ຫົວໜ້າຄະນະນັກເຈລະຈາ ອາເມລິກາ Glyn Davies
(ພາບ: internet)
ວັນທີ 23 ກຸມພາ, ຢູ່ປັກກິງແຫ່ງປະເທດຈີນ, ໄດ້ດຳເນີນການເຈລະຈາ 2 ຝ່າຍ ຂັ້ນຮອງລັດຖະມົນຕີການ ຕ່າງປະເທດຄັ້ງທຳອິດລະຫວ່າງ ອາເມລິກາ ແລະ ສາທາລະນະລັດປະຊາຊົນປະຊາທິປະໄຕເກົາຫຼີນັບຕັ້ງແຕ່ພາຍຫຼັງການນຳສາທາ ລະນະລັດປະຊາຊົນປະຊາທິປະໄຕເກົາຫຼີ Kim jong In ໄດ້ເຖິງແກ່ມໍລະນະກຳເມື່ອເດືອນທັນວາປີກາຍນີ້. ເຖິງວ່າໄດ້ມີການຄາດຄະນາວ່າ ຍາກທີ່ຈະບັນລຸບາດກ້າວບຸກທະລຸກໍຕາມ, ແຕ່ຕາມວົງການນັກສັງເກດການແລ້ວ, ການເຈລະຈາຈະສະທ້ອນໃຫ້ເຫັນທັດສະນະ, ເຈດຕະນາດີຂອງທັງອາເມລິກາ ແລະ ສາທາ ລະນະລັດປະຊາຊົນປະຊາທິປະໄຕເກົາຫຼີໃນການປັບປຸງການພົວພັນ 2 ຝ່າຍກໍຄືການສ້າງປະຖົມປັດໄຈເພື່ອຊຸກຍູ້ການເຊື່ອມຕໍ່ການເຈລະຈາ 6 ຝ່າຍ ກ່ຽວກັບບັນຫານິວເຄຼຍໃນແຫຼມເກົາຫຼີຄືນໃໝ່ໃນໄລຍະທີ່ຈະມາເຖິງ.
ການເຈລະຈາລະຫວ່າງ ອາເມລິກາ - ສາທາລະນະລັດປະຊາຊົນປະຊາທິປະໄຕເກົາຫຼີຄັ້ງນີ້, ເພື່ອແນໃສ່ຢັ້ງຢືນຂໍ້ຕົກລົງຂອງ 2 ຝ່າຍຄືນໃໝ່ ຊຶ່ງຕາມນັ້ນ, ອາເມລິກາສະເໜີໃຫ້ ສາທາລະນະລັດປະຊາຊົນປະຊາທິປະໄຕເກົາຫຼີຈົ່ງຢຸດຕິໂຄງການເສີມທາດ Uranium (UEP) ໂດຍມີການຕິດຕາມກວດກາຂອງອົງການພະລັງງານປະລະມານູສາກົນ( IAEA). ສ່ວນພຽງຢາງຈະໄດ້ຮັບການໜູນຊ່ວຍດ້ານສະບຽງອາຫານຈາກ ອາເມລິກາ. ນອກຈາກນັ້ນ, ນີ້ກໍແມ່ນໂອກາດເພື່ອເກັ້ຍກອມ ສາທາລະນະລັດປະຊາຊົນປະຊາທິປະໄຕເກົາຫຼີ ກັບຄືນສູ່ການເຈລະຈາ 6 ຝ່າຍ ກ່ຽວກັບບັນຫານິວເຄຼຍທີ່ໄດ້ຖືກໂຈະໄວ້ແຕ່ເດືອນເມສາ ປີ 