(vovworld)- ວັນທີ 1/1/2014, ສະຫະພັນລັດເຊຍ ໄດ້ຮັບການມອບໂອນຕຳແຫນ່ງເປັນປະທານໝູນວຽນຂອງກຸ່ມບັນດາພື້ນຖານເສດຖະກິດພັດທະນາ G8 ຢ່າງເປັນທາງການ. ໂດຍໄດ້ຮັບການສັງເກດວ່າ ແມ່ນອາຍຸການມີຄວາມສະດວກຂະນະທີ່ເສດຖະກິດບັນດາປະເທດສະມາຊິກພວມມີສັນຍານຟື້ນຕົວແຕ່ຍັງຊ້ອນແຝງສິ່ງທ້າທາຍບໍ່ແມ່ນຫນ້ອຍສຳລັບລັດເຊຍເມື່ອເກ້ຍກອ່ມບັນດາປະເທດສະມາຊິກເປັນເອກະພາບໃນການແກ້ໄຂບັນດາບັນຫາສາກົນ.
ທ່ານປະທານາທິບໍດີ ລັດເຊຍ V. Putin
photo:baodongnai.com.vn
|
ຕາມຖະແຫລງການຂອງວົງການເຈົ້າຫນ້າທີ່ລັດເຊຍແລ້ວ, ຈຸດສຸມຂອງປະເທດນີ້ໃນປີ 2014, ປີທີ່ຮັບຕຳແຫນ່ງປະທານໝູນວຽນຂອງ G8 ຈະແມ່ນການຕ້ານການກໍ່ການຮ້າຍ, ຕ້ານການຄ້າຂາຍຢາເສບຕິດ ແລະ ແກ້ໄຂວິກິດການຢູ່ພາກພື້ນ. ລັດເຊຍ ຈະເອົາໃຈໃສ່ເຖິງການຮັບປະກັນການເຕີບໂຕເສດຖະກິດ, ພ້ອມກັບບັນດາສະມາຊິກຂອງ G8 ພັດທະນາຕາມທິດປົກກະຕິ.
ຄວາມສະດວກເມື່ອເສດຖະກິດຟື້ນຕົວ, ຄວບຄຸມການປະທະກັນ
ລັດເຊຍຮັບຕຳແຫນ່ງປະທານ G8 ໃນສະພາບການທີ່ກຸ່ມປະເທດນີ້ໄດ້ຮັບຂ່າວດີຢ່າງລຽນຕິດກ່ຽວກັບສະພາບເສດຖະກິດຂອງບັນດາປະເທດສະມາຊິກຄື: ອາເມລິກາ, ເຢຍລະມັນ, ຝລັ່ງ, ອັງກິດ. ນີ້ແມ່ນປັດໄຈສຳຄັນເພື່ອໃຫ້ການປະຕິບັດບັນດາຈຸດໝາຍລວມຂອງ G8 ໃນອາຍຸການຂອງລັດເຊຍ ຢ່າງງ່າຍດາຍກວ່າ.
ຢູ່ອາເມລິກາ, ທ່າຟື້ນຕົວຂອງພື້ນຖານເສດຖະກິດໃນທ້າຍປີ 2013 ມີສັນຍານດີກວ່າເມື່ອທຽບໃສ່ການຄາດຄະເນ. ລະດັບການເຕິບໂຕໃນໄຕມາດທີ 3 ຂອງພື້ນຖານເສດຖະກິດ ອາເມລິກາ ບັນລຸລະດັບສູງສຸດໃນກວ່າ 2 ປີ ຜ່ານມາເມື່ອ GDP ເພີ່ມຂຶ້ນເຖິງ 4,1%. ທ່າຟື້ນຕົວຢ່າງວ່ອງໄວຂອງພື້ນຖານເສດຖະກິດໄດ້ຊ່ວຍໃຫ້ສະພາບວ່າງງານໃນເດືອນ 11/2013 ລົງໃນລະດັບຕຳ່ສຸດໃນກວ່າ 5 ປີຜ່ານມາ, ລົງເຫລືອງພຽງ 7% ແລະ ຄາດຄະເນອັດຕານີ້ໃນປີ 2014 ແມ່ນ 6,5-6,7%.
ໃນຂະນະນັ້ນ ຢູ່ ເຢຍລະມັນ, ຊື່ງແມ່ນພື້ນຖານເສດຖະກິດໃຫຍ່ກວ່າໝູ່ຢູ່ ເອີລົບ, ອົງການສະຖິຕິຂອງປະເທດນີ້ຫາກໍໃຫ້ຮູ້ວ່າ: ຈຳນວນຜູ້ມີວຽກເຮັດງານທຳເພີ່ມຂຶ້ນລະດັບສະຖິຕິໃນປີ 2013, ບັນລຸເກືອບ 42 ລ້ານຄົນ. ອັດຕາວ່າງງານຫລຸດລົງ 1,6% ເມື່ອທຽບໃສ່ປີກ່ອນ,ລົງເຫລືອງພຽງ 2,3 ລ້ານຄົນ. ເສດຖະກິດເຢຍລະມັນອາດຈະບັນລຸການເຕີບໂຕ 1,7%ໃນປີ 2014 ເມື່ອທຽບໃສ່ລະດັບ 0,5%ຂອງປີ 2013. ຫວ່າງແລ້ວນີ້, ທະນາຄານສູນກາງ ຝລ່ັງ ແລະ ສະຖາບັນສະຖິຕິ ແລະ ຄົ້ນຄ້ວາເສດຖະກິດແຫ່ງຊາດ ກໍຄາດຄະເນວ່າ ຝລ່ັງ ຈະບັນລຸການເຕີບໂຕ 0,4-0,5% ໃນໄຕມາດ 4 ປີ 2013 ແລະ ການຟື້ນຕົວນີ້ຈະໄດ້ຮັບການຮັກສາໃນປີນີ້. ຕາມບັນດານັກເສດຖະກິດແລ້ວ, ທ່າຟື້ນຕົວຂອງອັງກິດ, ພື້ນຖານເສດຖະກິດໃຫຍ່ອັນດັບ 6 ຂອງໂລກ ຈະສືບຕໍ່ໄດ້ຮັບການປັບປຸງໃນປີນີ້ ດ້ວຍລະດັບການເຕີບໂຕອາດຈະບັນລຸ 2,4% ເມື່ອທຽບໃສ່ລະດັບ 1,4% ຂອງປີ 2013.
ກ່ຽວກັບການແກ້ໄຂບັນດາສະຖານທີ່ເຄັ່ງຮ້ອນໃນໂລກ, ໃນອາຍຸການເປັນປະ ທານ G8 ຂອງລັດເຊຍ ກໍ່ຮັບຮູ້ຫຼາຍສັນຍານທີ່ຕັ້ງໜ້າ. ທ່ານ Alexei Pushkov ປະທານກຳມາທິການພົວພັນກັບຕ່າງປະເທດສະພາຕ່ຳ (ດູມາ) ແຫ່ງຊາດລັດເຊຍ ໃຫ້ຂໍ້ສັງເກດວ່າ: ລັດເຊຍ ຮັບຜິດຊອບເປັນປະທານໝູນວຽນ G8 ກົງກັບຈຸດເວລາທີ່ສຳຄັນ, ຂະນະປະກົດມີບັນດາຄວາມກ້າວໜ້າພື້ນຖານກ່ຽວກັບບັນຫາອີຣານ ແລະ ຊີຣີ. ທ່ານ Alexei Pushkov ເນັ້ນໜັກເຖິງຄວາມຮັບຜິດຊອບຂອງ G8 ໃນການສ້າງບັນດາທ່າອ່ຽງຕັ້ງໜ້າໄດ້ຮັບການສ້າງຂຶ້ນນັບແຕ່ທ້າຍປີ 2013 ແລະ ລັດເຊຍ ອາດຈະເພີ່ມທະວີບັນດາທ່າອ່ຽງນີ້ດ້ວຍບົດບາດເປັນປະທານໝູນວຽນ G8.
