊ ແລະ ກົດໝາຍສາກົນ.
ສະພາແຫ່ງຊາຫວຽດນາມ ເພື່ອໂລກແຫ່ງສັນຕິພາບ ແລະ ປະຊາທິປະໄຕ
ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ຊີ້ແຈ້ງວ່າ, ຜ່ານການຕໍ່ສູ້ຍາດເອົາເອກະລາດແຫ່ງຊາດມາຫຼາຍປີ, ພ້ອມກັບປະຊາຊົນປະເທດຕ່າງໆໃນໂລກ, ຍາມໃດປະຊາຊົນຫວຽດນາມ ກໍ່ຢາກໄດ້ດຳລົງຊີວິດໃນໂລກແຫ່ງສັນຕິພາບ ແລະ ປະຊາທິປະໄຕ. ຍ້ອນເຫດນັ້ນ, ຄາດໝາຍເພື່ອມຸ້ງໄປເຖິງ ແລະ ກຳລັງໜູນພັດທະນາຂອງຊາດຫວຽດນາມ ຍາມໃດກໍ່ແມ່ນ “ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ, ສີວິໄລ“.
ຍາມໃດຫວຽດນາມ ກໍຖືວ່າ ເພື່ອຮັບປະກັນປະຊາທິປະໄຕໃນການພົວພັນກັບສາກົນ, ປະເທດຕ່າງໆຕ້ອງເຄົາລົບ ແລະ ຍົກສູງບົດບາດຂອງການຮ່ວມມືກັບສາກົນ, ບົນພື້ນຖານກົດໝາຍສາກົນ ໃນການແກ້ໄຂບັນດາບັນຫາບໍ່ລົງລອຍກັນລະຫວ່າງປະເທດຕ່າງໆ. ໃນລະດັບຊາດ, ເພື່ອຮັບປກັນປະຊາທິປະໄຕ, ສະພາແຫ່ງຊາດຄວນມີບົດບາດສຳຄັນໃນການເພີ່ມທະວີບົດບາດຂອງລັດແຫ່ງອຳນາດນິຕິບັນຍັດ, ຮັບປະກັນລັກສະນະເຄັ່ງຄັດ ແລະ ສ່ອງໃສ, ທ່ຽງທຳຂອງກົດໝາຍ, ພ້ອມທັງປັບປຸງລະບົບກົດໝາຍ, ກົນໄກ, ນະໂຍບາຍ ແນໃສ່ຮັບປະກັນປະຕິບັດບັນດາສິດເສລີໂດຍພື້ນຖານຂອງປະຊາຊົນ.
ດ້ວຍຄວາມປາຖະໜາຢາກຮັກສາສັນຕິພາບ, ຍາມໃດຫວຽດນາມ ກໍ່ມີແຜນນະໂຍບາຍແກ້ໄຂຄວາມຂັດແຍ້ງກັນໂດຍສັນຕິວິທີ, ບົນພື້ນຖານເຄົາລົບບັນດາຫຼັກການຂອງກົດບັດ ສປຊ, ຂອງກົດໝາຍສາກົນ, ໃຫ້ຄຳໝັ້ນສັນຍາບໍ່ນຳໃຊ້ອາວຸດ ຫຼືຂົ່ມຂູ່ນຳໃຊ້ກຳລັງອາວຸດ, ເພື່ອຜົນປະໂຫຍດ ແລະ ຄວາມໝັ້ນຄົງລວມຂອງພາກພື້ນ ແລະ ຂອງໂລກ. ຫວຽດນາມ ກ່າວປະນາມບັນດາການກະທຳໃຊ້ຄວາມຮຸນແຮງ, ຫຼືຂົ່ມຂູ່ໃຊ້ກຳລັງອາວຸດ, ກໍ່ການຮ້າຍໃນທົ່ວໂລກຢ່າງແຮງ.
ເພື່ອປະຕິບັດຈຸດໝາຍພັດທະນາຢ່າງໝັ້ນຄົງ, ຫວຽດນາມ ກຳນົດແຈ້ງສາມເສົາຄຳ້ຂອງການພັດທະນານັ້ນແມ່ນ: ເສດຖະກິດ, ສັງຄົມ ແລະ ສິ່ງແວດລ້ອມ, ໃນນັ້ນຍົກສູງ ແລະ ເສີມຂະຫຍາຍບົດບາດເປັນເຈົ້າຂອງປະຊາຊົນ, ຖືການພັດທະນາຢ່າງໝັ້ນຄົງ ແມ່ນພາລະກິດຂອງທົ່ວປວງຊົນ.
ສຸດທ້າຍ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ເນັ້ນໜັກວ່າ, ຄວາມມຸ້ງຫວັງອັນຊອບທຳຂອງປະຊາຊົນແຕ່ລະຄົນໃນໂລກນີ້, ນັ້ນແມ່ນໄດ້ດຳລົງຊີວິດໃນໂລກແຫ່ງສັນຕິພາບ, ປະຊາທິປະໄຕ, ອິ່ມໜຳສຳລານ ແລະ ມີຄວາມຜາສຸກ. ກອງປະຊຸມຄັ້ງນີ້ຈະປະກອບສ່ວນສ່ອງແສງທັດສະນະກ່ຽວກັບຄຳໝັ້ນສັນຍາຂອງລັດຖະສະພາປະເທດຕ່າງໆ, ສະແດງໃຫ້ເຫັນຄວາມຮັບຜິດຊອບຂອງບັນດາລັດຖະສະພາໃນການສ້າງໂລກທີ່ດີງາມກວ່າ, ຜ່ານກົດໝາຍ ແລະ ນະໂຍບາຍປະຊາທິປະໄຕ, ຕອບສະໜອງຄວາມມຸ້ງຫວັງຂອງປະຊາຊົນທຸກຄົນໃນທົ່ວໂລກ.