(vovworld)- ທ່ານປະທານາທິບໍດີຟິລິບປີນ Rodrio Duterte ພວມມີການຢ້ຽມຢາມຫວຽດນາມ ຢ່າງເປັນທາງການ, ຕາມຄຳເຊີນຂອງທ່ານປະທານປະເທດຫວຽດນາມ ເຈີນດ້າຍກວາງ. ການຢ້ຽມຢາມດຳເນີນໄປໃນສະພາບທີ່ 2 ປະເທດຫາກໍ່ລົງນາມໃນຖະແຫຼງການຮ່ວມກ່ຽວກັບການສ້າງຕັ້ງການພົວພັນຄູ່ຮ່ວມມືຍຸດທະສາດເມື່ອເດືອນ 11/2015. ນີ້ແມ່ນເຫດການທີ່ມີຄວາມໝາຍສຳຄັນ, ເຮັດໃຫ້ການພົວພັນຮ່ວມມືລະຫວ່າງ 2 ປະເທດໃນທຸກຂົງເຂດເລິກເຊິ່ງກວ່າອີກ, ປະກອບສ່ວນເຂົ້າໃນການຮັກສາສັນຕິພາບ, ຄວາມວັດທະນາຖາວອນ ແລະ ຄວາມໝັ້ນຄົງໃນພາກພື້ນ. ບົດສັງລວມຂອງບັນນາທິການ ແອ໋ງຮ່ວຽນ.
ນີ້ແມ່ນການຢ້ຽມຢາມຫວຽດນາມ ເປັນຄັ້ງທຳອິດຂອງທ່ານປະທານາທິບໍດີ Rodrigo Duterte ນັບແຕ່ເມື່ອທ່ານຮັບດຳລົງຕຳແໜ່ງ, ກໍຄືນັບແຕ່ຫວຽດນາມ ແລະ ຟິລິບປີນ ສ້າງຕັ້ງການພົວພັນຄູ່ຮ່ວມມືຍຸດທະສາດ. ການຢ້ຽມຢາມຍິ່ງມີຄວາມໝາຍກວ່າ ໃນສະພາບທີ່ 2 ປະເທດພວມສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດ.
ການພົວພັນມິດຕະພາບທີ່ໝັ້ນຄົງ, ແທດຈິງ ແລະ ມີປະສິດທິຜົນ
ກ່ອນນີ້ 40 ປີ, ໃນວັນທີ 12/07/1976, ຫວຽດນາມ ແລະ ຟີລິບປີນ ໄດ້ສ້າງຕັ້ງການພົວພັນທາງການທູດຢ່າງເປັນທາງການ. ໃນຕະຫຼອດໄລຍະ 40 ປີຜ່ານມາ, ການພົວພັນຮ່ວມມືລະຫວ່າງ 2 ປະເທດໄດ້ຮັບການເພີ່ມພູນຄຸນສ້າງຢ່າງບໍ່ຢຸດຢັ້ງ ບົນຈິດໃຈມິດຕະພາບ, ສະເໝີພາບ, ເຄົາລົບເຊິ່ງກັນ ແລະ ກັນ ແລະ ຮ່ວມມືເພື່ອຜົນປະໂຫຍດຂອງປະຊາຊົນ 2 ປະເທດ. 2 ຝ່າຍບັນລຸໄດ້ບັນດາບາດກ້າວພັດທະນາຢ່າງຕັ້ງໜ້າ ເຊິ່ງສະແດງອອກໃນຫຼາຍຂົງເຂດ ຈາກດ້ານເສດຖະກິດ, ການເມືອງ ເຖິງການປ້ອງກັນຊາດ, ປ້ອງກັນຄວາມສະຫງົບ, ວັດທະນະທຳ - ສັງຄົມ.
ສິ່ງທີ່ໜ້າສົນໃຈນັ້ນແມ່ນ, ໃນຊຸມປີມໍ່ໆມານີ້, ວົງເງິນການຄ້າລະຫວ່າງ 2 ປະເທດສີບຕໍ່ມີທ່າເຕີບໂຕ, ບັນລຸເກືອບ 3 ຕື້ USD ໃນປີ 2015 ແລະ ໄລ່ສະເພາະ 7 ເດືອນຕົ້ນປີ 2016 ບັນລຸກວ່າ 1,7 ຕື້ USD (ເພີ່ມຂຶ້ນ 17% ເມື່ອທຽບໃສ່ໄລຍະດຽວກັນຂອງປີ 2015). ແຕ່ປີ 2008, ແຕ່ລະປີຫວຽດນາມ ສົ່ງອອກເກີນດຸນໄປຍັງຟິລິບປີນ ກວ່າ 1 ຕື້ USD, ຫຼາຍກວ່າໝູ່ໃນກຸ່ມອາຊຽນ, ໃນນັ້ນສິນຄ້າຕົ້ນຕໍ່ແມ່ນເຂົ້າສານ. ນອກຈາກເຂົ້າສານແລ້ວ, ຫວຽດນາມ ຍັງສົ່ງໄປຍັງຟິລິບປີນ ເຄື່ອງອາໄຫຼ່ເອເລັກໂຕນິກ, ຜະລິດຕະພັນກະເສດ ແລະ ນຳເຂົ້າຈາກຟິລິບປີນ ຄື: ຝຸ່ນເຄມີ, ເຄື່ອງອາໄຫຼ່ກົນຈັກ, ອຸປະກອນ, ແຮ່ທາດ, ນ້ຳມັນ, ຜະລິດຕະພັນການຢາ, ວັດສະດຸກໍ່ສ້າງ… ໃນຂະນະນັ້ນ, ການຮ່ວມມືດ້ານປ້ອງກັນປະເທດໄດ້ຮັບການພັດທະນາຢ່າງແທ້ຈິງ ແລະ ນັບມື້ນັບໄດ້ຮັບການເປີດກວ້າງ. 2 ຝ່າຍໄດ້ຈັດການເຈລະຈານະໂຍບາຍຂັ້ນຮອງລັດຖະມົນຕີປ້ອງກັນປະເທດຄັ້ງທີ 2 ໃນເດືອນ 04/2016. 2 ຝ່າຍຕັ້ງໜ້າຜັນຂະຫຍາຍບັນດາຂໍ້ຕົກລົງທີ່ໄດ້ຮັບການລົງນາມແລ້ວຄື: ຂໍ້ຕົກລົງສ້າງໂທລະສັບສາຍດ່ວນລະຫວ່າງກອງບັນຊາການຕຳຫຼວດທະເລຫວຽດນາມ ແລະ ກອງບັນຊາການປ້ອງກັນຝັ່ງທະເລຟິລິບປີນ; ຂໍ້ຕົກລົງເພີ່ມທະວີການຮ່ວມມື ແລະ ແບ່ງປັນຂໍ້ມູນຂ່າວສານລະຫວ່າງກອງທັບເຮືອຫວຽດນາມ ແລະ ກອງທັບເຮືອຟິລິບປີນ; ກົດລະບຽບພົບປະແລກປ່ຽນໃນເກາະ ຊອງຕືໄຕ ແລະ ຊອງຕືດົງ ຂອງຫວຽດນາມ ລະຫວ່າງກອງທັບເຮືອ 2 ປະເທດ. ການຮ່ວມມືດ້ານທະເລ ແລະ ມະຫາສະມຸດ ສືບຕໍ່ແມ່ນໜຶ່ງໃນບັນດາເສົ້າຄ້ຳໃນການພົວພັນລະຫວ່າງ 2 ປະເທດ, ໃນນັ້ນບຸລິມະສິດແມ່ນບັນຫາປ້ອງກັນຄວາມສະຫງົບ ແລະ ການເດີນເຮືອຢ່າງເສລີ, ພັດທະນາເສດຖະກິດທະເລ, ຊອກຫາກູ້ໄພກູ້ຊີບ. 2 ຝ່າຍມີກົນໄກກຸ່ມປະຕິບັດງານລວມກ່ຽວກັບທະເລ ແລະ ມະຫາສະມຸດ, ໄດ້ຈັດກອງປະຊຸມປະຈຳປີ ແລະ ໄດ້ຍົກລະດັບເປັນຄະນະກຳມະການປະສົມທະເລ ແລະ ມະຫາສະມຸດຂັ້ນຮອງລັດຖະມົນຕີການຕ່າງປະເທດ. ບັນດາຂົງເຂດຮ່ວມມືລະຫວ່າງ 2 ປະເທດຄື: ກະສິກຳ, ການສຶກສາ, ການທ່ອງທ່ຽວ… ນັບມື້ນັບໄດ້ຮັບການພັດທະນາ.
ການນຳຂັ້ນສູງຫວຽດນາມ ແລະ ຟິລິບປີນ ກໍໄດ້ມີການຢ້ຽມຢາມເຊິ່ງກັນ ແລະ ກັນເປັນປະຈຳ. 2 ປະເທດໄດ້ສົມທົບກັນຢ່າງແໜ້ນແຟ້ນກັບບັນດາປະເທດອາຊຽນ ອື່ນໆ, ປະກອບສ່ວນສ້າງປະຊາຄົມອາຊຽນ ສາມັກຄີ, ໝັ້ນຄົງເຂັ້ມແຂງ, ຮັກສາບົດບາດໃຈກາງຂອງອາຊຽນ ໃນບັນດາບັນຫາໃຫຍ່ທີ່ກ່ຽວຂ້ອງເຖິງຄວາມສະຫງົບ, ຜົນປະໂຫຍດຂອງແຕ່ລະປະເທດ ແລະ ຂອງພາກພື້ນ. ຫວຽດນາມ ແລະ ຟິລິປີນ ກໍສົມທົບກັນ, ໜູນຊ່ວຍເຊິ່ງກັນ ແລະ ກັນເປັນປະຈຳ ຢູ່ບັນດາເວທີປາໄສຫຼາຍຝ່າຍສາກົນ ແລະ ພາກພື້ນ.
ສ້າງກຳລັງໜູນໃຫ້ການພົວພັນຄູ່ຮ່ວມມືຍຸດທະສາດ
ເມື່ອຕົ້ນເດືອນ 09, ທີ່ການພົບປະກັບທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ຢູ່ນອກກອງປະຊຸມສຸດຍອດອາຊຽນ ທີ່ນະຄອນຫຼວງວຽງຈັນ, ປະເທດລາວ, ທ່ານປະທານາທິບໍດີ Rodrio Duterte ໄດ້ຢືນຢັນວ່າ, ຟິລິບປີນ ຖືການພົວພັນຄູ່ຮ່ວມມືຍຸດທະສາດກັບຫວຽດນາມ ເປັນສຳຄັນ, ຖືຫວຽດນາມ ບໍ່ພຽງແຕ່ແມ່ນ “ຖານບ້ານໃກ້ເຮືອນຄຽງທີ່ດີ” ຫາກຍັງແມ່ນ “ອ້າຍນ້ອງທີ່ໃກ້ຊິດສະໜິດສະໜົມ” ອີກດ້ວຍ. ບົນຈິດໃຈນັ້ນ, ການຢ້ຽມຢາມຫວຽດນາມ ຂອງທ່ານປະທານາທິບໍດີ Rodrio Duterte ແມ່ນໂອກາດເພື່ອໃຫ້ 2 ຝ່າຍຫັນເປັນລະອຽດ ແລະ ຜັນຂະຫຍາຍເນື້ອແທ້ຄູ່ຮ່ວມມືຍຸດທະສາດ, ໂດຍສະເພາະແມ່ນດ້ານການເມືອງ, ການປ້ອງກັນຊາດປ້ອງກັນຄວາມສະຫງົບ, ເສດຖະກິດ, ການຄ້າ. ທ່ານ Rodrio Duterte ພ້ອມກັບການນຳຫວຽດນາມ ໄດ້ແລກປ່ຽນບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ.
ການຢ້ຽມຢາມຫວຽດນາມ ຂອງທ່ານປະທານາທິບໍດີ Rodrio Duterte ໄດ້ເພີ່ມກຳລັງໜູນພັດທະນາການພົວພັນຮ່ວມມືຍຸດທະສາດຢ່າງຮອບດ້ານ ໃນຂົງເຂດການພົວພັນຄູ່ຮ່ວມມືຍຸດທະສາດຫວຽດນາມ - ຟິລິບປີນ, ນຳມາເຊິ່ງຜົນປະໂຫຍດອັນຊອບທຳໃຫ້ປະຊາຊົນ 2 ປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ຄວາມວັດທະນາຖາວອນຢູ່ພາກພື້ນ.