ກອງປະຊຸມບັນດາເຈົ້າໜ້າທີ່ອາວຸໂສເວທີປາໄສເສດຖະກິດອາຊີ-ປາຊີຟີກ APEC ຢ່າງບໍ່ເປັນທາງການ(ISOM-APEC) 2017, ການເຄື່ອນໄຫວເລີ່ມດຳເນີນປີ APEC ໂດຍຫວຽດນາມເປັນເຈົ້າພາບຈັດຕັ້ງ ໄດ້ຖືກໄຂຂຶ້ນຢູ່ຮ່າໂນ້ຍ. ຕໍ່ໜ້າບັນດາການຫັນປ່ຽນຢ່າງເລິກເຊິ່ງໃນໂລກ ແລະ ທ່າອຽງຮ່ວມສຳພັນໃນພາກພື້ນ ແລະ ໃນ APEC ນັບມື້ນັບເລິກເຊິ່ງ ກ້ວາງຂວາງນັ້ນ, ການຈັດຕັ້ງປີ APEC 2017, ກອງປະຊຸມ ISOM-APEC ໄດ້ສະແດງວິໄສທັດຍຸດທະສາດຂອງຫວຽດນາມກ່ຽວກັບ ອາຊີ-ປາຊີຟີກ, ຍົກອອກບັນດາບຸລິມະສິດລະອຽດເພື່ອຊຸກຍູ້ການຮ່ວມມື APEC ຢ່າງມີປະສິດທິຜົນ ແລະ ແທດຈິງກ່ວາໃນໄລຍະທີ່ຈະມາເຖິງ.
ກອງປະຊຸມບັນດາເຈົ້າໜ້າທີ່ອາວຸໂສເວທີປາໄສເສດຖະກິດອາຊີ-ປາຊີຟີກ APEC ຢ່າງບໍ່ເປັນທາງການ 2017 |
ມີຜູ້ແທນປະມານ 400 ຄົນຊຶ່ງແມ່ນບັນດານັກການເມືອງ, ນັກຮຽນຮູ້, ວິສາຫະກິດຂອງບັນດາພື້ນຖານເສດຖະກິດສະມາຊິກ APEC ແລະ ບັນດາອົງການສາກົນທັງຢູ່ພາຍໃນ ແລະ ນອກພາກພື້ນໄດ້ເຂົ້າຮ່ວມ ISOM-APEC ຄັ້ງນີ້. ໃນສະຖານະການໂລກ ແລະ ພາກພື້ນພວມຫັນປ່ຽນຢ່າງວ່ອງໄວກວ່າ ແລະ ຍາກທີ່ຈະຄາດຄິດລ່ວງໜ້າໄດ້, ພິເສດແມ່ນທ່າອ່ຽງປົກປ້ອງ ແລະ ມຸ່ງໄປສູ່ພາຍໃນໄດ້ພົ້ນເດັ່ນຂຶ້ນຢູ່ບາງແຫ່ງ, ນີ້ແມ່ນຈຸດເວລາທີ່ APEC ຄວນເສີມຂະຫຍາຍບົດບາດຊັກຈູງ, ຊຸກຍູ້ການເຕີບໂຕແບບຍືນຍົງ, ຮ່ວມສຳພັນຢ່າງເລິກເຊິ່ງກ້ວາງຂວາງ, ປັບປຸງລະບົບການຄ້າຫຼາຍຝ່າຍ. ພ້ອມກັນນັ້ນ, APEC ຄວນຢືນຢັນບົດບາດນຳໜ້າລິເລີ່ມແນວຄວາມຄິດ ແລະ ປະສານງານບັນດາກົນໄກຮ່ວມມືເສດຖະກິດພາກພື້ນ, ພິເສດແມ່ນໃນບັນດາບັນຫາການຄ້າ ການລົງທຶນລຸ່ນໃໝ່.