2009. ຕາມວົງການນັກສັງເກດການແລ້ວ, ນີ້ລ້ວນແຕ່ແມ່ນບັນດາເນື້ອໃນທີ່ບໍ່ໃໝ່ອຽມເມື່ອທຽບໃສ່ບັນດາການເຈລະຈາຄັ້ງກອ່ນໆ. ແລະ ເບິ່ງຄືວ່າໝາກຜົນແຫ່ງການເຈລະຈາກໍ່ໄດ້ຮັບການທຳນາຍລ່ວງໜ້າຈາກທຸກຝ່າຍ. ແຕ່ນັກໄຈ້ແຍກຫຼາຍຄົນຖືວ່າ: ສິ່ງດັ່ງກ່າວແມ່ນບໍ່ສຳຄັນ, ແຕ່ສິ່ງທີ່ຕັ້ງໜ້າກ່ວາໝູ່ຂອງການເຈລະຈາຄັ້ງນີ້ອາດຈະແມ່ນວຽກງານທີ່ 2 ຝ່າຍໄດ້ດຳເນີນ ແລະ ກໍມີຄວາມໝາຍເຊັ່ນດຽວກັນກັບເລື່ອງການສົນທະນາໂດຍກົງໄດ້ຮັບການຮັກສາໄວ້. ບັນຫາເລິກເຊິ່ງກ່ວາ ນັ້ນແມ່ນຜ່ານການເຈລະຈາ, ຈະສາມາດສ່ອງແສງດ້ານຫຼັກໝັ້ນ, ນະໂຍບາຍຂອງອາເມລິກາ ແລະ ສາທາລະນະລັດປະຊາຊົນປະຊາທິປະໄຕເກົາຫຼີ ໃນໄລຍະມອບໂອນສິດອຳນາດຢູ່ພຽງຢາງ. ສິ່ງດັ່ງກ່າວໄດ້ຮັບການພິສູດໃຫ້ເຫັນຜ່ານເລື່ອງທີ່ວ່າ: ພາຍຫຼັງໄປຮອດປັກກິງເມື່ອວັນທີ 22 ກຸມພາ, ຫົວໜ້າຄະນະນັກເຈລະຈາ ອາເມລິກາ, ທູດພິເສດ Glyn Davis ໃຫ້ຮູ້ວ່າ: ທ່ານຢາກໄດ້ເຫັນບັນດາປະກົດການກ່ຽວກັບນະໂຍບາຍຂອງທ່ານ Kim jong Un ການນຳຄົນໃໝ່ຂອງ ສາທາລະນະລັດປະຊາຊົນປະຊາທິປະໄຕເກົ່າຫຼີ. ອາເມລິກາກໍຢາກເຫັນ ສາທາລະນະລັດປະຊາຊົນປະຊາທິປະໄຕເກົ່າຫຼີມີຄວາມກຽມພ້ອມເພື່ອປະຕິບັດບັນດາບາດກ້າວເດີນເພື່ອເຮັດໃຫ້ໂລກມີຄວາມອຸ່ນອຽນໃຈຫຼືບໍ່?. ໃນຂະນະນັ້ນ, ສຳລັບ ສາທາລະນະລັດປະຊາຊົນປະຊາທິປະໄຕເກົາຫຼີ, ການເຈລະຈາກໍແມ່ນກາລະໂອກາດເພື່ອກວດກາຄຳຢືນຢັນຂອງລັດຖະມົນຕີການຕ່າງປະເທດ ອາເມລິກາ ທ່ານນາງ HillaryClinton ເມື່ອກ່ອນນັ້ນ, ຂະນະທີ່ທ່ານນາງຖະແຫຼງ ວ່າ: ອາເມລິກາປາດທະໜາຈະປັບປຸງການພົວພັນກັບສາທາລະນະລັດປະຊາຊົນປະຊາທິປະໄຕເກົ່າຫຼີໂດຍພາຍໃຕ້ການຊີ້ນຳນຳພາຂອງທ່ານ Kim jong Un.
ບໍ່ສະເພາະແຕ່ ອາເມລິກາ ແລະ ສາທາລະນະລັດປະຊາຊົນປະຊາທິປະໄຕເກົາຫຼີຢາກຢັ່ງເບິ່ງທ່າທີຂອງກັນເທົ່ານັ້ນ, ຫາກຫຼາຍປະເທດຢູ່ອາຊີຕາເວັນອອກສ່ຽງເໜືອກໍຖືການເຈລະຈານີ້ແມ່ນກາລະໂອກາດເພື່ອທຳນາຍຄວາມສາມາດເປັນໄປຂອງການເຊື່ອມຕໍ່ ການເຈລະຈາ 6 ຝ່າຍ ກ່ຽວກັບບັນຫານິວເຄຼຍໃນແຫຼມເກົ່າຫຼີຄືນໃໝ່. ຍ້ອນເຫດນີ້ເອງ, ກ່ອນທີ່ດຳເນີນການເຈລະຈາ, ໂຄສົກກະຊວງການຕ່າງປະເທດຈີນໄດ້ຖະແຫຼງວ່າ: ປັກກິງປາດທະໜາວ່າການເຈລະຈາ 2 ຝ່າຍລະຫວ່າງ ອາເມລິກາ - ສາທາລະນະລັດປະຊາຊົນປະຊາທິປະໄຕເກົາຫຼີຈະບັນລຸໝາກຜົນອັນຕັ້ງໜ້າເພື່ອສ້າງປະຖົມປັດໄຈໃຫ້ແກ່ການຊຸກຍູ້ການເຊື່ອມຕໍ່ ການເຈລະຈາ 6 ຝ່າຍ ກ່ຽວກັບບັນຫານິວເຄຼຍໃນແຫຼມເກົາຫຼີຄືນໃໝ່. ໃນຂະນະນັ້ນ, ສເກົ່າຫຼີຢືນຢັນວ່າ: ນີ້ແມ່ນການເຈລະຈາທີ່ໜ້າລໍຄອຍເພາະມັນເປີດກາລະໂອກາດເຊື່ອມຕໍ່ວິວັດທະນາການເຈລະຈາ 6 ຝ່າຍຄືນໃໝ່ຊຶ່ງຖືກຢຸດສະງັກພາຍຫຼັງການເຖິງແກ່ມໍລະນະກຳຂອງທ່ານ Kim jong In. ສ່ວນທາງຝ່າຍຍີປຸ່ນ, ລັດຖະມົນຕີການຕ່າງປະເທດ Koichiro Gemba ໃຫ້ຮູ້ວ່າ : ຍີປຸ່ນຊົມເຊີຍເລື່ອງອາເມລິກາ ແລະ ສາທາລະນະລັດປະຊາຊົນປະຊາທິປະໄຕເກົາຫຼີ ດຳເນີນການເຈລະຈາ. ຍີ່ປຸ່ນຈະສືບຕໍ່ເພີ່ມທະວີການຮ່ວມມືກັບບັນດາຄູ່ຮ່ວມມືຄື: ອາເມລິກາ, ສເກົ່າຫຼີ....ໃນການແກ້ໄຂບັນຫານິວເຄຼຍໃນແຫຼມເກົາຫຼີ.
ເຖິງວ່າການເຈລະຈາ 2 ຝ່າຍຂັ້ນສູງລະຫວ່າງອາເມລິກາ - ສາທາ ລະນະລັດປະຊາຊົນປະຊາທິປະໄຕເກົາຫຼີຄັ້ງນີ້ໄດ້ຮັບການສັງເກດວ່າ ພຽງແຕ່ແມ່ນການຢັ່ງເບິ່ງທ່າທີຂອງບັນດາຝ່າຍເທົ່ານັ້ນ, ແຕ່ມັນໄດ້ສະແດງໃຫ້ເຫັນວ່າ 2 ຝ່າຍໄດ້ຫຍັບມໍ່ເຂົ້າກັນເພື່ອພ້ອມກັນແກ້ໄຂຄວາມບໍ່ລົງລອຍກັນທີ່ມີມາແຕ່ດົນນານ, ຫຼືເວົ້າແນວອື່ນວ່າ: ທ່າອຽງດຳເນີນການເຈລະຈາໄດ້ທົດແທນໃຫ້ທ່າອຽງສູ້ຢັນຕໍ່ກັນ.