ສິ່ງທ້າທາຍໃນປະຈຸບັນ
ບໍ່ແມ່ນເລື່ອງບັງເອີນທີ່ບັນດາເຈົ້າໜ້າທີ່ລັດເຊຍ ໄດ້ກຳນົດການໃຫ້ບຸລິ ມະສິດໃນປີຮັບຜິດຊອບທີ່ຕັ້ງປະທານໝຼນວຽນຂອງກຸ່ມ G8 ແມ່ນຕ້ານກໍ່ການຮ້າຍ, ຕ້ານການຄ້າຂາຍຢາເສບຕິດ ແລະ ແກ້ໄຂບັນດາວິກິດການໃນພາກພື້ນ. ນີ້ແມ່ນສິ່ງທ້າທາຍສຳລັບລັດເຊຍ ແລະ ບັນດາປະເທດສະມາຊິກ G8. ສິ່ງທ້າທາຍນີ້ປະກົດມີນັບທັງໃນຊຸມວັນທ້າຍປີ 2013 ປະເທດລັດເຊຍ ມີຄວາມສັ່ນສະເທືອນຍ້ອນເຫດວາງລະເບີດສະຫຼະຊີບ 2 ຄັ້ງຢູ່ນະຄອນ Volgograd ຊື່ງເຮັດໃຫ້ກວ່າ 30 ຄົນເສຍຊີວິດ ແລະ ອີກນັບສີບຄົນຖືກບາດເຈັບ. ບັນດາເຈົ້າໜ້າທີ່ມົດສະກູ ວິຕົກກັງວົນວ່າ ບັນດາກຸ່ມມືປືນພວມເພີ່ມທະວີການເຄື່ອນໄຫວໃຊ້ຄວາມຮຸນແຮງໃນໄລຍະເວລາແຕ່ນີ້ຮອດງານມະຫາກຳກິລາລະດູໜາວ 2014 ຈັດຂຶ້ນຢູ່ນະຄອນ Sochi. ພິເສດ, ເຂດຕາກອາກາດ Sochi ກໍ່ແມ່ນສະຖານທີ່ລັດເຊຍ ຈັດກອງປະຊຸມສຸດຍອດ G8 ໃນເດືອນ 6/2014.
ນອກຈາກນັ້ນແລ້ວ, ພາຍຫຼັງທີ່ຢູແກຼນ ລົບລ້າງການເຊັນສົນທິສັນຍາ ກັບສະຫະພາບເອີລົບ, ຄວາມເຄັ່ງຕຶງລະຫວ່າງລັດເຊຍ ແລະ ບັນດາປະເທດຝ່າຍຕາເວັນຕົກ ກໍ່ຈະສົ່ງຜົນສະທ້ອນບໍ່ແມ່ນໜ້ອຍເຖິງບົດບາດເປັນປະທານ G8 ຂອງລັດເຊຍ.
ພ້ອມກັນນັ້ນ, ເສດຖະກິດທົ່ວໂລກປີ 2014 ຍັງຊ້ອນແຝງຄວາມສ່ຽງຫຼາຍຢ່າງ ດ້ວຍນະໂຍບາຍຮັດເຂັມຄັດຂອງເອີລົບ ແລະ ການເຕີບໂຕຊັກຊ້າຢູ່ຍີ່ປຸ່ນ ແລະ ຈີນ.
ການຮັບຜິດຊອບບົດບາດເປັນປະທານ G8 ໃນປີ 2014 ແມ່ນໂອກາດ ແລະ ກໍ່ແມ່ນສິ່ງທ້າທາຍບໍ່ແມ່ນໜ້ອຍສຳລັບລັດເຊຍ. ປະຊາຄົມໂລກ ພວມລໍຄອຍວ່າ ລັດເຊຍ ສາມາດນຳໃຊ້ໂອກາດນີ້ເພື່ອຢັ້ງຢືນບົດບາດຂອງຕົນໃນເວທີການເມືອງໂລກໄດ້ຫຼືບໍ່?