ເພາະສະນັ້ນ, ດ້ວຍຫົວເລື່ອງທີ່ຫວຽດນາມໄດ້ເລືອກເຟັ້ນໃຫ້ທັງປີ APEC 2017 ຄື “ສ້າງກຳລັງໜູນໃໝ່ເພື່ອພ້ອມກັນເສີມສ້າງອະນາຄົດຮ່ວມ ” ແມ່ນມີຄວາມໝາຍສຳຄັນ. ທີ 1 , ແມ່ນສ່ອງແສງທັດສະນະລວມຂອງບັນດາພື້ນຖານເສດຖະກິດ APEC ກ່ຽວກັບການຊອກຫາ “ກຳລັງຫນູນໃໝ່” ໃຫ້ແກ່ການເຊື່ອມໂຍງ, ຮ່ວມສຳພັນ ແລະ ເຕີບໂຕເສດຖະກິດຂອງ ອາຊີ-ປາຊີຟີກ. ທີ 2 ແມ່ນສະແດງໃຫ້ເຫັນເປົ້າໝາຍລວມ ແລະ ຍາວນານຂອງ APEC ແລະ ອາຊີ-ປາຊີຟີກກ່ຽວກັບການເສີມສ້າງອະນາຄົດລວມ, ນັ້ນແມ່ນສັນຕິພາບ, ສະຖຽນລະພາບ, ການພັດທະນາ ແລະ ວັດທະນາຖາວອນ. ທີ 3 ແມ່ນສະແດງໃຫ້ເຫັນຄວາມຫວັງກ່ຽວກັບການພັດທະນາໃໝ່ຂອງ APEC ໃນປີ 2017, ປະກອບສ່ວນຢືນຢັນທີ່ຕັ້ງບົດບາດຂອງເວທີປາໄສໃນສະພາບການໃໝ່.
ບັນດາຈຸດສຸມບຸລິມະສິດ
ທີ່ກອງປະຊຸມສຸດຍອດ APEC 2016 ຊຶ່ງຈັດຂຶ້ນຢູ່ລີມາ ປະເທດເປຣູໃນເດືອນ 11 ທີ່ຜ່ານມາ, ຫວຽດນາມໄດ້ຍົກອອກ 4 ບຸລິມະສິດເພື່ອປະຕິບັດ ແລະ ເຮັດໃຫ້ຫົວຂໍ້ດັ່ງກ່າວໃຫ້ຈະແຈ້ງກວ່າ. ຫົວຂໍ້ນີ້ລວມມີ ຍູ້ແຮງການເຕີບໂຕແບບຍືນຍົງ, ກວມລວມ ແລະ ປະດິດຄິດສ້າງ; ບົດບາດເປັນຂໍ້ກຸນແຈຂອງ APEC ໃນການຊຸກຍູ້ການຮ່ວມສຳພັນເສດຖະກິດພາກພື້ນຢ່າງເລິກເຊິ່ງກ້ວາງຂວາງ; ຄວາມສາມາດແກ່ງແຍ້ງຢ່າງມີຫົວຄິດປະດິດສ້າງໃນສັງກາດດີຈີຕອນທີ່ມີຕໍ່ບັນດາວິສາຫະກິດຂະໜາດກາງ ແລະ ນ້ອຍ; ເພີ່ມທະວີການຄ້ຳປະກັນສະບຽງອາຫານ ແລະ ກະສີກຳແບບຍືນຍົງ, ດັບປັບໃຫ້ແທດເໝາະກັບການປ່ຽນແປງຂອງດິນຟ້າກາດ. ດ້ວຍຫົວຂໍ້ “ສ້າງກຳລັງໜູນໃໝ່ເພື່ອພ້ອມກັນເສີມສ້າງອະນາຄົດໃນອາຊີ-ປາຊີຟີກ ”. ຜູ້ແທນເກືອບທັງໝົດຕ່າງກໍໃຫ້ຂໍ້ສັງເກດວ່າ ບັນດາບຸລິມະສິດຊຶ່ງຫວຽດນາມຍົກອອກມາແມ່ນສອດຄ່ອງກັບວິວັດການພັດທະນາໃນປະຈຸບັນຂອງ APEC. ພິເສດໃນສະພາບທີ່ ບັນດາພື້ນຖານເສດຖະກິດ, ບັນດາພາກພື້ນຕ່າງກໍພວມປະເຊີນໜ້າກັບບັນດາສິ່ງທ້າທາຍ, ເປັນຕົ້ນແມ່ນນັບແຕ່ພາຍຫລັງວິກິດການການເງິນທົ່ວໂລກ. ທ່ານນາງເອກອັກຄະລັດຖະທູດ ຫງວຽນງວຽດງາ ທີ່ປຶກສາຊັ້ນສູງຄະນະເລຂາ APEC ຫວຽດນາມ 2017 ຢືນຢັນວ່າ :
“ ໃນບັນດາຂໍ້ລິເລີ່ມປະຈຸບັນ, ກໍລ້ວນແຕ່ເລັ່ງໃສ່ບັນດາບຸລິມະສິດໃຫຍ່ຂອງ APEC ແລະ ສອດຄ່ອງກັບຄວາມຮຽກຮ້ອງຕ້ອງການໃໝ່ຂອງການເຕີບໂຕ ແລະ ຮ່ວມສຳພັນ. ໃນນັ້ນ, ສິ່ງສຳຄັນທີ່ສຸດແມ່ນການເພີ່ມຄຸນນະພາບ. ດັ່ງນັ້ນ, ພວກເຮົາຍົກອອກຂໍ້ລິເລີ່ມກ່ຽວກັບການຍົກສູງຄຸນນະພາບ, ກ່ຽວກັບການເຊື່ອມຕໍ່, ກ່ຽວກັບການສ້າງໂຄງປະກອບເສດຖະກິດຄືນໃໝ່, ສິ່ງນີ້ແມ່ນເໝາະສົມກັບຄວາມຕ້ອງການຂອງຫວຽດນາມ ແລະ ສອດຄ່ອງກັບຄວາມຮຽກຮ້ອງຕ້ອງການໃໝ່ຂອງ APEC ໃນປະຈຸບັນ. ພວກເຮົາກໍມີບັນດາຂໍ້ລິເລີ່ມທີ່ຖືເປັນສຳຄັນພິເສດການເພີ່ມທະວີ ແລະ ຫນູນຊ່ວຍບັນດາວິສາຫະກິດຂະໜາດກາງ ແລະ ນ້ອຍ, ບັນດາຂໍ້ລິເລີ່ມກ່ຽວກັບການກໍ່ສ້າງແຫຼ່ງຊັບພະຍາກອນມະນຸດ, ພິເສດແມ່ນໃນສັງກາດດີຈີຕອນ”
ການຍົກອອກບັນດາຫົວຂໍ້ບຸລິມະສິດເພື່ອໃຫ້ບັນດາພື້ນຖານເສດຖະກິດພາຄີ APEC ພ້ອມກັນປຶກສາຫາລື ແລະ ມຸ່ງໄປສູ່ການປະຕິບັດທີ່ມີຄວາມໝາຍສຳຄັນສຳລັບການພັດທະນາຂອງ APEC ໃນຊຸມປີທີ່ຈະມາເຖິງ, ເປັນຕົ້ນແມ່ນໃນຈຸດເວລາປະຕິບັດເປົ້າໝາຍ BOGO ໃນປີ 2020 ພວມຫຍັບເຂົ້າໃກ້. ທ່ານບຸຍແທງເຊີນ, ຮອງລັດຖະມົນຕີຜູ້ປະຈຳການກະຊວງການຕ່າງປະເທດ, ຮອງປະທານຄະນະກຳມະການແຫ່ງຊາດ APEC 2017 ໃຫ້ຮູ້ວ່າ :
