(vovworld)- ການສຳຫລວດກວດການະໂຍບາຍບຸລິມະສິດຜູ້ມີຄຸນງາມຄວາມດີໃນທົ່ວປະເທດ ແມ່ນຫນຶ່ງໃນບັນດາຫນ້າທີ່ຈຸດສຸມຂອງວຽກງານຕອບບຸນແທນຄຸນໃນໄລຍະ2 ປີ ຄືປີ 2014- 2015. ວຽກງານນີ້ເພື່ອແນໃສ່ຕີລາຄາການປະຕິບັດນະໂຍບາຍຂອງພັກ ແລະ ລັດຕໍ່ ຜູ້ມີຄຸນງາມຄວາມດີ ຢ່າງຮອບດ້ານ, ສືບຕໍ່ສ້າງນະໂຍບາຍຕໍ່ບັນດາເປົ້າໝາຍນີ້ໃນໄລຍະຈະມາເຖິງໃຫ້ສົມບູນແບບ. ມາຮອດປະຈຸບັນ, ພາຍຫລັງຜັນຂະຫຍາຍມາເປັນເວລາເກືອບ 4 ເດືອນ, ການສຳຫລວດກວດການະໂຍບາຍຕໍ່ຜູ້ມີຄຸນງາມຄວາມດີ ພວມໄດ້ຮັບການປະຕິບັດຢ່າງຮີບເຮັ່ງໃນທຸກທ້ອງຖິ່ນ.
ການນຳບໍລິສັດໂທລະຄົມມະນາຄົມນະຄອນເຫ້ວມອບຂອງຂວັນ
ໃຫ້ແມ່ຫວຽດນາມວິລະຊົນ
ພາບ:hue.vnn.vn
|
ການສຳຫລວດກວດການະໂຍບາຍຕໍ່ຜູ້ມີຄຸນງາມຄວາມດີ ແມ່ນສຸມໃສ່ 7 ເປົ້າໝາຍຕົ້ນຕໍ, ໃນນັ້ນ ມີນັກຮົບເສຍສະຫລະຊີວິດເພື່ອຊາດ ແລະ ຄອບຄົວເຂົາເຈົ້າ, ແມ່ຫວຽດນາມ ວິລະຊົນ, ທະຫານເສຍອົງຄະ, ທະຫານເຈັບປ່ວຍ, ຜູ້ເຂົ້າຮ່ວມການຕໍ່ຕ້ານຖືກຕິດທາດພິດເຄມີ, ຜູ້ມີຄຸນງາມຄວາມດີໃນການປະຕິວັດ, ອະດີດຊາວຫນຸ່ມຕະລຸມບອນ. ນີ້ແມ່ນບັ້ນສຳຫລວດກວດກາທີ່ມີຂອບຂະຫນາດໃຫຍ່ສຸດນັບແຕ່ກ່ອນມາຮອດປະຈຸບັນ, ແລະ ຄາດວ່າ ຈະສຳຫລວດປະມານ 4,8 ລ້ານຄົນ. ວຽກງານນີ້ໄດ້ຮັບການປະຕິບັດຢ່າງຄົບຊຸດຢູ່ 11.000 ຕາແສງໃນທົ່ວປະເທດ.
ສືບທອດນະໂຍບາຍຕອບບຸນແທນຄຸນ
ຈຸດປະສົງຂອງບັ້ນສຳຫລວດກວດການະໂຍບາຍຕໍ່ຜູ້ມີຄຸນງາມຄວາມດີ ໄດ້ລະບຸໄວ້ໃນຄຳສັ່ງຂອງນາຍົກລັດຖະມົນຕີ ແນໃສ່ແກ້ໄຂບັນຫາທີ່ຍັງຄົງຄ້າງໃນການປະຕິບັດນະໂຍບາຍຕໍ່ຜູ້ມີຄຸນງາມຄວາມດີ, ສືບຕໍ່ສ້າງນະໂຍບາຍຕໍ່ເປົ້າໝາຍນີ້ໃຫ້ສົມບູນແບບ.
