ປີ 2012 ພ້ອມກັບການສ້າງໂຄງປະກອບລັດວິສາຫະກິດ, ທະນາຄານຄືນໃຫມ່ ຫວຽດນາມ ກໍມີແຜນການປະຕິຮູບຕະຫລາດຫລັກຊັບຢ່າງແຂງແຮງ. ນີ້ໄດ້ຮັບຖືວ່າ ແມ່ນພາກສ່ວນຫນຶ່ງທີ່ສຳຄັນຂອງຕະຫລາດການເງິນ ໃນການລະດົມແຫລ່ງທຶນໃຫ້ແກ່ວິວັດການພັດທະນາ.
ຄະນະກຳມະການຫລັກຊັບແຫ່ງລັດ ໄດ້ເລືອກເຟັ້ນປີ 2012 ແມ່ນປີສ້າງໂຄງປະກອບຕະຫລາດຫລັກຊັບຄືນໃຫມ່ ແລະ ປະຈຸບັນໄດ້ຍື່ນສະເຫນີ ແຜນຮ່າງສ້າງໂຄງປະກອບຕະຫລາດຄືນໃຫມ່ຕໍ່ ລັດຖະບານ, ໃນນັ້ນ ເລັ່ງໃສ່ 4 ບັນຫາຊຶ່ງລວມມີ: ສ້າງອົງປະກອບການເງິນເປັນກາງ, ຕະຫລາດສິນຄ້າ, ຄວາມຕ້ອງການໃນການລົງທຶນ ແລະ ບັນດາບໍລິສັດຫລັກຊັບ. ຕາມບັນດາຜູ້ຊ່ຽວຊານແລ້ວ, ນີ້ແມ່ນວຽກງານຈຳເປັນທີ່ສຸດ, ເຖິງວ່າຈະມີຄວາມຊັກຊ້າ ເພື່ອຟື້ນຕົວຕະຫລາດໃຫມ່ທີ່ບໍ່ທັນເຂັ້ມແຂງ ແຕ່ສຳຄັນສຳລັບພື້ນຖານເສດຖະກິດ.
ໃນກວ່າ 11 ປີ ແຫ່ງການເຄື່ອນໄຫວ, ຕະຫລາດຫລັກຊັບຫວຽດນາມ ລະດົມທຶນໄດ້ປະມານ 400.000 ຕຶ້ດົ່ງ, ຂຸດຄົ້ນໄດ້ຫລາຍແຫລ່ງທຶນຈາກພາຍໃນ ແລະ ຕ່າງປະເທດ.ຈາກນັ້ນ ຊ່ວຍນຳໃຊ້ແຫລ່ງເງິນໃນປະຊາຊົນ, ສ້າງທ່ວງທ່າໃຫ້ແກ່ວິສາຫະກິດເຄື່ອນໄຫວຢ່າງມີປະສິດທິຜົນ. ແຕ່ ໃນສອງສາມປີມານີ້, ຕະຫລາດຫລັກຊັບຫວຽດນາມ ພວມມີບັນດາສັນຍານຂາດຄວາມດຸນດຽງ. ລາຄາໃບຫຸ້ນຕົກລົງມາຢູ່ໃນລະດັບຕຳ່ສຸດເກີດຂຶ້ນຢ່າງລຽນຕິດ, ເຮັດໃຫ້ຄວາມໄວ້ເນື້ອເຊື່ອໃຈຂອງນັກລົງທຶນຖືກຫລຸດລົງ, ກະແສເງິນລົງທຶນເຂົ້າຕະຫລາດຫລັກຊັບນັບມື້ນັບຫນ້ອຍລົງ, ມູນຄ່າໃບຫຸ້ນກໍຫລຸດລົງຫລາຍ. ໄລ່ມາຮອດທ້າຍປີ 2011 ດັດຊະນີຕົ້ນຕໍຂອງຕະຫລາດ ແມ່ນ VN index ຫລຸດລົງເຖິງ 25% ເມື່ອທຽບໃສ່ທ້າຍປີ 2010, ຄວາມສາມາດໃນການຊຳລະພຽງເທົ່າກັບ 50% ເມື່ອທຽບໃສ່ປີ 2010. ການຊຸດໂຊມຢ່າງຮ້າຍແຮງຂອງຕະຫລາດຫລັກຊັບ ສ່ວນຫນຶ່ງແມ່ນຍ້ອນສະພາບການເສດຖະກິດໂລກປະສົບກັບຄວາມຫຍຸ້ງຍາກ, ແຕ່ສ່ວນໃຫຍ່ແມ່ນຍ້ອນບັນຫາຄົງຄ້າງຢູ່ຕະຫລາດພາຍໃນປະເທດ, ຊຶ່ງຕາມບັນດາຜູ້ຊ່ຽວຊານແລ້ວ, ຖ້າຫາກບໍ່ໄດ້ຮັບການແກ້ໄຂໂດຍໄວ ຍາກທີ່ຈະຍາກທີ່ຈະສ້າງຄວາມໄວ້ເນື້ອເຊື່ອໃຈຂອງນັກລົງທຶນໄດ້.
ຖ້າຫາກປີ 2000, ທົ່ວຫວຽດນາມ ມີ ບໍລິສັດຫຸ້ນສ່ວນ ພຽງ 6 ແຫ່ງ ແລະ ໃບຫຸ້ນ 2 ລະຫັດໄດ້ຮັບການຕິດປະກາດຢູ່ສູນຕິດຕໍ່ຄ້າຂາຍຫລັກຊັບ, ສອງສາມປີຕໍ່ມາເມື່ອຕະຫລາດຫລັກຊັບມີການເຄື່ອນໄຫວຢ່າງຟົດຟື້ນ, ບັນດາບໍລິສັດຫລັກຊັບໄດ້ຮັບການສ້າງຕັ້ງເປັນຈຳນວນຫລວງຫລາຍ ດ້ວຍຈຸດປະສົງຢາກສະແຫວງຫາຜົນກຳໄລຈາກການຕິດຕໍ່ຄ້າຂາຍຈາກໃບຫຸ້ນຂອງຕົນ. ຂໍພຽງແຕ່ມີຫນັງສືອະນຸຍາດດຳເນີນທຸລະກິດ, ລາຄາໃບຫຸ້ນຂອງບໍລິສັດຫລັກຊັບ ໄດ້ຮັບການຕິດຕໍ່ຄ້າຂາຍດ້ວຍລາຄາຂຶ້ນເຖິງ 2- 3 ເທົ່າໃນທັນທີ່. ມາຮອດປະຈຸບັນ, ທົ່ວຕະຫລາດມີເຖິງ 105 ບໍລິສັດຫລັກຊັບ ຮັບໃຊ້ໃຫ້ແກ່ຕະຫລາດມີພຽງ 1,2 ລ້ານບັນຊີ, ໃນນັ້ນ ມີບໍລິສັດຫລາຍແຫ່ງມີຂອບຂະຫນາດນ້ອຍ, ກຳລັງຄວາມສາມາດການເງິນຕຳ່, ບໍ່ຮັບປະກັນປະສິດທິຜົນການເຄື່ອນໄຫວໄດ້, ຊ້ອນແຝງຄວາມສ່ຽງທີ່ມີຕໍ່ລະບົບ. ຕາມບັນດາຜູ້ຊ່ຽວຊານແລ້ວ, ຈຳເປັນຕ້ອງຄັດເລືອກ ເພື່ອໃຫ້ມີພຽງ 20 -30 ບໍລິສັດຫລັກຊັບຄົງຕົວ ດ້ວຍພາລະບົດບາດການເຄື່ອນໄຫວແມ່ນຈະແຈ້ງ,ໂປ່ງໃສດ້ານຂໍ້ມູນຂ່າວສານ. ທ່ານ ຫງວຽນ ແທນ ກີ່, ເລຂານຸການ ສະຫະສະມາຄົມດຳເນີນທຸລະກິດຫລັກຊັບຫວຽດນາມ ຖືວ່າ:
“ອາດຈະເວົ້າໄດ້ວ່າ,ໃນໄລຍະຜ່ານມາ ຕະຫລາດຫລັກຊັບຂອງພວກເຮົາເຄື່ອນໄຫວບໍ່ເປັນລະບົບ ແລະ ເກີດຫລາຍບັນຫາໃນການວາງອອກມາດຖານລາຍງານຂໍ້ມູນຂ່າວສານ. ພາໃຫ້ເກີດບັນຫາດັ່ງນີ້: ທີຫນຶ່ງແມ່ນ ລັກສະນະໂປ່ງໃສ, ການເປີດເຜີຍບໍ່ຈະແຈ້ງ. ທີສອງ ບໍ່ທັນການ ແລະ ທີສາມ ແມ່ນວາງອອກຫລາຍມາດຖານ, ວິເຄາະຄຸນລັກສະນະ, ການຈຳກັດປະລິມານບໍ່ລະອຽດ. ສະນັ້ນ ມີບໍລິສັດຫລາຍແຫ່ງ ແລະ ນັກລົງທຶນຫລາຍຄົນມີຄວາມລະແວງສົງໃສໃນບັນຫານີ້.“
ສູນຕິດຕໍ່ຄ້າຂາຍຫລັກຊັບ
ຄຽງຂ້າງນັ້ນ,ເລື່ອງຕິດປະກາດໃບຫຸ້ນຂອງບັນດາວິສາຫະກິດຢູ່ຕະຫລາດຫລັກຊັບໃນໄລຍະຜ່ານມາ ບໍ່ທັນບັນລຸປະສິດທິຜົນ ຕາມຈຸດປະສົງຂອງເລື່ອງຕິດປະກາດເທື່ອ. ເລື່ອງບັນດາບໍລິສັດຕິດປະກາດໃບຫຸ້ນເປັນຈຳນວນຫລວງຫລາຍ ໃນຂະນະນຄຸນນະພາບຂອງບັນດາບໍລິສັດເຫຼົ່ານັ້ນບໍ່ທັນສູງ, ພິເສດແມ່ນຍັງມີຄວາມຈຳກັດດ້ານການບໍລິຫານບໍລິສັດ ແລະ ລັກສະນະເປີດເຜີຍ, ກະຈ່າງແຈ້ງ. ພິເສດ ໃນໄລຍະ 2010 - 2011, ມີບໍລິສັດຫລາຍແຫ່ງດັ່ງກ່າວດຳເນີນທຸລະກິດລຸບທຶນ, ສົ່ງຜົນສະທ້ອນເຖິງຄວາມດູດດື່ມຂອງບັນດາໃບຫຸ້ນ ແລະ ຄວາມໄວ້ເນື້ອເຊື່ອໃຈຂອງບັນດານັກລົງທຶນ. ຊ້ຳບໍ່ໜຳ, ມີບໍລິສັດຫລາຍແຫ່ງຂໍ້ຍົກເລີກການຕິດປະກາດ ເພື່ອກູ້ເອົາລາຄາໃບຫຸ້ນທີ່ພວມຫລຸດລົງຢ່າງວ່ອງໄວ. ຕາມບັນດາຜູ້ຊ່ຽວຊານແລ້ວ, ຢູ່ຕ່າງປະເທດເລື່ອງຍົກເລີກການຕິດປະກາດໃບຫຸ້ນ ແມ່ນສັນຍານບໍ່ດີ, ແຕ່ຢູ່ ຫວຽດນາມ ພັດຖືວ່າ ແມ່ນວິທີເພື່ອຮັກສາຄຸນຄ່າຂອງບໍລິສັດ ແລະ ໄດ້ຮັບການຮັບຮອງ. ທ່ານ ໂດ້ບ໋າວງອກ ຜູ້ຊ່ຽວຊານໄຈ້ແຍກ ສັງກັດບໍລິສັດຫຸ້ນສ່ວນ Habubank ໃຫ້ຮູ້ວ່າ:
“ຄວາມຈິງແລ້ວ ລາຄາໃບຫຸ້ນຂອງບໍລິສັດຫລາຍແຫ່ງຖືກຫລຸດລົງຕຳ່ກວ່າມູນຄ່າໃນປື້ມບັນຊີ. ມີວິສາຫະກິດຫລາຍແຫ່ງຖືວ່າ: ມູນຄ່າໃບຫຸ້ນ ພວມໄດ້ຮັບການຕິດຕໍ່ຄ້າຂາຍຢູ່ຕະຫລາດໃນປະຈຸບັນ ແມ່ນຕຳ່ກວ່າຫລາຍເມື່ອທຽບໃສ່ລາຄາທີ່ຈິງຂອງວິສາຫະກິດ, ແຕ່ທ່າໄດ້ປຽບຂອງວິສາຫະກິດພວມມີ ແລະ ມຸນຄ່າຊຶ່ງວິສາຫະກິດພວມສ້າງຂຶ້ນ. ດ້ວຍຄວາມຄິດຄືແນວນັ້ນ, ບັນດາວິສາຫະກິດ ພວມຮູ້ສຶກວ່າ ເລື່ອງຕິດປະກາດຢູ່ຕະຫລາດຫລັກຊັບໃນໄລຍະປະຈຸບັນ ແມ່ນວຽກງານທີ່ຫຍຸ້ງຍາກສຳລັບເຂົາເຈົ້າໃນຂະນະເຂົາເຈົ້າພວມດຳເນີນທຸລະກິດເປັນຢ່າງດີ.“
ຕໍ່ຫນ້າສະພາບການຊຸດໂຊມຂອງຕະຫລາດຫລັກຊັບນັ້ນ, ຄະນະກຳມະການຫລັກຊັບແຫ່ງລັດ ໄດ້ສ້າງແຜນຮ່າງສ້າງໂຄງປະກອບຕະຫລາດຫລັກຊັບຄືນໃຫມ່ ແລະ ຄາດວ່າ ຈະຜັນຂະຫຍາຍນັບແຕ່ວັນທີ 1/4/2012 ເປັນຕົ້ນໄປ. ເຖິງຢ່າງໃດກໍຕາມ ເພື່ອສາມາດຄຸ້ມຄອງຕະຫລາດຫລັກຊັບທີ່ມີຂອບຂະຫນາດຄືແນວນັ້ນ, ຜູ້ຊ່ຽວຊານຫລາຍທ່ານໄດ້ໃຫ້ຂໍ້ສັງເກດວ່າ ເພື່ອຮັບປະກັນວິວັດການສ້າງໂຄງປະກອບປະສົບຜົນສຳເລັດ, ຈຳເປັນຕ້ອງນຳໃຊ້ທັງມາດຕະການດ້ານເສດຖະກິດ ແລະ ບໍລິຫານ, ໃນນັ້ນຈຸດໃຈກາງແມ່ນມາດຕະການເສດຖະກິດ.ເຖິງວ່າ ແມ່ນວຽກງານຫຍຸ້ງຍາກກໍຕາມ ແຕ່ການສ້າງໂຄງປະກອບຕະຫລາດຫລັກຊັບ ແມ່ນຄວາມຕ້ອງການທີ່ຈຳເປັນ ເພື່ອຟື້ນຕົວຕະຫລາດທີ່ສຳຄັນນີ້, ຫນູນຊ່ວຍຢ່າງມີປະສິດທິຜົນໃຫ້ແກ່ການພັດທະນາຂອງປະເທດຊາດ ໃນສະພາບພື້ນຖານເສດຖະກິດມະຫາພາກໄດ້ຮັບຄວາມມູ້ງຫວັງວ່າ ຈະຟື້ນຟູໃນປີ 2012./.