(vovworld)- ສ້າງອົງປະກອບການລົງທຶນຂອງລັດ ແລະ ລັດວິສາຫະກິດຄືນໃຫມ່ໄດ້ຮັບຖືວ່າ ແມ່ນ 2 ຂົງເຂດສຳຄັນຂອງແຜນຮ່າງສັງລວມສ້າງໂຄງປະກອບພື້ນຖານເສດຖະກິດຫວຽດນາມ ຄືນໃຫມ່. ນີ້ກໍແມ່ນ 2 ຫົວຂໍ້ຂອງກອງປະຊຸມສຳມະນາຊຶ່ງດຳເນີນໄປໃນວັນທີ 3/5 ຢູ່ ຮ່າໂນ້ຍ ໂດຍມີການເຂົ້າຮ່ວມຂອງນັກວິທະຍາສາດ ແລະ ຜູ້ຊ່ຽວຊານເສດຖະກິດກວ່າ 100 ທ່ານ.
ໃນວາລະປຶກສາຫາລືຂອງຄະນະປະຈຳສະພາແຫ່ງຊາດກ່ຽວກັບແຜນຮ່າງ
ສ້າງໂຄງປະກອບພື້ນຖານເສດຖະກິດຄືນໃຫມ່.
ພາບ:vietnamexpress.vn
|
ການລົງທຶນຂອງລັດ ຢູ່ ຫວຽດນາມ ແມ່ນອີງໃສ່ 3 ແຫລ່ງທຶນຕົ້ນຕໍຄື: ແຫລ່ງທຶນຈາກງົບປະມານແຫ່ງລັດ, ທຶນກູ້ຢືມຈາກພັນທະບັດຂອງລັດຖະບານ ແລະ ທຶນກູ້ຢືມຈາກຕ່າງປະເທດ. ຍ້ອນການລົງທຶນຂອງລັດບໍ່ມີຈຸດສຸມ, ໃຫ້ປະສິດທິຜົນຕຳ່ໃນໄລຍະຜ່ານມາ ໄດ້ເຮັດໃຫ້ບ້ວງຫນິ້ສິນຂອງລັດເພີ່ມຂຶ້ນຢ່າງວ່ອງໄວໃນຊຸມປີມໍ່ໆມານີ້.ໄລ່ມາຮອດປີ 2010, ຫນິ້ສິນຂອງລັດ ຫວຽດນາມ ກວມກວ່າ 56,7% GDP. ຕາມທ່ານ Vu Dinh Anh ຜູ້ຊ່ຽວຊານເສດຖະກິດ ແລ້ວ, ໃນໄລຍະມໍ່ໆມານີ້ ຫນິ້ສິນຂອງລັດເພີ່ມຂຶ້ນ ໃນຂະນະທີ່ການລົງທຶນຂອງລັດພັດມີທ່າອ່ຽງຫລຸດລົງ. ສາຍເຫດ ແມ່ນ ຍ້ອນມີຫລາຍໂຄງການລົງທຶນຂອງລັດບໍ່ມີຄວາມສາມາດຊຳລະຫນິ້ສິນລວມທັງຕົ້ນທຶນ ແລະ ດອກເບ້ຍ ສະນັ້ນ, ຈຳນວນເງິນເພື່ອຊຳລະບ້ວງຕົ້ນທຶນແມ່ນອີງໃສ່ແຫ່ລງງົບປະມານ, ເຮັດໃຫ້ເກິດຂາດດຸນງົບປະມານ ແຕ່ຈຳເປັນຕ້ອງກູ້ຢືມຕື່ມເພື່ອລົງທຶນ. ທ່ານ Vu Dinh Anh ຖືວ່າ: ຂອບຂະຫນາດຫນິ້ສິນຂອງລັດ ແລະ ຫນິ້ສິນກູ້ຢືມຈາກຕ່າງປະເທດເພີ່ມຂຶ້ນສູງ ຈະກໍຄວາມສ່ຽງດ້ານການເງິນ. ສະນັ້ນ ສ້າງອົງປະກອບການລົງທຶນຂອງລັດ ຕ້ອງປະຕິບັດຕາມທິດຍົກສູງປະສິດທິຜົນເງິນລົງທຶນ ແລະ ບໍ່ສົ່ງຜົນສະທ້ອນເຖິງຫນິ້ສິນຂອງລັດ.
“ຂອບຂະຫນາດການລົງທຶນຂອງລັດໃນໄລຍະ 5 -10 ປີຈະມາເຖິງ ແມ່ນ ເພີ່ມຂອບຂະຫນາດການເຕີບໂຕເສດຖະກິດເປັນຫລັກ, ຜ່ານນັ້ນ ຍັງຄົງຮັກສາລາຍຮັບງົບປະມານຢູ່ອັດຕາຕຳ່ກວ່າ. ໃນສະພາບທີ່ແຫລ່ງກຳລັງຈຳກັດຢູ່ ແມ່ນຕ້ອງສຸມໃສ່ເຂົ້າໃນບັນດາໂຄງການມີປະສິດທິຜົນກວ່າໝູ່. ບັນດາໂຄງການເຫລົ່ານັ້ນ ບໍ່ພຽງແຕ່ສຸມໃສ່ໃຫ້ແກ່ພື້ນຖານໂຄງລ່າງເທົ່ານັ້ນ ຫາກຍັງຕ້ອງພິຈາລະນາປະສິດທິຜົນດ້ານເສດຖະກິດການເງິນອີກດ້ວຍ ເພື່ອຫລຸດຜ່ອນຄວາມສ່ຽງໃຫ້ແກ່ຫນິ້ສິນຂອງລັດ.”
ເພື່ອໃຫ້ການສ້າງອົງປະກອບການລົງທຶນຂອງລັດໃນໄລຍະປະຈຸບັນບັນລຸປະສິດທິຜົນ, ຕາມຜູ້ຊ່ຽວຊານເສດຖະກິດ ຫວຽດນາມ ຫລາຍທ່ານແລ້ວ ຄວນກວດກາການລົງທຶນຂອງລັດຢ່າງແຫນ້ນແຟ້ນ. ດອກເຕີ Tran Dinh Thien ຫົວຫນ້າສະຖາບັນເສດຖະກິດ ຫວຽດນາມ ຖືວ່າ:
“ຫລຸດຜ່ອນການລົງທຶນຕ້ອງຄິດໄລ່ຊັ່ງຊາເຖິງບັນຫາກ່ຽວກັບປະສິດທິຜົນ. ພວກເຮົາບໍ່ຄວນປຶກສາຫາລືເຖິງຈຳນວນໂຄງການ ຫາກເອົາໃຈໃສ່ເຖິງປະສິດທິຜົນ. ທາງລັດໄດ້ລົງທຶນຫລາຍໂຄງການເກີນໄປ ບໍ່ສາມາດຄຸ້ມຄອງໄດ້. ອັນໃດກໍຈຳເປັນ ແຕ່ພວກເຮົາຕ້ອງລົງທຶນຢ່າງມີຈຸດສຸມ.
ກ່ຽວກັບການສ້າງໂຄງປະກອບລັດວິສາຫະກິດຄືນໃຫມ່, ຕາມບັນດາຜູ້ຊ່ຽວຊານແລ້ວ, ລັດວິສາຫະກິດຕ້ອງແມ່ນກະດູກສັນຫລັງຂອງພື້ນຖານເສດຖະກິດ, ແຕ່ເຖິງຢ່າງໃດກໍຕາມ ໃນໄລຍະຍາວຜ່ານມາ ສະພາບການລັດວິສາຫະກິດດຳເນີນທຸລະກິດນັ້ນ ບັນລຸປະສິດທິຜົນບໍ່ສົມກັບຂອບຂະຫນາດ. ກຸ່ມວິສາຫະກິດນີ້ ກວມເກືອບ 50% ແຫລ່ງສິນເຊື່ອຂອງພື້ນຖານເສດຖະກິດ ແຕ່ປະສິດທິຜົນດ້ານເສດຖະກິດບໍ່ໄດ້ເທົ່າທີ່ຄວນ. ເມື່ອເຕຶ້ອງເຖິງບັນຫານີ້, ທ່ານ Truong Dinh Tuyen ອະດີດລັດຖະມົນຕີກະຊວງການຄ້າ ຫວຽດນາມ ຖືວ່າ: ຕ້ອງກຳນົດໃຫ້ໄດ້ບັນດາອາຊີບ ທີ່ຈຳເປັນຕ້ອງມີການເຂົ້າຮ່ວມຂອງລັດວິສາຫະກິດ ແລະ ອັດຕາສ່ວນເຂົ້າຮ່ວມຕ້ອງລະອຽດ. ພ້ອມກັບການຍູ້ແຮງການຫັນລັດວິສາຫະກິດເປັນຫຸ້ນສ່ວນ ພວກເຮົາຕ້ອງຈັດວາງລັດວິສາຫະກິດເຂົ້າໃນສະພາບແວດລ້ອມແຫ່ງການແກ້ງແຍ້ງຢ່າງສະເຫມີກັບວິສາຫະກິດຂຶ້ນກັບພາກສ່ວນເສດຖະກິດອື່ນ ແລະ ການປ່ຽນໃຫມ່ວິທີບໍລິຫານລັດວິສາຫະກິດ. ຕາມທ່ານ Tran Xuan Gia ອະດີດລັດຖະມົນຕີກະຊວງແຜນການ ແລະ ການລົງທຶນ ແລ້ວ, ລັດວິສາຫະກິດພຽງແຕ່ມີຫນ້າໃນບັນດາຂົງເຂດກ່ຽວຂ້ອງເຖິງການປ້ອງກັນຊາດ, ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ, ສ່ວນທີ່ຍັງເຫລືອປະໃຫ້ພາກເອກະຊົນຮັບຜິດຊອບ, ທາງລັດພຽງແຕ່ຄຸ້ມຄອງ ແລະ ເກັບອາກອນເທົ່ານັ້ນ. ທ່ານ Le Dang Doanh ຜູ້ຊ່ຽວຊານເສດຖະກິດຍົກຄຳເຫັນວ່າ:
“ຂະແຫນງໃດຕ້ອງລົງທຶນເຂົ້າຂະແຫນງນັ້ນ ຕົວຢ່າງ: ໄຟຟ້າ ພຽງແຕ່ລົງທຶນໃນໂຄງການໄຟຟ້າເທົ່ານັ້ນ. ປະຈຸບັນ ຈຳນວນເງິນລົງທຶນນອກຂະແຫນງແມ່ນ 20.000 ຕຶ້ື້ດົງ ແລະ ຕ້ອງເກັບທຶນຄືນຕາມຄຳຮຽກຮ້ອງຂອງນາຍົກລັດຖະມົນຕີ. ຂ້າພະເຈົ້າຄິດວ່າ ໃນໄລຍະຈະມາເຖິງ, ລັດວິສາຫະກິດຈະເຄື່ອນໄຫວເປັນຈຸດສຸມກວ່າ, ມີຈຸດປະສົງກວ່າ ແລະສຳເລັດຫນ້າທີ່ຫລັກແຫລ່ງທີ່ໄດ້ຮັບການມອບໝາຍ.”
ບັນດາຜູ້ຊ່ຽວຊານເສດຖະກິດກໍກ່າວເຕືອນວ່າ ວິສາຫະກິດແຕ່ລະແຫ່ງ ຄວນມີບາດກ້າວປ່ຽນແປງວິທີບໍລິຫານເທື່ອລະກ້າວ, ເພີ່ມທະວີຄຸນນະພາບວຽກງານບໍລິຫານພາຍໃນ, ຂໍ້ມູນຂ່າວສານຕ້ອງເປີດເຜີຍ ແລະ ປະຕິບັດການກວດສອບ ເອກະລາດ, ລົງທຶນໃຫ້ແກ່ການພັດທະນາເຄື່ອງໝາຍການຄ້າ ແລະ ເຕັກໂນໂລຊີໃຫມ່ຢ່າງເໝາະສົມ. ເຮັດໄດ້ຄືແນວນັ້ນ ເລື່ອງສ້າງໂຄງປະກອບເສດຖະກິດຄືນໃຫມ່ຈຶ່ງເສີມຂະຫຍາຍປະສິດທິຜົນໄດ້.
ນັກຂ່າວ Thuy Van