ຄວາມຈິງໃຫ້ເຫັນວ່າ:ໃນຊຸມປີຜ່ານມາ, ພັກ ແລະ ລັດໄດ້ປະຕິບັດນະໂຍບາຍຕໍ່ຜູ້ມີຄຸນງາມຄວາມດີກວ່າ 8 ລ້ານຄົນໃດ້ສຳເລັດເທ່ືອລະກ້າວ ເພື່ອໃຫ້ເໝາະສົມກັບສະພາບຕົວຈິງ, ເໝາະສົມກັບເງື່ອນໄຂທາງດ້ານເສດຖະກິດສັງຄົມຂອງປະເທດຊາດໃນແຕ່ລະໄລຍະ. ຕາມທ່ານນາງ ຟ້າມທິຫາຍຈ່ວຽນ, ລັດຖະມົນຕີກະຊວງແຮງງານ ທະຫານເສຍອົງຄະ ແລະ ສັງຄົມຫວຽດນາມແລ້ວ, ຜູ້ມີຄຸນງາມຄວາມດີ ນັບມື້ນັບໄດ້ຮັບຄວາມເອົາໃຈໃສ່ທາງດ້ານວັດຖຸ ແລະ ຈິດໃຈ ຈາກ ລັດ ແລະ ສັງຄົມກວ່າ. ນອກຈາກຊ່ວຍຫນູນບຸລິມະສິດ, ຜູ້ມີຄຸນງາມຄວາມດີ ຍັງໄດ້ຊົມໃຊ້ລະບອບເບິ່ງແຍງສຸຂະພາບ, ປັບປຸງເຮືອນຢູ່, ບຸລິມະສິດໃນການສອນວິຊາຊີບ, ສ້າງວຽກເຮັດງານທຳ.. ເຖິງຢ່າງໃດກໍຕາມ, ກະຊວງ, ຂະແຫນງການ, ທ້ອງຖິ່ນຈຳນວນຫນຶ່ງ, ການຊີ້ນຳນຳພາ, ການຈັດຕັ້ງປະຕິບັດນະໂຍບາຍຕໍ່ຜູ້ມີຄຸນງາມຄວາມດີຕໍ່ການປະຕິວັດບໍ່ທັນໄດ້ຮັບຄວາມເອົາໃຈໃສ່ຢ່າງເຖິງຖອງ, ການຈັດຕັ້ງປະຕິບັດນະໂຍບາຍບໍ່ທັນຖືກຕ້ອງ. ສະນັ້ນ ບັ້ນສຳຫລວດກວດການະໂຍບາຍຕໍ່ຜູ້ມີຄຸນງາມຄວາມດີ ຈະປະກອບສ່ວນຕີລາຄາຢ່າງຄົບຖ້ວນ, ປະກອບສ່ວນສ້າງນະໂຍບາຍຂອງພັກ ແລະ ລັດຕໍ່ຜູ້ມີຄຸນງາມຄວາມດີໃຫ້ສົມບູນແບບ ພ້ອມທັງເສີມຂະຫຍາຍມູນເຊື້ອອັນດີງາມຕອບບຸນແທນຄຸນຂອງຊາດ. ທ່ານນາງ ຮ່າທິລຽນ, ຮອງປະທານຄະນະກຳມະການສູນການແນວໂຮມປະເທດຊາດຫວຽດນາມ ຖືວ່າ:
“ເພື່ອຍົກສູງລະດັບຄອງຊີບໃຫ້ແກ່ຜູ້ມີຄຸນງາມຄວາມດີຕໍ່ປະເທດຊາດ ກ່ອນອື່ນໝົດ ຕ້ອງເຮັດໃຫ້ຜູ້ມີຄຸນງາມຄວາມດີໄດ້ຊົມໃຊ້ນະໂຍບາຍຢ່າງຄົບຖ້ວນ ແລະ ບັ້ນສຳຫລວດກວດກາຄັ້ງນີ້ ກໍແມ່ນຈຸດປະສົງເພື່ອໃຫ້ພວກເຮົາສືບຕໍ່ປະຕິບັດນະໂຍບາຍຂອງພັກ ແລະ ລັດ. ພ້ອມກັບການພັດທະນາຂອງປະເທດຊາດ ບັນດານະໂຍບາຍຂອງພັກ ແລະ ລັດ ຕໍ່ຜູ້ມີຄຸນງາມຄວາມດີ ໄດ້ຮັບຄວາມເອົາໃຈໃສ່ຫລາຍກວ່າ, ຊີວິດການເປັນຢູ່ຂອງເຂົາເຈົ້າກໍໄດ້ຮັບການປັບປຸງດີກວ່າ.”
ຜັນຂະຫຍາຍຢ່າງຄົບຊຸດ, ແຫນ້ນແຟ້ນຈາກສູນກາງລົງຮອດທ້ອງຖິ່ນ
ຢູ່ສູນກາງ, ແຕ່ເດືອນ 3/2014, ກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ, ແນວໂຮມປະເທດຊາດຫວຽດນາມ ໄດ້ຈັດຕັ້ງກອງປະຊຸມໂດຍກົງຜ່ານເຄືອຂ່າຍອິນເຕີແນັດ ທົ່ວປະເທດກ່ຽວກັບການຝືກອົບຮົມໂຄງການດັ່ງກ່າວ. ທ່ານນາງຮ່າທິລຽນ, ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າໄດ້ປະຕິບັດຢ່າງລະອຽດວິວັດການກະກຽມກ່ອນຜັນຂະຫຍາຍໃນທົ່ວປະເທດ. ເພ່ືອປະຕິບັດຫນ້າທີ່ນີ້, ຄະນະສຳຫລວດກວດກາທຸກຂັ້ນໄດ້ຮັບການສ້າງຕັ້ງຂຶ້ນ ແລະ ຢູ່ເຂດຊຸມຊົນ ກໍໄດ້ສ້າງຕັ້ງຫນ່ວຍສຳຫລວດກວດກາ, ໂດຍມີການເຂົ້າຮ່ວມຂອງສະມາຄົມນັກຮົບເກົ່າ, ສະຫະພັນແມ່ຍິງ, ຄະນະຊາວຫນຸ່ມ ເພ່ືອຮັບປະກັນລັກສະນະພາວະວິໄສ.”