“ ພວກເຮົາໄດ້ກຳນົດ 4 ບຸລິມະສິດໃຫຍ່ໃຫ້ແກ່ປີ APEC 2017 ໃນຂົງເຂດຮ່ວມສຳພັນເສດຖະກິດ, ຂົງເຂດພັດທະນາແບບຍືນຍົງ, ປ່ຽນແປງໃໝ່ຢ່າງມີຫົວຄິດປະດິດສ້າງ ແລະ ພິເສດແມ່ນການປະຕິຮູບບັນດາວິສາຫະກິດຂະໜາດກາງ ແລະ ນ້ອຍ. ບັນດາຜູ້ຊ່ຽວຊານ, ນັກຮຽນຮູ້, ພິເສດແມ່ນບັນດາເຈົ້າໜ້າທີ່ອາວຸໂສຂອງ ບັນດາພື້ນຖານເສດຖະກິດ APEC ຈະປະກອບຄຳຄິດຄຳເຫັນໃຫ້ແກ່ບັນດາບຸລິມະສິດນີ້. ເປົ້າໝາຍຂອງພວກເຮົາ ແມ່ນຕ້ອງມີແນວຄວາມຄິດຮ່ວມເພື່ອສ້າງປະຊາຄົມ APEC ເພື່ອປະຊາຊົນ, ເພື່ອບັນດາປະເທດສະມາຊິກ ແລະ ເພື່ອບັນດາວິສາຫະກິດໃນ APEC ”
ໂຄສະນາພາບພົດປະເທດຊາດ ແລະ ຊາວຫວຽດນາມ
ຕໍ່ໜ້າການຫັນປ່ຽນຢ່າງເລິກເຊິ່ງໃນໂລກ ແລະ ທ່າອ່ຽງຮ່ວມສຳພັນໃນພາກພື້ນ ແລະ ໃນ APEC ທີ່ນັບມື້ນັບກ້ວາງເລິກນັ້ນ, ການຈັດຕັ້ງປີ APEC 2017 ແມ່ນສະແດງໃຫ້ເຫັນວິໄສທັດຍຸດທະສາດຂອງຫວຽດນາມກ່ຽວກັບອາຊີ-ປາຊີຟີກ. ກອງປະຊຸມ ISOM-APEC ຊຶ່ງແມ່ນການເຄື່ອນໄຫວທຳອິດຂອງປີ APEC 2017 ກໍເປັນການຢັ້ງຢືນວຽກງານກະກຽມຢ່າງລອບຄອບຖີ່ຖ້ວນ, ມີລັກສະນະອາຊີບຂອງຝ່າຍຫວຽດນາມ. ນອກຈາກນັ້ນ, ມີສານໃຫຍ່ຊຶ່ງຫວຽດນາມຢາກຝາກຝັງໂດຍຜ່ານການເປັນເຈົ້າພາບຈັດຕັ້ງປີ APEC 2017 ແມ່ນເພື່ອໂຄສະນາປະເທດຊາດ ແລະ ຊາວຫວຽດນາມ. ພາບພົດຫວຽດນາມທີ່ສະໜິດສະໜິດສະໜົມ, ສະພາບແວດລ້ອມດ້ານການຄ້າ ແລະ ການລົງທຶນທີ່ສີວິໄລ, ໂປ່ງໃສ, ເອື້ອອຳນວຍຄວາມສະດວກ ຈະຊ່ວຍບັນດາຜູ້ແທນທີ່ມາຈາກບັນດາພື້ນຖານເສດຖະກິດ APEC ມີການສັງເກດທີ່ຊັດເຈນກ່ວາ, ຈາກນັ້ນ ຈຶ່ງເປີດທິດທາງຮ່ວມມືທີ່ດີກ່ວາໃນໄລຍະທີ່ຈະມາເຖິງ. ນີ້ກໍແມ່ນໂອກາດເພື່ອໃຫ້ຫວຽດນາມຮັບເອົາຄຳຄິດເຫັນຂອງບັນດາຜູ້ແທນ, ບັນດາອົງການຈັດຕັ້ງສາກົນ, ນັກຮຽນຮູ້ ແລະ ວິສາຫະກິດ, ຮັບໃຊ້ໃຫ້ແກ່ກິດຈະການຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ.