ດັ່ງທີ່ໄດ້ໃຫ້ຂ່າວໄປແລ້ວ, ຕອນບ່າຍວັນທີ 12/1, ຢູ່ຮ່າໂນ້ຍ, ກອງປະຊຸມຄັ້ງທີ 10 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ່ 11 ໄດ້ອັດລົງແລ້ວ, ພາຍຫຼັງດຳເນີນມາເປັນເວລາ 8 ວັນ. ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ມີບົດກ່າວປາໄສທີ່ສຳຄັນ ຊຶ່ງໄດ້ເນັ້ນໜັກເຖິງບັນດາບັນຫາໂດຍສັງເຂບກ່ຽວກັບເນື້ອໃນຂອງກອງປະຊຸມ.
ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ ກ່າວຄຳເຫັນທີ່ວາລະອັດກອງປະຊຸມຄັ້ງທີ 10 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ່ 11 |
ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ ຢືນຢັນວ່າ ບັນດາກຳມະການສູນກາງພັກທີ່ເຂົ້າຮ່ວມກອງປະຊຸມ ໄດ້ສະແດງໃຫ່ເຫັນຈິດໃຈຮັບຜິດຊອບຊອບສູງ, ປຶກສາຫາລືຢ່າງປະຊາທິປະໄຕ, ກົງໄປກົງມາ, ປະກອບຄຳຄິດຄຳເຫັນດ້ວຍການສຸມສະຕິປັນຍາເຂົ້າໃນບັນດາບົດລາຍງານ, ແຜນຮ່າງ ແລະ ເຮັດສຳເລັດຫຼາຍວຽກງານອື່ນທີ່ສຳຄັນ. ກົມການເມືອງໄດ້ຮັບເອົາຄຳເຫັນປະກອບສ່ວນ ແລະ ອະພິປາຍບັນດາບັນຫາທີ່ຍັງມີຄຳເຫັນແຕກຕ່າງກັນ; ຄະນະບໍລິຫານງານສູນກາງພັກກອມມູນິດຫວຽດນາມໄດ້ເຫັນດີຢ່າງສູງຮັບຮອງເອົາມະຕິຂອງກອງປະຊຸມ.
ບັນດາຮ່າງເອກະສານກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມສືບຕໍ່ສ້າງໃຫ້ສົມບູນແບບ.
ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ ໃຫ້ຮູ້ວ່າ : ສູນກາງພັກໄດ້ເຫັນດີໂດຍພື້ນຖານກ່ຽວກັບບັນດາເນື້ອໃນ, ບັນຫາຊຶ່ງຖືກເຕື້ອງເຖິງໃນບັນດາຮ່າງບົດລາຍງານ, ໃນສະເໜີ ແລະ ຖືວ່າ ບັນດາຮ່າງເອກະສານໄດ້ຮັບການຄັດເລືອກ, ສາມາດສ່ອງແສງໄດ້ເຖິງໝາກຜົນສະຫຼຸບບາງບັນຫາທິດສະດີ - ພຶດຕິກຳຜ່ານ 30 ປີແຫ່ງການປ່ຽນແປງໃໝ່ ແລະ ສຳຫຼວດກວດຄືນ, ຕີລາຄາໄລຍະ 5 ປີແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ, ຕິດແທດກັບຕົວຈິງ ແລະ ມີການຄົ້ນພົບ, ຂໍ້ສະເໜີໃໝ່ຫຼາຍຢ່າງ. ທ່ານເລຂາທິການ ຫງວຽນຟູ້ຈ້ອງ ຊີ້ແຈ້ງວ່າ :
“ສູນກາງພັກຕ້ອງເຫັນໄດ້ເຖິງຄວາມໝາຍ, ຄວາມສຳຄັນທັງໝົດຂອງກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ຊຶ່ງຖືດຳເນີນໃນຈຸດເວລາທີ່ທົ່ວພັກ, ທົ່ວປວງຊົນ, ທົ່ວກອງທັບຫວຽດນາມປະຕິບັດບັນດາແຜນນະໂຍບາຍ, ຈຸດໝາຍ ແລະ ໜ້າທີ່ຊຶ່ງໄດ້ກຳນົດໃນມະຕິກອງປະຊຸມໃຫຍ່ຄັ້ງທີ 11 ຂອງພັກຢ່າງມີໄຊ; ໂດຍຜ່ານ 30 ປີແຫ່ງການປະຕິບັດກິດຈະການປ່ຽນແປງໃໝ່, 5 ປີແຫ່ງການປະຕິບັດໂຄງການກໍ່ສ້າງປະເທດຊາດໃນໄລຍະຂ້າມຜ່ານກ້າວຂຶ້ນສັງຄົມນິຍົມ ແລະ ຍຸດທະສາດພັດທະນາເສດຖະກິດ-ສັງຄົມ 2011-2020, 2 ປີແຫ່ງການປະຕິບັດລັດຖະທຳມະນູນປີ 2013. ສະພາບການນັ້ນ, ໄດ້ຮຽກຮ້ອງໃຫ້ຫວຽດນາມຕ້ອງສືບຕໍ່ເພີ່ມທະວີວຽກງານກໍ່ສ້າງພັກ ແລະ ລະບົບການເມືອງໃຫ້ດີກ່ວາອີກ, ເສີມຂະຫຍາຍກຳລັງແຮງທົ່ວທັງຊາດ, ຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ ແລະ ຄົບຊຸດ, ປົກປັກຮັກສາປະເທດຊາດສັງຄົມນິຍົມໃຫ້ໝັ້ນຄົງໜັກແໜ້ນ, ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ, ສ້າງພື້ນຖານເພື່ອກາຍເປັນປະເທດອຸດສາຫະກຳຕາມທິດທັນສະໄໝໂດຍໄວ ”
ທ່ານເລຂາທິການ ຫງວຽນຟູ້ຈ້ອງ ຍັງຖືວ່າ ຄວນຕີລາຄາໝາກຜົນຂອງ 30 ປີແຫ່ງການປ່ຽນແປງໃໝ່(1986-2016) ແລະ 5 ປີແຫ່ງການປະຕິບັດມະຕິກອງປະຊຸມໃໝ່ຄັ້ງທີ 11 ຂອງພັກ (2011-2015) ດ້ວຍຈິດໃຈພາວະວິໄສເຫັນແຈ້ງວ່າ ໄລຍະ30 ປີແຫ່ງການປ່ຽນແປງໃໝ່ ແມ່ນໄລຍະປະຫວັດສາດທີ່ສຳຄັນໃນວິວັດທະນາການພັດທະນາພັດທະນາຂອງປະເທດຊາດ, ເປັນຂີດໝາຍການເຕີບໃຫຍ່ໃນທຸກດ້ານຂອງພັກ, ລັດ ແລະ ປະຊາຊົນຫວຽດນາມ. ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ ເນັ້ນໜັກວ່າ :
“ ບົນພື້ນຖານການຕີລາຄາໂດຍພາວະວິໄສກ່ຽວກັບສະພາບການ ແລະ ບັນດາໝາກຜົນທີ່ບັນລຸໄດ້ໃນໄລຍະທີ່ຜ່ານມາ, ຄາດຄະເນຢ່າງຖືກຕ້ອງກ່ຽວກັບສະພາບການຂອງປະເທດຊາດ ແລະ ໂລກໃນໄລຍະທີ່ຈະມາເຖິງ, ພວກເຮົາຈະມີເງື່ອນໄຂກຳນົດຢ່າງຖືກຕ້ອງກ່ຽວກັບທິດທາງ, ຈຸດໝາຍ, ໜ້າທີ່ພັດທະນາປະເທດຊາດໃນໄລຍະ 2016-2020, ນັບທັງຈຸດໝາຍສັງລວມ ແລະ ບັນດາໜ້າທີ່ລະອຽດ. ສືບຕໍ່ມີບັນດາແຜນນະໂຍບາຍ, ວິທີການແກ້ໄຂຍູ້ແຮງການຫັນເປັນອຸດສາຫະກຳ ແລະ ທັນສະໄໝ, ປ່ຽນໃໝ່ຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃໝ່; ສ້າງລະບອບລະບຽບການໃຫ້ສົມບູນແບບ, ພັດທະນາເສດຖະກິດການຕະຫຼາດຕາມກຳນົດທິດສັງຄົມນິຍົມ; ພັດທະນາວັດທະນະທຳ, ກໍ່ສ້າງມະນຸດ; ປ່ຽນໃໝ່ການຄຸ້ມຄອງພັດທະນາສັງຄົມ, ປະຕິບັດຄວາມກ້າວໜ້າ, ຍຸຕິທຳທາງສັງຄົມ, ເພີ່ມທະວີການປ້ອງກັນຊາດ ປ້ອງກັນຄວາມສະຫງົບ, ປົກປັກຮັກສາປະເທດຊາດສັງຄົມນິຍົມໃຫ້ໝັ້ນຄົງໜັກແໜ້ນ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ເສີມຂະຫຍາຍປະຊາທິປະໄຕ, ສ້າງລັດແຫ່ງອຳນາດນິຕິບັນຍັດສັງຄົມນິຍົມໃຫ້ສົມບູນແບບ; ກໍ່ສ້າງພັກໃຫ້ນັບມື້ນັບໂປ່ງໃສ, ໝັ້ນຄົງເຂັ້ມແຂງ ”
ສ້າງການຫັນປ່ຽນຢ່າງຈະແຈ້ງໃນການຫຼຸດຜ່ອນພະນັກງານບັນຈຸ, ປະຕິບັດແຜນກຳນົດສັງລວມສື່ມວນຊົນໂດຍໄວ
ຕາມທ່ານເລຂາທິການໃຫຍ່ ຫງວຽນຟູ້ຈ້ອງແລ້ວ, ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ປຶກສາຫາລືຢ່າງຟົດຟື້ນ, ປະກອບຄຳເຫັນຫຼາຍຂໍ້ທີ່ສຳຄັນກ່ຽວກັບແຜນຮ່າງຫຼຸດຜ່ອນພະນັກງານບັນຈຸ ແລະ ສ້າງໂຄງປະກອບຖັນແຖວພະນັກງານ, ລັດຖະກອນຄືນໃໝ່. ສູນກາງພັກ ໄດ້ເນັ້ນໜັກວ່າ ຄວນສ້າງການຫັນປ່ຽນຢ່າງຈະແຈ້ງໃນການຫຼຸດຜ່ອນພະນັກງານບັນຈຸ ແລະ ສ້າງໂຄງປະກອບຖັນແຖວພະນັກງານ, ລັດຖະກອນຄືນໃໝ່; ດຶງດູດບັນດາຜູ້ທີ່ມີຄຸນສົມບັດ, ມີຄວາມເກັ່ງກ້າສາມາດເຂົ້າເຮັດວຽກໃນບັນດາອົງການສຳນັກງານ ແລະ ຫົວໜ່ວຍຕ່າງໆຂອງພັກ ແລະ ລັດ ແລະ ບັນດາອົງການການເມືອງ-ສັງຄົມ. ມີກົນໄກ, ນະໂຍບາຍບຸກທະລຸເພື່ອປ່ຽນແປງໃໝ່, ຍົກສູງຄຸນນະພາບການຈັດຕັ້ງ ແລະ ການເຄື່ອນໄຫວຂອງບັນດາຫົວໜ່ວຍພາລະກິດພາກບໍລິການສ່ວນລວມ. ຜັນຂະຫຍາຍການປະຕິຮູບດ້ານບໍລິຫານ, ປະຕິຮູບລະບອບລັດຖະການ, ລັດຖະກອນຢ່າງຄົບຊຸດ, ໂດຍສະເພາະແມ່ນກຳນົດຖານະຕຳແໜ່ງ, ວຽກເຮັດງານທຳ, ສ້າງໂຄງປະກອບລັດຖະກອນໃຫ້ເໝາະສົມ, ດ້ວຍຈຳນວນທີ່ແທດເໝາະກັບຕົວຈິງ.
ທ່ານເລຂາທິການໃຫຍ່ ຫງວຽນຟູ້ຈ້ອງ ຍັງໃຫ້ຮູ້ວ່າ : ກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ ໄດ້ຢືນຢັນຄວາມຈຳເປັນຕ້ອງປະກາດໃຊ້ໂດຍໄວ ແລະ ຈັດຕັ້ງປະຕິບັດແຜນກຳນົດພັດທະນາ ແລະ ຄຸ້ມຄອງສື່ມວນຊົນເຖິງປີ 2025 ແນໃສ່ພັດທະນາສື່ມວນຊົນຕາມທິດປະຕິວັດ, ເປັນອາຊີບ ມີປະສິດທິຜົນເພື່ອສ້າງຄວາມເປັນຈິດໜຶ່ງໃຈດຽວໃນສັງຄົມ.