ເພື່ອຜັນຂະຫຍາຍບັ້ນສຳຫລວດກວດກາ, ໃນ 2 ປີ ຄືປີ 2014-2015, ນະຄອນ ໂຮ່ຈິມີນ ຄາດຄະເນວ່າຈະສຳຫລວດກວດກາ ຕໍ່ເປົ້າໝາຍຜູ້ມີຄຸນງາມຄວາມດີ 62.000 ຄົນ. ນອກນັ້ນ ນະຄອນໂຮ່ຈິມີນ ຍັງສຳຫລວດກວດກາເບິ່ງແຍງດູແລແມ່ຫວຽດນາມ ວິລະຊົນ, ສຳຫລວດກວດກາເຮືອນແຫ່ງສາຍຈິດມິດໃຈ 16.000 ຫລັງເພື່ອສ້ອມແປງຫລືກໍ່ສ້າງໃຫມ່. ຢູ່ນະຄອນ ດາຫນັງ, ຄະນະກຳມະການປະຊາຊົນນະຄອນ ໄດ້ຕົກລົງສ້າງຕັ້ງຄະນະສຳຫລວດກວດກາ ໂດຍການນຳຄະນະກຳມະການປະຊາຊົນເປັນຫົວຫນ້າຄະນະ. ຄາດວ່າ ເດືອນ 8/2015, ຄະນະກຳມະການປະຊາຊົນນະຄອນ ດາຫນັງ ຈະລາຍງານໝາກຜົນການສຳຫລວດກວດກາຕໍ່ສູນກາງ. ຕາມກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມແລ້ວ, ປະຈຸບັນ ວຽກງານຜັນຂະຫຍາຍການສຳຫລວດກວດກາໄດ້ຮັບການປະຕິບັດຢ່າງເຂັ້ມງວດຈາກບັນດາທ້ອງຖິ່ນ, ຮັບປະກັນຂັ້ນຕອນ. ທ່ານ ເຢືອງມີງໂດ໋, ຮອງຫົວຫນ້າກົມຮັບຜິດຊອບວຽກງານຕໍ່ ຜູ້ມີຄຸນງາມຄວາມດີ, ສັງກັດກະຊວງແຮງງານທະຫານເສຍອົງຄະ ແລະ ສັງຄົມຫວຽດນາມ ໃຫ້ຮູ້ວ່າ:
“ມາຮອດປະຈຸບັນ, ບັນດາທ້ອງຖິ່ນ ລ້ວນແຕ່ໄດ້ຈັດຕັ້ງການສຳຫລດວກວດກາທົດລອງສຳເລັດຜົນ. 63 ແຂວງ, ນະຄອນທັງໝົດ ພວມດຳເນີນການສຳຫລວດກວດກາຢູ່ບັນດາຕາແສງທີ່ຍັງເຫລືອ ເພື່ອຮອດທ້າຍເດືອນ 7/2014 ຈະປະກາດໝາກຜົນໃນເບື້ອງຕົ້ນ.”
ຕາມລະດັບຄວາມໄວການປະຕິບັດໂຄງການ, ຮອດເດືອນ 8/2015, ຄະນະກຳມະການປະຊາຊົນບັນດາແຂວງ ໄດ້ສ່ົງບົດລາຍງານສຳຫລວດກວດກາເຖິງກະຊວງແຮງງານ, ທະຫານເສຍອົງຄະ ແລະ ສັງຄົມ ແລະ ຄະນະກຳມະການສູນກາງແນວໂຮມປະເທດຊາດຫວຽດນາມ. ເດືອນ 10/2015, ຜູ້ປະຈຳຄະນະກຳມະການສູນການແນວໂຮມປະເທດຊາດຫວຽດນາມ ແລະ ກະຊວງແຮງງານ, ທະຫາຍເສຍອົງຄະ ແລະ ສັງຄົມ ຈະໄດ້ລາຍງານຕໍ່ລັດຖະບານ ແລະ ສະພາແຫ່ງຊາດ ໝາກຜົນການສຳຫລວດກວດກາການປະຕິບັດນະໂຍບາຍບຸລິມະສິດຕໍ່ ຜູ້ມີຄຸນງາມຄວາມດີໃນທົ່ວປະເທດ.
ຜັນຂະຫຍາຍການສຳຫລວດກວດການະໂຍບາຍຕໍ່ ຜູ້ມີຄຸນງາມຄວາມດີ ທັງສະແດງໃຫ້ເຫັນຫນ້າທີ່ຂອງພັກ, ລັດ ຕໍ່ ຜູ້ມີຄຸນງາມຄວາມດີ ທັງສະແດງໃຫ້ເຫັນລັກສະນະດີເລີດໃນນະໂຍບາຍຮັບປະກັນຊີວິດສັງຄົມຂອງຫວຽດນາມ.